የአዲሱ ዓመት የኢትዮጵያ እግር ኳስ አንጸባራቂ ተስፋ

በደቡብ አፍሪካ (PSL) ሊግ ሶስት ጨዋታዎችን ተቀይሮ አንድ ጨዋታ ደግሞ ቋሚ ተሰላፊ ሆኖ ወደ ሜዳ በመግባት ለክለቡ ማሚሎዲ ሰንዳውንስ በአራት ጨዋታ ሶስት ግቦችን ያስቆጠረው ወጣት ኢትዮጵያዊ ተጫዋች ባለፉት ሳምንታት የደቡብ አፍሪካ መገናኛ ብዙሃንን ትኩረት ስቧል ። ይህ አንጸባራቂ ወጣት ኮከብ የኢትዮጵያ እግር ኳስ የአዲሱ አመት ትልቅ ተስፋም ነው። ከጉቶ ሜዳ ተነስቶ የአፍሪካ እግር ኳስ የወቅቱ መነጋገሪያ የሆነው አቡበከር ናስር።

የሰንዳወንስ ምክትል አሰልጣኝ ሩላኒ ሞኮዬዋና ሰሞኑን ስለዚህ ተስፈኛ ኮከብ በሰጡት አስተያየት እንዲህ አሉ “በአስደናቂ ተጫዋቾች በመከበቡ በቶሎ ለውጥ ማሳየት ይችላል ። ለሁሉ ነገር አዲስ ተጫዋች ስለሆነ በደቡብ አፍሪካ ውስጥ እንዲረጋጋና ሙሉ ብቃቱን እንዲያሳይ ደጋፊዎች ትእግስተኛ ሆነው መጠባበቅ አለባቸው”። አንዳንድ ዘገባዎች አቡበከር በቋንቋ የተነሳ ችግር ውስጥ መግባቱን ያወሱ ቢሆንም ሰሞኑን የተሰራጩ መረጃዎች ተጫዋቹ ሜዳ ውስጥ ከአሰልጣኞች ጋር እንዲግባባ ክለቡ አስተርጓሚ መመደቡን አትተዋል። እንደ ደቡብ አፍሪካው ኪኮፍ መፅሄት ዘገባ አቡበከር ናስር በቀጣይ ጨዋታዎች በሜዳው ውስጥና ከሜዳ ውጭ መነጋገሪያ ሆኖ ይቀጥላል።

አቡበከር ናስር ለሰንዳውንስ የመጀመሪያውን ጨዋታ ያደረገው በቲ ኤስ ጋላክሲ 1ለ0 በተሸነፈበት ጨዋታ ላይ ነበር ። በጨዋታው ከተቀያሪ ወንበር ላይ ተነስቶ በመግባት ለደቂቃዎች ቢጫወትም ውጤቱን የሚቀይር ብቃት ውስጥ አልነበረም ። በሁለተኛው ጨዋታው አሁንም ተቀይሮ በመግባት ደቂቃዎችን የመጫወት እድል አገኘ ። ሜመሎዲ ሰንዳውንስ ተጋጣሚውን ካይዘር ቺፍን 4ለ0 በሆነ ውጤት ሲያሸንፍ በጨዋታው ምርጥ ብቃቱን በማሳየትና አስደናቂ ግብ ማስቆጠር ችሏል። የደቡብ አፍሪካ ሊግን የሚያደምቅና ወደ አውሮፓ ለመሻገር ተስፋ ያለው ተጫዋች ሆኖ በመጠቀስ የአፍሪካን የስፖርት ሚዲያዎች ማነጋገሩን ቀጥሏል። የሰንዳውንስ አሰልጣኞች ከተለያዩ ሚዲያዎች ጋር ባደረጓቸው ውይይቶች በክለባቸው እንደአቡበከር አይነት አዳዲስ ተጫዋቾች በልምምድና ጨዋታዎች ብቃታቸውን እያሻሻሉ በመሄድ ጥሩ ደረጃ ላይ እንደሚደርሱ እምነት እንዳላቸው ተናግረዋል ። 22ኛ ዓመቱን የያዘው አቡበከር በሰንዳውንስ የቢጫና ሰማያዊ 28 ቁጥር ማሊያ ለብሷል ።

አቡበከር ናስር በደቡብ አፍሪካ ከፍተኛ የክለቦች የሊግ ውድድር በመጫወት 5ኛው ኢትዮጵያዊ ነው ። ከእሱ በፊት ፍቅሩ ተፈራ፤ ጌታነህ ከበደ፤ ፍስሐ ይመር በጋሻውና መሀመድ ኢብራሂም በ6 የተለያዩ ክለቦች መጫወት ችለዋል። በተለይ ፍቅሩ ተፈራ በሁለቱ ታላላቅ ክለቦች ኦርላንዶ ፓይሬትስና ሱፕር ስፖርት ዩናይትድ ከመጫወቱም በላይ ለሁለት ጊዜያት የደቡብ አፍሪካ ሊግን በማሸነፍ ከፍተኛውን ውጤት ያስመዘገበ ነው ። ጌታነህ ከበደ ደግሞ በቢድቬስት ዌስትና በፕሪቶሪያ ዩኒቨርሲቲ 19 ጨዋታዎችን በማድረግ በደቡብ አፍሪካው ሊግ 6 ጎሎችን በስሙ አስመዝግቧል ። አቡበከር ከነዚህም ተጫዋቾች የተሻለ ጅማሬ ያሳየ ባለ ተሰጥኦ ወጣት መሆኑን ተከትሎ በርካቶች ከፍ ላለ ስኬት ከወዲሁ አጭተውታል።

አቡበከር ናስር ወደ ደቡብ አፍሪካ ከመሻገሩ በፊት በኢትዮጵያ ቡና የስፖርት ክለብ እኤአ እስከ 2025 የሚቆይበት የኮንትራት ውል ነበረው ። ሰንዳውንስ ሊያዛውረው ከፈለገ በኋላ በውሰት ለሌላ ክለብ በመስጠት ሊያጫውተው አስቦ ነበር ። ስለዚህም ለስድስት ወራት በቡና ስፖርት ክለብ ውስጥ ቆይታ አድርጓል ። የእንግሊዘኛ ቋንቋውንም በዚህ ወቅት ለማሻሻል አስተማሪ ተቀጥሮለት ሁሉ ተሰርቷል። በመጨረሻም ቡና የስፖርት ክለብ በፕሮቶሪያ ለሚያደርገው ቆይታ ወጪውን ከሸፈነለት በኋላ ለሁለት ሳምንታት የሰንዳውንስ ቆይታ አድርጎ በ250ሺ ዩሮ የዝውውር ሂሳብ ለደቡብ አፍሪካው ክለብ ሙሉ በሙሉ ሊፈርም ችሏል ። ከሰንዳውንስ ባሻገር ካይዘር ቺፍ የሚፈልገው ሌላው የደቡብ አፍሪካ ክለብ ነበር ። ኪክኦፍ መፅሄት እንደዘገበው የደቡብ አፍሪካ ክለቦች ሽሚያ ውስጥ ከመግባታቸው በፊት በአልጄሪያና በግብፅ ክለቦች ይፈለግ ነበር። የጆርጅያ ክለብ እና በስፔን ዝቅተኛ ዲዚዮን ያሉ ክለቦች ሊወስዱት ሙከራ እንዳደረጉም አውስቷል ።

አቡበከር ወደ ደቡብ አፍሪካው ክለብ ከመዛወሩ በፊት ከ2014 እስከ 2016 እኤአ በሃረር ከተማ በመጫወት የክለብ ሕይወቱን ጀምሯል ። ከ2016 ጀምሮ ደግሞ ለስድስት ዓመታት በኢትዮጵያ ቡና ስፖርት ክለብ በመጫወት አሳልፏል ። በቡና ቢ ቡድን መጫወት ከጀመረ በኋላ በአጭር ጊዜ ውስጥ ዋና ቡድን ተቀላቅሏል ። ከ23 በላይ የፕሪሚዬር ሊግ ጨዋታዎችን በማድረግ 29 ጎሎችን በስሙ አስመዝግቧል ። በ2021 የኢትዮጵያ ፕሪሚዬር ሊግ ኮከብ ግብ አግቢ ሆኖ በ24 ጎሎች ያሸነፈ ሲሆን ሌሎች የምርጥ ተጨዋች ሽልማቶችንም ተቀዳጅቷል ።

አቡበከር ናስር ባለፉት 3 ዓመታት በዓለም ዋንጫ፤ በአፍሪካ ዋንጫ ማጣሪያዎች፤ በወዳጅነት ጨዋታዎች፤ ዋና ውድድሮች ለብሔራዊ ቡድን 21 ጨዋታዎችን አድርጓል ። 5 ጎሎችንም ከመረብ አሳርፏል። በብሔራዊ ቡድን ማሊያ ካገባቸው ጎሎች ሁለቱም በወዳጅነት ጨዋታዎች ላይ ያስቆጠራቸው ሲሆኑ በባህርዳር ስታድዬም በኡጋንዳና በማላዊ ላይ ነው ። ሌሎች ሁለት ጎሎችን ደግሞ በአፍሪካ ዋንጫ ማጣሪያ በባህርዳር ስታድዬም በማዳጋስካር ላይ እንዲሁም በዓለም ዋንጫ ማጣሪያ ዚምባቡዌ ላይ በሃራሬ ስታዲዬም አስቆጥሯል ።

የደቡብ አፍሪካው ክለብ ሜመሎዲ ሰንዳውንስ በአገሪቱ ከፍተኛ የክለቦች ውድድር ከ15 ጊዜያት በላይ ዋንጫዎችን አሸንፏል ። የአፍሪካ ቻምፒዮንስ ሊግና የአፍሪካ ሱፕር ካፕንም ያሸነፈ ምርጥ ፕሮፌሽናል ክለብም ነው ። ሜመሎዲ ሰንደውንስ በደቡብ አፍሪካ እግር ኳስ በ11 ሚሊዮን ዶላር የዋጋ ተመን ሃብታሙ ክለብ ሲሆን፤ ዋና ባለቤቱ ፓትሪስ ሞትሶፔ ታዋቂ የደቡብ አፍሪካ ቢሊዬነርና የማዕድን ኢንቨስተር ናቸው። መቀመጫውን በፕሪቶሪያ፤ ቲስዋኔ ያደረገው ክለቡ ከተመሰረተ 52 ዓመታትን አስቆጥሯል ። በሰንዳውንስ የ46 ተጨዋቾች ስብስብ አብዛኛዎቹ ደቡብ አፍሪካዊ ቢሆኑም ከምስራቅ አፍሪካና ከደቡብ አሜሪካ ጭምር ፕሮፌሽናሎች ተሰባስበዋል። ከኢትዮጵያ፤ ኬንያ ፤ ኡጋንዳ፤ ኡራጋይ፤ ቺሊና ቦሎቪያ የመረጡ ተጨዋቾች በቡድኑ ይገኛሉ ። ከነዚህ ሁሉ ልቆ ግን አቡበከር በክለቡ ደጋፊዎች የተወደደ ይመስላል።

ቦጋለ አበበ

አዲስ ዘመን መስከረም 1 ቀን 2015 ዓ.ም