![](https://press.et/wp-content/uploads/2019/10/ታተተተ-2-11-2-19.png)
በሀገራችን በተለይም በኦሮሚያ አንዳንድ አካባቢዎች ሰሞኑን ያጋጠመው ሁከት እና ብጥብጥ የበርካታ ዜጎችን ሕይወት ቀጥፏል፤ አካል ጉዳት አድርሷል፤ የሀብትና ንብረት ውድመት አስከትሏል። የመንገድ መዘጋት፣ የትራንስፖርት መስተጓጎል፣ የንግድ፣ የትምህርት እና ሌሎች ማህበራዊ እንቅስቃሴዎችንም ገቷል። በአጠቃላይ በሀገሪቱ ዜጎች ላይ የሥነልቦና ጫና እና አለመረጋጋትን አስከትሏል። ይሄ በጣም የሚያሳዝን ነው። ለዚህ ሁሉ ችግር መነሻ ምክንያቱ ምንም ይሁን ምን ኅብረተሰቡ፣ አክቲቪስቶች/ፖለቲከኞች እና መንግሥት ለችግሩ ተወቃሽ ከመሆን አይድኑም።
ዛሬ ሃሳብን በነፃነትና ሰላማዊ በሆነ ሁኔታ በፈለጉት መንገድ መግለጽ ይቻላል። ሕዝብ የማይፈልገውና የማይወደውን ነገር በላዩ ላይ ለመጫንም ጊዜው አይፈቅድም። ይሁንና ሕዝቦች ቅሬታቸውን መግለጽ ሲጀምሩ ከጎን የሚከሰቱ አፍራሽ ተግባራት ከጸጸት ውጪ ትርፍ የላቸውም። ሕዝብ ሆይ የሆነ ያልሆነ ነገር ኮሽ ባለ ቁጥር ጎዳና በመውጣት የምታጠፋው ሕይወት የራስህን ወገን ነው። የምታወድመው ንብረት የራስህንና የሀገርህን ነው። ማንም ከውጭ የመጣ ጠላት የለም።
እንዲሁም ሌላውን አጠቃለሁ ብለህ ስታስብ ራስህን ለከፍተኛ አደጋ እና ጉዳት እየዳረግክ ነው። ከትክክለኛ ጥያቄህ በተጓዳኝ ድብቅ ዓላማቸውን ሊያሳኩ የሚፈልጉ ኃይሎች አንተን የሥራ ዕድል ተጠቃሚ እንዳትሆን፣ ተምረህ እንዳታውቅ፣ ተረጋግተህ እንዳትኖር እየቀሰቀሰ የጥይት እራት እያደረገህ መሆኑን ልብ ልትል ይገባል። ከትክክለኛ ጥያቄህ ጀርባ መሽገውና ከወገንህ አናቁረው አንድነትህን፣ ክልልህን ብሎም አገርህን ለማፍረስ የሚሰሩ አካላት እንዳሉ በማወቅ የምታደርገውንና የምትሰራውን ሁሉ በማስተዋልና በመረጋጋት ልትከውን ይገባል።
አክቲቪስቶች እና ፖለቲከኞችም የምትወግኑለትን ሕዝብ ጥቅም የምታስከብሩት ሲኖር ነውና እያንዳንዱ ንግግራችሁና ምክራችሁ እጅግ የታሰበበት ሊሆን ይገባል። ያላመናችሁበትን ነገር በግልጽ መቃወምና ሕዝብን በሃሳባችሁ ዙሪያ ማንቃት ማንም የማይገስሰው መብታችሁ ነው። ከመቼውም ጊዜ ይልቅም ይህ መብት ዛሬ ላይ ተረጋግጧል።
ስለሆነም ሕዝብን ለመቀስቀስ በምታደርጉት ተግባር ዴሞክራሲያዊነትን መላበስና የሚያስከትለውን ውጤትም አስቀድማችሁ ልትመዝኑ ይገባል። ከየትኛውም ወገን ያላችሁ ፖለቲከኞችም ሆናችሁ አክቲቪስቶች ያለጥንቃቄ የምታደርጉት እንቅስቃሴ ተወቃሽ የሚያደርጋችሁና ታሪካችሁም ላይ ጥቁር አሻራን እንደሚያስቀምጥ ለአፍታ ልትዘነጉትም አይገባም። አገርን እያፈረሰ ያለው የብሽሽቅ ፖለቲካ ነውና ከዚህ ወጥታችሁ በሳል ፖለቲካን በማራመድ ለሕዝቡ አርአያም ሁኑ!
ሌላው ማስተዋል ያለበት እና በጥበብ ሀገርና ሕዝብን መምራት የሚጠበቅበት መንግሥት ነው። ስለዚህ መንግሥት ሆይ ሕዝብ ይመራኛል፤ ደህንነቴን ይጠብቃል፤ ሰላሜን ያስከብርልኛል፤ በሰላም ወጥቼ እገባለሁ፤ አቅጄ እፈጽማለሁ…ብሎ ከፈጣሪው በታች ራሱን አሳልፎ የሰጠው ለአንተ መሆኑ አይዘንጋ። መንግሥትም የሀገርን ሰላም የማስከበር፣ የሕዝብን ደህንነት የመጠበቅና የማስጠበቅ ሀገራዊ ኃላፊነት እና ግዴታ አለበት።
በመሆኑም በየቦታው ችግሮች ሲፈጠሩ ሕዝቡን ከማዳን ውጪ ቀደም ብሎ ሁኔታዎችን እየመረመረ የግጭት ቀዳዳዎችን መዝጋቱ ላይ አበክሮ መስራት ይኖርበታል። ከመንግሥት አካላት የሚሰነዘሩ ንግግሮችም እጅግ የተመዘኑ የሰውን ስሜት የማይጎዱና ለሰላም መደፍረስ ምከንያት የማይሆኑ ሊሆኑ ይገባል። አይቶ እንዳላየ አይኑን ጋርዶ፤ ሰምቶ እንዳልሰማ ጆሮውን ደፍኖ የሚያልፍ መንግሥት ሕዝብን ለእልቂት፣ ሀገርንም ለትርምስ ይዳርጋል።
የዴሞክራሲ መድረኩን የበለጠ ከመክፈት ጎን ለጎንም በሰላማዊ ትግልና በመብት አጠያየቅ ዙሪያ ሕዝቡ ሊከተለው በሚገባው አካሄድ ላይም መንግሥት ሰፊ የግንዛቤ መፍጠሪያ ሥራዎችን መስራቱ ለነገ ይደር የሚባል ሥራ አይሆንም። ሰዎችን በመግደልና በመጨፍጨፍ ለውጥ አይመጣም የሚለው ትዕግሰት የተሞላበት የመንግሥት አካሄድ እንደተጠበቀ ሆኖ ብሔርና ሃይማኖት ለይተው ጥቃት የሚሰነዝሩና አገርን ለማፍረስ ለሚሰሩ ኃይሎች ግን የማይታለፍ ቀይ መስመር ማበጀት አለበት። ችግሮችን በሰላማዊ መንገድ ለመፍታት የሚሰሩ ሥራዎች እንደተጠበቁ ሆነው የሕግ የበላይነት የማስከበሩ ሥራ ላይ ሸብረክ ሳይል የመንግሥትነት ሚናውን መወጣትም የውዴታ ሳይሆን የግዴታ ጉዳይ ነው።
መንግሥት ማንኛውንም የሚሰራውን ሥራ በማስተዋል፣ በጥበብና ኃላፊነት በተሞላበት መንገድ ሊከውነው ይገባዋል። የሚሰሩ ሥራዎች፣ የሚወሰዱ እርምጃዎች የጋራ ጉዳዮቻችንን አይተን ፣ ለነገ አደጋ የማያስከትሉ መሆናቸውን አረጋግጠንና ቀጣዩን ውጤት አገናዝበን መሆን አለበት። ይሄ ሲሆን ሕዝብና መንግሥት ይተማመናል። ፍትህ ይሰፍናል። የሀገር ሰላም ይረጋገጣል።
የሕዝቡም ወጥቶና ሰርቶ የመግባትና ወልዶ የመዳር ህልሙ እውን ይሆናል። ሀገራችንንም ወደ አሰብነውና ልንደርስበት ወደምንመኘው የብልጽግና ጎዳና እናደርሳለን። ለዚህ ግን ጥበብ የተሞላበት አካሄድን መከተል ይጠይቃል። በአጠቃላይ ሕዝባችን ፖለቲከኞቻችን፣አክቲቪስቶቻችንና መንግሥት ማንኛውም የምትወስዷቸው እርምጃዎች አደጋን የማያስከትል፣ ትርምስ የማይፈጥርና ውጤታቸውም የተጠና በሆነ መልኩ ሊሆኑ ይገባል!
አዲስ ዘመን ጥቅምት 16/2012