![](https://press.et/wp-content/uploads/2019/10/ታተተተ-2-11-2-12.png)
በመጽሐፍ ቅዱስ የተነገረ አንድ ታሪክ አለ፡፡ አይሁዳዊያን አንዲት “አመነዘረች” ያሏትን ሴት ወደ ኢየሱስ ዘንድ አቅርበው የሙሴን ህግ ተላልፋለችና ምን እናድርጋት ሲሉ በተንኮል ተሞልተው ጠየቁት። አይሁዳዊያኑ፤ እየሱስ ሴቲቱን “ተዋት” ቢል ህግ ተላለፈ ሊሉ፤ እንደ ሙሴ ህግ “ተወግራ ትሙት” ብሎ ቢፈርድም ሰው አስገደለ፤ ነፍስ አጠፋ ሊሉ ነበር አመጣጣቸው። ይህ ተንኮል የገባው ኢየሱስም “ከእናንተ መካከል ሀጢያት የሌለበት ይውገራት” ብሎ ፈረደ። ከዚያ በኋላም የሁሉም ሀጢያት በግንባሩ ላይ ይነበብ ጀመር። አንዳቸው የሌላውን ሀጢያት ሲያዩም እየሱስንና ሴቲቱን ትተው ወደመጡበት ተመለሱ። እየሱስም ሴቲቱን ዳግም እንዳትበድል ነግሮ አሰናበታት።
ይህ ታሪክ ለብዙ የአገራችን ምስቅልቅሎች ልኩ ሆኖ እናየዋለን። በኢትዮጵያ የተደረገውን ለውጥ ተከትሎ የሚታዩም የሚደመጡም ጉዳዮች ብዙ የሚያስተዛዝቡ ሆነዋል። ላለፉት 28 ዓመታት ኢህአዴግ ይህችን አገር ሲያስተዳድር ከነበረበት አንድ ምዕራፍ ወደ ሌላና በብዙ መልኩም ወደተሻለ የኢኮኖሚ፣ የማህበራዊና የፖለቲካ ምዕራፍ አድርሷታል። ለዚህ ተግባሩም ምስጋና ይገባዋል። በአንጻሩ ያለፉት 28 ዓመታት ብዙ ምስቅልቅሎች የታዩበት ስለመሆኑ መካድ ሚዛን ማጣት ይሆናል።
በዚህ ምስቅልቅል ውስጥ ዋና ተዋናይ የነበሩና አሁን ላይ “በለውጡ ተገልለናል” በሚል ቁዘማ ውስጥ ያሉ የግንባሩ ሰዎች ለ27 ዓመታት ላበላሹትና መልስ ለነፈጓቸው ጥያቄዎች መልስ መስጠት ሲጀመር አቃቂር ሲያወጡ መመልከት፤ የመጽሐፍ ቅዱሱን ታሪክ እዚህ ላይ ማምጣትና፤ “ከደሙ ንጹህ የሆነ ይህንን ጥያቄ ያንሳ” ብሎ መሞገት ትክክል ይሆናል።
አዎን እንሞግታለን!”አገር ተበላሸ፤ አሰራር ተጣሰ፤ ህገ መንግስት ይከበር፤ መርህ ጠፋ…” በሚል የሚደመጡ ትችቶችንና ክሶችን ከእነዚህ ወገኖች መካከል ከሀጢያቱ ንጹህ የሆነ ጥያቄውን ያንሳ፤ መልስ መስጠት ያለበትን አካልም ይሞግት። የምናወራው ስላለፉት 27 ዓመታት በደሎችና ምስቅልቅሎች ከሆነ ከለውጡ በተጻራሪ የቆሙት ወገኖች ይህንን ጥያቄ ለማቅረብ የሞራልም የህግም የበላይነት የላቸውም።
ትናንት ለተፈጠሩ በደሎች ዋና ተዋናይ የነበረ አካል አይኑን በጨው አጥቦ የሆነ ጥግ ላይ ሆኖ አቃቂር ማውጣትና ያደሩ የቤት ስራዎች መልስ ሲሰጣቸው ደርሶ ዴሞክራት ደርሶም ጠበቃ ለመሆን መሞከር ያስተዛዝባል፤ ያስገምታልም። በእርግጥስ ከእነዚህ አካላት መካከል እየተነሱ ያሉ ጥያቄዎችን ለማንሳት ንጹሁ ማነው?
በግንባሩ ውስጥ ግንባር ቀደም የነበሩ ወገኖች አዳፍነውት የኖሩትን እንደ የሲዳማ ህዝብ የክልል እንሁን አይነት ጥያቄ መልስ መስጠት ሲጀመር ዋና ተቆርቋሪ መስሎ መቅረብና የተለየ ግፊት በግልጽም በድብቅም ማድረግ ህዝብን አላዋቂ ማድረግ ነው። የማንነትና የዴሞክራሲ ጥያቄ ያነሱ የራስን ወገን ረግጦ ይዞ ባስ ሲልም “ባንዳ” በሚል ታርጋ ፈርጆ በሌላ ክልል ላሉ የማንነት ጥያቄዎች ጠበቃ ሆኖ መቅረብ “የራሷ አሮባት…” ያስብላል። ይህንን ጥያቄስ ለማቅረብ ሀጢያት የሌለበት ማነው? እንዲህ ብሎ መጠየቅ በብዙ መልኩ ትክክልም ተገቢም ነው።
የአገራዊ ለውጡ መርህ ያለፈውን በደል እንርሳ፤ መጪውን ዘመን እየዋጀን አብረን ታላቋን አገር ከሚመጥናትና ከሚገባት ከፍታ እናድርሳት፤ በአጭር ቃልም መንገዳችን መደመር ይሁን ነው። ይህንን የይቅርታና የመደመር መንገድ ወደጎን ትቶ፤ ከለውጡ በፊት በደል እንዳልነበረና በበደሉ ውስጥም እንደሌሉበት ቆጥሮ፤ ከለውጡ ወዲህ ያሉ ህጸጾችን እንደ ስንደዶ እየመዘዙ ሌላው ላይ ሌባ ጣትን መቀሰር “የወጋ ቢረሳ የተወጋ አይረሳ” ያስበላልና እነዚህ አካላት ቆም ብለው ያስቡ።
በአንድም በሌላም በግልጽም በህቡዕም ጥሪ የሚቀርብለት ህዝብም ይሁን ቡድን የጥሪ አቅራቢውን ማንነት በውል ማወቅ አለበት። ይህም ብቻ ሳይሆን በእርግጥስ የሚቀርበው ጥሪ ከጥሪ አቅራቢው የቀደመ ታሪክ አንጻር በዚህ አካል መቅረብ አለበት ወይ ብሎ መጠየቅ ይገባዋል። አይናችሁን ጨፍኑ ላሞኛችሁ አካሄድም መቆም አለበት። ሁሉም ወገን ዛሬም ነገም ጣቱን በሌላው ላይ ለመቀሰር ጣት ስለሚቀስርበት ጉዳይ ከሀጢያቱ ነጻ ነኝ ወይ ብሎ መጠየቅ ይገባዋል።
አዲስ ዘመን ጥቅምት 7/2012