መልካም አጋጣሚውን ለሰላም ጠንቆች አሳልፈን መስጠት የለብንም

ለቀኑ ውሎአቸው ሰላም የሚመኙ ሰዎች ጠዋት ከእንቅልፋቸው ተነስተው «በሰላም አውለኝ»፤ ማታ ሲተኙም «በሰላም ያዋልከኝ በሰላም አሳድረኝ» በማለት ፈጣሪያቸውን ይማፀናሉ፡፡ይህንን የሚያደርጉትም የሰላምን ትልቅነት በመረዳታቸው ነው፡፡ ነገር ግን ብዙዎች ስለ ሰላም ያስቡ እንጂ ጥቂቶች ደግሞ ከሰላም ናፋቂዎች በተቃራኒ የሚቆሙ አሉ፡፡

በእነዚህ አይነት የሰላም ፀር የሆኑ ሰዎች የተነሳ ሕዝቦች ሰላምና መረጋጋት ሲርቃቸው ይታያል፡፡ ጦርነት፣ የእርስ በርስ ግጭት፣ ሽብርተኝነትና ወንጀል ተስፋፍቶ ኑሮአቸው ሲቃወስ ይስተዋላል፡፡ በዓለም ላይ ካሉ ሰላም የናፈቃቸው አገሮችን ዋቢ ያደረገው እኤአ የ2017 ዓለም አቀፍ የሰላማዊነት መለኪያ (Global Peace Index) መረጃ እንደሚያሳየው በአለም አቀፍ ደረጃ በሰላም እጦት ምክንያት ከሰው ሕይወት መጥፋት ባሻገር በየዓመቱ 13 ነጥብ 6 ትሪሊየን ዶላር ኪሳራ እየደረሰ ነው፡፡

መረጋጋት በናፈቃቸው አገራት ውስጥ በሚካሄደው የእርስ በርስ ጦርነት ምክንያት ከተሞቻቸው ወደ ፍርስራሽነት እየተቀየሩ የአሸባሪ ቡድኖች መናኸሪያ ሆነዋል፡፡ የሰላም መናጋት ሞት፣ አካላዊ ጥቃት፣ መፈናቀል፣ ስደት፣ ወረርሽኝና ረሃብን ያስከትላሉ፡፡

አገራችን በየዘመናቱ ያጋጠሟትን መልካም ዕድሎች ባለመጠቀሟ ሊኖረን የሚገባው የዕድገትና የልማት ደረጃ በሚፈለገው መንገድ አልተገኘም፡፡ በቀዳማዊ አፄ ኃይለ ሥላሴ ዘመነ መንግሥት ለአገር ታላቅ ራዕይ የነበራቸው ኢትዮጵያውያን የደረሰባቸው በደል፤ በደርግ ዘመነ መንግሥት የተካሄደው ቀይ ሽብር እርምጃ በሕዝብ ላይ ከፍተኛ በደል አድርሷል፡፡ ባለፉት 27 ዓመታትም የሕዝብን ፍላጎት መሰረት ያላደረጉ በርካታ ተግባራት በመከናወናቸው ዜጎችን ለሞት ፣ለእስርና ለስደት ተዳርገዋል፡፡

ባለፉት ሶስት ዓመታት እነዚህ ሕዝብን ያማረሩ ድርጊቶች አገሪቱን አደገኛ ቀውስ ውስጥ የሚከት ታላቅ ነውጥ ፈጥረው የበርካቶችን ሕይወት ቀጥፈው የአመራር ለውጥ መጥቷል፡፡የለውጡ አመራርም የነበሩትን ችግሮች ሙሉ ለሙሉ ለመፍታት ጥረት እያደረገ ይገኛል፡፡

አገሪቱ በለውጥ ውስጥ ሆና ፖለቲከኞች ከእስር ቢፈቱም፣ አምፀው ለጦርነት ጫካ የነበሩ፣በባዕድ አገራት በስደት የቆዩ ሁሉ ወደ አገራቸው እንዲገቡ ቢጋበዙም፣ ለዴሞክራሲያዊ መብቶች መረጋገጥ እንቅፋት የሆኑ ፖሊሲና ሕጎች እንዲሻሻሉ ምቹ ሁኔታ ቢፈጠርም ከሕዝብ ግን የሚያረካ ምላሽ እየተሰጠ እንዳልሆነ መረዳት ይቻላል፡፡

ባለፈው አንድ ዓመት ብቻ በሱማሌ፣ በኦሮሚያ፣ በአማራ ፣በደቡብ ፣በአፋር፣በቤኒሻንጉል ወዘተ… ክልሎች የተፈናቀሉ፣ ሕይወታቸውን ያጡና የተሰደዱ ወገኖቻችንን ስናስብ ለማመን የሚከብድ ነው፡፡በዕውነት ላለፉት 40 ዓመታት የኢትዮጵያ ሕዝብ ያሳለፈውን መከራና ስቃይ ዘንግቶ በፍቅር እንደመር- በይቅርታ እንሻገር እየተባለ፣የግለሰብም የቡድንም መብት መከበር አለበት ተብሎ ሁሉም እንደልቡ ሀሳቡንና እምነቱን እያራመደ፣ ከመለያየት ይልቅ ስለ አንድነት እየተሰበከ ፣ የሰላም አየሩ ከራሳችን አልፎ ለጎረቤት አገራት ተርፎ እያለ፣ በሰላም አገር ጦር መሳሪያ ታጥቆ ባንክ የተቀመጠ የሕዝብን ገንዘብ መዝረፍ፣ግጭት መቀስቀስ፣ነዋሪዎችን ከኖሩበት ቀዬ ማፈናቀል፣የመንግሥት አስተዳደርን ማፍረስ፣መንገዶችን እየዘጉ ሕብረተሰቡን ለኑሮ ውድነት መዳረግ፣ አገሪቱንም ኢኮኖሚዋን ወደኋላ መጎተት፣ ለአገር አስባለሁ ፣ሠላም እፈልጋለሁ ፣ ለሕዝብ እታገላለሁ ከሚል ዜጋና ሃይል የሚጠበቅ ተግባር አይደለም፡፡በዚህ ፍላጎታችን የምንቀጥል ከሆነ ግን አስተዋይነታችንን አጥተን፣ ፍላጎታችንን ማወቅ አዳግቶን፣ ምን እንደሚገጥመን የማናውቅ ነሆለል ከመሆን የተሻለ ዕድል አይኖረንም፡፡

እነዚያን አስቸጋሪ ወቅቶች አልፈን ሰላም በማስከበር ለሌሎች የምንተርፍ ህዝብ ሆነን ሳለ፣ ለሰላማችን መደፍረስ ምክንያት የሆኑ ችግሮችና ቅራኔዎችን ደረጃ በደረጃ ለመፍታት መፍትሄዎች እየተቀየሱ ባሉበት ወቅት የመንግሥትን ዘርፈ ብዙ ተግባራት ማገዝ ሲገባን አገራዊ ነውጥ በማካሄድ መንግሥት ላይ ጫና ለመፍጠር የሚደረገው ርብርብ በእጃችን የገባውን መልካም አጋጣሚ ለሰላም ጠንቆች አሳልፎ መስጠት መሆኑን እንደምን መገንዘብ ተሳነን?

የዘመናት የኋልዮሽ ጉዞ በፈጣን እድገት ድል የሚመታው ሰላም ሲሰፍን በመሆኑ የሕዝብ ሰላም የማይጥማቸው የፖለቲካ መሪዎች ቢያጋጥሙን እንኳ ሕዝብ ወሳኝ ነውና የሰላም መሰረት የሆነው ሕዝብ አስገድዶ ሰላም የማስፈን ሥራ እንዲሰሩ ሊያደርግ ይገባዋል፡፡የተገኘው ለውጥና መልካም አጋጣሚ በማንኛውም መንገድ ለሰላም ጠንቆች አሳልፈን መስጠት የለብንም፡፡

አዲስ ዘመን ጥር 10/2011