መንግስት ሆይ! አሁንም ህግን አስከብር እንላለን !

 ሰሞኑን በኦሮሚያ ክልል የተለያዩ አካባቢዎች በተቀሰቀሰው ግጭት የ86 ሰዎች ህይወት አልፏል ፡፡ ግጭቱ ብሄርና እምነትን መሰረት ያደረገ መሆኑን ተከትሎ የተለያዩ ብሄሮች ብሄረሰቦች አባላት እና የተለያዩ እምነቶች ተከታዮች በግጭቱ ህይወታቸውን አጥተዋል።

ጠቅላይ ሚኒስትር ዶክተር አብይ ከትናንት በስቲያ በሰጡት መግለጫ ይህ ክፉ ክስተት በኢትዮጵያ የግጭት እሳት ሲነሳ አንዱን ክፍል አቃጥሎ ሌላውን አሙቆ የሚያልፍ እንዳልሆነ ያሳየ ነው ብለዋል።

መንግስት የዜጎችን እና የተቋማትን ደህንነት ለመጠበቅ የሀገሪቱ ህግ ባስቀመጠው መሰረት እንደሚሰራም አስታውቀው፣ በአንድ በኩል የፖለቲካውን እና የዴሞክራሲውን ምህዳር ለማስፋት፤ በሌላ በኩል ደግሞ ፍትህንና የህግ የበላይነትን ለማረጋገጥ እንደሚሰራም አረጋግጠዋል።

“ያለፉትን ስህተቶች ለማረም እየሰራን በሌላ በኩል ደግሞ ሰላምና ደህንነትን ለማረጋገጥ ህጋዊና ተመጣጣኝ እርምጃ እንወስዳለን” ያሉት ጠቅላይ ሚኒስትር ዶክተር አብይ፤ በዚህ አግባብም አልሚ ሁሉ ስራውን፤ አጥፊ ሁሉ ደግሞ በጥፋቱ ልክ ተጠያቂ እንደሚሆንም ተናግረዋል።

ጠቅላይ ሚኒስትሩ በመግለጫቸው የሃይማኖት አባቶች፣ የጎሳ መሪዎች፣ የፖለቲካ ልሂቃን፣ የሀገር ሽማግሌዎች፣ እናቶች፣ ወጣቶች እና ሌሎች የህብረተሰብ ክፍሎች መንግስት የሀገሪቱን ሰላም፣ ደህንነት እና አንድነት ለማስጠበቅ ሲል ህግና ሥርዓትን እንዲያስከብር ደጋግመው ጥያቄ ማቅረባቸውን ጠቅሰው ጥያቄያቸው ተገቢ መሆኑን እና መንግስትም ህግ የሚፈቅድለትን ሁሉ ለማድረግ አቅምም፣ ዝግጁነትም፣ ብቃትም እንዳለው አስታውቀዋል።

እንደሚታወቀው፤ ጠቅላይ ሚኒስትሩ ግጭቱ በተቀሰቀሰባቸው አካባቢዎች በመንቀሳቀስ ከህብረተሰቡ ጋር ተወያይተዋል፡፡ የህብረተሰቡን ጉዳት አጠገቡ ሄደው ተመልክተዋል፤ አዳምጠዋልም፡፡ በሰጡት ጋዜጣዊ መግለጫ የህግ የበላይነትን ለማስጠበቅ መንግስት በትኩረት እንደሚሰራ ማረጋገጣቸው ደግሞ የህዝቡን የህግ የበላይነት ይከበር ጥያቄ ለመፍታት እንደ አንድ እርምጃ ሊወሰድ ይችላል፡፡

ባለፉት አንድ አመት ተኩል ጊዜያት ግጭቶች እየተቀሰቀሱ መንግስት የህግ የበላይነትን እንደሚያስጠበቅ ሲያረጋግጥ ቢቆይም ፣ተጠርጣሪዎችን በቁጥጥር ስር ከማዋል እና አንዳንድ የምርመራ ስራዎችን ከማካሄድ በዘለለ ጥፋተኛ ተብሎ እርምጃ የተወሰደበት ወንጀለኛ አልታየም፡፡ እርግጥ ነው ተጠርጥረው በቁጥጥር ስር የዋሉ ማስረጃ ሳይገኝባቸው ሲቀር የተለቀቁበት ሁኔታ አለ፡፡

ከዚያ በመለስ ግን አንድ ተጠርጣሪ ጥፋተኛ ተብሎ ጥፋቱ ደግሞ ይህን ያህል ያስቀጣል ፤በዚህም መሰረትም ይህን ያህል ቅጣት ተጥሎበታል የሚል መረጃ ብዙም አይሰማም። ከተፈጸሙ ወንጀሎች አንጻር የተጣለ ሊጠቀስ የሚችል ቅጣት በወንጀለኞች ላይ ሲተላለፍም አልተስተዋለም፡፡

ጠቅላይ ሚኒስትሩ የ2011 በጀት አመት ሪፖርትን ባቀረቡበትም በተለያዩ የወንጀል ድርጊቶች የተጠረጠሩ ግለሰቦች በቁጥጥር ስር ውለው ጉዳያቸው በህግ አግባብ እየታየ መሆኑን ከመግለጽ በሻገር ጥፋተኛ የተባሉትንም ሆነ ወንጀለኛ ተብለው ቅጣት የተጣለባቸው ስለመኖራቸው ያሉት አልነበረም፡፡

አዲስ ዘመን ጋዜጣም ይህን መሰረት በማድረግ የሀምሌ 25 ቀን 2011 ዓ/ም ‹‹ በቁጥጥር ስር የማዋሉና ለህግ የማቅረቡ ስራ አጥፊዎችን በመቅጣትም ይደገፍ ›› በሚል ይዞት በወጣው ርእሰ አንቀጹም የህግ የበላይነት የማስከበሩ ስራ አጥፊዎችን በመቅጣትም መረጋገጥ ይኖርበታል ሲል ጥሪ አቅርቦ እንደነበር አይዘነጋም፡፡

አሁንም ሊሆን የሚገባው ይሄው ነው፡፡ በመስቀል አደባባይ በጠቅላይ ሚኒስትሩ ላይ የግድያ ሙከራ ያደረጉ ተጠርጣሪዎችን ጨምሮ በተለያዩ ግጭቶች ተጠርጥረው በእስር ላይ የሚገኙ ተጠርጣሪዎች ወንጀለኛ ከሆኑ ተጣርቶ መቀጣት አለባቸው፡፡ ተጠርጣሪዎችን በቁጥጥር ስር የማዋሉ ጥረት ከቅርንጫፎቹ በሻገር ግንዶቹም ላይ ሊያተኩር ይገባል፡፡

ይህ ሲሆን ለወንጀልና ለጥፋት ያቆበቆበው አደብ ይገዛል፡፡ ቀደም ሲል በተለያዩ ጥፋቶች ውስጥ የነበረውም ከጥፋት ይታቀባል፡፡ እስር ቤት ውስጥ ማቆየት እንዲሁም የምርመራ ስራ ማካሄድ ብቻቸውን የህግ የበላይነትን አያስከብሩም፡፡ በእርግጥ ጥፋተኛ ሆነው ያልተገኙ ተጠርጣሪዎችን የመፍታት ስራ እየተከናወነ መሆኑ ይታወቃል፡፡

ጥፋተኛው የግድ መታወቅ እና እርምጃም ሊወሰድበት ይገባል። እርምጃ ሲወሰድ ይህን ያህል አጥፊዎችን በቁጥጥር ስር አውለናል እንደሚባለው ሁሉ ይህን ያህል ተጠርጣሪዎች ጥፋተኛ ተብለዋል፤ በዚህን ያህሉ ላይ ደግሞ በጥፋታቸው ልክ ቅጣት ተጥሏል መባል ይኖርበታል፡፡ በዚህ በኩል ክፍተት አለ፡፡ መንግስት የህግ የበላይነትን በእርግጥም ማስከበር ጀምሯል የሚያሰኘውም እነዚህ ክፍተቶች ሲደፈኑ ነው፡፡

መንግስት ችገሮችን በጠብመንጃ ከመፍታት ይልቅ ትዕግስትን ማስቀደሙና ችግር በተፈጠረባቸው አካባቢዎች የመከላከያ ሰራዊትን እያስገባ ሰላምና መረጋጋት እያመጣ ያለበት ሁኔታ ሊደነቅ የሚገባው ተግባር ሲሆን፣ አሁን በሰራዊቱ ላይ ያለውን ጫናም መቀነስ የሚቻለው አጥፊዎች ሲቀጡና ሌሎች ከዚህ ትምህርት ሲቀስሙም ነው፡፡ አሁንም መንግስት አጥፊዎችን መቅጣት ውስጥ ይግባ!

አዲስ ዘመን ጥቅምት 25/2012