![](https://press.et/wp-content/uploads/2019/10/ታተተተ-2-11-2-21.png)
ኢትዮጵያውያን በነባራዊው ዓለም አብሮ የመኖር እሴቶቻቸውን እያጎለበቱ፣ ዴሞክራሲያዊ አስተሳሰብን እያዳበሩ፣ መልካም ተሞክሮዎቻቸውን፣ ታሪክና መተሳሰባቸውን ለመጪው ትውልድ እያወረሱ የመሄድ ባህልን ያሰርፃሉ ሲባል ቀደም ሲል ከነበራቸው ወግና ባህል በተፃራሪ እየታዩ ያሉት ተግባራት አሳዛኝ ሆነዋል፡፡
የኢ.ፌ.ዴ.ሪ. ህገ መንግሥት የኢትዮጵያ ብሄሮች፣ ብሄረሰቦችና ህዝቦች ራሳቸውን በራሳቸው እያስተዳደሩ የኢትዮጵያ ሉዓላዊ ስልጣን ባለቤቶች ሆነው በእኩልነት ላይ በተመሰረተ አንድነት ለመኖር የገቡትን ቃል የሚያረጋግጥ የሕዝቦች ትስስር መገለጫ ዋስትና መሆኑን የሚያመላክት ቢሆንም፤ ይህንን ያልተገነዘቡ ወይም ቢገነዘቡም ለህዝቦች በሰላም መኖር ግድ የሌላቸው አብሮ የመኖር እሴትን ሲሸረሽሩና የእርስ በርስ እልቂትን ሲጋብዙ ይስተዋላል፡፡
ባለፉት ሦስት ዓመታት በአገሪቱ አንዳንድ ስፍራዎች በአብዛኛው ዜጎችን ከመኖሪያ ቀዬአቸው የማፈናቀልና የመግደል፣ ንብረትና የዕምነት ተቋማትን የመዝረፍና የማቃጠል አስነዋሪ ተግባራት ተፈፅመዋል፡፡
እንደ እውነቱ ከሆነ ሕገ መንግስቱ ከዜጎቹ አልፎ ለውጭ አገር ዜጎች ሳይቀር ሰርቶ የመኖር መብትን የሚያጎናፅፍ ቢሆንም፤ ኢትዮጵያውያን ግን ይህንን መብታቸውን እንዲያጡት፣ እንዲያውም በአገራቸው መኖር እንዳይችሉ ያደረገ ስጋት እንዲያድርባቸው አድርጓል፡፡ ኢትዮጵያውያን መሰረታዊ ማንነታቸውን የሚያሳጣና ሰብዓዊ ክብራቸውን የሚጋፋ አስከፊ ሥርዓት ስላጋጠማቸው ብረት አንስተው ተፋልመውና የህይወት መስዋዕትነት ከፍለው ዛሬ አገሪቱ ለደረሰችበት የልማትና የዕድገት ደረጃ ማድረስ ችለው ነበር፡፡
ባለፉት ጊዜያት አገሪቱ በልማት ሊጠቀስ የሚችል እመርታ አሳይታለች ቢባልም በሰብዓዊ መብት አያያዝ በኩል ከፍተኛ ህፀፆች ይስተዋሉ ስለነበር የጉዳቱ ሰለባ የነበሩና ድርጊቱ ያስቆጣቸው ኢትዮጵያውያን ተቃውሞአቸውን በማሰማትና በማመፅ ለውጥ በመካሄዱ፤ የታሰሩ እንዲፈቱ፣ የተሰደዱና ትጥቅ አንስተው ትግል ላይ የነበሩት ሰላማዊ ውይይት እንዲያደርጉ እድሉ ተመቻችቶ ወደ አገር ቤት መመለሳቸው ይታወሳል፡፡
ይሁን እንጂ የተፈለገው ሰላም እንዳይገኝ የሚሹ ድብቅ አጀንዳ ያላቸው አካላት የማበጣበጥ ስልታቸውን እየቀያየሩ የበርካታ ወገኖቻችንን ኑሮ አመሳቅለዋል፤ ፋብሪካዎችን ፣የመጓጓዣ ተሽከርካሪዎችን፣ የእምነት ሥፍራዎችን፣የመኖሪያ ቀዬዎችን፣ የባለሃብት ንብረቶችን የማቃጠልና የማውደም እኩይ ተግባራትን እንዲፈፀሙም ምክንያት ሆነዋል፡፡
ለውጥ ማለት አገሪቱን በፊት ከነበረችበት ወደ ተሻለ ደረጃ ማሸጋገር እንጂ የነበረው ከወደመ፣ የለማው ከጠፋ፣ የቤተሰብ ኃላፊዎች ኑሮአቸውን የመሰረቱበት የሥራ ቦታቸው ከተቃጠለ ፣ ለዜጎች የሥራ ዕድል ይፈጥሩ የነበሩ ፋብሪካዎች አርቀው ማሰብ በተሳናቸው የጥፋት መልዕክተኞች ከተግባራቸው ከተስተጓጎሉ የሚፈለገው ዕድገትና ሥራ የማግኘት ጥያቄ እንደምን ሊመለስ ይችላል? ይህንን የጥፋት ተግባር የሚያስተውሉ የውጭና የውስጥ አካላትስ ምን ደግ ነገር አይተው ለአገሪቱና ለህብረተሰቡ የሚጠቅሙ የልማት ሥራዎችን ያከናውናሉ?
በርግጥም በለውጥ ላይ ያለች አገር ፈተናዋ ብዙ ቢሆንም የነገን ጥሩነት የሚናፍቅና አገሩን የሚወድ ዜጋ ሁሉ ለመንግሥት ፋታን በመስጠት፣ የሚወድመው ንብረት በቀጥታም ሆነ በተዘዋዋሪ የራስ መሆኑን በመገንዘብ ከጥፋት ከሳሪ እንጂ አትራፊ መሆን ስለማይቻል ለወገንና ለአገር በማሰብ የተሻለውን አበርክቶ በማድረግ የዜግነት ግዴታውን ሊወጣ ይገባል፡፡
አዲስ ዘመን ጥቅምት 19/2012