![](https://press.et/wp-content/uploads/2021/04/film-frame-film-roll-symbol-vector-20957541.jpg)
በዳግም ከበደ
ቀን አልፎ ቀን ሲተካ፤ ዘመናት ነጉደው በአዲስ ሲለወጡ፤ በተመሳሳይ የሰው ልጅ በየፈርጁ የኑሮ ዘይቤውን፣ አመለካከቱን እና የስልጣኔ ደረጃውን ከጊዜ ጋር እየተሽቀዳደመ ይቀያይራል። ይህ ብቻ አይደለም። በተፈጥሮ ኡደት የሚከሰቱ አስቸጋሪ ለውጦችን የሚቋቋምበት ብልሃትም ይዘይዳል። ስሪቱም ራሱን ከሁኔታዎች ጋር አላምዶ እንዲኖር ይፈቅዳል። ይህ ስጦታው ደግሞ በርካታ ዘመናትን አሻግሮ አሁን ያለንበት አስደናቂ የኑሮ ደረጃ ላይ አድርሶታል።
ለዛሬ የፋሽን አምዳችን በዚህ ኡደት ደምቀውና ጎልተው ስለተገኙ ጉዳዮች ለማንሳት ይወዳል። ስለ “ፊልምና የቀይ ምንጣፍ ፋሽን ትርኢት” ጥቂት እንላለን። እንደሚታወቀው ዓለማችን ላይ የሰው ልጆች ጥበብ፣ የስልጣኔና የውስጥ ስሜት መገለጫ ነፀብራቅ እንደሆነ ተደርጎ የሚወሰደው የፊልም ኢንዱስትሪ ነው። ይኼ ዘርፍ ደግሞ ብቻውን የማይቆምና በብዙ መሰል ሙያዎች የሚደገፍ ነው። ከዚህ መካከል ደግሞ የፋሽን ኢንዱስትሪው ከፊልም ሙያ ጋር ቀዳሚ ቁርኝት እንዳለው ባለሙያዎች ይገልፃሉ።
“ፊልምና ፋሽን ምን አገናኛቸው?” በማለት የጠየቃችሁ እንደሆን የሚከተለውን ሃሳብ ለማንሳት ይገደናል። ባለፉት ዘመናት በዓለማችን ላይ የፊልም ኢንዱስትሪ ከእለት እለት እያደገ የሰው ልጆችን ማህበራዊ፣ ምጣኔ ሀብታዊና ፖለቲካዊ ጉዳዮችን እየዳሰሰ እዚህ ደርሷል። ፊልም የነበሩና የሚታዩ ጉዳዮችን አጉልቶ በአዝናኝና አሳዛኝ መንገድ ከማንፀባረቅ ባሻገር አዳዲስ መላምቶችን በቴክኖሎጂ ታግዞ በማመላከት ቀጣይ የስልጣኔ ጉዞው ምን እንደሚመስል አይንና ጆሮ በመሆን የሚያሳይ ጭምር ነው።
የፋሽንና ፊልም ቁርኝት
ሁለቱ ዘርፎች ተመጋጋቢና ጥብቅ ቁርኝት ያላቸው መሆኑን ሙያው ውስጥ የሌለ ማንኛውም ሰው ሊያውቀው የሚችለው ጉዳይ ነው። ይህን ለመረዳት ጥሩ ፊልም ተከታታይ ብቻ መሆን በቂ ሳይሆን አይቀርም። ምክንያቱ ደግሞ ግልፅ ነው። በፋሽን ዘርፉ የሚተዋወቁ አዳዲስ የመዋቢያ አልባሳት፣ ጌጣጌጦች እንዲሁም መሰል ቁሳቁስ በቀዳሚነት የሚተዋወቁት በተለያዩ ርእሰ ጉዳዮች ላይ አጠንጥነው በሚሰሩ ፊልሞች ላይ ነው። ፊልሞች በዲዛይነሮች በተሰሩና ባጌጡ አልባሳት የተዋቡ ተዋኒያን ከሌሉበት ባዶ ነው። አልባሳቱም ያለ ተዋኒያኑ ነብስ ያጣሉ።
በሲኒማ ቤቶች ውስጥ የሚታዩ አዳዲስ የፈጠራ ውጤት የታከለባቸው መዋቢያዎች ከተማውን በፍጥነት ያዳርሱታል። የወጣቶችን ቀልብም ይሰቡበታል። ምን ይኼ ብቻ በፊልሙ የተለያዩ አገራት፣ ብሄረሰቦችና የማንነት መገለጫ የሆኑ ባህላዊ አልባሳትም ይተዋወቁበታል። በዚህ የተነሳ ፊልምና ፋሽን የተለየ ግንኙነት እንዳላቸው ይገለፃል።
የቀይ ምንጣፍ ፋሽን ትርኢት
“የቀይ ምንጣፍ ፋሽን” የሚለው ስም ለአንዳንዶቻችን አዲስ ሊሆን ይችላል። የፊልም ሽልማት ስነስርዓቶችን የሚከታተሉ አድናቂዎች ግን በዚህ ስም ብዙም ላይገረሙና ምንነቱን ላይጠይቁ ይችላሉ። ምክንያቱም በዓለማችን ላይ በዓመቱ ምርጥ ፊልም፣ ተዋንያን በሚሸለሙበት ሰዓት የሚካሄድ እጅግ ተወዳጅ ስነስርአት ስለሆነ ነው።
የቀይ ምንጣፍ ስነስርዓት በተለይ በግራሚ፣ ኦስካርና ጎልደን ግሎብን በመሳሰሉ ታላላቅ የፊልምና የሙዚቃ ሽልማት ስነስርዓቶች ላይ የሚደረግ ቀዳሚ ዝግጅት ነው። ዝግጅቱ ተዋንያን ተፅእኖ ፈጣሪ ሰዎች፣ አንዲሁም በሙዚቃና ፊልም ኢንዱስትሪው ላይ ዝናን ያተረፉ ባለሙያዎች እጅግ ውብ በሆኑ ስብእናቸውን በሚገልፁ አልባሳት ተውበው በቀይ ምንጣፍ ላይ የፎቶና የቃለ መጠይቅ ስነስርዓት የሚያካሂዱበት ነው።
በዚህ ዝጅግት ላይ የዓለማችን ታዋቂ የፋሽን ዲዛይነሮች በታዋቂና ተወዳጅ ተዋንያንና ተፅእኖ ፈጣሪ ሰዎች አማካኝነት ስራዎቻቸውን ያስተዋውቃሉ። ታዲያ በዲዛይን ስራዎቻቸው ተወዳጅም ተነቃፊም ሲሆኑ መመልከት አዲስ አይደለም። በቀይ ምንጣፍ ስነስርዓቱ ላይ በተለይ ታላላቅ የሚዲያ ተቋማትና ጋዜጠኞች ስለሚገኙ አዳዲስ ፋሽን የሚያስተዋውቁ ተዋንያን ልዩ ትኩረት ያገኛሉ። በዚህ ወቅት ከፍተኛ አድናቆት የሚያስገኙ አልባሳት ትኩረት እንደሚያገኙ ሁሉ ከስነ ምግባር አንፃር ደግሞ ነቀፌታን የሚያስተናግዱትም በተመሳሳይ የመገናኛ ብዙሃን አፍ ውስጥ ገብተው ሲብጠለጠሉ ማየት የተለመደ ነው።
ፈልምና ፋሽን በመግቢያችን ላይ ካስቀመጥነው ጉዳይ በዘለለ “በቀይ ምንጣፍ ፋሽን” ትርኢትም ጥብቅ ግንኙነት አላቸው ማለት ነው። እንዲያውም ሁለቱ ዘርፎች የአንድ ሳንቲም ገፅታ ናቸው ብንል ማጋነን የሚሆን አይመስለንም። ይኼን ካልን ዘንዳ ከዚህ በሚከተሉት ምእራፎች ላይ በኢትዮጵያ ውስጥ ይኼ ልምድ ምን ይመስላል የሚለውን ጉዳይ ለመመልከት እንሞክር።
ፊልም-ቀይ ምንጣፍ- ፋሽን- በኢትዮጵያ
እንደ እድል ሆኖ ሁለቱም ዘርፎች በኢትዮጵያ ውስጥ ገና በማደግ ላይ የሚገኙ ዘርፎች ናቸው። ይሁን እንጂ ጅምር ሂደቱ ግን የተስፋ ብልጭታ የሚታይበት ነው። ፊልሙ ሄድ መለስ እያለም ቢሆን የሚያበረታቱ ይበል የሚያሰኙ የጥበብ ውጤቶችን እያሳየ ነው። የፋሽን ዘርፉም እንደዚያው። ነገር ግን አንድ ሊሰመርበት የሚገባው ጉዳይ ሁለቱም ዘርፎች ብተገነቡና በደረጁ ተቋማት ሳይሆን በግለሰቦች ጥረትና ጥንካሬ የሚመሩ መሆናቸው ነው። ወደፊት ግን በዘርፉ የተደራጁ አካላት የሚያደርጉት ጥረት መልካም ውጤት ይዞ እንደሚመጣ ከወዲሁ የሚያመላክቱ እንቅስቃሴዎች እየታዩ መሆኑም የሚካድ ሃቅ አይደለም።
የሽልማት ስነ ስርአትና ፋሽን
በኢትዮጵያ አሁን…አሁን በተለያዩ ዘርፎች ላይ ውጤታማ ስራ ለሰሩ ግለሰቦችም ሆነ ተቋማት እውቅናና ሽልማቶችን መስጠት እየተለመደ ነው። ይኼ ስነስርዓት ከጊዜ ወደ ጊዜ እድገት እያሳየ መሆኑንም የሚያመላክቱ ዝግጅቶችን ማስተዋል እንችላለን።
በኢትዮጵያ ውስጥ የተለያዩ ሽልማቶችን ማንሳት እንችላለን። በፊልሙ ዘርፍ ጉማ፣ በሙዚቃው ለዛ እንዲሁም በስነ ፅሁፍና መሰል የኪነ ጥበብ ጉዳዮች ላይ “ሆሄ” አዋርድን ማንሳት እንችላለን። ታዲያ በነዚህ ዝግጅቶች ላይ በሚደረጉ የቀይ ምንጣፍ ስነስርአቶች የፋሽን ዲዛይነሮች የፈጠራ ውጤት የሆኑ አልባሳት በተዋንያንና የኪነ ጥበቡ አለም ተፅእኖ ፈጣሪዎች ተሽቀርቅረው መታየት ጀምረዋል።
በዚህም የሁለቱ ዘርፍ ትስስርና የጋራ ውጤቶችንም ማየት እየቻልን ነው። ዲዛይነሮችም ስራዎቻቸውን ለህዝብ ይፋ የሚያደርጉበት ሁነኛ አማራጭ ያገኛሉ። ተወዳጅና የራስ ማንነትን ያልለቀቁ ስራዎች ሰርተው ሲገኙ ይሞገሳሉ። በተቃራኒው ደግሞ የሚያስነቅፍና አፈንጋጭ ስራዎች ሲያስተዋውቁ ከማህበረሰቡ ነቀፌታ አያመልጡም። እስካሁን ድረስ ላነሳነው ሃሳብ ማጠናከሪያ እንዲሆነን በሚከተለው የመውጫ አንቀፅ ላይ የቅርብ ጊዜ ትዝታን አንስተን ለመሰነባበት እንሞክር።
በሰባተኛው ጉማ ሽልማት ሥነ ሥርዓት ላይ የታደሙ ባለሙያዎች ለብሰዋቸው የነበሩት አልባሳት በተለይ በማኅበራዊው ሚዲያ ላይ ባለፈው ሳምንት ዋነኛ መነጋገሪያ ሆነው ነበር። በሽልማቱ ላይ ታዋቂ የኪነ ጥበብ ሰዎች ታዳሚ ነበሩ፡፡ ከመካከላቸውም ጥቂት የማይባሉት የተገኙት ለየት ባሉ ባሕላዊ እና ዘመናዊ አልባሳት ተውበው ነው። በተለይ አንዳንዶች የለበሷቸው ለየት ያሉ አልባሳት አድናቆትን ሲያስገኝላቸው የአንዳንዶቹ ደግሞ በማኅበራዊ ሚዲያ ላይ በስፋት ከመጋራቱ በተጨማሪ ትችትም ገጥሟቸዋል።
ይኼ የሽልማት ስነስርዓት የፊልምና የፋሽን ትስስርን ያሳየ፣ በየአመቱ እያደገ የመጣ እንዲሁም ለሌሎች ምሳሌ የሚሆን ተወዳጅ ዝግጅት መሆኑን ግን ከመሰናዶው ጥራትና ከገነባው እውቅና አንፃር መዝኖ መፍረድ ለማንም ከባድ አይሆንም። ቸር እንሰንብት!
አዲስ ዘመን መጋቢት 27/ 2013 ዓ.ም