በቱርኩ አካባቢያዊ ምርጫ የኤርዶጋን ፓርቲ ፈተና ገጥሞታል

በፕሬዚዳንት ረሲብ ጣይብ ኤርዶጋን የሚመራው ገዥው ፓርቲ በመዲናዋ አንካራ በቱርክ የአካባቢያዊ ምርጫ መሸነፍ ተሰምቷል:: እሁድ ዕለት በመዲናዋ በተካሄደው ምርጫ የኤርዶጋኑ የፍትህና ዴሞክራሲ ፓርቲ በተቃዋሚው የህዝቦች ሪፐብሊካን ፓርቲ ብልጫ የተወሰደበት መሆኑን አናዶል የተሰኘው የዜና ወኪል ዘግቧል ::

እስከ አለፈው እሁድ ድረስ በነበረው የቆጠራ ውጤት የተቃዋሚው ፓርቲ የከንቲባ እጩ መንሱር ያቫስ 51 በመቶ ድምጽ በማግኘት በአንካራ ከተማ የገዥውን ፓርቲ እጩ  ማሀመት ኦዝስኪን በበላይነት መምራታቸውን አረጋግጠዋል:: ገዥው ፓርቲም 47 ነጥብ 2 በመቶ ድምጽ ማግኘት ችሎ እንደነበር ታውቋል::

በዚህም የኤርዶጋን ፓርቲ በ25 ዓመታት ጊዜ ውስጥ ለመጀመሪያ ጊዜ በመዲናዪቱ መሸነፉ ነው የተነገረው:: በኢኮኖሚ ማዕከልነቷ በምትታወቀው ኢስታንቡልም የተቃዋሚው ፓርቲ እየመራ መሆኑ እየተነገረ ሲሆን፣ ገዥው ፓርቲ ግን በአንዳንድ የከተማዪቱ አካባቢዎች ምርጫው ይደገም ሲል እየከሰሰ ነው ተብሏል::

በትልቅነቷ በሦስተኛ ደረጃ ላይ በምትገኘው በምዕራባዊቷ ከተማ ኢዝሚር ደግሞ ገና ከጅምሩ ሁለቱ ፓርቲዎች አንገት ለአንገት የተናነቁ ቢመስልም በመጨረሻ የተቃዋሚ ፓርቲው እጩ ሙስጠፋ ቱንሰየር 58 በመቶ ድምጽ በማግኘት የገዥውን ፓርቲ እጩ ኒሃት ዘይባኪን አሸንፏል:: የኤርዶጋኑ እጩም 38 ነጥብ 5 በመቶ ድምፅ በማግኘት መረታቱን አመልክቷል::

ገዥው ፓርቲ በምርጫው ያገኘው ውጤት ለፕሬዚዳንት ኤርዶጋን እንደ ትልቅ ሽንፈት ይቆጠራል:: ፕሬዚዳንቱ ግን መሸነፍ በዴሞክራሲያዊ ሂደት ውስጥ ያለና የሚጠበቅ ነው ብለዋል:: በቱርክ የተጠናከረ ኢኮኖሚያዊ ማሻሻያዎችን በማድረግ እንቀጥላለን ያሉት:: ያለምንም ማቅማማት የነጻ ገበያ ሥርዓት ተግባራዊ ይደረጋል ብለዋል::

ፕሬዚዳንቱ የአገሪቱን ፖለቲካ ላለፉት 16 ዓመታት የተቆጣጠሩት ሲሆን፣ በእነዚህ ዓመታት ቱርክ ያስመዘገበቻቸው ፈጣን የኢኮኖሚ እድገት ሕዝባዊ ድጋፍ እንዳስገኘላቸው ሁሉ ባለፉት ዓመታት ያጋጠመው የኢኮኖሚ ቀውስ ግን ተቀባይነታቸውን እንደቀነሰባቸው ይነገራል::

በቱርክ የዋጋ ግሽበት 20 በመቶ እና የአገሪቱ ማዕከላዊ ባንክ የወለድ ምጣኔ 24 በመቶ መድረሱ ያስከተለውን አጠቃላይ የኢኮኖሚ አለመረጋጋት ተቃዋሚ ፓርቲዎች በተገቢው ለቅስቀሳ ተጠቅመውበታል:: በተመሳሳይም ከፓርቲ ዓርማ ይልቅ የቱርክን ብሔራዊ ሰንደቅ ዓላማ በምረጡኝ ዘመቻ ሙሉ በሙሉ መጠቀማቸው ተመራጭ አድርጓቸዋል::

አልጀዚራ የቱርክ የፖለቲካ ተንታኙን ሙራት የኪን ጠቅሶ እንደዘገበው እንበልና ኤርዶጋን ገዥውን ፓርቲ በሕይወት በመምራት ላይ እያሉ በአካባቢያዊ ምርጫው ተቃዋሚ ፓርቲዎች ልክ እንደ አንካራ ሁሉ በኢስታንቡልም ሥልጣን አሳጧቸው ማለት ያለምንም ጥርጥር በአምስቱ ትላልቅ የቱርክ ከተሞች ሥልጣኑ ከእጃቸው እያዩት ያመልጣል ማለት ነው ሲል አስቀድሞ ትንበያውን አስቀምጧል:: ውጤቱ ያሳየው ይህንኑ ሀቅ ነው፤ ምክንያቱም ገዥው ፓርቲ አብላጫ ድምጽ ማግኘት ባለመቻሉ ከተቃዋሚ ፓርቲዎች ጋር ጥምረት ይፈጥር ይሆናል ተብሎ ይገመታል::

አዲስ ዘመን መጋቢት 26/2011

ሙሐመድ ሁሴን