ለምርጫው ስኬታማነት ባለድርሻዎች የሚጠበቅባቸውን ይስሩ!

 ኢትዮጵያ በለውጥ ሂደት ላይ ትገኛለች። በዚህ የለውጥ ሂደት ደግሞ ፈተናዎች መብዛታቸው አይቀሬ ነው። ከዚህ በተጨማሪ የያዝነው ዓመት ስድስተኛው አገራዊ ምርጫ የሚካሄድበት በመሆኑ ሁኔታውን የተለየና ከባድ ያደርገዋል። በዚህ አገራዊ ምርጫ ደግሞ የባለድርሻ አካላት ቁጥር እና ውስብስብ ባህሪያቸው ልዩ ትኩረትን እና ሕጋዊነትን ይጠይቃል።

በዚህም ሁኔታ የፖለቲካ ሥርዓቱና ዴሞክራሲው ሊከተለው የሚገባው ግልፅ መስመር ደግሞ መታወቅ ይኖርበታል። ፖለቲካው በመግባባት፣ በመከባበርና በመተሳሰብ ላይ አተኩሮ የሀገርን አንድነት በሚያጠናክሩ ወሳኝ ሀገራዊ ዕሴቶች ሊቃኝ እንደሚገባው መንግሥት አሳስቧል። ፕሬዚዳንት ሳህለወርቅ ዘውዴ እንዳሉት መንግሥት የፖለቲካ ምህዳሩን ለማስፋት በሕግ፣ በአሠራር፣ በአደረጃጀትና ሥርዓት ዘርግቶ የሚጠበቅበትን ሁሉ ያደርጋል።

በመሆኑም የፖለቲካ ሂደቱና የተዋናዮቹ ግንኙነት ከጠላትነትና ከቡድን ፍረጃ ወጥቶ የመግባባት ፖለቲካ እንዲሰፍን መታገል የሁሉም ባለድርሻ አካላት የቤት ሥራ ነው። በተለይ አሁን አሁን ሕዝብን ስጋት ውስጥ እየከተተ የመጣው የፓርቲዎች የመነጠልና የመለያየት አካሄዶች ታርመው የትብብርና የአንድነት ፖለቲካዊ አደረጃጀት ጎልቶ እንዲወጣ መስራት ለፓርቲዎቹ ህልውና ጭምር እጅግ በጣም አስፈላጊ ነው፡፡

ወራት የቀሩት ሀገራዊ ምርጫ የሰላም የዴሞክራሲና አካታች ፖለቲካዊ ዕሴቶችን መሠረት ያደረገ እንዲሆን መንግሥትና ተፎካካሪ የፖለቲካ ፓርቲዎች የአንበሳውን ድርሻ ሊወጡ ይገባል። በመሆኑም መንግሥት በይፋ እንዳስገነዘበው ስድስተኛው አገራዊ ምርጫ ባለፉት አምስት ዙር ምርጫዎች ያጋጠሙ ግድፈቶችን በሚያርም መልክ እንዲከናወን መስራት የሁሉም ባለድርሻ አካላት ወሳኝ የቤት ሥራ ነው። ይህን በሚገባ ካከናወንን ምርጫው ያለጥርጥር ነፃና ዴሞክራሲያዊ ሆኖ ተአማኒና ተቀባይነት ያለው ይሆናል። ለዚህ ስኬትም የፖለቲካ ልሂቃን፣ የመላው ኢትዮጵያውያን እና አጋር አካላት ተሳትፎ ትርጉም ባለው መልኩ ሊረጋገጥ ይገባል።

ለምርጫው ስኬታማነት በተለይ የመንግሥት ቁርጠኝነትና ዝግጅት ዋናው ቢሆንም ብቸኛው ግን አይደለም። የኢትዮጵያ ሕዝብ፣ የፖለቲካ ፓርቲዎች፣ የመገናኛ ብዙኃን፣ ምሁራን እና የሲቪክ ድርጅቶች ቀናኢነት፣ ተሳትፎና ለአንድ ሀገራዊ ዓላማ መሥራት ደግሞ ወሳኝ ብቻ ሳይሆን ግዴታም ይሆናል።

ይህን በሚገባ ከተረዳን እያንዳንዱ ዜጋ የነቃ ተሳትፎ በማድረግ ለምርጫው ስኬታማነት ሊረባረብ ይገባል። ይህ ሲሆን በስኬቱም ሆነ በሚፈጠሩ ችግሮች ማንም በማንም ላይ ጣት ከመቀሰር ወጥቶ ጉዳዩ «የእኔ ነው፤ እኔም አለሁበት፤ የእኔም አስተዋፅኦ አለበት» ወደሚል የምርጫውን አካታችና አሳታፊነት ያረጋግጣል። በዚህ ሂደትም የዚህን ዓመት ምርጫ ካለፉት ምርጫዎች የተሻለ ዴሞክራሲያዊ እናደርጋለን፤ በውጤቱም ቀጣዮቹ የፖለቲካ ሂደቶችና ሥራዎች በጠንካራ መሠረት ላይ እንዲመሠረቱ ሰፊ ዕድል እና መደላድል ይሆናል።

በእርግጥ ምርጫው በሕዝብ ዘንድ ተአማኒ፣ ነፃ፣ ፍትሐዊና ዴሞክራሲያዊ እንዲሆን በርካታ ሥራዎች እየተሰሩ ነው። ምርጫ ቦርድ በሚዘረጋቸው አሠራሮች ልክ የፖለቲካ ፓርቲዎች ለሕግ መገዛት አለባቸው፤ ለሰላም የማያወላውል ቁርጠኝነታቸውም በግልፅ አቋም ከማሳየት በተጨማሪ አገሪቱ ያለችበትን ሁኔታ በመረዳት ኃላፊነት በሚሰማቸው ልክ እና ተግባር እንቅስቃሴ ማድረግ ይጠበቅባቸዋል፤ ይህ በእርግጥ ለፓርቲዎች ዘላቂ ህልውና ጭምር ወሳኝ ይሆናል፡፡

ከፓርቲዎች እኩል፤ የሲቪክ ማህበራት፣ የኅብረተሰብ ክፍሎች እና የመገናኛ ብዙኃን በሕግ ተገዥ ሆነው የመስራታቸው ጉዳይ ለምርጫው ተአማኒና ዴሞክራሲያዊነት ትልቅ አበርክቶ አለው። ዓይነተኛ ድርሻቸውንም መወጣት ነጋሪ ሊያስፈልጋቸው አይገባም። እነዚህ የኅብረተሰብ ክፍሎች እና ተቋማት ግንኙነታቸው ሕጋዊና ከሚመለከተው አካል ጋር ብቻ በማድረግ ትክክለኛ መረጃ በመቀበልና በማስተላለፍ የምርጫውን ሰላማዊነት ከምንም ነገር በላይ ሊያረጋግጡ ይገባል። አስተዋፅኦዋቸውም በዚህ የሚለካ ይሆናል፡፡

ለምርጫው ዴሞክራሲያዊነት ከብሔራዊ ምርጫ ቦርድ በኩል እየተሰሩ ያሉ ሥራዎች ተጠናክረው እንዲቀጥሉና ሁሉንም አካል በፍትሀዊነት እና በግልፅ አሠራር ማገልገል የምርጫውን ሂደት ተአማኒነትና አሳታፊነት ከምንም ነገር በላይ ሊያረጋግጥለት ይችላል፤ ይገባልም።

በዋናነት ግን የአገር ሉዓላዊነት እንዲቀድም መስራት የሁሉም ድርሻ መሆን አለበት። በዚህም ሁኔታ የዘንድሮው ምርጫ አማራጭ ሳይሆን ግዴታ ያደርገዋል። ይህን ወሳኝ አገራዊ ጉዳይ ለማከናወን የሚያግድ ነገር ሁሉ በቅንጅት ሊሰራበት ይገባል፡፡

በአጠቃላይ በምርጫው የተሻለ የፖለቲካ ፉክክር ማምጣት ሕዝቡም የናፈቀውን እና የጓጓውን ነፃ እና ዴሞክራሲያዊ ምርጫ ማከናወን እንዲቻል ሁሉም ባለድርሻ አካል የሚጠበቅበትን ሁሉ ማከናወን ይጠበቅበታል። በምርጫው ሂደትም ከምዝገባው ጀምሮ እስከ ድምፅ ቆጠራውና ውጤት እስከ ማሳወቅ ድረስ ያለው አሠራር እና ሂደት ግልፅ፣ ዴሞክራሲያዊና ሁሉን አሳታፊ ሆኖ ያለምንም ቅሬታ ሊፈፀም፤ ሕዝቡም ድምፄ ነው በሚለውና የመረጠውን መንግሥት አምኖ ሊቀበል ይችላል። በመሆኑም ምርጫው በሰላም እንዲከናወን የሁሉም ባለድርሻ አካላት ሚናቸውን መጫወት ለነገ የሚባል አይደለም፡፡

አዲስ  ዘመን መስከረም 29/2012