![](https://press.et/wp-content/uploads/2019/10/11-59.jpg)
የአንድ ሀገር ኢኮኖሚያዊ፣ ማህበራዊና ፖለቲካዊ ፈተናዎች ከሆኑት ውስጥ የስራ አጥነት ችግር አንዱና ዋነኛው ነው። ስራ አጥነት ሶስቱንም ፈተናዎች የያዘ ችግር ነው። በተለይም እንደ ኢትዮጵያ ባሉ ታዳጊ እና ከ70 በመቶ በላይ ህዝባቸው ወጣቶች በሆኑባቸው ሀገራት የስራ አጥነት ጉዳይ ከኢኮኖሚ ችግርነቱ ባሻገር ለበርካታ ቀውሶች ይዳርጋል። መረጋጋትን ያጠፋል፣ ሰላም ይነሳል፣ መንግስትን ያወርዳል ሀገርንም ያፈርሳል።
ስራ አጥ የሆነው የሰው ኃይል ቁጥር በወጣትና በተማረው ሕብረተሰብ ዘንድ ከፍተኛ ከሆነ ለፖለቲካዊና ማህበራዊ አለመረጋጋት ዋነኛ ምንጭ ይሆናል። ስራ አጥ ወጣት በቀላሉ ተስፋ ስለሚቆርጥ በቀላሉ ለጥፋት ይነሳሳል። የፖለቲካ መጠቀሚያም ይሆናል። አልፎ ተርፎም ለሀገር አለመረጋጋትና ለእርስ በእርስ ግጭትም ይዳርጋል። የዴሞክራሲ ሳይንስም ዴሞክራሲ በአንድ አገር እንዲሰፍን ዜጎች በልቶ ከማደር ባለፈ መካከለኛ ገቢ ያላቸው ሊሆኑ እንደሚገባ ያስቀምጣል።
ከ2008 ዓ.ም ጀምሮም በሀገራችን የተነሱ ግጭቶችና አለመግባባቶች ስራ አጥ የሆኑ ወጣቶች ባደረባቸው ብሶት ጭምር የተነሱ ናቸው። መንግስት በተለያዩ የሀገሪቱ አካባቢዎች በርካታ ዩኒቨርሲቲዎችን ገንብቶ በሺዎች የሚቆጠሩ ተማሪዎች የከፍተኛ ትምህርት ተቋዳሽ ቢያደርግም ትምህርታቸውን ጨርሰው እንደወጡ የስራ ዕድሉ ተጠቃሚ ስለማይሆኑ ለተስፋ መቁረጥና ለብሶት ይዳረጋሉ። ይህ ደግሞ የገጠሪቱን የአገሪቱ ክፍል ጨምሮ በመላ አገራችን የተማረ ስራ አጥን በማበራከት ቅሬታ የተሰማውና ያኮረፈ ወጣት የኅብረተሰብ ክፍል እንዲፈጠር አድርጓል።
የጠቅላይ ሚኒስትር አብይ(ዶ/ር) ካቢኔ ወደ ስራ ከመጣ በኋላ ይህንኑ ችግር ከግምት ውስጥ በማስገባት በጠቅላይ ሚኒስትሩ የሚመራ የስራ ዕድል ፈጠራ ኮሚቴ አቋቁሟል።
ኮሚቴውም የግሉን ዘርፍ ልማት በማፋጠን የስራ ዕድልን በማስፋት፣ በመስኖ ልማትን፣ በአይሲቲ፣ በቱሪዝምና በኢንዱስትሪው መስክ የስራ ዕድሎችን በመፍጠር፤ በተለያዩ መንግስታዊና መንግስታዊ ባልሆኑ ተቋማትና በውጭ ሀገር ከሚገኙ ድርጅቶች ጋር በመተባበር የስራ ዕድሎችን በማስፋት በተያዘው በጀት ዓመት 3 ሚሊዮን የስራ ዕድል ለመፍጠር ዕቅድ ይዟል። በአንዳንድ ተቋማትም ተግባራዊ እንቅስቃሴዎች መደረግ ተጀምሯል።
ከለውጡ በኋላ ስራ አጥነትን በጋራ ርብርብ ለመፍታት የተያዘው ዕቅድና የመንግስትም ዋነኛ ትኩረት መሆኑ የሚበረታታ ቢሆንም የተያዙትን ዕቅዶች በጊዜ የለኝም መንፈስ መተግበር ካልተቻለ ከችግሩ ስፋትና ጥልቀት አንጻር መልሶ ሀገሪቱን ላልታሰበ ችግር ሊዳርጋት ይችላል። እንደከዚህ ቀደሙም በውሸት ሪፖርት ማደናገር እንዳይፈጠር ትግበራው ከምር ስለመሆኑ በጥንቃቄ ሊፈተሽ ይገባል።
በተለይም ከዘንድሮው በጀት ዓመት ሶስት ወራትን ያገባደድን እንደመሆኑ ለዓመቱ የታሰቡት የስራ ፈጠራ ዕቅዶች በጊዜ መርሃ ግብራቸው ውስጥ መከናወናቸውን ማረጋገጥ ይገባል። እንደ ክፉ ልማድ የተጣባንን የሀሰት ሪፖርት ማጣራትና ተጠቀመ የተባለው የህብረተሰብ ክፍል ጋር ወርዶ ማረጋገጥም ለነገ ሊባል አይገባም።
አዲስ ዘመን ጥቅምት 1/2012