![](https://press.et/wp-content/uploads/2019/11/11-15.jpg)
አዲሱ አስተዳደር የወረሳቸውና በሂደትም ያጋጠሙት በርካታ የእርስ በእርስ ግጭቶችና መፈናቀሎች በተለያዩ የሀገሪቱ አካባቢዎች ተከስተዋል፡፡ በሶማሌና በኦሮሚያ ድንበር፤ በቡራዩ፤ በጉራጌ ዞን በመስቃንና ማረቆ፤ በጌዲዮ፤ በአማራ ክልል፤ በቤኒሻንጉል፤ በሐዋሳ እንዲሁም ሰሞኑን በኦሮሚያ የተለያዩ አካባቢዎችና በአዲስ አበባ የተከሰቱት ግጭቶች የበርካታ ሰዎችን ህይወት ያጠፉ፤በሚሊዮኖች የሚቆጠሩ ኢትዮጵያንን ከቤት ንብረታቸው ያፈናቀሉና በርካታ የሰብዓዊ መብት ጥሰቶች የተከሰተባቸው አሳፈሪ ታሪኮቻችን ሆነው ተመዝግበዋል፡፡
ሰሞኑን በአንዳንድ የአዲስ አበባ ከተማ ዳርቻዎችና በአንዳንድ የኦሮሚያ ክልል ከተሞች ላይ የተከሰተው ውዝግብና አመፅ የተቀላቀለበት ነውጥ በይዘቱም በውጤቱም ለየት ያለ እና የህግ የበላይነትን በአደባባይ የተገዳደረ ክስተት መሆኑ የተለያዩ የኃይማኖት ተቋማትና የፖለቲካ ፓርቲዎች ሲያወግዙት አድምጠናል፡፡
የሰብዓዊ መብት ኮሚሽን ይፋ ባደረገው መረጃም በሁከቱ ቁጥራቸው ከ70 እስከ 80 የሚደርሱ ሰዎች ህይወታቸውን አጥተዋል፡፡ በሚሊዮኖች የሚቆጠር የህዝብ ንብረትም ወድሟል፡፡ ይህንንም ተከትሎ መንግሥት 409 የሚደርሱ ተጠርጣሪዎችን በቁጥጥር ስር ማዋሉን የገለጸ ቢሆንም በህግ የበላይነት ላይ የሚነሳው ጥያቄ ግን የበረታ ሆኗል፡፡
መልኩን እየቀያየረ በሰበብ አስባቡ የሚነሳው ግጭትና ሁከት ዜጎች ሰላምና ደህንነት እንዳይሰማቸው ከማድረጉም በላይ የእርስ በእርስ ጥርጣሬ እንዲነግስና መተማመን እንዲጠፋ አድርጓል፡፡ በተለይ በተለያዩ ግጭቶች ውስጥ ተሳትፈው በነበሩ አካላት ላይ የተወሰደ አስተማሪ እርምጃ አለመኖሩ ወይም የተወሰደ እርምጃ ካለ አለመገለጹ አጥፊዎች የልብ ልብ እንዲሰማቸውና ሌሎችም በነሱ የጥፋት መንገድ እንዲጓዙ በር ከፍቶላቸዋል፡፡ ዜጎችም ከዛሬ ነገ ተመሳሳይ ችግር ሊፈጠር ይችላል በሚል የስጋት ህይወት እንዲገፉ አድርጓቸዋል፡፡
ስለሆነም መንግሥት በተለያዩ ጊዜያት በጥፋት ውስጥ የተገኙ ሰዎችን በአፋጣኝ ፍርድ እንዲያገኙ በማድረግ በሀገሪቱ ውስጥ የህግ የበላይነት መኖሩን ማረጋገጥ ይጠበቅበታል፡፡ ከዚሁ ጋር ተያይዞም እያንዳንዱ የመንግሥት አካል የተሰጠውን ኃላፊነት የህግ የበላይነትን መሰረት በማድረግ የሥራ ድርሻውን እየተወጣ መሆኑን መፈተሽ አንዱ ድርሻው መሆኑን መዘንጋት የለበትም፡፡
አዲስ ዘመን ጥቅምት 22/2012