![](https://press.et/wp-content/uploads/2021/04/20210322_175116.jpg)
በጋዜጣው ሪፖርተር
በአንድ ወቅት ወፈፌው ወይም እብዱ ሰው በመባል በማህበረሰቡ ዘንድ ይጠራ ነበር። ኢንዶኒዢያዊ ሳዱማን። በአሁኑ ወቅት ጀግና ለመባል በቅቷል። ጀግና ያሰኘው ደግሞ በሚኖርበት አካባቢ የሚገኝንና ምንም አይነት ዛፍ ያልነበረበትን 250 ሄክታር መሬት ባንያንና ፊከስ በተሰኙ የዛፍ ዝርያዎች በደን መሸፈን በመቻሉ መሆኑን ሰሞኑን ኦዲቲ ሴንትራል በድረገጹ ያስነበበው መረጃ ያመለክታል።
ሳዲማን ይህን ተአምር ለመስራት የበቃበት መንገድ በራሱ ተአምር የሚያሰኝ ነው። ደኑን ያለማው በአንድ እጁ በመስራት ብቻ በመሆኑ ነው። የደን ልማቱን የጀመረው እኤአ በ1990 ሲሆን፣ ይህን ስራ እንዲያስብ ያረገው ችግር መታየት የጀመረው ግን በ1960 መሆኑን ደረገጽ ያመለክታል። በዚህ ወቅት በሀገሪቱ ማእከላዊ ግዛት ከላው ተራራ በስተደቡብ ክፍል ከፍተኛ የሆነ የሰደድ እሳት ተቀስቅሶ በመቶዎች የሚቆጠር ሄክታር ደንን ወደ አመድነት ይቀይራል። በዚህም ያ በደን ተሸፍኖ የኖረ ተራራ ራቁቱን ይቀራል።
ይህ ጀግና የወደመውን ደን ወደ ቀድሞ ይዞታው ለመመለስና ለራሱና ለአካባቢው ማህበረሰብ የተሻለ ሕይወት ለማምጣት በራሱ ቆርጦ እስከ ተነሳበት ጊዜ ድረስ ፣የዎኖጊሪ አስተዳደር መንደሮች ለአስርት አመታት ያህል ለድርቅና ረሃብ ተጋልጠው ቆይተው ነበር።
ሳዲማን የ40 አመት ጎልማሳና ከብት አርቢ አርሶ አደር ሲሆን.፣ በሚኖርበት አካባቢ ድርቅ እንዲከሰትና ንጹህ ውሃ ማግኘት ከባድ እንዲሆን ያደረገው ምክንያት የተክሎች አለመኖር መሆኑን ለመጀመሪያ ጊዜ የደረሰበት እሱ ነው በሚልም ይታወቃል።
ሳዲማን የትኛውም ባለስልጣንና አስተዳደር ትኩረት ያልሰጠውን ይህን ችግር ለመፍታት ከፍተኛ ትኩረት መስጠቱን ሲቀጥል በርካታ ተቃውሞዎች ገጥመውታል። መንግስት ትኩረት ባልሰጠው ጉዳይ አለ ምን ቤት በሚል ማህበረሰቡ አብጠልጥሎታል፤ ቀውስ፤ እብድ እስከ መባልም ደርሷል ።
አንድ ግለሰብ አንድ መቶ ሄክታር የወደመ ደንን ወደ ቀድሞ ይዞታው እመልሳለሁ ብሎ መነሳት ሲታሰብም ጤነኛ ላያሰኝ ይችላል ያለው መረጃው፣ ይሁንና ይህ እሱ ያሰበውን አይነት ስራ በአለም የተለያዩ አካባቢዎች በተለያዩ ጊዜያት ሆኖ የታየ መሆኑ ግን መስራት እንደሚቻል ያመለክታል ይላል።
ሳዲማንም ይህን አሳክቶ የአካባቢው ጀግና ለመባልም በቅቷል። ይህን ለማሳካት የወሰደበት ጊዜ አስር አመት ብቻ ነው ሲል ያብራራል።
ይህ ጀግና ገንዘቡን አውጥቶ የባንያን ዛፍ ችግኞችን መግዛት ከገባ በኋላ የደን ልማቱ ይበልጥ ስኬታማ እንዲሆን በሚል ትላልቅ ችግኞችን መትከል ላይ ማተኮር ይጀምራል። ይህ ስራ ሌላ መስዋእትነት እንዲከፍል ያደርገዋል። እንደ አይኑ ብሌን የሚያያቸውን ከብቶችን እስከመሸጥ ደርሷል። ይሄኔ ደግሞ ሰዎች ይህ ሰው ለየለት አበቃለት ማለት ውስጥ ገቡ። እሱ ግን ተስፋ በመቁረጥ ፈንታ ተልእኮውን ለማሳካት የሚያደርገውን ጥረት ማጠናከር ውስጥ ገባ።
እሱ ግን በአካባቢው ደንና እና የመሳሰሉትን ማልማት የተጎዳውን አካባቢ አሳምሮ ወደ ቀድሞ ይዞታው እንደሚመልሰው በሚገባ ያውቃል። በየቀኑ የባንያን እና ፊከስ ችግኞችን መትከሉን አጠናክሮ ቀጠለ። እነዚህ የዛፍ ዝርያዎች መሬት ውሃ እንዲቋጠር ለማድረግ እንደሚጠቅሙ እና በአካባቢው ያለውን ድርቅ በዘላቂነት እንዲቀር ማድረግ እንደሚያስችሉ ያውቃል።
ሳዲማን በ25 አመታት ውስጥ በአንድ እጁ ከ11 ሺ በላይ ዛፎችን አልምቷል፤ የሚፈልገው ለውጥ ለማየት የወሰደበት ጊዜ ግን አስር አመታት ናቸው። የተከላቸው በሺዎች የሚቆጠሩ ችግኞች እያደጉ ሲመጡ፣ በአካባቢው ሌሎች የተከል አይነቶች መብቀል ጀመሩ። የአካባቢው አርሶ አደሮች በአመት አንዴ ያመርቱ የነበረበት ሁኔታ በዚህ ጀግና የደን ልማት ውጤታማነት ሳቢያ በአመት ሁለት ጊዜ፣ አንዳንዶች ደግሞ ሶስቴ የሚያመርቱበት ሁኔታ ተፈጠረ።
የአካባቢው ማህበረሰብም ዝናብ ቀድሞ በሚያውቀው ፈር መሰረት መጣል መጀመሩን ሲመለከት የዛፎችን ፋይዳ በሚገባ መገንዘብ ውስጥ ገባ። ሳዲማንም እብድ ከመባል ወጥቶ ጀግና እየተባለ በክብር ይወደስ ጀመር። በዚህ ስራው የሀገሪቱ መንግስት ካልፓታሩ የተሰኘውንና ኢንዶኔዢያ ለዜጎች የምትሰጠውን ከፍተኛ ሽልማት እኤአ በ2016 ሰጠው።
አዲስ ዘመን መጋቢት 27/ 2013 ዓ.ም