የሰፈሩ ሰው ተጨንቋል። በየቀኑ የሚሰማው ወሬ እየረበሸው ነው። በአካባቢው ጨለማን ተግነው ቦታን ለይተው የሚዘርፉ ጨካኞች በርክተዋል። በቀናት ልዩነት በስፍራው ተገደሉ፣ ተደበደቡ፣ ተዘረፉ የተባሉት ቁጥር አሻቅቧል። ይህ ዕንቅልፍ የሚነሳ ጉዳይም የሁሉም ችግር ከሆነ ውሎ አድሯል። አንዳንዶች በዚህ ስፍራ ያለሰዓት ለሚያልፉ አጥብቀው ያሳስባሉ። ከሰሙት ክፉ ገጠመኝ አጣቅሰውም በሌሎች እንዳይደርስ ይመክራሉ።
ከሳሪስ ወደ ሀና ማርያም የሚወስደው መንገድ ሁሌም በሰዎች ይጨናነቃል። ይህን አካባቢ ለቅናሽ ቤት ኪራይ፣ ለሥራና ለሌሎች ጉዳዮች የሚሹት በርካቶች ናቸው። አንዳንዶች ሰፊውን የሀና ሰፈር አደባባይን ከበው ወጪ ወራጁን ሲቃኙ ይውላሉ። አንዳንዶቹ ደግሞ ስፍራውን ለገበያና ለድለላ ይጠቀሙበታል። ሱቆች፣ የመንገድ ላይ ንግዶች፣ የታክሲ ሰልፎችና የጎዳና ላይ ግርግር የአካባቢው መለያ ነው።
ከዋናው መንገድ አለፍ ሲሉ የውስጥ ለውስጥ ጥርጊያዎች ይታያሉ። በእነዚህ አቅጣጫዎች መራመድ ወደሰፊ መንደሮች ያደርሳል። በስፍራው ከሚገኙ ቤቶች አብዛኞቹ ለኪራይ ይውላሉ። ቤቶቹ እንደአሁኑ ከተማው ሳይሰፋና ነዋሪው ሳይበረክት የተሠሩ ናቸው። አንዳንዶቹ በህጋዊ፣ ከፊሎቹ ደግሞ በጨረቃ ብርሃን የተሠሩ ናቸው።
ከየአቅጣጫው የሚመጡ መንገዶችን አገናኝቶ በርካቶችን በአንድ የሚያውለው የሀይሌ ጋርመንት መገንጠያ ግርግር አያጣውም። ወደ ሳሪስ፣ ጀሞና ቃሊቲ የሚሄዱ ታክሲዎችን ከእግረኞች እያጋፋ ያመሻል። ከቀለበት ድልድዩ ስር ሸቀጥ የሚዘረጉ ተባራሪ ነጋዴዎች ገበያውን ለመያዝ ሲጮሁ ይውላሉ። ከታክሲዎች ባላነሰ ተሳፋሪን የሚያመላልሱ ባጃጆችም ተሰልፈው መንገደኛውን ይቃኛሉ።
ከሀይሌ ጋርመንት ግርጌ የቆመው ሪቬራ ሆቴል ለአካባቢው ድምቀት ሆኗል። ፊቱን ወደመንገዱ ማዞሩ እይታን እንዲስብ ምክንያት ነው። ከግዙፉ ሕንጻ ጀርባ ደግሞ ሌላ ታሪክ አለ። ከግርግሩ ርቆ ዝምታ በተላበሰው ሰርጥ ጭርታውን ጥሶ የሚወጣ የጭንቅ ድምፅ ይሰማል። ይህ ይሆን ዘንድ የጨረቃ ድምቀት አያሻም። የምሽቱ መግፋትና የጨለማው ብርታት በቂ ነው።
ዱከም ከተማ ተወልዶ ያደገው ሞገስ ጸጋዬ የከተማን ህይወት በወጉ አያውቅም። ዕድሜው ከፍ ሲል ገጠር አያቶቹ ቤት እንዲኖር ተገደደ። ለእርሱ ገጠር መገኘት ሰበቡ ድህነት መሆኑን ያውቃል። ቤተሰቦቹ ተንከባክበው ሊያሳድጉት አልቻሉም። ይህ አጋጣሚ ከፊደል ሳያገናኘው ከከብቶች ጋር አውሎታል። ከከተማ መብራት ርቆ ወደ ገጠር ኩራዝ መግባቱ ሁሌም ያናድደዋል። የልጅነቱ ትዝታና ከተማ ወዳድነቱ በነበረበት አላቆየውም።
እንደእኩዮቹ አለመማሩ፣ ከተሜ ሆኖ ገጠር መቅረቱ ቢያሳስበው ጓዙን ሸከፈ። ያደገበትን ቀዬ ጥሎት ሲወጣ ቅር አላለውም። አዲስ አበባ ሲደርስ «የእኔ» የሚለው ወገን አልነበረውም። የሚያርፍበት ጥግ ቢያጣ ጎዳናን መረጠ። ከመንገድ ዳር እያደረና የዕለት ጉርሱን እየፈለገ ቀናትን ገፋ። እንዲህ መሆኑ ለሞገስ አልተመቸውም።
የጎዳና ህይወት ይከብዳል፤ የጠዋት ማታ ርሃብ ይፈትናል። አንድ የቀን አጋጣሚ ከሁለት ወጣቶች ጋር አግባባው። ሁለቱም በእርሱ ዕድሜ ናቸው። ሃሳባቸው ከሃሳቡ ጨዋታቸው ከጨዋታው መግጠሙ አስደስቶታል። እያደር ውሏቸውን አወቀ። ኪሳቸው በገንዘብ ማበጡ ማረከው። እንደዋዛ ለመዝናናት የሚረጩት ብር፤ ለጫት፣ ለሲጋራ የሚከፍሉት ሁሉ አጓጓው። ጓደኝነታቸው ሲጠነክር ማንነታቸውን ነገሩት። ይህን ሲያውቅ አልደነገጠም።
እሱም እንደነርሱ ቢሆን የበለጠ እንደሚያገኝ ገምቶ ተቀላቀላቸው። አሁን ሞገስ ከጎዳናው ህይወት ርቋል። የነገውን ለውጥ ሲያልም ጓደኞቹን ያስባል። ሳይለፉ ማግኘት ሳያስቡ መክበር እንዳለ ገብቶታል። ጌታቸውና ተስፋዬ ባልንጀሮቹ ከሆኑ ወዲህ የህልሙ ፍቺ መድረሱ ይታየዋል።
እነርሱ በሄዱበት ሁሉ እየተከተለ ከድርጊታቸው ያብራል። ከተገኘው መካፈሉ፣ ከተበላው መቃመሱ እየጣመው ነው። እነሞገስ የመኖሪያ አካባቢያቸው ቃሊቲ አካባቢ ነው። መሸት ሲል ግን ወደ ሀና ማርያም የሚሄደውን መንገድ ያዘወትሩታል። ከሚውሉበት ርቀውና መንደሮችን አቆራርጠው እዚህ መድረሳቸው ያለምክንያት አይደለም። በዚህ አቅጣጫ አምሽተው የሚያልፉ መንገደኞች ለእነርሱ የዕድል ገዶች ናቸው። የያዙትን ይሰጣሉ፣ የተጠየቁትን ያራግፋሉ። እምቢ ባዮች ካሉ ደግሞ ጩቤ ይመዘዝባቸዋል። የሆነውን ለፖሊስ የሚጠቁሙ ከመሰለም የወጣው ወደሰገባው አይገባም። የተሰነዘረው ስለት ህይወትን እስኪነጥቅ ሥራ ላይ ይውላል። ሲነጋ አዲስ የወንጀል ዜና ለአካባቢው ይደርሳል። እንደተለመደው ነዋሪዎች በስጋት ይናጣሉ።
ፍርሐት በአካባቢው ነግሶ ይሰነብታል። የዛኔ የሚያመሹ ሁሉ በጊዜ ይገባሉ። ጥቂት ቀናት አለፍ ብሎ ተመሳሳይ ድርጊት ይፈጸማል። ሞገስና ጓደኞቹ አካባቢን ለውጠው ቀንና ሰዓት ዘለው ወንጀሉን ሲደግሙት በድንገት ይሆናል። አንዳንዴ ከስለታቸው የተረፉ ህይወታቸውን አስበው ንብረታቸውን ይተውታል። ያልሰሙ ያልጠረጠሩ ደግሞ በዝርፊያ ሰበብ ሞታቸው ይሰማል። እነሞገስ መገኛቸው አረቄ ቤት ነው። ጨለማው እስኪገፋ፣ ሰዓቱ እስኪደርስ ሲጎነጩ ያመሻሉ። ከመለኪያው ሲደጋግሙ ድፍረት ይሆናቸዋል። መገባበዛቸው ብርታት ደርቦ ያጀግናቸዋል። አንዳንዴ ለዓይን ሲይዝ ይሰማራሉ። እግር በእግር ተከትለው፣ በጩቤያቸው አስፈራርተው የዘረፉትን ይካፈላሉ። አረቄ ቤቱ ለእነርሱ መማከሪያቸው ሆኗል። ስለዛሬው ያወጉበታል። ስለነገው ይነድፉበታል። ሞገስና ባልንጀሮቹ ነፍስ እያጠፉ፣ንጹህ ደም እያፈሰሱ በሚያገኙት ገንዘብ ይዝናናሉ። ሁሉም ፍቅረኞች አበጅተዋል። ከሥራ መልስ ዘና እያሉ ያሻቸውን ይጎነጫሉ። ሞገስ በአካባቢው ከሚገኝ ጠላ ቤት ዙሪያ የአልጋ ደንበኞች አሉት። ፍቅረኛውን ማግኘት በፈለገ ጊዜ አብሯት ማደርን ለምዷል። ሌሎቹም ቢሆኑ ለዚህ አይቦዝኑም።
ኪሳቸውን እያሳዩ ብዙዎችን ይማርካሉ። ገንዘባቸውን እየዘሩ የፈለጉትን ያገኛሉ። ሲነጋ ሦስቱም ሥራቸውን አይዘነጉም። እየዘረፉና ሰው እየጎዱ የሚወስዱት ገንዘብ ጥሟችዋል። ሞገስ ሥራዬ የሚለው ውሎ ተመችቶታል። በልጅነቱ ያሰደደውን ችግር፣ ከፊደል ያለያየውን ድህነት የተበቀለው ይመስላል። ሳይለፋና ሳይደክም በክፋትና በጡንቻ ብርታት ከሚገኝ ሲሳይ ኪሱን ጦም አያሳድርም። ጭካኔው እየጨመረ ሲሄድ የተሻለ እንደሚያገኝ ያስባል። ይህን አስቦም ስለነገው ይተልማል።
በዝርፊያ ከሚገኝ ገንዘብ ሌላ በእጃቸው የሚገባ ንብረት ውሎ አያድርም። ገንዘብ እስካወጣ በተጠየቀው ዋጋ ይሸጣል። ለዚህ ደግሞ የሰፈሩ አረቄና ጠላ ቤቶች አይቦዝኑም። ሁሌም ሻጭን ከገዥ እያስማሙ ይሸጣሉ፣ ይለውጣሉ። በመሸታ ቤቶቹ ሞባይሎች፣ልብሶችና ጌጣጌጦች ይቸበችባሉ። ደንበኞችም እንደአቅም ፍላጎታቸው ዋጋ ተከራክረው ያሻቸውን መርጠው ይወስዳሉ።
የካቲት 12/ 2003 ዓ.ም፦
የካቲት 12 ቀን 2003 ዓ.ም ሦስቱ ጓደኞች በጊዜ ተገናኝተዋል። የምሽቱን ሥራቸውን ለመከወን በተለመደው ቦታ መሰማራትን እያሰቡ ነው። እስከዛሬ የሀና ማርያም ሰፈር ቀናቸው ነው። የመንደሩ አመቺነት ነጥቀው ለመሮጥ አስፈራርተው ለመዝረፍ ሲረዳቸው ቆይቷል። ሁሌም ከሥራ በፊት ዙሪያ ገባውን ይቃኛሉ። ሁኔታቸውን ዓይተው በሚጠራጠሩ ፖሊሶች እጅ መውደቅን አይፈልጉም።
የዛን ዕለት ውሏቸው ሀይሌ ጋርመንት አካባቢ ነበር። በዚያው አመሻሽተው ወደተለመደው ሰፈር ለመሻገር ጊዜያቸውን እየጠበቁ ነው። ምሽት አንድ ሰዓት ላይ በአካባቢው ካለ ሪቬራ ሆቴል አቅራቢያ ተገኝተዋል። ይህ ቦታ ለእነሱ ባለውለታቸው ነው።
ጭርታውን ተጠቅመው ጨለማውን ተተግነው ግዳይ ጥለውበታል። ዛሬም ወጥመዳቸው ጦም የሚያድር አይመስልም። ጊዜው ያዝ ማድረግ ቢጀምርም የሦስቱ ዓይኖች አጥርተው ለማየት አልተቸገሩም። በትክክልም ለምሽቱ ሥራቸው የሚሆን ሲሳይ እየመጠላቸው ነው። አሁን አንድ ጎልማሳ ከነበረበት ፒካፕ መኪና መውረዱን አረጋግጠዋል። ብቻውን ነው። ሁኔታው ለሽንት መሆኑን ሲያውቁም በወጉ ያልተዘጋውን መኪና ተጠግተው ጠበቁት። ይህ አጋጣሚ ታርጋውን ቁልጭ አድርጎ አሳያቸው።
መኪናው የመከላከያ ንበረት መሆኑን አውቀዋል። ይህ ግን ፈጽሞ አላስደነገጣቸውም። ሰውዬው ሳይቀድማቸው ሊቀድሙት ፈልገዋል። ድንገት መከበቡን ያወቀው ጎልማሳ ራሱን ለመከላከል ሞከረ። ጊዜ አልሰጡትም። የያዘውን ሞባይል እንዲሰጣቸው አስገደዱት። ፈቃደኛ አልሆነም። እየበሸቀ ፣እየተናደደ ግብግብ ያዛቸው። የዋዛ አለመሆኑን ሲረዱ ትግል ገጠሙት። እያንገላቱ፣ እየደበደቡ ሊጥሉት ሞክሩ። በዚህ መሀል ሞገስ በያዘው ጩቤ ሁለት ጊዜ ቀድሞ ወጋው። እሱን ተከትለው ጌታቸውና ተስፋዬ ስለታቸውን መዘዙ። እየወጉ እየነቀሉ ደግመው ደጋግመው ወጉት። አሁን ተጠቂው እጅ ሰጥቷል።
በስሉ ጩቤዎች ክፉኛ ተጎድቷል። ደሙ እየጎረፈ የኋሊት መንጋለሉ ለግዳይ ጣዮቹ ታላቅ ድል ሆኗል። ይህ መሆኑ ያሻቸውን ለማድረግ ያመቻል። እናም ከኪሱ ገቡ። እጆቻቸው የብር ኖቶችን አስጨበጧቸው። አንድ ሁለት ሲሉ መቶ ሃያ ብር ቆጠሩ። ቀጠሉ፣ ሞባይሉን ወሰዱ። ዝቅ ሲሉ ያደረገው ቢጫ ጫማ ማረካቸው። ገንዘብ እንደሚያወጣ ሲያውቁ ከእግሩ አወለቁት። የአንገቱን ዙሪያ ዳሰሱ። ቀጭን ገመድ መሳይ ነገር መንካታቸውን አወቁ። ወርቅ መሆኑን ገምተው በፍጥነት በጠሱት። ወደ እጁ አንጓ ወረዱ። የእጅ ሰዓቱን አገኙት። ከወደቀው ሰው ብርበራው እንዳለቀ ወደቆመው መኪና አመሩ። ከጋቢናው ያለው ቴፕ ቁልጭ ብሎ ታያቸው። በለመዱት ስልት ፈልቅቀው ከእጃቸው አስገቡት። ዞር ሲሉ የመኪናውን ክሪክ አስታወሱ። በዓይናቸው ፈለጉት አላገኙትም። የወደቀውን ሰው ዞር ብለው አዩት። ደሙ እንደጎርፍ ይፈሳል። ዝቅ ብለው አዳመጡት፣ በስሱ ይተነፍሳል። ይህን ሲያውቁ ኮሌታውን ጨምድደው የክሪኩን መገኛ ጠየቁት። አልመለሰላቸውም።
ስቃዩ እየታያቸው የጣር ድምፁ እየተሰማቸው ከስፍራው ተሰወሩ። ሦስቱም በምሽቱ ግዳያቸው ረክተዋል። በስል ጩቤዎቻቸው እንደወረቀት የሸረካከቱት ጎልማሳው አላስጨነቃቸውም። ስቃዩ ፣ልመናውና ጨኸቱ አላሳዘናቸውም። የእነርሱ ሃሳብ ቀጣዩን ጊዜ ማሰብ ሆኗል። ከኪሱ የተገኘው ገንዘብ ብዙ የሚባል አይደለም። አንድ መቶ ሃያብር ለሦስት ሲካፈል ድርሻው አነስተኛ ነው። በእጃቸው ያለው ሞባይል፣የመኪና ቴፕና የአንገት ወርቅ ግን ይጠቅማቸዋል።
ሞገስ የምሽት አዳሩን እያሰበ ነው። ፍቅረኛውን ማግኘት ፈልጓል። ራሱን ማሳመርና እርሷን መማረክ አለበት። ዝቅ ብሎ እግሮቹን አየ። ያደረገው ጫማ አሮጌ ነው። ከሰውየው ያወለቁትን ቢጫ ጫማ ቀይሮ በነጠቁት ሞባይል ወደ ጠላ ቤቷ ደወለ። ወዲያውም ለአዳር የሚሆን አልጋ እንድትይዝለት ትዕዛዝ አስተላልፎ ስልኩን ጠረቀመው።
ተስፋዬም ቢሆን ብቻውን ማደር አልፈለገም። ከተካፈለው ገንዘብ የኪሱን አክሎ ከአንዲት ወዳጁ ጋር አልጋ ተጋርቷል። በማግስቱ የተዘረፉት ንብረቶች ለአረቄ ቤቱ ደንበኞች ለሽያጭ ቀረቡ። ሞገስ ትላንት የቀየረውን ጫማ አውልቆ በመቶ ሃያ ብር ሸጠው። ሌሎች ዕቃዎችም በተተመነላቸው ዋጋ እንዲሸጡ ትዕዛዝ ሰጠ።
ጨለማው በብርሃን እየተሸነፈ ነው። ጨረቃ ደምቃ መውጣት ጀምራለች። ሀይሌ ጋርመንት ሪቬራ ሆቴል አቅራቢያ የሰሌዳ ቁጥሩ 05881 መከ የሆነ አንድ ፒካፕ መኪና ቆሟል። በአካባቢውም በደም ተነክሮ በከባድ ስቃይ ውስጥ የሚገኝ አንድ ጎልማሳ ወድቋል። ሦስቱ ሰዎች ግዳያቸውን ጨርሰው ከስፍራው እንደራቁ ይህ ሰው ራሱን ለማጠንከር ሞከረ። ደም አስክሮታል። የሰሉት ጩቤዎች መላ አካሉን አቁስለውታል። እንደምንም ተስቦ ከጋቢናው ደረሰ። የመኪናውን ቁልፍ ተጭኖ ሞተሩን አስነሳ። መሪውን ሲጨብጥ አካሉ እየዛለ ፣ደሙ እየጎረፈ ነበር። ጉዞ ሲጀምር ሰፈሩን አልረሳም፤ ቤቱን አልዘነጋም።
ፖሊስ ከተኛበት ሆስፒታል ተገኝቶ የተጎጂውን ቃል መቀበል ጀምሯል። እጅግ በሰለለና ጣርና ስቃይ በተሞላበት አንደበት የሆነውን ለማስረዳት እየሞከረ ነው። ራሱን መቶ አለቃ ገብረመድህን ግደይ ሲል ያስተዋወቀው ተጎጂ የሠላሳ ስምንት ዓመት ጎልማሳ ነው። በመከላከያ ሠራዊት ውስጥ ዓመታትን በሥራ አሳልፏል። የዛን ዕለት ምሽት በስፍራው ደርሶ መኪናውን ያቆመው ለሽንት ነበር።
ሦስቱ ጎረምሶች ወደ እሱ ሲቀርቡት ለዘረፋ መሆኑ አልገባውም። እየደበደቡ፣እያንገላቱና በጩቤ እየወጉ ብዙ አሰቃይተውታል። ተጎጂው በጣር ውስጥም ቢሆን የተደረገውን ሁሉ ያስታውሳል። ወርቅ መስሏቸው ጎሮሮውን አንቀው የበጠሱት ክር የአንገት ማተቡ ነበር። «ክሪኩን ካለመጣህ» ሲሉ መወትወታቸውንም አልዘነጋም።
መቶ አለቃ ገብረመድህን ይህን ቃል ከሰጠ ከአንድ ቀን በኋላ እስትንፋሱ ተቋረጠ። የደረሰበት ጉዳት የከፋ ነውና ህይወቱን ማትረፍ አልተቻለም። በህክምና የተገኘው ውጤት እንደሚያስረዳው ሟች የመቶ አለቃ ስምንት ቦታዎች ላይ በስለት ተወግቷል። በዚሁ ምክንያት ባጋጠመው ከፍተኛ የደም መፍሰስም ለሞት ተዳርጓል።
የፖሊስ መርመራ
ፖሊስ ከአካባቢውና ከሟች ያገኘውን መረጃ በአግባቡ ሰንዷል። የተጠቀሰው ቦታ ሟችን ጨምሮ በርካታ ሰዎች ተዘርፈውበታል። ለሞት የተዳረጉና አካላቸውን የተጎዱ እንዳሉም ከአካባቢው ተረድቷል። የድርጊቱን ፈጻሚዎች ማንነት ለመለየት ሌት ቀን የሚደረገው ጥረት እንደቀጠለ ነው። የሦስቱ ሰዎች አካላዊ ገጽታን ለማወቅ ፖሊስ የራሱን ስልት ተጠቅሞ መረጃዎችን ሰበሰበ። እንደታሰበው አልሆነም። የዝርፊያ ቦታውና የተጠርጣሪዎች መኖሪያ መራራቅ፣ የዓይን እማኝ አለመኖርና የጊዜው ጨለማነት ጉዳዩን ይበልጥ አከበደው።
ድርጊቱ ከህብረተሰቡ ዓይንና ጆሮ እንደማይርቅ የሚያውቀው ፖሊስ ፈጽሞ ተስፋ አልቆረጠም። በረዳት ኢንስፔክተር ሲሳይ ተሾመ የሚመራው ቡድን ተጠርጣሪዎቹ ይገኙበታል በተባሉ አካባቢዎች ሁሉ ተሰማርቷል። የሲቪል ክትትሎች በየምሽቱ በስፍራው እየመሸጉ ዳግም ድርጊቱ ከተፈጸመ በሚል ደፈጣ ይዘው ከርመዋል። በቀላሉ የተገኘ መረጃ፣ በዋዛ የተተወ ምልክት አልነበረም።
በፖሊስ መዝገብ ቁጥር ተሰይሞለት የተከፈተው ፋይል በየጊዜው ሪፖርት ይጻፍበታል። የሚመጡ መረጃዎች አይናቁም። ጥቆማዎች፣ ተራ የሚመስሉ ወሬዎችና ጥርጣሬዎች ሁሉ በፖሊስ ዘንድ ዋጋ አላቸው። የቡድን አባላቱ በየቀኑ እየተሰበሰቡ ባገኙት ውጤት ላይ ይወያያሉ፣ይመካከራሉም። መረጃ አፈላልጎ ተጠርጣሪዎችን ማሰስና ውጤት ላይ መድረስ ግን ቀላል አልሆነም። በውጣውረድ ሲባዝኑ የከረሙት ፖሊሶች ፍለጋቸውን አላቆሙም። የሟቹ የመጨረሻ የሞባይል ጥሪ መድረሻ ከሚመለከታቸው ጋር ተቀናጅቶ ምርመራ እየተደረገበት ነው። አሁን የዚያን ዕለት ምሽት በመቶ አለቃው የእጅ ስልክ የት እንደተደወለ መረጃው ደርሷል። ጥሪው በዕለቱ አልጋ እንድትይዝ ትዕዛዝ የደረሳት ባለ ጠላ ቤት ዘንድ አድርሷል።
ፖሊስ መረጃውን ይዞ ወደተባለው ስፍራ አመራ። ሴትዬዋን አግባብቶም ጨዋታ ቢጤ ጀመረ። ባለ ጠላ ቤቷ በአካባቢው ስለሚደረገው ድርጊት አልሸሸገችም። በየጊዜው የተለያዩ ዕቃዎች ለሽያጭ እንደሚቀርቡ ተነፈሰች። ይህኔ የፖሊስ ጆሮዎች ነቁ። አዘናግቶ የዕቃ ሻጮችን ማንነት ጠየቃት። ኮማሪቷ አሁንም አልደበቀችም። የሰዎቹን ልምድና አካላዊ ገጽታ እያስታወሰች አንድ በአንድ ዘረዘረች። አንድ ቀን ፖሊስ ሲደክምበት የከረመው ውጤት ከዳር ደረሰ። ቀንና ሰዓትን ለይተው፣ ስል ጩቤ ወድረው በጨላማው የሚያደፍጡ ዘራፊዎችን ተከታትሎ በእጁ አስገባ። ሦስቱም ለዘረፋ ሲሉ ግለሰቡን በስለት ደጋግመው መውጋታቸውን አመኑ። በእጁ ያገኟቸውን ንብረቶች ስለመሸጣቸው ተናግረው የገዟቸውን ሰዎች ከያሉበት መርተው አሳዩ። የሁሉም የዕምነት ክህደት ቃል ግን በአንድ ዓይነት ሃሳብ የታሰረ ሆነ።«ግለሰቡን ወጋነው እንጂ፣ አልገደልነውም» በሚል።
አሁን ፖሊስ በተጠናከረ መረጃ ያደራጀውን ዶሴ ለፍርድ ቤት አቅርቦ ክስ መስርቷል። ተከሳሾችም በተጠየቁበት ወንጀል ጥፋተኝነታቸው ተረጋግጧል። በፌዴራል ከፍተኛ ፍርድቤት የልደታ ምድብ ሦስተኛ ወንጀል ችሎት የቀረቡት ሦስቱ ሰዎች ክሱን መከላከልና ድርጊቱን ማስተባበል አልቻሉም። ሚያዝያ 16 ቀን 2006 ዓ.ም የፍርድ ቤቱ ዳኞች ተሰይመዋል። ይህ ቀን የመጨረሻው ውሳኔ የሚሰጥበት በመሆኑ ወንበሮች ሞልተዋል። ሦስቱም በተከሳሾች ሳጥን ቆመው የሚሆነውን ለመስማት እየጠበቁ ነው። ዳኛው የክስ ዝርዝሩን አንብበው እንዳጠናቀቁ ቀጣዩን ውሳኔ አስተላለፉ።
ውሳኔ፦
ግለሰቦቹ በተከሰሱበት ከባድ የውንብድና እና ሰው መግደል ወንጀል ጥፋተኞች ሆነው በመገኘታቸው። አንደኛ ተከሳሽ ሞገስ ጸጋዬ፡- በዕድሜ ልክ፤ ሁለተኛ ተከሳሽ፡- ጌታቸው ዋለ በዕድሜ ልክ እንዲሁም ሦስተኛው ተከሳሽ ተስፋዬ በለጠ በሃያ አራት ዓመት እስራት እንዲቀጡ በመበየን መዝገቡ ተዘግቷል።
አዲስ ዘመን ቅዳሜ መጋቢት 7/2011
መልካምስራ አፈወርቅ
