ችግሮችን በውይይት የመፍታት ጅምሮች ተጠናክረው ይቀጥሉ!

መነጋገር፣ መወያየት፣ መመካከር፣ የሃሳብ ልውውጥ ማድረግ የሚሉ ጉዳዮች፤ በሰው ልጆች መስተጋብሮች ውስጥ ለሚፈጠሩ የሃሳብ ልዩነቶች፣ አለመግባባቶች፣ ችግሮችና ሌሎች መሰል ጥርጣሬን የሚፈጥሩ ነገሮች አድገው ወደ ግጭት ከማም ራታቸው በፊት መፍትሄ ማፍለ ቂያ አውዶች ናቸው::

በዚህ ረገድ በችግሮቻቸው ዙሪያ ቁጭ ብለው የተነጋገሩ እና የአለመግባባታቸው ምክንያት የሆኑ ጉዳዮችን በነቂስ አውጥተው የተወያዩና የተመካከሩ አካላት፣ ከችግሮቻቸው ልቀው በመውጣት ለሌሎች የሚተርፍ ሥራን ሲከውኑ ማየት የተለመደ ተግባር ነው:: በአንጻሩ በችግሮቻቸው ዙሪያ ቁጭ ብለው መነጋገር ባለመቻላቸው ምክንያት ልዩነቶቻቸውን ማጥበብና በጋራ መቆም ባለመቻላቸው ዛሬ ላይ የውድቀት ማሳያ ሆነው የሚነሱ በርካታ የማህበረሰብ ክፍሎችም፣ አገሮችም አሉ::

በዚህ ረገድ ኢትዮጵያ በዘመናት ሂደት ውስጥ በበርካታ ችግሮች ተፈትናለች:: አንዳንዴም ችግሮቿን ፈትታ የአሸናፊነት ምሳሌ ተደርጋ ስትገለጽ፤ ሌላ ገጿም ልጆቿ በችግሮቻቸው ዙሪያ ቁጭ ብለው መምከርና ልዩነቶቻቸውን አጥብበው ለሰላማዊ ጉዞ ራሳቸውን ባለማዘጋጀታቸው ምክንያት ከፍ ያለ ሰብዓዊና ቁሳዊ ኪሳራን ያስተናገደችባቸው ሁነቶች አሉ:: የሃሳብ ልዩነት ሳይበግራቸው በአንድ ተሰልፈው የልዕልናቸውን ታሪክ የከተቡ ሕዝቦች፤ በአንድም በሌላ ምክንያት ልዩነታቸውን ቁጭ ብለው በመነጋገር መፍታት ባለመቻላቸው እርስ በእርሳቸው ጦር ተማዝዘው የጥቁር ጠባሳ የታሪክ ምዕራፍ ገጾችንም ፈጥረዋል::

የሩቁ ቀርቶ የቅርቡን መመልከት ቢቻል እንኳን፤ ራስን ለንግግር ዝግጁ ባለማድረግ ትንሿ አለመግባባት አድጋ ወደ ጦርነት አምርታለች፤ ችግሩን ቀድሞ ማስቀረት ቢቻልም ይሄ ባለመሆኑ ለከፋ ሰብዓዊ እና ቁሳዊ ኪሳራም ዳርጋለች:: ይሁን እንጂ በመንግሥት በኩል በነበረው ብርቱ ጥረት በችግሮች ዙሪያ መነጋገር፤ ጦርነቱንም በሰላም ለመቋጨት ተችሏል:: በዚህም በሰሜኑ የኢትዮጵያ ክፍል ከሁለት ዓመታት በላይ የቆየው ጦርነት በሰላም አየር ተተክቷል፤ የሕዝቦች ወንድማማችነት ወደቀደመ ሁኔታው ተመልሷል::

ይሁን እንጂ ዛሬም በተለያዩ የኢትዮጵያ አካባቢዎች የሚስተዋሉ ችግሮች አሉ:: እነዚህ ችግሮች በዋናነት የጽንፈኝነት አመለካከት የወለዳቸው ቢሆኑም፤ አገርንም ሆነ ሕዝብን ዋጋ እያስከፈሉ ያሉ ናቸው:: ለዚህ ደግሞ፣ ቀደም ሲል በኦሮሚያ፣ አሁንም በአማራ ክልሎች የሚስተዋሉ ችግሮችን ማንሳት ይቻላል:: እነዚህን ችግሮች ለመፍታትም በመንግሥት በኩል ትናንትም ሆነ ዛሬ ያላሰለሰ ጥረት እየተደረገ ይገኛል:: በመሆኑም በኦሮሚያ ክልል በሸኔ አማካኝነት ሲፈጠሩ የነበሩ ዘርፈ ብዙ ችግር እልባት እንዲያገኙ ያስችል ዘንድ ሰሞኑን በታንዛኒያ የሰላም ውይይት ሲከናወን ቆይቷል::

ይሄ ውይይት ቀደም ሲል መንግሥት ከሕወሓት ጋር እንዳደረገው የሰላም ውይይት ሁሉ ለሕዝቦች ሰላምና ደህንነት፣ ለአገር ሁለንተናዊ ሰላምና ብልጽግና እውን መሆን ከፍ ያለ ፋይዳ ያለው ነው:: ከዚህ አኳያ በመንግሥት እና በሸኔ ኃይል መካከል ሲደረግ የቆየው የሰላም ውይይት የመጀመሪያ ምዕራፍ የተጠናቀቀ ሲሆን፤ ውይይቱም በአብዛኛው በአዎንታዊ የተከናወነ ስለመሆኑም ነው የመንግሥት ኮሙኒኬሽን መግለጫ ያመለከተው:: በተለይም ግጭትን በዘላቂነት ሰላማዊ በሆነ መንገድ ማቆም መቻል ተገቢ እንደመሆኑ ሁለቱም ወገኖች በውይይቱ አስፈላጊነት ላይ ተግባብተዋል::

ይሄን መሰል ግጭትን በዘላቂነትና ሰላማዊ በሆነ መልኩ መፍታት ምን ያህል ከፍ ያለ ዋጋም ፋይዳም እንዳለው መንግሥት ከሕወሓት ጋር ባደረገው የሰላም ውይይት የተፈጠረው ሰላም ከፍ ያለ እማኝ ነው:: ምክንያቱም መነጋገርና መወያየት ባልተቻለበት ጊዜ በሰሜኑ የአገራችን ክፍል ከፍ ያለ ቀውስና ኪሳራ ደርሷል፤ አገርንም ዋጋ አስከፍሏል:: ልዩነቶችን በውይይት ለመፍታት እና ችግሮችን በመነጋገር በሰላማዊ መንገድ መከወን ሲቻል ደግሞ አካባቢው ላይ የሰፈነውን ሰላምና መረጋጋት፤ አገር ላይ የተፈጠረውን አዎንታዊ የማህበራዊ፣ ኢኮኖሚያዊ፣ ፖለቲካዊ እና ዲፕሎማሲያዊ ከፍታ መመልከት ተገቢነት ይኖረዋል::

ዛሬም በሰሜኑ የአገራችን ክፍል የተገኘው እፎይታ፣ ሰላምና መረጋጋት፤ በኦሮሚያም ሆነ በአማራ ክልል ላሉ ወገኖች እውን ሊሆን ያስፈልጋል:: ይሄ የሚሆነው ደግሞ ልዩነቶችን ለማጥበብ የሚያስችሉ ንግግሮችና ምክክሮችን፤ ሰላምን ማምጣት የሚያስችሉ ሰላማዊ ውይይቶችን ማድረግ ሲቻል ነው:: በዚህ ረገድ ከሕወሓት ጋር የተደረገው የሰላም ውይይት ብዙ ያስተማረ ሲሆን፤ ከሸኔ ጋር እየተደረገ የነበረው የሰላም ውይይትም ችግሮችን ለመፍታትና ጦርነትን በሰላማዊ መንገድ በዘላቂነት ለማስቆም ይቻል ዘንድ ጥሩ ጅምር የታየበት ነው:: በመሆኑም በአንድ በኩል ይሄ መልካም ጅምር ተጠናክሮ ሊቀጥል፤ በሌላ በኩልም ይሄው ችግሮችን ቁጭ ብሎ በሰላማዊ መንገድ የመነጋገር ልምድ ሌሎችም ሊወስዱት የሚገባ ነው:: ይሄን ማድረግ ደግሞ ከራስ በላይ ለሕዝብ፤ ከቡድን በላይ ለአገር የማሰብና የመኖር ሰብዕና መገለጫ መሆኑ ሊሰመርበት ይገባል:: ስለሆነም ችግሮችን በውይይት የመፍታት ጅምሮች ተጠናክረው ሊቀጥሉ ይገባል!

አዲስ ዘመን ሚያዚያ 27/2015