![](https://press.et/wp-content/uploads/2019/10/ታተተተ-2-11-2-22.png)
ለውጡ ዓመት ከመንፈቅ በላይ በሆነው በዚህ ወቅት በርካታ ተስፋ የተጣለባቸው ተግባራት ተከናውነዋል።የንግግር ነፃነት ከመቼውም ጊዜ በላይ ሥራ ላይ እየዋለ ነው።አፋኝና ጨቋኝ የሆኑ የሚዲያ፣ የፀረ ሽብርና የበጎ አድራጎትና ማኅበራት ሕጎችን ለማሻሻል ወሳኝ የተባሉ ሥራዎች እየተከናወኑ ነው።
የፖለቲካ ምኅዳሩን ለማስፋት እርምጃዎች እየተወሰዱ በመሆናቸው፣ የፖለቲካ ፓርቲዎች በነፃነት ለመንቀሳቀስ እየቻሉ ነው።በርካታ የመገናኛ ብዙሃንም ወደ ሥራ ገብተዋል።ሌሎች በርካታ ተስፋ ሰጪ ጅምሮችም አሉ።
ከተሰሩ መልካም ሥራዎች አኳያ የኢትዮጵያ ተስፋ እየለመለመ ቢሆንም፣ ለውጡን የሚገዳደሩ ድርጊቶች አሁንም አልጠፉም።በተለይ በተለያዩ ሥፍራዎች እየተከሰቱ የንፁሃን ሕይወት በከንቱ የቀጠፉ ድርጊቶች ከባድ ፈተናዎች ናቸው።ሚሊዮኖች ተፈናቅለውም አይተናል።
ኢኮኖሚው ከሚሸከመው በላይ ፈተናዎች ተጋርጠውበታል።ሥራ አጥነቱም ገና ብዙ ጥረት የሚጠይቅ የቤት ሥራ ነው። የችግሮቹ ዋነኛ መንስኤ ደግሞ ልዩነትን የምናስተናግድበት መንገድ ነው።
ከላይ የተነሱት ጉዳዮች በቀጥታም ሆነ በተዘዋዋሪ የሕዝብ በመሆናቸው ሕዝብ ጉዳዮቹን እንዲያውቅና የመወያየት እድሉን አግኝቶ ግንዛቤ ሊይዝባቸው ይገባል።በመሆኑም በአሁኑ ወቅት ኢትዮጵያ ያጋጠሟትን መሰረታዊ ችግሮች ለመፍታት የሚያስፈልጋት መደማመጥ ነው።ለመደማመጥ ደግሞ ሕዝባዊ ውይይቶች ሊመቻቹለት ይገባል፡፡
በኢትዮጵያ የፖለቲካ ባህል ውስጥ ለዓመታት ተሰንቅሮ በረባ ባልረባው ምክንያት ችግር የሚፈጠረው፣ ሕዝባዊ ውይይቶች ተዘጋጅተው መነጋገርና መደማመጥ ባለመለመዱ ነው።በተለይ በዚህ ዘመን ከየጎራው እየተነሳ የራሱን ብሶት ወይም ጀብዱ ብቻ ማቀንቀን ከመጠን በላይ በመለመዱ፣ በፖለቲካው ሠፈር መደማመጥ ብርቅ ሆኗል።
ባለመደማመጥ ምክንያት ሐሰተኛ መረጃዎችና የጥላቻ ንግግሮች አየሩን ሞልተውታል።ኢትዮጵያውያንን ከሚለያዩ ነገሮች ይልቅ አንድ የሚያደርጉ በርካታ ጉዳዮች እያሉ፣ እነዚህን መድረኮች በመዘንጋትና ባለመደማመጥ ምክንያት ሐሰተኛ ወሬዎች ልዩነቱን እያጦዙት ይገኛሉ።
እነዚህን የጦዙ ልዩነቶች በአግባቡ ለማርገብ ደግሞ ሕዝባዊ ውይይቶች ተመራጭ ናቸው።ይህን ሲያስተናግድ የኖረ ህዝብ የውይይት መድረኮች በመነፈጉ ምክንያት ማንም እየተነሳ በሚያናፍሰው ተራ እና ያልተጨበጠ ወሬ ዋጋ ሊከፍል አይገባም።በመሆኑም ልዩነትን አክብሮ ለጋራ ብሔራዊ ጉዳዮች በአንድነት መቆም የሚቻለው በውይይት ነው፡፡
በቅርቡ በምዕራብ አርሲ ዞን በሚገኙ 15ቱም ወረዳዎች ከሰላማዊ ሰልፉ አስቀድሞ ሕዝባዊ ውይይቶች ተደርገዋል።ከነዚህ ውስጥ በ12ቱ ወረዳዎች ያለ አንዳች ችግር ህዝቡ ድምጹን አሰምቶ ወደ ቤቱ የተመለሰባቸው ሲሆኑ በሶስቱ ወረዳዎች ግን ህዝባዊ ውይይቶች ችግሮችን ቀድሞ ለመከላከል እንደመፍትሄ ሊወሰዱ እንደሚገባ ትምህርት ሰጥተው ያለፉ ናቸው።
ህዝባዊ ውይይት ማድረግ ጠቀሜታው በርካታ ነው።ነገር ግን ዘር፣ ቋንቋ፣ ባህል፣ ሃይማኖትና የመሳሰሉትን ከለላ በማድረግ ለመናቆር እድል ሲፈጥርም ይስተዋላል።
የኢትዮጵያ ሕዝብ በአራቱም ማዕዘናት ቢሠራጭም በሥነ ልቦና ተቀራራቢ መሆኑ እየታወቀ፣ ‹ያኛው ወንዝ የማን ነው? ይኼ መንደር የማን ነው?› ወዘተ እየተባለ ይታመሳል።ሕዝባዊ መድረኮቹ ተመቻችተው በሥርዓቱ ተቀምጠው መነጋገር የማይችሉ ስሜታውያን በሚፈጥሩት ግጭት፣ የንፁሃን ሕይወት ለአደጋ ሊጋለጥ ባልቻለ ነበር።
አሁንም ቢሆን ጊዜው አለ፤ ሕዝብ በጉዳዮቹ ላይ ሊነጋገር፣ ልዩነቶቹን ሊያጠብ እና ለሰላም መስፈን የራሱን ሚና ሊጫወት ይገባል።ይህ በምዕራብ አርሲ ዞን በተግባር የታየ የቅርብ ጊዜ ተምሳሌታዊ ተግባር ነው።ልዩነቶችን ለማቀራረብ እና የጋራ አቋም ለመያዝ በሰከነ መንገድ መነጋገር በማይችሉ ስሜታውያን ምክንያት፣ ዘመናትን የተሸጋገሩ ኢትዮጵያዊ የጋራ እሴቶች ይናዳሉ።በአንፃሩ ደግሞ አስተዋዩ ሕዝብ ያለችውን ሀብት ተካፍሎ ተዛዝኖ እና በህብረት የመኖር ልምዱ በበጥባጮች ሊናጋ ባልተገባ ነበር።
በአጠቃላይ ኢትዮጵያውያን የነበረን የኋላ ታሪክ የሚያሳየው በአንድነት፣ በፍቅርና በመተሳሰብ መኖር ነው።ልዩነትን እያከበሩ፣ ጥላቻና ቂም በቀልን እያስወገዱ፣ የበዳይና የተበዳይነት ትርክትን ለታሪክ ዶሴ እየተዉ የዘመኑን ሥልጣኔ በጋራ እየተቋደሱ መኖርና መሥራት ከተቻለ ኢትዮጵያ ታላቅ አገር ትሆናለች።
ሆኖም በጉልበት ‹‹እንፈታተሽ›› ማለት ውጤቱ ሞት፣ ስቃይ፣ እስራትና ስደት ነው።ዴሞክራሲ ሥርዓት ሆኖ መቆም የሚችለው ሕዝባዊ መድረኮች ተመቻችተው መነጋገርና መደማመጥን ባህል ማድረግ ሲቻል ብቻ ነው።ይህ ሲሆን የሐሳብ ብዝኃነት ይንሰራፋል።ዴሞክራሲያዊ ሥርዓታችንም ይጎለ ብታል፡፡
አዲስ ዘመን ጥቅምት 20/2012