ማስተዋወቁም የግንባታውን ያህል ይሁን !

 ሀገሪቱ በቅርቡ በመዲናዋ በአዲስ አበባ አንድ አዲስ የቱሪስት መዳረሻ አስመርቃለች። አንድነት ፓርክ! አምስት ቢሊየን ብር የወጣበት ይህ የቱሪስት መዳረሻ 40 ሄክታር ከሆነው የታላቁ ቤተ መንግሥት ግቢ ውስጥ በ13 ሄክታሩ ላይ ያረፈ ነው። ፓርኩ እንደሰሙ በርካታ ቱሪስቶችን ሊስቡ የሚችሉ ስብሰቦችን በአንድነት ይዟል።

የዳግማዊ አጼ ምኒሊክ ቤተመንግሥት ፣አዳራሽ፣ መኖሪያ ቤት ወዘተ በሚገባ ታድሶ ለጎብኚዎች ክፍት ተደርጓል። ቤተመንግሥቱ እንኳንስ ሌሎች አዳዲስ መስህቦች ታክለውበት በራሱም በርካታ ጎብኚዎችን ሊስብ እንደሚችል ይታወቃል። ለጎብኚዎች እንዲመች ተደርጎ የተካሄደለት ግንባታም ሌላው ጎብኚዎችን ሊስብ የሚችልበት አቅም ሆኗል።

ከታሪካዊ ቅርሶቹ በተጨማሪ የብሄር ብሄረሰቦች እና ህዝቦች ባህልን የሚያንጸባርቁ ግንባታዎች ፤የአረንጓዴ ስፍራዎች፣ የልጆች መጨዋቻ፣ የዱር እንስሳት ማቆያ እና የመሳሰሉት የተካተቱበት እንደመሆኑ የበርካታ ጎብኚዎችን ቀልብ ሊስብ እንደሚችል ይታመናል። በውስጡ እያንዳንዳቸው ፓርክ ሊሆኑ የሚችሉ መስህቦች ሰፊ ዕውቀት የሚቀሰምባቸው መሆናቸውም ሌላው ፋይዳው ነው።

ፓርኩ የተለያዩ ትውልዶችን ያስተሳስራል፤ ካለፈው ታሪክ ትምህርት ይቀሰምበታል። በንጉሡ ዘመን በቤተ መንግሥቱ የተሸለሙ፣ የተጋበዙ እንዳሉ ሁሉ በደርግ ዘመን ደግሞ በዚሁ ቤተመንግሥት ውስጥ የታሰሩ፤ የተገረፉ፤ አካላቸውን ያጡና የተገደሉም አሉ። የአሁኑ ትውልድ ደግሞ ለዜጎች ዝግ ሆኖ ከቆየው ከእዚህ ቤተመንግሥት እና አዲስ ከተገነቡት የተለያዩ መስህቦቹ ዕውቀት የመቅሰምና ዘና የማለት ፍላጎት አለ።

በመሆኑም ፓርኩ በዘመን ትውልዶች መጎብኘት የሚችል ታላቅ ፓርክ ነው። ተሸላሚዎች፣ የንጉሥ ግብር የበሉ፣ ስቃይ የደረሰባቸው ዜጎች ፣በአረንጓዴ ስፍራው የተማራኩ ሰፊ መስክ ዓይተው የማያውቁም ሆነ የናፈቁ ወጣቶች ጭምር የሚጎበኙት እንደሚሆን ይጠበቃል።

ፓርኩን ለኢትዮጵያውያንና የውጭ ሀገር ዜጎች በማስጎበኘት ገቢ ለመስበስብ ታቅዷል። ከመስከረም 30 ቀን 2012 አንስቶም ፓርኩን ማስጎብኘት ተጀምሯል።

 የማስተዋወቅ ሥራም በስፋት እየተካሄደ ሲሆን፣ ጎብኚዎች በተለያዩ መንገዶች እየተመዘገቡ ለመጎብኘት የሚችሉባቸው የተለያዩ መንገዶች ተመቻችተዋል። በርካታ ጎብኚዎችም ፓርኩን እየጎበኙ ይገኛሉ። መረጃዎች እንደሚያመለክቱት ለጎብኚዎች ክፍት ከሆነ አንስቶም በቀን በአማካይ ከአንድ ሺ በላይ በሚሆኑ ኢትዮጵያውያንና የውጭ ሀገር ዜጎች እየተጎበኘ ይገኛል።

እስከ አሁን በተከናወነው ፓርኩን የማስተዋወቅ ሥራ በውስጡ ባካተታቸው መስህቦች ጎብኚዎችን ሊስብ እንደሚችል ይታወቃል፤ ጥሩ ዕቃ ማስተዋወቅን አይጠይቅም ሊባል ቢችልም አዲስ አንደመሆኑ አሁንም በስፋት ማስተዋወቅ ይገባል። ይህን በማድረግም ይበልጥ ሊጎበኝ የሚችልበትንና የውጭ ምንዘሪ ምንጭ የሚሆንበትን ሁኔታ መፍጠር ይገባል። ለመጎብኘት ጥያቄ የሚያቀርበውን በወቅቱ በማስተናገድ በአገልግሎቱ ጥሩ ስምና ዝና በማትረፍም ጎብኚዎችቸን ማፍራት ይቻላል።

የፓርኩ ኃላፊ እንዳሉት ጎብኚዎችን ፓርኩን የማስተዋወቁ ሥራ አካል ማድረግ ይገባል። ማየት ማመን ነውና ጎብኚዎቹ ያዩትን ለሚያውቋቸው ቢገልጹ የበለጠ ጎብኚን መሳብ ይቻላልና አሁንም በጎብኚዎች የተጠናከረ ሥራ መሥራት ያስፈልጋል። ኢትዮጵያ ሊጎበኙ የሚችሉ እምቅ የቱሪዝም ሀብቶች እንዳላት ይታወቃል።

ለእዚህም ብሄራዊ ፓርኮቿን፣ ወንዞቿን፣ ጥንታዊ የአብያተ ክርስቲያን ሕንፃዎችን ፣ ታሪክ የተሠራባቸው እንደ ዓድዋ ያሉ አካባቢዎችን ፣ ባህሎቿን፣ መንፈሳዊ በዓላቷን በአብነት መጥቀስ ይቻላል።

ይሁንና እነዚህ እና ሌሎች አያሌ የቱሪስት መዳረሻ ሊሆኑ የሚችሉ መስህቦች ቢኖሯትም ከቱሪዝም በሚገኝ ገቢ በኩል አሁንም ተጠቃሽ ልትሆን አልቻለችም። የእዚህ ችግሩ ደግሞ መስህቦቹ እና ወደ መስህቦቹ የሚወስዱ መሰረተ ልማቶችና አገልግሎቶች በቂ አለመሆንና አለመሟላት ፣በቂ የማስተዋወቅ ሥራ አለመሠራት ነው።

ከዚህ አንጻር የአንድነት ፓርክ በአዲስ አበባ እምብርት ላይ እንደመገኘቱ እና የተለያዩ አገልግሎቶች እንዲሟሉለት ተደርጎ በመገንባቱ በብዙ መልኩ በበርካታ ቱሪስቶች ሊጎበኝ ይችላል። ይህ ብቻውን ግን የሚፈለገውን ያህል እንዲጎበኝ አያደርገውም። የማስተዋወቅ ሥራ ለየትኛውም ምርት ወሳኝ እንደመሆኑ ፓርኩን ማስተዋወቅ ላይ በትኩረት መሥራት ይገባል።

በአጠቃላይ ለግንባታው የተሰጠውን ትኩረት ያህል ለማስተዋወቁ ሥራም መስጠት ያስፈልጋል። እንደ ኢትዮጵያ አየር መንገድ እና የመሳሰሉትን ዓለም አቀፍ ስምና ዝና ያላቸውን ተቋማት ጭምር በመጠቀም ማስተዋወቅም ብልህነት ነው።

አዲስ ዘመን ጥቅምት 11/2012