![](https://press.et/wp-content/uploads/2019/10/ታተተተ-2-11-2-19.png)
“በእጅ የያዙት ወርቅ ከመዳብ ይቆጠራል” የሚል አንድ የአገራችን አባባል አለ፡፡ ይህ አባባል ከግለሰባዊ የዕለት ተዕለት ስንክሳሮች በመውጣት በግዙፍ አገራዊ ዘርፈ ብዙ ምህዋር ውስጥ ስንቃኘው፣ ለሚያጋጥሙ ውስብስብ ችግሮችም ሆነ መልካም አጋጣሚዎች መሠረታዊ የሆነ ጭብጥ ያስይዘናል፡፡ በተለይ አገራችን አሁን ካለችበት ተጨባጭ ሁኔታ አኳያ ቆም ብለን ራሳችንን እንድንመረምር ይጋብዘናል፡፡
እንደሚታወቀው ባለፉት 28 አመታት የዴሞክራሲዊ ስርዓትን ለመገንባት የሚያስችሉ የተለያዩ ተግባራት ተከናውነዋል፡፡ ከነዚህም ውስጥ የብዝሃ ፓርቲዎች መፈጠር፣ የዴሞክራሲ ተቋማት መገንባት፣ የሴቶችን ፍትሃዊ ተጠቃሚነት ለማሳደግ የሚያስችሉ ስራዎች መጀመር፣ ወዘተ እንደ ማሳያ ይወሰዳሉ፡፡
ይሁን እንጂ እነዚህ ተቋማት የሚፈለገውን ጠንካራ ዴሞክራሲዊ ስርዓት መገንባት አላስቻሉም፡፡ ምክንያቱም ዴሞክራሲን መገንባት ዘርፈብዙ ጥረቶችን የሚጠይቅ ስራ ነውና፡፡ ጠንካራ የዴሞክራሲ ስርዓት የሚገነባውና ተግባራዊ የሚሆነው የዴሞክራሲ ተቋማትን በመገንባት ብቻ ሳይሆን ተቋማቱ የሚጠበቅባቸውን ሃላፊነት በአግባቡ እንዲወጡ በማስቻል ጭምር ነው፡፡ ለዚህ ደግሞ በአንድ በኩል የመንግስት ቁርጠኝነት፣ በሌላ በኩል ደግሞ የህዝቡ ንቃተ ህሊና መዳበር የግድ ነው፡፡
በአገራችን የዴሞክራሲ ስርዓት መገለጫዎች በህገመንግስቱና በተለያዩ ህጎች ሰፍረው ቢገኙም አተገባበራቸው ላይ በሚታዩ ክፍተቶች የዴሞክራሲ ግንባታ ስርኣታችን በሚፈለገው ደረጃ ላይ እንዳይደርስ አሉታዊ ተፅዕኖ ፈጥረዋል፡፡ ይህ ደግሞ በአንድ በኩል ህብረተሰቡ በመንግስት ላይ አመኔታ እንዲያጣና ብሎም ወደ አመፅ እንዲገባ ያደረገው ሲሆን በሌላ በኩል ደግሞ አገራችንም በአለም አቀፉ ማህበረሰብ ዘንድ የጸረ ዴሞክራሲ መገለጫ እንድትሆን ጭምር ያደረጉ ናቸው፡፡
ለውጡን ተከትሎ ግን መንግስት ችግሮቹን ለመፍታትና ዴሞክራሲያዊ ስርዓትን ለመገንባት ጠንካራ መሰረቶች እየጣለ የመጣበት ወቅት ነው፡፡ በተለይ ላለፉት ሁለት አስርት ዓመታት ተግዳሮት ሆነው የቆዩትን መሰረታዊ ችግሮች በመፍታት ጠንካራ የዴሞክራሲ ስርኣትን ለመገንባት የሚያስችሉ እርምጃዎችን ወስዷል፡፡
በዚህም መሰረት በተለያዩ ዘርች ሪፎርሞችን በማካሄድ የዴሞክራሲ ተቋማት ከስም በዘለለ እውነተኛ እንዲሆኑ፤ የፀረሽብር አዋጁን ጨምሮ ዴሞክራሲን የሚያፍኑ ህጎች እንዲሻሻሉ፤ የዜጎች የመናገር ህገመንግስታዊ መብት ሙሉ ለሙሉ ተግባራዊ እንዲሆን፤ ሚዲያዎች ያለገደብ እንዲንቀሳቀሱ ፣ ወዘተ እርምጃዎች ተወስደዋል፡፡
ከዚህም ባሻገር በሃሳብ ልዩነት ብቻ ለእስር የተዳረጉ፣ ከሀገር ውጭ የተሰደዱ፣ በውጭ ሆነው የትጥቅ ትግል ላይ የቆዩ፣ ወዘተ ዜጎችም ወደአገራቸው ተመልሰው በሰላማዊ መንገድ እንዲታገሉ በሩ ተከፍቶላቸዋል፡፡ እነዚህ ሁሉ ለዴሞክራሲው ምህዳር መስፋት በመንግስት የተወሰዱ ትላልቅ እርምጃዎች ናቸው፡፡
ይሁን እንጂ የዴሞክራሲ ባህላችን ገና ያልዳበረ በመሆኑና መብትና ግዴታችንን ካለማወቅ ወይም በሌሎች ምክንያቶች ዴሞክራሲውን የምንለማመድበት መንገድ በራሱ ዴሞክራሲውን ከማዳበር ይልቅ የሚያቀጭጭ ሲሆን ይስተውላል፡፡ በዚህ የተነሳ ዴሞክራሲውን ከማሳደግ ይልቅ የዴሞክራሲ ስርዓት ግንባታችን ዳግም ወደችግር ሲገባ ይስተዋላል፡፡
ለዚህም አንዱ ማሳያ ሰሞኑን በተለያዩ የኦሮሚያ ከተሞች የተከሰቱ ሁከቶችና የጠፋው የሰው ህይወትና ንብረት ማሳያ ነው፡፡ የሰሞኑ ግጭት አሁን ከተፈጠረው ሰፊ የዴሞክራሲ ምህዳር አንጻር ሲታይ ፈጽሞ የማይገባና አገራችንን የማይመጥን ተግባር ነው፡፡
ዜጎች በማበራዊም ሆነ በመደበኛ ሚዲያው ሃሳባቸውን በነፃነት የሚገልፁበት ሰፊ የዴሞክራሲ ሜዳ ተከፍቶ ባለበትና ከጭለማ ወደብርሃን በተሸጋገርንበት ነባራዊ ሁኔታ መገዳደል የማይገባና ደካማ በመሆኑ ሁላችንም ቆም ብለን ራሳችንን ልንፈትሽ ይገባል፡፡ አሁን ያገኘነው ዴሞክራሲ በቀላሉ የመጣ ሳይሆን ከብዙ ትግልና የሰው ልጅ የህይወት መስዋዕትነት በኋላ የተገኘ በመሆኑ ይህንን ያገኘነውን ድልም መልሰን ወደጭለማ ልንገፈትረው አይገባም፡፡ “በእጅ የያዙት ወርቅ ከመዳብ ይቆጠራል” አንዲሉ በመገዳደልና ያለንን ሃብት በማውደም አገራችንን ድህነትን እንዳናባብስም ልንጠነቀቅ ይገባል፡፡
በመሆኑም አሁን በአገራችን የተጀመረውን ዴሞክራሲያዊ ስርዓት የመገንባት ሂደት ለማሳካት የመንግስት፣ የኅብረሰቡና የፖለቲከኞች ርብርብ ወሳኝ ነው፡፡ ከዚህ አንጻር በህብረተሰቡ በኩል አሁን እየታየ ያለውን መልካም አጋጣሚ በማሳደግ የተሻለ ዴሞክራሲዊ ስርዓት እንዲፈጠር መብትና ግዴታን በአግባቡ መለየትና መብቶቻችንን እንደምንጠይቀው ሁሉ ግዴታዎቻችንንም ለመወጣት ጥረት ማድረግ ይጠበቅብናል!
አዲስ ዘመን ጥቅምት 17/2012