![](https://press.et/wp-content/uploads/2019/10/ታተተተ-2-11-2-20.png)
በኦርሚያ ክልል አንዳንድ ከተሞች ሰሞኑን ሰላማዊ ሰልፍን ተገን በማድረግ በተፈፀመ አሳዛኝ ድርጊት የዜጎች ሕይወት ጠፍቷል፣ጉዳት ደርሶባቸው በህክምና ላይ የሚገኙም ጥቂት አይደሉም፣ንብረት ወድሟል፣ የትራንስፖርት እንቅስቃሴ በመቋረጡም ዜጎች ለእንግልት ተዳርገዋል፣የህብረተሰቡ እንቅስቃሴ በመታወኩም ኢኮኖሚያዊና ማህበራዊ ግንኙነቶች ተስተጓጉለዋል። በዚህ ምክንያትም ህዝቡ ስጋት ውስጥ ቆይቷል።
ድርጊቱ ብሄርንና እምነትን ጭምር መሰረት አድርጎ እስከ መፈጸም የደረሰ መሆኑ በእጅጉ አደገኛ አካሄድ ነው። መንግሥት የድርጊቱን አሳሳቢነት በመገንዘብም የሀገር መከላከያ ሠራዊት ችግሩ በተፈጠረባቸው የኦሮሚያ ከተሞች እንዲሁም በድሬዳዋ እና በሀረር ጭምር ገብቶ ሰላምና መረጋጋትን እንዲያስጠብቅ አድርጓል።
አባገዳዎችና ታዋቂ ፖለቲከኞችም በተለይም ወጣቱ መንገድ መዝጋትን የመሳሰሉ ተግባራትን አቁሞ እንዲረጋጋ ምክር ለግሰዋል። በዚህም ተዘግተው የቆዩ መንገዶች ተከፍተዋል። በቀጣይም ሰላምና መረጋጋት እንደሚመጣ ይጠበቃል። ሰራዊቱ በሀገሪቱ አሳሳቢ የሰላም እጦት በተከሰተባቸው አካባቢዎች ሁሉ እየገባ ሰላምና መረጋጋትን እንዳመጣ ሁሉ አሁንም በእነዚህ አካባቢዎች ሰላምና መረጋጋት እንደሚያመጣ አያጠራጥርም።
በዜጎች ላይ የተፈጸመው ድርጊት በእርግጥም አደገኛ አካሄድ ነው። መላ ኢትዮጵያውያንን አሳዝኗል፣ የሀገርን ገጽታም አበላሽቷል፣ ዜጎች ስጋት ውስጥ እንዲዘፈቁም አድርጓል። ይህ ተግባር ለዘመናት አብረው የኖሩ የኦሮሞ ህዝብንም ሆነ ኢትዮጵያውንን አይገልጽም።
ኢትዮጵያውያንን እርስ በርስ ለማባላት ሲሞከር ይህ የመጀመሪያው አይደለም። ድርጊቱ በርካታ ዜጎችን ያሳጣ እና ንብረትንም ያወደመ ቢሆንም በቆየው የኢትዮጵያውን መተሳሰብ ቁስሉ እንዲጠግና የከፋ ጉዳት እንዳይደርስ ጥረት ባደረጉ የኦሮሞና ሌሎችም ብሄረሰብ አባላት የበለጠ ጉዳትና አደጋ እንዳይከሰት ለማድረግ ተችሏል።
ጠቅላይ ሚኒስትር ዶክተር አብይ አህመድ በክስተቱ ህይወታቸው ላለፈና ጉዳት ለደረሰባቸው ዜጎች የተሰማቸውን ጥልቅ ሀዘን ገልጸውና መንግሥት የህግ የበላይነትን ለማስከበር እንደሚሰራ አረጋግጠው፣ አጥፊዎች ህግ ፊት ቀርበው ተገቢውን ሁሉ እንዲያገኙ ያለማወላወል እንደሚሰራ አስታውቀዋል።
የተጎዱ እንዲያገግሙ ከቤት ንብረታቸው የተፈናቀሉ እንዲመለሱ፣ንብረታቸው የጠፋባቸው እንደገና እንዲቋቋሙ ለማድረግ ከህዝቡ ጋር ይሰራል ሲሉ አስታውቀዋል። ለዚህም የሃይማኖት ተቋማት፣ የሲቪክ ማህበራት፣እና መላው ህዝብ ከመንግሥት ጎን እንዲቆም ጥሪ አቅርበዋል።
የመከላከያ ሠራዊቱ ሰላምና መረጋጋትን ለማምጣት እያከናወነ ያለው ተግባር ውጤታማ እንዲሆን የተለያዩ ወገኖች ድጋፍ ወሳኝ እንደሆነ ይታመናል። ከዚህ አኳያ የኦሮሚያ ክልል የጸጥታ አካላት፣ የፌዴራል ፖሊስ፣የድሬዳዋ ከተማ አስተዳደር እና የሀረሪ ክልል ፖሊስ አብረው በመስራት ሰላሙን ዘላቂ ማድረግ ይጠበቅባቸዋል።
ጠቅላይ ሚኒስትሩ እንዳሉትም አጥፊዎችን ለህግ የማቅረቡ ሥራ ያለማወላወል በትኩረት ሊከናወን ይገባል። ከዚህ አኳያ በቁጥጥር ስር የሚውሉ ተጠርጣሪዎች ሊኖሩ እንደሚችሉ ይጠበቃል። ይህ አንድ ነገር ሆኖ በተጠርጣሪዎቹ ላይ የሚደረገው ምርመራ በአስቸኳይ ተካሂዶ ለህግ ቀርበው ቅጣት የሚያገኙበት ሁኔታ መመቻቸት ይኖርበታል።
እስከ አሁን በሀገሪቱ ከተፈጸሙ ህገወጥ ድርጊቶች ጋር በተያያዘ ተጠርጥረው በቁጥጥር ስር በዋሉ ተጠርጣሪዎች ላይ የተወሰደ እርምጃ አለመኖሩ አጥፊዎች ከድርጊቱ ለመታረም የሚችሉበትን እድል አጥቦታል ፤ይህ ብቻም አይደለም ተመሳሳይ ጥፋቶች በተለያዩ አካባቢዎች እንዲደጋገሙ አድርጓል። በመሆኑም መንግሥት ተጠርጣሪዎችን በቁጥጥር ስር ከማዋል በተጓዳኝ ለህግ በማቅረብ ማስቀጣት ላይ ማተኮርም ይኖርበታል።
የጥቃቱ ሰለባዎች እና ኢላማዎች ቂም ሳይቋጥሩና ጥቃቱ ተቃውሞውን ተቀላቅለው በገቡ ጥቂት ኃይሎች አነሳሽነት የተፈጠረ መሆኑን በመገንዘብ እንዳለፉት ዘመናት ሁሉ ከኦሮሚያ ክልል ህዝብ ጋር እጅ ለእጅ ተያይዘው መጓዝ ይኖርባቸዋል።
ተመሳሳይ ጥቃቶች የትም ስፍራ እንዳይደገሙ ለማድረግ ህዝቡ ጥያቄዎቹን በሰላማዊ ሰልፍ ሲያቀርብ እሱና እሱ ብቻ ሆኖ መሆኑን መገንዘብና ተመሳስለው ገብተው ከሰልፉ ዓላማ ውጪ የራሳቸውን አጀንዳ የሚያራምዱ አካላት ሰለባ እንዳይሆን መጠንቀቅ እንዲሁም በዜጎችና ንብረታቸው ላይ ጥቃት የመፈጸም አዝማሚያ ሲኖርም ሆነ ሲፈጸም ሲመለከትም በጋራ ማስቆም ይኖርበታል።
በዚህ አስቸጋሪ ወቅት ዝግናኝ ድርጊት ብቻ አልታየም፣የህዝቦች መተሳሰብና ከጥቃት ጠብቆ ክፉ ቀንን ማሻገርም ታይቷል፤ ህዝቡ የተጎዱትን በመደገፍ ፣ ሙስሊሙ ቤተክርስቲያን እንዳይቃጠል ፣ክርስቲያኑ መስጊድ እንዳይቃጠል ዘብ ቆመው ተገኝተዋል። ይህ አኩሪ ተግባር እንዲሰፋ መስራት ያስፈልጋል። ለሀገርም የሚያስፈልገው ይሄው ነው።
ህዝቡ በዜጎች ላይ ጉዳት እንዳይደርስ እንደተከላከለ ሁሉ የተፈናቀሉ እና ጉዳት የደረሰባቸውን ዜጎች ለመደገፍም ርብርቡን አጠናክሮ መቀጠል ይኖርበታል። መላው ህዝብም ይህን አሳዛኝ ድርጊት ከማውገዝ በተጓዳኝ ለተጎጂዎች ድጋፍ በማድረግ እንዲያገግሙ ማድረግ ይጠበቅበታል!
አዲስ ዘመን ጥቅምት 18/2012