ሚኒስቴሩ በስድስት ወራት፡- 98 ነጥብ 96 ቢሊዮን ብር ሰብስቧል

@ 509 ሚሊዮን ብር የሚያወጡ የኮንትሮባንድ ዕቃዎችን ይዟል

@ ከባድ ስርቆት የፈፀሙ 26 ሠራተኞቹን አሰናብቷል

 አዲስ አበባ፡- የገቢዎች ሚኒስቴር ባለፉት ስድስት ወራት 122 ነጥብ18 ቢሊዮን ብር ለመሰብሰብ አቅዶ 98 ነጥብ 96 ቢሊዮን ብር መሰብሰቡን፤ 509 ሚሊዮን የሚያወጡ ዕቃዎች በኮንትሮባንድ ሊገቡና ሊወጡ ሲሉ መያዙን እንዲሁም በስነምግባር ጉድለት አስተዳደራዊ ቅጣት ከወሰደባቸው 98 ሠራተኞች ውስጥ 26ቱ ከባድ ስርቆት በመፈፀማቸው ከተቋሙ ማሰናበቱን አስታወቀ፡፡

 የገቢዎች ሚኒስትር ወይዘሮ አዳነች አቤቤ ትናንት የተቋማቸውን የስድስት ወራት የእቅድ አፈፃፀም ሪፖርት ለህዝብ ተወካዮች ምክር ቤት ባቀረቡበት ወቅት እንዳስታወቁት፤ በግማሽ ዓመቱ ከአገር ውስጥ ታክስ፣ ከወጪ ንግድ ቀረጥና ታክስ፣ ታክስ ካልሆኑ ገቢዎች እንዲሁም ከሎተሪ ሽያጭ የተጣራ ትርፍ በጥቅሉ 122 ነጥብ 18 ቢሊዮን ብር ለመሰብሰብ ታቅዶ 98ነጥብ 96 ቢሊዮን ብር በመሰብሰብ  የእቅዱን 80 ነጥብ 76 በመቶ መፈፀም ችሏል፡፡ ገቢው ካለፈው በጀት ዓመት ተመሳሳይ ወቅት ጋር ሲነፃፀር 7 ነጥብ 78 ቢሊዮን ብር ብልጫ ያለው ሲሆን፤ አፈፀፃሙ የ8 ነጥብ 66 በመቶ ዕድገት አሳይቷል፡፡

 በግማሽ ዓመቱ ከተሰበሰበው ጠቅላላ ገቢ ውስጥ ታክስ ገቢ 62 ነጥብ 60 በመቶ፣ የውጭ ንግድ ቀረጥና ታክስ ገቢ 37 ነጥብ 28 በመቶና የሎተሪ ሽያጭ የተጣራ ትርፍ ገቢ 0ነጥብ 12 በመቶ ድርሻ ማበርከቱን ሚኒስትሯ አመልክተዋል፡፡ 

 እንድ ሚኒስትሯ ማብራሪያ ከዓለም አቀፍ ንግድ ባህሪያት አንፃር አስተማማኝ ያልሆነው የውጭ ንግድ ቀረጥ ድርሻው ዝቅ ያለ መሆኑና በሂደትም የላቀውን ድርሻ መያዝ ያለበት የአገር ውስጥ የገቢ ምንጭ ስለሆነ በዚህ ረገድ የታየውን መሻሻል አጠናክሮ መቀጠል ይገባል፡፡

 ሚኒስትሯ በበጀት ዓመቱ በተደረገው የገቢና ወጪ ኮንትሮባንድን የመከላከል ሂደት በድምሩ 509 ሚሊዮን የሚገመቱ የተለያዩ ዕቃዎችን መያዙን ጠቁመው፤ ወደ አገር ውስጥ በኮንትሮባንድ ሊገቡ ሲሉ የተያዙት 394 ነጥብ 25 ሚሊዮን ብር የሚገመቱ ዕቃዎች  መሆናቸው፤ ይህም ከአምና ተመሳሳይ ወቅት ጋር ሲነፃፀር 16 ነጥብ 8 በመቶ ቅናሽ ያለው መሆኑ፤ በተጨማሪም  114 ነጥብ 65 ሚሊዮን ግምት ያላቸው ልዩ ልዩ የግብርና እና የኢንዱስትሪ ምርቶች፣ የከበሩ ማዕድናትና የውጭ አገር የገንዘብ ኖቶች የተያዙ ሲሆን፤ ካለፈው ተመሳሳይ ወቅት ጋር ሲነፃፀር የ9 ነጥብ 1 በመቶ ብልጫ ማሳየቱን አመልክተዋል፡፡ 

ሚኒስትሯ አያይዘውም ትልቁን ድርሻ የሚይዙት የውጭ አገር የገንዘብ ኖቶች በመሆናቸው መስሪያ ቤቱ በኮንትሮባንዱ በቀጥታ የተሳተፉ 442 ሰዎች በቁጥጥር ስር እንዲውሉ መደረጉን ገልጸዋል፡፡
 ሚኒስቴሩ  ከተገልጋይ የሚነሳለትን ቅሬታ መነሻ በማድረግ የስነምግባር ጉድለት የታየባቸው 98 ሠራተኞ አስተዳደራዊ ቅጣት እንዲቀጡ ያደረገ መሆኑን ሚኒስትሯ ጠቅሰው፤ ከዚህ ውስጥ ከባድ ስርቆት የፈፀሙ 26 ሠራተኞች ከተቋሙ መሰናበታቸውን፤ በዘላቂነት ለውጡን ለማምጣት የተደከመባቸውንና ልምድ ያላቸውን ሠራተኞች ላለማጣት አስቀድሞ ማስተማር፣ በስነ ምግባር ማነፅና የአስተሳሰብ ለውጥ ማምጣት እንደሚገባ፤ ግብር ከፋዩም የሠራተኛውን ተጋላጭነት ተጠቅሞ ከመደለልና ጉቦ ከመስጠት እንዲቆጠብ በተከታታይ መሥራት እንደሚያስፈልግ  አስገንዝበዋል፡፡

 ባለፉት ስድስት ወራት የታክስ ህግ ተገዢነትን ከማረጋገጥ አኳያ የተከናወኑ ጥረቶችና መልካምከማረጋገጥ አኳያ የተከናወኑ ጥረቶችና መልካም ውጤቶች ቢኖሩም ከአጠቃላይ ነባራዊ የፖለቲካ ኢኮኖሚ ሁኔታው በሚፈልገው ልክ ካለመቀየሩ ጋር ተዳምሮ  የታክስ አስተዳደሩ  የኢኮኖሚ አሻጥር ዋነኛ መገለጫው በመሆኑ አሁንም በከፍተኛ ትኩረት ከህግ አስከባሪዎችና ከፍትህ አካላት ጋር በቅንጅት የሚሠራ መሆኑን ሚኒስትሯ ተናግረዋል፡፡

የህዝብ ተወካዮች ምክር ቤት አባላት በበኩላቸው  ሚኒስቴሩ በቀጣዮቹ ስድስት ወራት ያሉትን የገቢ አቅሞች አሟጥጦ በመጠቀም አፈፃፀሙን ማሳደግ እንደሚገባው ጠቁመው፤ የፀረ ኮንትሮባንድ ትግሉ በሚፈለገው ደረጃ እንዲጠናከርና በአገሪቱ የተፈጠረውን አለመረጋጋት በመጠቀም እየተስፋፋ ያለውን ህገወጥነት ለመከላከል ከሚመለከታቸው ባለድርሻ አካላት ጋር በመቀናጀት መንገድ መሥራት እንደሚያስፈልግ አሳስበዋል፡፡

  የሚኒስቴሩ መረጃ እንደሚያመለክተው፤ ባለፉት ስድስት ወራት 55 የተጨማሪ እሴት ታክስ ኦፕሬሽን ተከናውኖ ያለደረሰኝ ግብይት ሲፈፅሙ የተገኙ 64 ትላልቅ ድርጅቶች እጅ ከፍንጅ ተይዘዋል፡፡ በተጨማሪም 126 ድርጅቶች ሐሰተኛ ግብይት በተደረገው ምርመራ የተረጋገጠ ሲሆን፤ 155 ድርጅቶች ላይ የምርመራ (ኢንቨስትጌቲቭ) ኦዲት በማድርግ ሁለት ቢሊዮን የግብርና ታክስ ማጭበርበር ግኝት ተገኝቷል፡፡  

አዲስ ዘመን የካቲት 1/2011
በማህልት አብዱል