![](https://press.et/wp-content/uploads/2019/10/11-119.jpg)
ኢትዮጵያ የበርካታ ባህላዊ፤ ኃይማኖታዊ እና ተፈጥሯዊ ሀብቶች ባለቤት ነች፡፡ ሀገሪቱ የተለያዩ እምነቶች፣ ባህሎች፣ ቋንቋዎችና ብሔር ብሔረሰቦች ካሉባቸው የዓለማችን ሀገሮችም አንዷ ነች፡ ፡ ቤተ እምነቶች፤ ብሔርና ብሔረሰቦች ደግሞ የራሳቸው መለያ የሆኑ መገለጫዎች አላቸው፡፡
የራሳቸው አለባበስ፤ የምግብ ዓይነትና ዝግጅት፤ ጭፈራዎች፤ ሥነጥበብና ዕደ ጥበቦች፤ የጋብቻ ሥርዓቶች፤ የግጭት አፈታት ስልቶችና የመሳሰሉት ባህላዊና ትውፊታዊ ሀብቶች የእነዚሁ ብሔር ብሔረሰቦችና ቤተ እምነቶች መገለጫዎች ናቸው:: ለዚህም ነው ኢትዮጵያ ከሌላው ዓለም የምትለይባቸው በርካታ ጸጋዎችና እሳቤዎች ያላት ሀገር የምትባለው፡፡
ይሁን እንጂ በዘመናት ታሪኳ ውስጥ እነዚህን ጸጋዎችና እሳቤዎች ከግምት ውስጥ ያስገባ የፖለቲካ ሥርዓት በኢትዮጵያ ውስጥ ታይቶ አይታወቅም፡፡ እንዳለመታደል ሆኖ የራስን ጸጋ ባለመረዳትና አንዳንድም ጊዜ በማናናቅ ውጭ ውጭውን ማለት የተለመደ ሆኖ ቆይቷል፡፡ በየዘመናቱ ሀገሪቱን ሲገዙ የቆዩ መሪዎችም ከሀገሪቱና ከሕዝቦቿ ሥነልቦናና ማህበራዊ አወቃቀር በተጣረሰ መልኩ የተለያዩ የፖለቲካ አስተሳሰቦችን ከውጭ ኢምፖርት በማድረግ ሕዝቡን ሲያጠምቁት ቆይተዋል፡፡
ከውጭ የተቀዱት የፖለቲካ እሳቤዎችም የሕዝቡን ኢኮኖሚያዊ፤ ማህበራዊና ፖለቲካዊ ችግሮች ከመቅረፍ ይልቅ ጉስቁልናንና መለያየትን አስፍነዋል፡፡ ለዘመናት የኅብረተሰቡ መለያ ሆነው የቆዩት ኢትዮጵያዊ ዕሴቶች ፈራርሰው በምትካቸው ጥርጣሬ፤ መለያየትና ጥላቻ እንዲሰፍንም በር ከፍተዋል፡፡
ባለፉት ሃያ ሰባት ዓመታት በሀገሪቱ ሲተገበር የቆየው አብዮታዊ ዴሞክራሲ ለዚህ ጥሩ ማሳያ ነው፡፡ አብዮታዊ ዴሞክራሲ በመደብ ክፍፍል የሚያምንና ወዳጅና ጠላት ብሎ በመፈረጅ በሕዝቦች መካከል ጥርጣሬና ጥላቻ እንዲነግስ ያደረገ የፖለቲካ መስመር ነው፡፡
አሁን ባለው ተጨባጭ ሁኔታ በኢትዮጵያ ውስጥ ጨቋኝና ተጨቋኝ ሆነ የመደብ ክፍፍል በሌለበትና ሁሉም በተመሳሳይ መልኩ ኑሮን ለማሸነፍ በሚታትርበት ሁኔታ የመደብ ክፍል እሳቤ ውስጥ መገባቱ ኢትዮጵያን የሚመስል የፖለቲካ ጠፍቶን ስንደናበር ለመቆየታችን አንዱ ማሳያ ነው፡፡
በሌላው ጎኑ ደግሞ ለሃይማኖት ዕውቅና የማይሰጥ በመሆኑ ሃይማኖች ተከታዮቻቸውን በሚፈለገው መልኩ እንዳያገለግሉና ብሎም የፖለቲካ መድረኩ ተዋናይ እንዲሆኑ አድርጓል፡፡ 99 በመቶ የሚሆነው የኢትዮጵያ ሕዝብ ኃይማኖተኛ ሆኖ ሳለ የሕዝቡን ነባራዊ ሁኔታ ያላገናዘበ ፖለቲካዊ ዕሳቤ ውስጥ ገብተንም እንደ እምነት የለሽ ስንዳክር ቆይተናል፡፡
ላለፉት ሦስት አስርት ዓመታት ሲተገበር የቆየው ይህ አብዮታዊ ዴሞክራሲ መርህ በችግሮች የተተበተበና የኅብረተሰቡንም ኑሮ ያልለወጠ ብሎም ቆሜለታለሁ ለሚለው አርሶ አደርና የከተማው ድሃ ኅብረተሰብ ጠብ የሚል ነገር ያላስገኘ መስመር ነው፡፡ ከ101 ዓመታት በፊት በሩሲያ መተግበር የጀመረው አብዮታዊ ዴሞክራሲ ለየትኛውም ሀገር መፍትሄ ባለማምጣቱ ዛሬ ሁሉም ሀገሮች ከነመፈጠሩ እንኳን ረስተውታል፡፡
ይሁንና ቆሞ ቀርነት እንደማያዋጣ የተገነዘበው የለውጥ አመራርም አብዮታዊ ዴሞክራሲ የሕዝቡን ችግሮች ሊፈታ የማይችል የፖለቲካ ዕሳቤ መሆኑን ተረድቶ ኢትዮጵያና ሕዝቦቿን የሚመስል ‹‹መደመር›› የተሰኘ የፖለቲካ ሀገር በቀል ዕሳቤ አስተዋውቋል፡፡ የመደመር የፖለቲካ ዕሳቤ በአብዮታዊ ዴሞክራሲ ያጣናቸውን ኢትዮጵያና ሕዝቦቿን የሚመስል ፖለቲካ አስተሳሰብ የሚያጎናጽፍና ከውጭ በሚቀዱ የፖለቲካ ዕሳቤዎች ለእኛ እንደማይሆኑን ያረጋገጠ ዕሳቤ መሆኑን መረዳት ይገባል፡፡
ለአገር ችግር አገራዊ መፍትሄ የሚለውን ሁነኛ የመደመር ዕሳቤ መላው ሕዝብ አስቀድሞ በመረዳት ብሎም የጎደለውንም ተመካክሮ በማሟላት አገራችንን ከተተበተችበት ችግር ማላቀቅና ለመጪው ትውልድ ከጥላቻና ድህነት የተላቀቀች አገር ማሰረከብ ጊዜው የሚጠይቀው ተግባር ነው!
አዲስ ዘመን ቅዳሜ ጥቅምት 15/2012