ህብረ ብሄራዊ በዓል

የጥምቀት በዓል ሁሉም ሰው ያለ ልዩነት የሚያከብረው  ነው። ቋንቋ ፣ዘር፣ብሄር ሳይመረጥ ሁሉም ሰው በሚችለው ቋንቋና ባህል  ዘምሮና ዘፍኖ፤ አሸብሽቦና አጨብጭቦ፤ ጨፍሮና ደንሶ  ደስታውን የሚገልጽበት ነው። ወጣቶች ወንድ ሴት ሳይሉ በባህላዊና ዘመናዊ ልብሶች ተውበውና  አምረው  በተለይ በአዲስ አበባና በአንዳንድ ከተሞች በጥንድ እና በቡድን ሃርሞኒካ  እየነፉ የሚደንሱበትና የሚዝናኑበት በዓል ነው።በገጠርም ባህላዊ ክዋኔዎችን በመከወን ለበዓሉ ድምቀት ይሰጡታል፡፡ በሁሉም አካባቢዎች አዛውንቶች በአገር ባህል አልባሳት ተውበው  የሚታደሙበት  ነው።

ህፃናት፣ ወጣቶች፣  አዛውንቶች  ብቻ በሁሉም የዕድሜ ክልል ያሉ የህብረተሰብ  ክፍሎች  በዘራቸውና በቋንቋቸው ሳይሆን በሰውነታቸው ብቻ የሚከባበሩበት  በዓል ነው። ሰዎች  በሰውነታቸው ብቻ ተያይተው፣ ተዋደውና ተግባብተው  ለዘለቄታዊ  ህይወታቸው (በትዳር)  አብሮ  ለመኖር እስከመተጫጨት የሚደርሱበት  በዓመት አንድ ጊዜ የሚከበር  ሃይማኖታዊ በዓል ነው።

ይሄ የሚያሳየው ጥምቀት በክልልና በብሄር የተገደበ ፤ በቋንቋ  የጠበበ ሳይሆን በመላው ሀገሪቱ የሚከበር በዓል ሲሆን የሚያከብረው ደግሞ ከእምነቱ ተከታዮች በተጨማሪም የሌሎች እምነት ተከታዮች ጭምር አደባባይ ወጥተው በጋራ በመሆን ነው።ይሄም በዓሉን ልዩ ያደርገዋል።ይሄም ነው ጥምቀት የሁሉም የአንድነት በዓል  ነው ለማለት የሚያስደፍረው።

የአዲስ አበባ ከተማ ነዋሪ «ፍቅር ያሸንፋል ማህበር» አባላት  እህትና ወንድም  ሙስሊሞች በክርስትና ዕምነት ተከታዮች ዘንድ ዛሬ የሚከበረውን የጥምቀት በዓል ያማረና የደመቀ ይሆን ዘንድ  በተለይም በርካታ ምዕመናን የሚሰበሰቡበትን  ጃንሜዳን  በበዓሉ ዋዜማ በማፅዳት እና ቆሻሻውን በማቃጠል  አካባቢውን ንጹህ በማድረግ  አለኝታነታቸውን አሳይተዋል። የክርስቲያን ወንድምና እህቶቻችን  የጥምቀት በዓል የእኛም በዓል ነው ብለው  በመነሳሳት አንድ አይነት  ቲሸርቶች አዘጋጅተው  በጀርባውም  «ዘረኝነት ይውደም! ኢትዮጵያዊነት ይለምልም!»  የሚል  መልዕከት  በመልበስ  ጭምር  አጋር መሆናቸውን አስመስክረዋል።ዘረኝነት ለማንም ለምንም እንደማይጠቅም መልዕክት በማስተላለፍም የጥምቀት በዓል እንደከዚህ ቀደሙ በፍቅር ፣ በአንድነት ፣ በመተሳሰብ  እንዲከበር የበኩላቸውን ሚና ተወጥተዋል።

የሙስሊሙ ማህበረሰብ ለክርስቲያን ወገኑ እና   ለጥምቀት በዓል ያለውን አክብሮት ሲገልጽ ይሄ የመጀመሪያው  አይደለም።  በአማራ ክልል በተለይም በደሴ  የሚገኙ ሙስሊሞች የጥምቀት በዓል ተጠናቅቆ ታቦተ ህጉ ወደ መንበሩ ሲመለስ« አልሀዲሊላህ ታቦታችን በሰላም ገባ»  ሲሉ ኖረዋል።አሁንም ይሄን ሃይማኖታዊ አክብሮታቸውንና አብሮነታቸውን  እንደጠበቁ ቆይተዋል።ዛሬም በጋራ እያከበሩ ናቸው። በዚህ እናም በሌሎችም  ተግባሮቻቸው «እስላም ክርስቲያኑ የማይለይበት ከተማ» እስከመባል በቅተዋል።ይሄም መልካም ታሪክ  ሆኖ በየዘመኑ ሲታወስ ይኖራል፡፡

ኢትዮጵያውያን ሙስሊም ክርስቲያን ሳይሉ በመከባበር፣በመቻቻልና በመተሳሰብ በዓልን ተጠራርተው በጋራ አክብረዋል።የጥምቀት በዓልን ደግሞ የሚያከብሩት እንዲህ አሁን እንደምናየው ጭምር በዓሉ ያማረ እንዲሆን ከመመኘትም ባለፈ አብረውና ተባብረው የበዓሉን ማክበሪያ ቦታዎች  በማጽዳትና በዓሉ በየአካባቢው በሰላም እንዲጠናቀቅ  በጋራ  በመስራት  ነው።

ጥምቀት ህብረ ብሄራዊ በዓል ነው ለማለት የሚያስገድደው ብሄር ፣ዘር፣ቋንቋ፣ ፆታ፣ ዕድሜ  እና ቀለም ሳይለይ ሁሉም ሰው በአደባባይ ወጥቶ የሚያከብረው ሃይማኖታዊ በዓል በመሆኑ ነው። ይሄም  ከመላው ዓለም የሚመጡ የውጭ አገር ጎብኚዎች (ቱሪስቶች)ን  ጭምር የሚያስደንቅ ነው።ይሄ ድንቅ በዓልም በዓለም ቅርስነት  እንዲመዘገብ አስፈላጊውን ዝግጅቶች የማሟላት ሥራ በባህልና ቱሪዝም ሚኒስቴር በኩል እየተሰራ ይገኛል።

አዲስ ዘመን ጥር 11/2011