የኢህአዴግ ውህደት የአካታችነት ተምሳሌት ነው!

 በብዙ ፈተናዎች የተገኘው ለውጥ አሁንም በትግል ውስጥ ቢሆንም ብዙ የምስራቾች አሳይቶናል፤ ወደፊትም የምንጠብቃቸው ብዙ ተስፋዎች አሉ። ከእነዚህም መካከል ደግሞ የኢትዮጵያ አብዮታዊ ዴሞክራሲያዊ ግንባር (ኢህአዴግ) ውህደት ዋነኛው ነው። ኢህአዴግ አራቱን ብሔራዊ ድርጅቶች፤ ማለትም ህዝባዊ ወያኔ ሐርነት ትግራይ (ህወሐት)፣ የአማራ ዴሞካራሲያዊ ፓርቲ (አዴፓ)፣ የኦሮሞ ዴሞክራሲያዊ ፓርቲ (ኦዴፓ) እና የደቡብ ህዝቦች ዴሞክራሲያዊ ንቅናቄ (ደህዴን)ን ይዞ አገርና ህዝብ እየመራ ለ28 ዓመታት ፓርቲም መንግሥትም ሆኖ ዘልቋል።

በዚህ ሂደት ግንባሩ በአራቱ ድርጅቶቹ ብሔሮችን ሲወክል፤ የአፋሩን አብዴፓን፣ የሶማሌውን ሶህዴፓን፣ የቤንሻንጉል ጉምዙን ቤጉህዴፓን እና የጋምቤላውን ጋህአዴንን በአጋርነት አብረን እንሠራለን በማለት ከጎኑ እንዲቆሙ ከማድረግ ውጭ አካታች ሆኖ በአገራዊ ጉዳይ ላይ ድምፅ ሰጥተው ውሳኔ እንዲያስተላልፉ እኩል ዕድል አልሰጣቸውም ነበር።

ይህም በአፋር፤ በሶማሌ፤ በቤንሻንጉል ጉሙዝ እና በጋምቤላ ክልል በሚኖሩ ህዝቦች ላይ የፈጠረው ተጽዕኖ ቀላል እንዳልነበረ ቢገለፅም መፍትሄ ሳይሰጠው ቆይቷል። ክልሎቹ ምንም እንኳን ራሳቸውን በራሳቸው ያስተዳድራሉ ቢባልም በመንግሥትና በገዥው ፓርቲ የሚደረሱ አገራዊ ውሳኔዎች የእነዚህ ክልል አስተዳዳሪዎች እና መሪ ፓርቲዎች ቀጥተኛ ተሳትፎ አያደርጉባቸውም ነበር።

ውሳኔዎቹ ግን እንደሀገር በነርሱም ላይ ተግባራዊ ይደረጉ ነበር። ታዲያ አሠራሩ በክልሎቹ አስተዳደሮችና ህዝቦች ዘንድ የተለያዩ ቅሬታዎች እንዲፈጠሩ ከማድረጉም ባሻገር አርብቶ አደሩ ክብሩ ተጠብቆ ድምፁን የሚያሰማለት አካልና የሚያሰማበት ሁኔታ እንዳይኖር አግዶትም ቆይቷል።

አግላይነት ተገቢ ያለመሆኑን ብዙዎች የግንባሩ አባላት ቢያምኑም፤ በድፍረት አጋር ድርጅቶች እንዲካተቱና ድምፅ እንዲኖራቸው የማድረግ ሀሳቡ የተሰማው በቅርቡ በተካሄደው የሀዋሳው የኢህአዴግ ጉባኤ ላይና ከዚያ በኋላ ነው። አሁን ከተገኘው ለውጥ ጋር ተያይዞ አጋር ፓርቲዎች ድምፅ ማግኘት መጀመራቸው ቢያስደስታቸውም ከሁሉም በላይ የኢህአዴግን ውህደትና የእነርሱንም መካተት አጥብቀው ይፈልጋሉ።

 ኢህአዴግ በትክክል የመላውን የኢትዮጵያ ህዝብ ጥቅም የማስጠበቅ ዓላማውን በርትዕ መንገድ ተግባራዊ ለማድረግ የአፋር፤ የሶማሌ፤ የትግራይ፤ የአማራ ሳይል አገር አቀፍ ፓርቲ ሆኖ መዋቀርና በመንግሥትነት አገር ማስተዳደር ይጠበቅበታል። ጊዜውም ይህንን የሚጠይቅ ሲሆን፤ መንግሥት ሆኖ አገር እየመራ ያለ ፓርቲ ደግሞ ለሌሎች ምሳሌ መሆንም አለበት።

“የተወሰነ ቡድን ተጨቁኗል” ወይም “ተበድሏል” በሚል ስም ለይቶ “ዓላማዬ የዚህን ህብረተሰብ ችግር መፍታት እና የተፈፀመበትን ግፍ በማስታወስ እንባውን ማበስ ነው” ብሎ መወሰን አቃፊነት አይሆንም። አርብቶ አደሩም ሆነ አርሶ አደሩ፣ ነጋዴውም ሆነ የመንግሥት ሠራተኛው፣ አለቃም ሆነ ምንዝር የትኛውም ኢትዮጵያዊ በደል ሊፈፀምበት አይገባም። መታገል ለሥልጣን እና ለራስ ጥቅም ብቻ ካልሆነ ኦሮሞው ለተበደለው ትግሬ፣ አማራው ለተበደለው ሶማሌ፣ አፋሩ ለተበደለው ቤንሻንጉል ሊቆረቆር፤ ሊጮህ፤ በደል ይብቃ፤ ተባብረን እንሥራ ሊል ይገባዋል። ሁሉም ኢትዮጵያዊ የሀገሩ ውድ ዜጋ ነውና የሀብቷ ፍትሐዊ ተጠቃሚ መሆን አለበት። የማንም መብት መጣስና ክብሩ መገፈፍ የለበትም።

እስካሁን ባለው ሃይል ላይ ተጨማሪ ጉልበት በመጨመር፤ ያለውንና የሚገኘውን ሀብት በአግባቡ ለመጠቀም፤ ለአንዲት ሀገር እድገትና ለህዝቦቿ ልዕልና በጋራ ለመሥራት መዋሃድ ያስፈልጋል። ውህደት አገራዊነትን ያሰፋል። እየታዩ ያሉ የደህንነት ሥጋቶችን ከሥር መሰረታቸው ነቅሎ ለመጣል ትልቅ መሣሪያ በመሆን ያገለግላል። ከዚህ በኋላ የሕዝቦች ፍትሃዊ ተጠቃሚነት በትክክል እንዲሰፍን የሚፈልግ አካል መንግሥት ሆኖ አገር እንዲመራ በመላ ኢትዮጵያውያን ተመራጭ ሊሆንና የሁሉም ተወካይ ሊሆን ይገባዋል።

ይህንንም በማድረግ አሁን ባለው የአገራችን ተጨባጭ ሁኔታ በዝተዋል እየተባሉ ጠዋትና ማታ ለሚወቀሱት የፖለቲካ ድርጅቶችና ፓርቲዎች ምሳሌ መሆን ይቻላል። እናም፤ ኢህአዴግ የህዝብን ጥቅም በማስቀደም፤ የአገር ደህንነትን ለማረጋገጥ እና እውነተኛ የሁሉም ኢትዮጵያዊ ተወካይ ለመሆን ከማግለል ይልቅ ማካተትን አጎልብቶ አገራዊ ፓርቲ ለመሆን የጀመረውን የለውጥ መንገድ እውን ለማድረግ አጋሮቹን አካቶ መዋሃድ ግድ ይለዋል።

አዲስ ዘመን መስከረም 30/2012