ክብር ለሰንደቅ ዓላማችን!

 በሰንደቅ ዓላማ ላይ ልዩነት መፈጠር ከጀመረ ዓመታት ተቆጥረዋል። ይህ ልዩነት ግን ያለው በሰንደቅ ዓላማው ላይ ባለው አርማ ላይ ሲሆን፣ ይህን ችግር ለመፍታትም ከለውጡ በፊት ባሉት ዓመታት በሰንደቅ ዓላማው ላይ ግንዛቤ የማስጨበጥ ሥራዎች ተሰርተዋል።አርማው የሌለበት ሰንደቅ ዓላማ ማውለብለብም ሆነ ይዞ መገኘት መከልከሉም ይታወቃል።

ባለፉት ዓመታት የብሄራዊ ሰንደቅ ዓላማ ቀንን ለማክበር በተካሄዱ ልዩ ልዩ መድረኮች የአዋጁን ዓላማ በጠበቀ መልኩ በሰንደቅ ዓላማ ላይ ግልጽነት እንዲፈጠር የሚያስችሉ ግንዛቤን የመፍጠር ሥራዎች በጥናት ላይ በተመሰረተ መልኩ መካሄዳቸውን የህዝብ ተወካዮች ምክር ቤት መረጃዎች ያመለክታሉ ። በዚህም በሰንደቅ ዓላማው የሉዓላዊነት መገለጫነት እና የአንድነት ምልክት መሆን ላይ የጎላ ልዩነት እንደሌለ ፣ በአርማው ላይ ግን በሚፈለገው ደረጃ መግባባት መፍጠር እንዳልተቻለ መረጃው ይጠቁማል፡፡

ችግሩ እየሰፋ መጥቶ ከለውጡ ወዲህም ትልቅ አጀንዳ ሆኖ እየተነሳ ነው።ለውጡ ለብዙ ጥያቄዎች መልስ የሰጠ ቢሆንም ፣ልዩነትን ማንጸባረቅን ከማስተናገድ ባሻገር ያስቀመጠው ዘላቂም ሆነ ጊዜያዊ መፍትሄ የለም። ይህ ልዩነት እየተንጸባረቀ ባለበት ሁኔታ 12ኛው የሰንደቅ ዓላማ ቀን ትናንት በህዝብ ተወካዮች ምክር ቤት “ሰንደቅ ዓላማችን የብዝሀነታችን ድምር ውጤትና የአንድነታችን ምሰሶ ነው” በሚል መርህ ተከብሯል።

ቀኑ በኢፌዴሪ ህገ-መንግሥት አንቀፅ 3 የተቀመጠውን የብሔራዊ ሰንደቅ ዓላማ ትርጓሜ መሰረት በማድረግ በወጣው የሰንደቅ ዓላማ አዋጅ ቁጥር 654/2001 እንዲሁም በተሻሻለው አዋጅ ቁጥር 863/2006 አንቀጽ 2 መሰረት በየዓመቱ ጥቅምት ወር በገባ በመጀመሪያው ሳምንት ሰኞ እንዲከበር በተደነገገው መሰረት ላለፉት ለበርካታ ዓመታት በተለያዩ ሥነ ሥርዓቶች ሲከበር እንደቆየው ሁሉ ዘንድሮም መከበሩ ተገቢ ነው።

በሥነ ሥርዓቱ ላይ የተገኙት የኢፌዴሪ ፕሬዚዳንት ሳህለወርቅ ዘውዴ ሰንደቅ ዓላማ የብሄራዊ ማንነት መገለጫ መሆኑን ጠቅሰው፣ ፍቅርና ዜግነት የሚገለፅበትም ነው፤ ስለዚህም ለሰንደቅ ዓላማ የተለየ ክብር ሊሰጠው ይገባል››ብለው ሰንደቅ ዓላማው የፖለቲካ መሳሪያ እንዳይሆን መከላከል እንደሚገባም አስገንዝበዋል።

የህዝብ ተወካዮች ምክር ቤት ምክትል አፈጉባዔ ወይዘሮ ሽታዬ ምናለም ሰንደቅ ዓላማ ለኢትዮጵያውያን የነፃነት ልዩ ምልክትና የቃልኪዳን ዓርማ መሆኑን ጠቅሰው፣በህገ መንግሥቱና በሰንደቅ ዓላማው አዋጅ እውቅና ያገኘውን ሰንደቅ ዓላማ መጠቀምና ማክበር የግድ መሆኑን አመልክተዋል።

የኢትዮጵያ ሰንደቅ ዓላማ የሉአላዊነት መገለጫ፣የነጻነት ምልክት መሆኑ ይታወቃል። ሀገር በዓለም አቀፍም ይሁን በአህጉር ደረጃ በሰንደቅ አላማ ትወከላለች። በመሆኑም በአስፈላጊነቱ ላይ ልዩነት አይኖርም። ይህ ሰንደቅ አላማ በአዋጅ ወደ ሥራ የገባ ነው። ለሰንደቅ ዓላማ ተገቢውን ክብር አለመስጠት እነዚህን ተግባሮቹን ሁሉ አውርዶ እንደማየት ይቆጠራል።

እርግጥ ነው በሰንደቅ አላማው ላይ በተለይ ከአርማው ጋር በተያያዘ ልዩነቶች እየታዩ ናቸው። ልዩነት መፈጠር ከጀመረም ቆይቷል። መንግሥት በተለያዩ ሀገራዊ ጉዳዮች ላይ የተጠመደ ቢሆንም፣ ይህ ልዩነት የሚፈታበትን መንገድ በመፍጠር በኩል ብዙ ተንቀሳቅሷል ብሎ መናገር አይቻልም።

ልዩነቱ ሰንደቅ ዓላማው ተገቢውን ክብር እንዳያገኝ እያደረገ መሆኑ የአደባባይ ሀቅ ነው። በሰላማዊ ሰልፎች፣በሃይማኖታዊ እና ባህላዊ በዓላት ወቅት እየተፈጠረ ያለው አንዱ ግብግብም ከዚሁ የመነጨ ሆኗል።ችግሩ ፍጥጥ ብሎ የተቀመጠ እንደመሆኑ መፍትሄ እንዲያገኝ ለማድረግ መንግሥት በትኩረት መስራት ይኖርበታል። ህዝቡ ሰንደቅ አላማውን እንዲያከብር ፣በአዋጅ የወጣን ሰንደቅ አላማ በህግ እስከአልተሻረ ድረስ ክብሩን መግፈፍ አይገባም በሚል እያሳሰበ ሰንደቅ ዓላማው ተገቢውን ክብር እንዲያገኝ መሰራቱ እንዳለ ሆኖ ልዩነቱ ዘላቂ መፍትሄ የሚያገኝበትን ሁኔታ ለመፍጠር መስራትም ይኖርበታል።

የፖለቲካ ኃይሎችም ይህን ችግር ለፖለቲካ ዓላማ መጠቀሚያ ከማድረግ ተቆጥበው በሰንደቅ ዓላማው ዙሪያ የሚስተዋሉ ችግሮች በዘላቂነት በሚፈቱበት ሁኔታ ላይ ከመንግሥት ጋር መምከር ይኖርባቸዋል። መፍትሄው እስከሚመጣ ድረስም የሀገሪቱ ህገ መንግሥታዊ ሰንደቅ ዓላማ ተከብሮ መቆየት ያለበት መሆኑ ላይ ራሳቸውንም ደጋፊዎቻቸውን ማሳመን ይኖርባቸዋል።

አዲስ ዘመን ጥቅምት 4/2012