በቀበና የካ ተራራ በአልጋ ወራሽ ጫካ ውስጥ ንጹህ አየር እየተነፈሱ ከዕድሜ አቻዎቻቸው ጋር ከወዲያ ወዲህ እየተሯሯጡ ማደጋቸው ለተክሎች ልዩ ፍቅር እንዲኖሯቸው አድርጓቸዋል።ያ በአጼ ኃይለስላሴ ጦር ወይም በክቡር ዘበኛ የሚጠበቀው ጫካ ለእርሳቸው የሁልጊዜ ትዝታቸው ነው። የአካባቢው ሰው ሳይቀር ከሚጠብቀው ውብ ጫካ ውስጥ የደረቀ እንጨት (ጭራሮ) ለማገዶ፣ ጣፋጩን አጋምና ቀጋ ለመመገብ ከመልቀም ውጪ ለማውደም፣ለመጨፍጨፍ የሚሞክር ሰው የለም። ጥብቁ ጫካ ምን አለ ዛሬም ድረስ ቢኖር ሲሉ ይቆጫሉ። ያ የሚወዱት ያደጉበት ጫካ ዛሬ ተመንጥሮ ፎቅ ተሰርቶበታል። በቅርብ ርቀት የሚያዩት የየካ ተራራም ቢሆን ተመናምኗል።አሁን አሁን ትንሽ ትኩረት አግኝቶ ይሆናል እንጂ የራስ ሀገር ሀብት በማይመስል መልኩ ይጨፈጨፋል። መሬቱም ለንፋስና ለውሃ መሸርሸር ተጋልጧል። ሆኖም ግን ያ ውብ ደን በእርሳቸው አእምሮ ውስጥ ታትሟል። የትዝታ እርሾው ከውስጥ አይወጣምና ለተክሎች ያላቸውን ፍቅር ዛሬም የመንገድ ዳር ተክሎችን እንዲተክሉ ፣ የተተከሉትንም ውሃ እያጠጡ እንዲንከባከቡ ያስገድዳቸዋል።
መገናኛ ብዙኃን ያገኙዋቸውም ይህንን ውስጣዊ ትዝታቸው በአዲስ መልኩ ለማለምለም በሚጥሩበት ወቅት መሆኑን ያስረዳሉ። በእርግጥ የጠቅላይ ሚኒስትሩ አራት ቢሊዬን ችግኝ እተክላለሁ የሚለው ሃሳብ መነሳሳትን ፈጥሮባቸው እንደነበር አልሸሸጉም። ቁጭት የዘራው ዘር ሳያብብና ሳያፈራ አይቀርምና እሳቸውም ማንንም ሳይጠብቁ ውሃ በጀሪካን ሞልተውና በመኪናቸው ጭነው የቻሉትን ያህል የመንገድ ላይ አትክልቶችን ያጠጣሉ። “ ተክሎችን መንከባከብ በህይወት እስካለሁ ድረስ እወጣዋለሁ” ይላሉ።
በዚህ እና በሌሎችም የህይወት ተሞክሯቸው ዙሪያ እንዲያጫውቱን ለዛሬው የ”ህይወት እንዲህ ናት” አምድ እንግዳችን አድርገን መርጠናቸዋል፤ ካፒቴን ሽፈራው ገብሬን። ከእርሳቸው በርካታ መልካም ተግባራትን ልንቀስም ፣ የዘነጋነውን ልናስታውስ ደግሞም አዳዲስ ሀሳብ ልናመነጭ እንችላለንና የህይወት ልምዳቸውን እነሆ ለንባብ ማለቱን ወደናል።
”ስሙኒ‘
ቁመታቸው ትንሽ ፣ በእዛ ላይ ቀጫጫ የሚባሉ አይነት ልጅ ናቸው። ግን ባላቸው የትምህርት ጉብዝና ከክፍል በአለቅነት ያልተመረጡበት ጊዜ እንዳልነበር ያስታውሳሉ። ከእርሳቸው ውጪ የሚመረጥ ባለመኖሩ ብዙዎች ይናደዱባቸው እንደነበርም አይረሱትም። እንዳውም ከአቅመቢስነ ታቸው ጋር ተያይዞ የተለየ ቅጽል ስም እንደሰጧቸው ይናገራሉ። ‹‹ስሙኒ›› የሚለው መለያ መጠሪያቸው ነው፤ ኃላፊነታቸውን ለመወጣት በመምከር ብዙዎችን ማሸነፋቸው፤ ያ ካልሆነና በጉልበት ልፈትንህ የሚል ከገጠማቸው ስሙን መዝግበው ለክፍል ስም ጠሪ ማስተላለፋቸው ደግሞ ብዙ ጊዜ ያጋጫቸው እንደነበር ይናገራሉ።
ካፒቴን ሽፈራው ከማንም ልጅ ጋር ተጣልተው የማያውቁ ቢሆኑም ከአላማቸው እንዲያፈነግጡ የሚያደርጋቸውን ግን አይፋቱትም። ማንም ሲሳሳት ዝም ብለው የሚያልፉ ልጅም አይደሉም። መጀመሪያ ይመክሩታል። ይህንን ማድረግ ካልቻለ ግን የሚማርበትን እርምጃ ከማስወሰድ ወደ ኋላ አይሉም።
በልጅነታቸው አቅመቢስ መባላቸው ሁልጊዜ እንደሚያሳስባቸው የሚናገሩት የትናንቱ ልጅ የዛሬው አዛውንት ካፒቴን ሽፈራው፤ አንድ ቀን ግን ይህንን ለማጥፋት የሚችለውን የቦክስ ልምምድ ለማድረግ ወሰኑ። በእርግጥ መጀመሪያ ላይ ያላቸው ክብደትና ቁመት አይደለም ቦክሰኛ እረኛም እንደማያደርጋቸው ያምናሉ።፡ ግን ተስፋ መቁረጥን አይወዱምና ልሞክረው በሚል ወንዶች ወጣቶች ክርስቲያናዊ ማህበር (ወወክማ ) ገቡ። ቦክሰኛ ለመሆን ያላቸውን አቅም አሟጠው የተለያዩ ስፖርታዊ እንቅስቃሴዎችን ማድረጉንም ተያያዙት። በዚህም በ15 ቀን ውስጥ ለውጣቸውን አዩ። እንደሚሳካላቸውም አመኑ። ይህ ስኬት እውን ሆነናም በስድስት ወር ውስጥ 49 ኪሎግራም መዝነው ለውድድር ቀረቡ። በተለያዩ መድረኮች ላይም ብቃታቸውን አሳዩ።
የትናንቱ ቀጫጫ ልጅ የዛሬው አዛውንት ካፒቴን ሽፈራው ቦክሰኛ ከሆኑ በኋላ ግን ወደ ቦክሱ ለመግባት ባሰቡበት ልክ ሰዎችን (የሚጣሏቸውን) ተደባዳቢ አልሆኑም። በጉልበትና ችሎታቸው አልተመኩም።እንዳውም ለሰዎች ያላቸው አመለካከት ተቀየረ ። መልካም አሳቢ፣ ተደባዳቢ ሳይሆን መካሪ ሆኑ። “ስሙኒ” የሚለኝን ሁሉ አሳየዋለሁ ብለው ወደ ቦክሱ ቢያመሩም የወሰዱት የሥነምግባር ትምህርት ታጋሽ፣ ትሁት፣ ሰዎችን አክባሪ እንዲሆኑ እንዳደረጋቸው ያስረዳሉ።
የቦክስ ተወዳዳሪነታቸውን ብዙም እንዳልቀ ጠሉበት የሚያነሱት እንግዳችን፤ አብረዋቸው የሚሰሩ ጓደኞቻቸው በትምህርታቸው እየተዳከሙ ቦክሱ ላይ ብቻ ሲያተኩሩ መመልከታቸው እኔንም ከትምህርት እንድርቅ ያደርገኛል የሚል ስጋት ፈጠረባቸው። እናም ቅድሚያ ለትምህርቴ በማለት ቦክሱን እርም ብለው ማቆማቸውን አጫውተውናል።
ጥቅምት 13 ቀን 1946ዓ.ም የተወለዱት ካፒቴን ሽፈራው የእግር ኳስ ጨዋታ ወዳድ፤ ታዛዥ፣ ሰው አክባሪና ጎበዝ ተማሪ እንደነበሩ ይናገራሉ። ቤተሰብም ሆነ የአካባቢው ነዋሪዎች በጣም የሚወዷቸው ጨዋ ልጅ፤ ከብቶችን መጠበቅ የሚወዱ፣ የጓሮ አትክልቶችን በመንከባከብ የሚታወቁና መበለጥን የማይፈልጉ እንዲሁም ለራሳቸው አይነኬ መስመር ያስቀመጡ ልጅም ናቸው።
‹‹በአካባቢው ማህበረሰብ የማንንም ልጅ የማሳደግ ኃላፊነት አለበት። ስለዚህም ሁሉም ሰው ማንንም ማዘዝና መቆጣት ይችላል።ሲያጠፋ ካገኘውም ይቀጣል። የፈለገውን ቅጣት መቅጣት ይችላል። በመሆኑም እኔ የእናቴ ብቻ ሳልሆን የአካባቢው ሰው ልጅ ጭምር ሆኜ ነው ያደኩት›› የሚሉት ባለታሪኩ፤ የታዘዙትን እንቢ ካሉ እናታቸው የምታዝንባቸው መስሎ እንደሚሰማቸው ይናገራሉ። ይህ ባህል በልጅነት ካላቸው ትዝታ ሁሉ የላቀ መሆኑን ያነሳሉ።
የአካባቢው ልጆች ሁሉ “እደግ ተመንደግ፣ ከፍ ያለ እንጀራ ይስጥህ “ተብለው ተመርቀው እንዳደጉ የሚናገሩት ካፒቴን ሽፈራው፤ በእነርሱ የልጅነት ጊዜ ምርቃት የቀጣይ እጣ ፋንታ መወሰኛ አድርገው ያስቡና በዚህም ይደሰቱ እንደነበር ያስታውሳሉ። ዛሬም ወጣቱ ይህንን ቢያይ ለነገ የሚያስቀምጠው ብዙ ነገር እንደሚኖረው ይናገራሉ። አገር ወዳድነትን የሚማረውና የሚረዳውም ከዚህ ነውና ይጠቀምበት ባይ ናቸው።
ሽ – ፈራው
በባህሪያቸው ነጭናጫ እንደነበሩ የሚናገሩት ካፒቴን ሽፈራው፤ ሁልጊዜ የማያሳምናቸውን መቀበል አይወዱም፤ ስህተት ከተፈጸመ የማያልፉና እስኪታረም የሚጠብቁ ልጅም ነበሩ። ከዚህም አንጻር ስማቸው ሺ ፈራው በሚል ሳይወጣላቸው እንዳልቀረ ይናገራሉ። ምክንያቱም ማንም ሰው ይህንን አድርግ አይላቸውም። ሰዎች ያሰቡትን ቀድመው ይረዳሉ፤ ያደርጋሉ። ሁሉም ሰው የሚያስፈልገውን አውቀው መፍትሄ የሚሆን ሃሳብም ያቀርባሉ። ስለሆነም ሁሉም ሰው ይፈራቸው ነበር። በተለይ የቤተሰቡ የበኩር ልጅ በመሆናቸው ሁሉም ቦታ ይሰጣቸው የነበረውን ክብር ዛሬም ያስታውሳሉ።
ከጫካ የጀመረው ትምህርት
የአካባቢው ልጆች እንግሊዝኛ ሲያወሩና ሲያነቡ ሲመለከቱ ዘወትር ይቆጩ ነበር። እርሳቸው ትምህርት ቤት ስላልገቡ የሆነ ይመስላቸውም ነበር። እናም ሁልጊዜ ጓደኞቻቸው ሲያነቡ በአትኩሮት ያዩዋቸው ነበርና አንድ ቀን እናታቸው መጽሃፍ እንዲገዙላቸው ይጠይቃሉ። መጽሀፉም ተገዛ። ጓደኞቻቸው ተሳሳትክ ብለው እንዳይሳለቁባቸው የማያውቁትን እንግሊዝኛ ለማንበብ መጽሐፉን ይዘው ያመሩት ወደ ማይታዘባቸው ጫካ ነበር።
እንደእብድ ጮክ ብለው ያነበንቡትም ጀመር። በወቅቱ ትክክል እንደሆኑም ይሰማቸው እንደነበር ያስታውሳሉ። ከዚያ ይህንን የተመለከተ አንድ ጓደኛቸው ትምህርት ቤት ይወስዳቸውና ክፍል ውስጥ ለመምህሩ እንግሊዝኛ ማንበብ እንደሚችሉ ይነግርላቸዋል።
በወቅቱ እርሳቸው በጣም ደንግጠው እንደነበርና ሊቀጡ መስሏቸው ስቅስቅ ብለው እንዳለቀሱ አይረሱትም። ያው መምህር ብዙ ነገር ያስረሳል አይደል! እርሳቸውም በመምህሩ አማካኝነት ጭንቀታቸውን ረስተው እንዲያነቡ ተደረገ። ያ የጫካ ውስጥ ንባብም አንደኛን አሳልፎ ሁለተኛ ክፍልን እንዲቀላቀሉ አገዛቸው። ከዚያማ ማን ችሏቸው። አስጠኚም፣ እንግሊዝኛ ተናጋሪና ተርጓሚም ሆነው ዘለቁ።
በጫካ ውስጥ ንባብ ተጀምሮ እስከ አራተኛ ክፍል የዘለቁበት ትምህርት ሾላ ገበያ አካባቢ የነበረውን በጎ አድራጎት ትምህርት ቤት እንዲቀላቀሉ ረዳቸው። ካፒቴን ሽፈራው፤ የእያንዳንዱ ስኬት መሰረቱ እውቀት ነው የሚል ጽኑ እምነት አላቸው። እውቀትን ለማግኘት የማይቆፍሩት ድንጋይ እንዳልነበረ ያነሳሉ። እውቀት ያለው አይታመምም፤ ሁሌም የመፍትሄ አካል ይሆናል፤ ነገሮችን ቶሎ የሚረዳ፣ ችግርን የማይፈራና የሚጋፈጥም ነው ይላሉ።
ከአምስት እስከ 11ኛ ክፍል በኮከበጽባህ የመጀመሪያና ሁለተኛ ደረጃ ትምህርት ቤት ትምህርታቸውን የተከታተሉት ካፒቴን ሽፈራው፤ ቀጣዩ የትምህርት ክፍላቸውን የተከታተሉት ቀን እየሰሩ ማታ በመማር ነው። 12ኛ ክፍል ማትሪክ ፈተና የወሰዱት በግላቸው ነበር። ጥሩ ውጤት በማግኘታቸውም ቀጣዩን ትምህርት በኮተቤ መምህራን ማሰልጠኛ ኮሌጅ አደረጉ። በመምህርነት ሙያ ተመረቁ።
ሆኖም በዚሁ መቆሙን አልመረጡም፣ ጉዞ ወደ ዩኒቨርሲቲ አደረጉ። ቀዳማዊ ኃይለስላሴ ዩኒቨርሲቲ የዛሬው አዲስ አበባ ዩኒቨርሲቲን ተቀላቀሉ። በትምህርቱ ብዙም ሳይገፉ እድገት በህብረት ዘመቻ መጣና ትምህርታቸውን አቋረጡ።
ካፒቴን ሽፈራው የትምህርት ጥማቸው አረካምና የቀኑ ትምህርት ሲቆም በማታ መማር ጀመሩ። ይህም ቢሆን ከእርሳቸው አቅም ጋር የሚመጣጠን ስላልነበረና ትምህርቱ እንደቀኑ በአግባቡ የማይሰጥ በመሆኑ ሊቀጥሉበት አልፈለጉም። በእርግጥ ትምህርቱን ሲያቆሙ አማራጭ አስቀምጠው እንደነበር ይናገራሉ።
የኢትዮጵያ አየር መንገድ በበረራ ትምህርት ተማሪዎችን አስተምሮ መቅጠር እንደሚፈልግ ማስታወቂያ አውጥቶ ነበርና ያንን ተወዳድረው በማለፋቸው የበረራ ትምህርት ለመማር ባዘጋጁት አማራጭ ገቡ ። በትምህርት ቤቱ የሜንቴናንስ ትሬኒግ ትምህርትን የቀሰሙ ሲሆን፤ በጥገና ባለሙያነት ተቀጥረው እየሰሩ ሳለ ደግሞ በዲፕሎማ በዚያው በበረራ ትምህርት ቤት ሌላ ትምህርት ለመማር ገቡ።
ሁለት ዓመት በሜካኒክነትና በበረራ የትምህርት መስክ በመማር በዲፕሎማ ለመመረቅ በቅተዋል። ከዚያ በኋላ ግን ትምህርቱን አልቀጠሉም። ለእርሳቸው ትምህርት የሆነው በየእለቱ ከሚያደርጉት የስራ ላይ ቆይታ ልምድ መቅሰም ነው።
‹‹ቢኖር መልካም ባይሆንም ግን ዲግሪና ከዚያ
10
በላይ ብቻ ነው ትምህርት ሊባል አይገባም። ከሁሉም በላይ በልምድ የሚገኝ እውቀት ይልቃል። ስለዚህ አልተማርኩም ብዬ አልቆጭም›› የሚሉት ካፒቴን ሽፈራው፤ የትምህርት ደረጃቸው ከዲፕሎማ ባያልፍም በተለያዩ አገራት በሚያደርጉት የልምድ ልውውጥና የሥራ መስተጋብር እንዲሁም ስልጠናዎች የተሻለ እውቀት እንደቀሰሙና አሁንም እውቀት በመገብየት ላይ እንደሚገኙ ይናገራሉ።
እንደ ወፍ በሰማይ
ሥራቸውን “ሀ” ያሉት ሲዳሞ ክፍለ ሀገር ሄደው በወናጎ እና በይርጋጨፌ መካከል በምትገኝ ‹‹ቆቲ›› ተብላ በምትጠራ የገጠር ቀበሌ ውስጥ በመጀመሪያ ደረጃ ትምህርት ቤት በመምህርነት ነው። በዚህች ቀበሌ ውስጥ ለሁለት ዓመታት ቆይታ አድርገዋል። ብዙዎችንም ለውጤት እንዳበቁ ይሰማቸዋል። ከዚያ የተሻለ ስራና ደመወዝ ፍለጋ አዲስ አበባ መጡ። ተማሩናም ለ37 ዓመት በአብራሪነት ባገለገሉበት የኢትዮጵያ አየር መንገድ ገቡ።
በኢትዮጵያ አየር መንገድ ቆይታቸው ከፓይለት እና ፍላይት ኢንጅነር በመሆን ስምንት አይነት አውሮፕላኖችን ለማብረር ችለዋል። የተለያዩ አዳዲስ ሞዴል አውሮፕላኖች ሲመጡም እርሳቸው የመሞከርና የማብረር እድሉ ይሰጣቸው እንደነበር አጫውተውናል።
ካፒቴን ሽፈራው በአየር መንገዱ የጎልማሳነት ዕድሜ አገልግሎታቸው የዓመት ፈቃድ ያስፈልገኛል ብለው አርፈው እንደማያውቁ ይናገራሉ። ምክንያታቸው ደግሞ ስራ ወዳድነት ነው። እውቀት የሚገኘው ከእለት ወደ እለት የተሻለ ስለሆነና ለአገሬ የቻልኩትን መሰዋዕትነት እከፍላለሁ ብለው በማሰብ ነው። እረፍት እያልኩ ከስራ ብቀር ይሄ ይጎላል ብለውም ያምናሉ ። ስለዚህ በቆይታቸው ከ10 ዓመት የማይበልጥ የእረፍት ጊዜያቸውን እንደወሰዱና ይህንንም ከልጆች ጋር እንዳሳለፉ አውግተውናል።
እንግዳችን በቀን 21 ሰዓታትን በስራ ላይ ያሳልፉ እንደነበር ያስታውሳሉ ፤ ጡረታ ከወጡ በኋላም ስራ ወዳድነታቸውን፣ የሥራ ልምዳቸውንና ያላቸውን አቅም የሚያውቀው የኢትዮጵያ ሲቪል አቬየሽን አስተዳደር በኤር ክሩ ማኔጀርነት ኦፕሬሽኖችን በመቆጣጠር እንዲሰሩ ዳግም እንደቀጠራቸው አጫውተውናል።በአሁኑ ወቅትም በኤር ክሩ ማኔጀርነት ኦፕሬሽኖችን በመቆጣጠር እያገለገሉ ይገኛሉ።
ከልጅነት እስከ እርጅና – ከተክል ጋር
‹‹ብዙዎቹ የዓለም አገራት ዛሬ በተለያዩ ምክንያቶች በጎርፍ የሚጥለቀለቁት፣ የአየር ሁኔታው የሚዘበራረቀው፣ አፈርና መሰል ሀብቶች በድንገተኛ ጎርፍ የሚጠራረጉት ሌሎች ተጨማሪ ምክንያቶች ቢኖሩም የደን መመናመን ግን ትልቅ ድርሻ አለው። ለዚህ ዋናው ምክንያት ተክሎችን ተክሎ የመንከባከብ ባህል ባለመዳበሩ፣ ለደን የተሰጠው ትኩረት አነስተኛ መሆኑ ነው። እኛም ጋር እየሆነ ያለው ይኸው ነውና ከዚህ መውጫ መንገዱን ማሰብ ያስፈልጋል። ለዚህ ደግሞ አንድሰው አስቦ በአንድ እጅ አጨብጭቦ አይቻልምና በእኔነት መንፈስ ለመስራት ሁሉም መትጋት አለበት›› ይላሉ ካፒቴን ሽፈራው።እርሳቸው ይሄንን መልካም ሃሳብ ያስቡ እንጂ “ማን ይሰማል” በማለት የእሳቸውም ህልም ወደኋላ እንደተጎተተ ይናገራሉ።
ያም ሆኖ ግን ተክል ከመትከልና መንከባከብ ርቀው እንደማያውቁ የሚናገሩት ባለታሪኩ፤ በግቢያቸው ከ28 ዓመት በላይ ያስቆጠረ ግራር እንዳላቸው፣ ዛሬም ድረስ በአካባቢው ብቸኛ መሆኑን ይገልጻሉ። ሆኖም አንዱ በመንገድ ምክንያት ተቆርጦ ከጥቅም ውጪ እንደሆነባቸውና እንዳዘኑ አጫውተውናል። የቀረው አንዱም ቤቱን እያፈረሰው ነው ለምን አትቆርጡትም እየተባሉም እርሳቸው ግን ቤቱን በየጊዜው አድሰዋለሁ እንጂ አልቆርጠውም ብለው እንዳስቀመጡት ይናገራሉ።
‹‹ለእኔ ሁሉም መሪ በራሱ ድክመት ቢኖርበትም የኢትጵያዊነት ስሜቱ ግን እኩል ነው። ለአብነት ሁለቱን መሪዎች ማንሳት ይቻላል። መለስ ዜናዊና አብይ አህመድን። መለስ ዜናዊ ኢትዮጵያን ትልቅ የሚያደርግ ፕሮጀክት ዘርግቶ አባይን ስሩ ብሏል። አፈራችን እንዳይወሰድና የኤሌክትሪክ አቅርቦታችን እንዲሻሻል መስመር ቀይሷል። ዛሬ ደግሞ ጠቅላይ ሚኒስትር አብይን ብንመለከት አራት ቢሊዮን ችግኞች ተተክለው አገር ብቻ ሳትሆን አለም ጭምር የሚድንበትን መሰረት ጥለዋል። ምክንያቱም የአየር ብክለት እንዳይኖር ተክሎች ይከላከላሉና። እናም ይህ መሰረት ለሁላችንም መነሻ ሆኖ ከግብ ማድረስ መቻል አለብን›› ይላሉ።
“ ከዚህ በኋላ አደራው በግለሰቦች መዳፍ ላይ የሚወድቅ ነው። ምክንያቱም እነርሱ መስመር ማሳየት ብቻ ነው ተግባራቸው። ከዚያ ያለፈውን እንደግል ስንሰራ ውጤት እናመጣለን። ስለሆነም እኔም ተክሎችን መንከባከብ እንዳለብኝ ያመንኩት ከዚህ የተነሳ ነው” ሲሉ ያስረዳሉ።
ሁልጊዜ የሰውነት እንቅስቃሴ ለመስራት 11 ሰዓት እንደሚነሱ የሚገልጹት እንግዳችን፤ በጉልበቱ ጭምር በጭቃ ተጨማልቆ አትክልት ሲተክል የተመለከቱትን የጠቅላይ ሚኒስትሩን ፎቶ መቼም አይረሱትም። አትክልቶችን ውሃ ሲያጠጡም ሆነ ሲኮተኩቱ ያንን ፎቶ በአይነ ህሊናቸው እያዩና እየተደመሙ እንደሆነ ይናገራሉ። ‹‹እኔ ታዲያ ማነኝ፣ ለምን የራሴን አሻራ አላሳርፍም፣ እርሱ ብቻ ለምን ይህንን ያደርጋል” የሚለው ሃሳብ ከውስጣቸው ገብቶም ወደ ሥራ ለመግባት እንደቻሉም ያስረዳሉ።
ሰዓቴን ጠብቄ ስፖርት ከሰራሁ በኋላ የተተከሉትን ዛፍና ጥዶች በመኪናዬ ውሃ በመጫን ማጠጣት የዘወትር ስራዬ ነው። ሰዎች እንዴት እንዲህ ያለ ሙያ ያለው ሰው ዝቅ ብሎ አትክልተኛነት ይሰራል የሚል ግምት ቢያድርባቸውም ለአገር መስራት ለራስ መስራት በመሆኑ ሙያ አይጠይቅም፤ ዝቅ ማለትም አይደለም ይላሉ። ስለዚህም ኢትዮጵያን ሳስብ መኮፈስ ሳይሆን ዝቅ ብሎም ለአገር መኖርን እመርጣለሁ ብለዋል።
አገሩን የሚወድ ሰው ማንም ይምራው ማን ያመላከተው አቅጣጫ ይጠቅማል ብሎ ካሰበ አጋዥ መሆን አለበት። ስለ አገሩ ውጤታማነት ተጨንቆ የታቀደውን ከግብ ለማድረስም ሊታትር ይገባል። እሳቸውም እያደረጉት ያለው ይህንኑ ነው ይላሉ።
‹‹የኢትዮጵያ ህዝብ መሪ ያስጀመረውን ብቻ በማየት መከተል እንጂ ራሴ ልጨርስ አይልም። የእኔ ኃላፊነት ነው ብሎ መስራትን አይፈልግም። በዚህም ብዙ ነገሮች ተጀምረው ሲቆሙ እንመለከታለን።›› የሚሉት ባለታሪኩ፤ ባህላችን ከልጅነታችን ጀምሮ ለአገር መኖርን አለማምዶናል። ለምሳሌ እኔ ተክሎችን የመንከባከብ ባህል እንዲኖረኝ ያደረጉኝ ቤተሰቦቼና የአካባቢዬ ማህበረሰብ ነው። ካደጉ በኋላ ደግሞ ባህሉን የማስቀጠሉ ግዴታ የግላችን ይሆናልና ያሳደገን ማህበረሰብ አይደለም። እናም መሪዎች አቅጣጫ ሲያመላክቱ ተቀብሎ የመተግበሩ ኃላፊነት የእኛ በመሆኑ በተለይ ወጣቱ የአባቶቹን አደራ ማስቀጠልና ለትውልድ የተሻለች አገርን ማስረከብ አለበት ብለውናል።
የተክሎች ተንከባካቢነትን ጠዋትና ማታ ያስቀጠሉት የእድሜ እኩዮቻቸው እንዲከተሏቸው ሳይሆን ወጣቱ ይህን አይቶ እንዲማርበት መሆኑን ካፒቴን ሽፈራው ይናገራሉ። እስከ ህልፈተ ህይወታቸው አቅማቸው የፈቀደውን ሁሉ ለመስራት በቆራጥነት ተነስተዋል። ወጣቱ ትውልድም ኢትዮጵያንና መልካም ሰሪ መሪዎቹን እያየና ከእነርሱ እየተማረ የሚያኮራውን የታሪክ አሻራ አስቀምጦ እንዲያልፍ አሳስባለሁ ሲሉ በአደራ ጭምር መክረዋል።
“በክረምት ወቅት አትክልቶች ኮትኳችና አራሚ እንጂ ውሃ የሚያጠጣቸው አይፈልጉም። ከሰማይ መጋቢ አላቸውና። በበጋ ግን ብዙዎቹን የተተከሉትን ብናይ እየጠወለጉ በመሆናቸው ተመልካች ያሻቸዋል። ለዚህም ነው ዛሬ አይኔን ወደምናፍቃቸው ተክሎች ያዞርኩት፤ የጠወለጉትን ለማለምለም ነው።” ብለውናል።
‹‹አሁን አትክልቶቹን እንደሰው ነው የማያቸው፤ የሚያወሩኝና የሚያጫውቱኝም ይመስለኛል። በተለይም የተቆረጠው ቅጠላቸው ለምልሞ ሳያቸው ደህንነት እንደሰጠኋቸው ይሰማኛል። ከቦሌ ሚካኤል ወደ ወሎ ሰፈር መንገድ የሚወስደውን ድልድይ ዛሬ ቤቴ እያደረኩት ነው። በስተግራም ያሉትን መንከባከብ ጀምሬያለሁ። ይህ ደግሞ ብዙዎች እንዲመለከቱኝ አድርጓል። በዚህም ከእኔ ተምረው ለተክሎቹ ይደርሳሉ የሚል እምነት አለኝ›› ይላሉ።
አብዛኛው ጊዜ ልክ እንደእርሳቸው በእድሜ የገፉ ሰዎች ሲያመሰግኗቸው፣ ሲመርቋቸው ይውላሉ። ወጣቱም ቢሆን አልፎ አልፎ ቢሆንም ለማገዝ ጎንበስ ቀና ይላል። ይህ ደግሞ ለእርሳቸው ልዩ ስሜትንና ደስታን እንደፈጠረላቸው ይናገራሉ። የበለጠ እንዲሰሩና እንዲበረቱ እያደረጋቸው መሆኑንም አጫውተውናል።
እድሜ ከተሰጣቸው አጠገባቸው ተቀምጠው የሚናፈሱበት፤ የልጅ ልጆቻቸውንና ሌሎች ሰዎችንም ጭምር የሚያዝናኑበት እንደሚሆን አስበው እንደሚሰሩ የነገሩን ባለታሪኩ፤ በዘመቻ ለተተከሉት ተክሎች ብቻም አይደለም እንክብካቤ ለማድረግ ያሰቡት። በራሳቸው ተክለው መታሰቢያ ይሆናቸው ዘንድ 10 ጉድጓዶችን ቆፍረዋል። የተለያዩ ተክሎችን ለመትከልና ለመንከባከብም እቅድ አላቸው። ኢትዮጵያ በረሃውን አስቆመች የሚለውን መስማትም ይናፍቃሉና ከእርሳቸው ባሻገር ሌሎችም ለተክሎች እንዲኖሩ በልመና ጭምር መልዕክታቸው ይድረስልኝ ብለውናል።
ቤተሰብ
ባለቤታቸው አብሮ አደጋቸው ፣ የልጅነት ወዳጃቸው ናት። በጣም ይዋደዱም ነበርና በትዳር 30 ዓመታትን በፍቅር ማሳለፍ ችለዋል። በየጊዜውም የጋብቻ በዓላቸውን ያከብራሉ። በዚህም መርሃግብር ላይ ከድግሱ ባለፈ ልጆቻቸው የወላጆቻቸውን መርህ ተከትለው እንዲያድጉ፤ መልካሙን ሁሉ እንዲሰሩና አገር ወዳድ እንዲሆኑ ይመክሯቸዋል።
በእነ ካፒቴን ሽፈራው ቤት ልጅን ማስተማር ምርጫ የማይሰጠው ጉዳይ ነው። እናም ልጆቻቸውን ያላቸውን ጥሪት አሟጠው አስተምረው ለወግ ማእረግ አብቅተዋል። በተለይ አንዱ ልጃቸው የእርሳቸውን ሙያ የያዘ ሲሆን፤ በአየር መንገድ እንዳስተማሩት አጫውተውናል። የሁለት ልጆች አባት የሆኑት ካፒቴን ሽፈራው፤ የልጅ ልጅም አላቸው። በዚህም ሁሌ ደስተኛ ሆነው ይኖራሉ።
መልዕክት
ኢትዮጵያ ለእኔ ድንጋይና አፈሩ እንዲሁም ሰው ብቻ አይደለም። ከዚያ ይልቃል መንፈስ አድርጌ ነው የማያት። እንደዚህች ያለች የተቀደሰችና ሁሉ ነገር የተመቻቸባት ሀገር አለ ብዬም አላምንም። ምንም እንኳን የተለያየ ፈተና ቢኖርባትም ደስታ የሚገኘው ከችግር በኋላ መሆኑን አምኖና ተቀብሎ የሚሰራባት ካለ ግን ይሻገርባታል። አንድ ነገር ቶሎ ሊሆን አይችልም ‹‹ የረጋ ወተት ቅቤ ይወጣዋል›› እንደሚባለው በሰከነ መንፈስ ዙሪያ ገባውን አይቶ ለመልካም ነገር መስራት ለአገር ደህንነት ዋጋው የላቀ ነው። እናም ልጅ አዋቂ ሳይባል የተቻላቸውን ለማድረግ መለማመድ ይገባል።
አንድ ወይም ሁለት ሰው ጭንቅላት ውስጥ መልካም ዘር እዘራለሁ በማለት መስራትም አገሪቱን ከችግሯ ማላቀቅ ነው። ስለዚህ የሚናቅ ለአገር የማይጠቅም ሥራ ከመስራት ተላቆ ከመንገድ ላይ ቆሻሻ ከማንሳት የጀመረ ሥራ በማከናወን አገርን ማገልገል ይገባል። እያንዳንዱን ሰው ከገባበት ስህተት ማዳን የሚቻለው ደግሞ አርአያ በመሆን ነውና ተከታዮቻችንን እያየን እንስራ የሚለው መልዕክታቸው ነው።
ብዙ ነገሮች ላይ ኃላፊነት ወስደን እንደ ዜጋ ለኢትዮጵያ መስራት አለብን። ብሔር የሚለው ነገር አያዋጣንም። ቅድሚያ ለአገር ነው የሚያስፈልገን። መሪ ወይም ግለሰብ ስላጠፋ አገር አጥፍታለች ብሎ መደምደም ተገቢ አይደለም። ምክንያቱም እኛ መኖር የምንጀምረው አገር ሰላም ስትሆን ነው። ስለዚህ ከጎጥ ሳይሆን ከአገር የጀመረ ሥራ እናከናውንም ሌላው መልዕክታቸው ነው።
ልክ ያልሆኑ ነገሮችን በጊዜው ተቃውመን መስመር ማስያዝ ከዛሬ እንጀምር። ልክ የሆነን ብቻ መፈለግ ያስፈልገናል። ጎራ እየለየን እንትና ልክ ነው እንትና ደግሞ ልክ አይደለም የምንልበት ጊዜ አይደለም። ለአገር የማይበጀው ሁሉ ልክ እንዳልሆነ አስበን መስራት እንልመድ። ምክንያታዊ መሆን ከምንም በላይ ያስፈልገናል። ትውልዱ የኢትዮጵያዊነት ዋጋን ፈልጎ ማግኘት እንዲችል ደግሞ የእድሜ ባለጸጎች ይምከሩ፤ ታሪክ ይንገሩ፤ በአርአያነት ይምሩ ማጠቃለያ መልዕክታቸው ነበር። እኛም ስለነበረን ቆይታ አመስግነን ተለየን። ሰላም!
አዲስ ዘመን ህዳር 28/2012
ጽጌረዳ ጫንያለው
