![](https://press.et/wp-content/uploads/2021/04/4.jpg)
በኢትዮጵያ ፪፻፵ ሆስፒታሎችና የህክምና ቤቶች ይገኛሉ
በአስራ አራቱ የኢትዮጵያ ጠቅላይ ግዛቶች ውስጥ ከ፪፻፵ የማያንሱ ሆስፒታሎችና የህክምና ቤቶች ሲገኙ በነዚሁ ሆስፒታሎች ውስጥ ፯ሺ፮፶፩ አልጋዎች፣ ፬፻፹፩ ክሊኒኮችና ፷፩ የጤና ጥበቃ ጣቢያዎች መኖራቸውን በተገኘው ወሬ ለማወቅ ተቻለ።
በአሁኑ ጊዜ ፫፻፳፬ ዶክተሮችና የኦፕራሲዮን ሀኪሞች በኢትዮጵያ በልዩ ልዩ ሆስፒታሎች ውስጥ ተቀጥረው አገልግሎታቸውን በመስጠት ላይ ናቸው። እንዲሁም ፭ ፻፲፬ ነርሶች ፩፻፭ የጤና ጥበቃ መኮንኖች ፩፻ የኮሚኒቲ ነርሶች፣ ፩ሺ፺ ንጽህና ተቆጣጣሪዎች፣ ፩ሺ፮፻፯፭ ዴሬሰሮች፣ ፲፭ ፋርማሲስቶች፣ ፳፯ ረዳት ፋርማሲስቶችና ፪፻ ያህል ሌሎች የህክምንና የህዝብ ጤና ጥበቃ ሰራተኞች እንደሚገኙ ተገለጠ።
የኢትዮጵያ ንጉሰ ነገስት መንግስት የሕዝብ ጤና ጥበቃ ሚኒስቴር ለወደፊቱ ልዩ ልዩ እቅዶችን በስራ ላይ በማዋል ተግባሩን ለመከታተል አስቧል። ከነዚህም እቅዶች ፪ ሺህ በሸታ የያዛቸው ሰዎች እንዲታከሙ ተዘዋዋሪ የሕክምና አገልግሎት ስራውን እንደሚያካሂድ ታውቋል።
መጋቢት 16 ቀን 1958
ጥቅም ፈላጊ ነጋዴ በጥይት ተደበደበ
ከሳይጎን፡- ታ ቫኒህ የተባሉት የቻይና ነጋዴ አስር ሰው በሚገኝበት የወታደር ጓድ ትናንት ሊነጋጋ ሲል በጥይት ተደብድበዋል።
ታቫኒህ በጥይት የተደበደቡት ከአንድ ሳምንት በፊት በሳይጎን የተቋቋመው ልዩ ፍ/ቤት ያለቅጥ ትርፍ በመፈለጋቸውና ይህንኑ ተግባራቸውን ለማሟላት ለመንግስት ባለስልጣኖች ጉቦ በመስጠታቸው ነው። በሳይጎን ውስጥ የተቋቋመው የችግር ማቃለያ ፍ/ቤት በወሰደው እርምጃ በታቫኒህ ላይ የሞት ፍርድ ሲያስተላልፍ የመጀመሪያው ነው ።
ባለቤታቸው ስምንት ልጆቻቸውና ዘመዶቻቸው ታቫኒህ ሲሰቀሉ ከወታደሮች ጋር ይታገሉ ነበር። የሰላሳ ዓመቱ ዕድሜ ያላቸው ታቫኒህ የአንድ ኩባንያ ዴሬክተር ነበሩ። / ሮይተር /
መጋቢት 6 ቀን 1958
ሣቅና ልቅሶ
በሰው ላይ ሲፈራረቁ የሚኖሩ በዓለም ላይ ሁለት ነገሮች አሉ። እነዚህም ሣቅና ልቅሶ ወይም መከራና ደስታ ናቸው። የቀረው የዓለም ኑሮ በሙሉ በዚህ ውስጥ አዳሪ ነውና ሁሉም ሰው በሣቅ ወይም በልቅሶ ወር ተራውን ይገፋል።
ዓለም ሁል ጊዜ ሲራመድ የሚኖረው በነዚህ በሁለቱ መንገዶች ስለሆነ አንድ ጊዜ እንቅፋት ሲመታው አንድ ጊዜ እንቅፋቱን ሲዘለው የእግሩን ቁስል ሲያስርና ሲፈታ ይኖራል።
ሰው ብዙውን ጊዜ በእጁ ስራ ሲለማ፣ ብዙውን ዘመን በእጁ ስራ ይጠፋል። በዚህም በእጁ ስራ ሲለማና ሲጠፋ በሚኖርበት ዘመን በጣም ከባድ ሆኖ የሚመዘነው ከስጋዊ ዘመን በኋላ ከመከራ የሚያደርስ ስራ ሰርቶ መገኘቱ ላይ ነው። ለምሳሌ ዛሬ ዓለም ሙሶሊኒን አይንህ ላፈር ብሎ እንዳረገው በቅድመ እግዚአብሄርም እሳቱ የማይጠፋ ትሉ የማያንቀላፋ ሲኦል አጽመ ርስት ሆኖት በፍጹም ስቃይ እንዲኖር ፍርዱን ይቀበላል።
ዓለምን ያለፈተና ሙላትን ያለዋና የሚደፍር ስለሌለ ጊዜ እንደመዶሻ ፈተና እንደመዶሻ ሰው እንደብረት ዓለም እንደመስፍ ሆኖ ከመኖሩ የተነሳ ሀይለኛ እንዳጠቃ፤ ደካማ እንደተጠቃ አይቀርም። ሁሉም ከፈተናው ውስጥ እየገባ ድርሻውን ይቀበላል።
ወልደ ጊዮርጊስ ወ
ነሀሴ 8 ቀን 1935
የሶቪየት ገበሬዎች የፈለጉትን ለምምረት ተፈቀደላቸው
የሶቪየት ኅብረት ጠቅላይ ሚኒስትር ሚስተር ክሩቼቭ ማንኛውም ገበሬ ከእርሻው ለመንግሥት የሚያስፈልገውን ከሰጠ በተረፈው የፈለገውን እህል ሊዘራ የፈለገውን ዓይነት ከብት ሊያረባ የሚችል መሆኑን በመግለጥ ያደረጉት ንግግር ታትሞ የወጣ መሆኑ ታውቋል።
ይህም የተገለፀው ለማዕከላዊ ኮሚኒስት ፓርቲ ኮሚቴ የካቲት ፳ ቀን ፶፮ ዓ.ም ሲሆን፤ የሶቪየቱ ጠቅላይ ሚኒስትር ይህንን የመሰለ ርምጃ የውጪ ጉዳይ ሚኒስትር ቫያስቺላቭ ሞሎቶቭ ባይቃወሙ ኖሮ እ.ኤ.አ በ፲፱፻፶፭ ዓ.ም ሊጀመር ታቅዶ እንደነበር ገልጠዋል።
ጠቅላይ ሚኒስትሩ ባደረጉት ንግግር ላይ የሶቪየት ንብረት ኢንዱስትሪዎች ወደ ውጪ አገሮች ለመላክ የሚችሉ ተስማሚ ዕቃዎችን በብዙ ማቅረብ የሚያስፈልጋቸው መሆኑንና በዚህ ሳምንት በወጣው አዲስ ሕግ መሠረት የሸመገሉ ሰዎች የሚችሉትን ሥራ ከሠሩ ግማሽ ደመወዛቸው የተፈቀደላቸው መሆኑን ተናግረዋል።
ከዚህም በማያያዝ በአሁኑ ጊዜ ለሀገሩ ኤኮኖሚ የማይሠሩ ብዙ ሥራ ፈቶች የሚገኙ መሆናቸውንና እነርሱንም በሥራ ላይ ማዋል አስፈላጊ መሆኑን በማሳሰብ ማንኛውም የሶቪየት ተወላጅ በሥራ ላይ እንዲውል ለማድረግና ለዚህም ፕሮግራም ጥሩ መቆጣጠሪያ ሊሆን የሚችለው ለማንኛውም የሶቪየት ተወላጅ ጠቅላላ ሥራውን ለማስረዳት የሚችል የሥራ ፓስፖርት እንዲታደል ያሻል ሲሉ አስረድተዋል።
(ሮይተር)
የካቲት 30 ቀን 1956
አዲስ ዘመን መጋቢት 27/ 2013 ዓ.ም