‹‹ባሌዎች መንገድ ይሰራልን ሳይሆን ስንዴ ውሰዱ ማለት አለባችሁ››- ዶክተር ዐብይ አህመድ የኢፌዴሪ ጠቅላይ ሚኒስትር

ጠቅላይ ሚኒስትር ዶክተር ዐብይ ከእንግሊዝ የቀድሞ ጠቅላይ ሚኒስትር ቶኒ ብሌር፣ ከምክትል ጠቅላይ ሚኒስትር ደመቀ መኮንንና ከኦሮሚያ ክልል ርዕሰ መስተዳድር ለማ መገርሳ ጋር በመሆን በኦሮሚያ ክልል ባሌ ዞን ጊኒር ወረዳ ተገኝተው የዱረም ስንዴ የሚያመርቱ አርሶ አደሮችን ከትናንት በስቲያ ጎብኝተዋል፡፡

ጠቅላይ ሚኒስትሩ ከጉብኝቱ በኋላ እንደተናገሩት፤ የአካባቢው አርሶ አደር ከአንድ ሄክታር መሬት ከ80 በላይ ኩንታል ስንዴ በማምረት ላይ ነው፡፡ አገሪቱ ደግሞ ስንዴ ተቸግራ ከተለያዩ አገሮች በመግዛት ከውጭ ታስመጣለች፡፡ ስለዚህም ባሌዎች ማለት የሚጠበቅባቸው ይህ መንግሥት ከውጭ ማምጣት ይሻለዋል? ወይስ ከባሌ አርሶ አደር ገዝቶ ቢጠቀም የሚለውን ነው፡፡

‹‹ስለዚህም ሁለተኛ የመንገድ ጥያቄ እንዳታቀርቡ፤ ማለት ያለባችሁ ለምን ትራባላችሁ? እኛ ስንዴ አለንና መጥታችሁ ውሰዱ ነው ማለት ያለባችሁ›› ሲሉ ተናግረዋል፡፡

ጠቅላይ ሚኒስትሩ፣‹‹የባሌ ዞን ጊነር ወረዳ አርሶ አደር በወረዳዋ እየሰራ ያለውን ሥራ ከርቀት ሆነን ስንሰማ የነበረ ቢሆንም ዛሬ እነሆ በዓይናችን ማየት በመቻላችን በእጅጉ ተደስተናል፡፡ ይሁንና ይህ አካባቢ ሰፊ ምርት እያለው የመንገድ ችግር በመኖሩ ብቻ የገበያ ሁኔታ ባለመኖሩና ያመረታችሁትን በአግባቡ የሚገዛችሁ ባለመኖሩ ድካማችሁ ሁሉ ፍሬያማ መሆን አልቻለም›› ሲሉ ገልጸዋል፡፡ በቀጣይ ግን ከአርሶ አደሩ ጋር በመነጋገራቸውና ማሳዎችንም በመጎብኘታቸው ችግር እንደሚፈታም አስረድተዋል፡፡

ከዚህ በኋላ አካባቢያቸውንም አገሪቱንም በማሳደግ የህዝብን የኑሮ ደረጃ ለማሻሻል እንዲቻል የአካባቢው ቄሮዎች የልማቱ ተሰላፊ ለመሆን ማምረትና ማልማት እንደሚጠበቅባቸውም አስገንዝበዋል፤፡ መንግሥትም ከአካባቢው ህብረተሰብ ጋር እንደሚሰራ ጠቅሰው፣አገሪቱንም በጋራ በመሆን መለወጥና አንድነቷን ማስጠበቅ እንዳለባቸውም አሳስበዋል፡፡

እንደ ጠቅላይ ሚኒስትሩ ገለጻ፤በግብርናው ብቻ ሳይሆን በቱሪዝሙም ባሌ ስመ ጥር ነው፡፡ በተወሰነ ኪሎ ሜትር ርቀት ላይ ያለው የአየር ጻባይ ለውጥ ያስገርማል፡፡ እንዲህ አይነት እጅግ በጣም ቅዝቃዜና እጅግ በጣም ሙቀትን በተወሰኑ ኪሎ ሜትሮች ርቀት በዓለም አቀፍ ደረጃ እንኳ ቢፈለግ ማግኘቱ ከባድ ነው፡፡

‹ከዚህ በኋላ እኛም መተኛት አንሻም፤ ሌት ተቀን ሰርተን አገራችንንና ህዝባችንን መለወጥ እንፈልጋለን፡፡ ዋና ዓላማችንም ልማት ሊሆን ይገባል፡፡ እናንተም ከጎናችን ሁኑ፤ ያኔ ኢትዮጵያን ብቻ ሳይሆን አፍሪካን እንለውጣለን፡፡››ሲሉም ,አሰገንዝበዋል፡፡

ኦሮሞ ከጦርነት፣ ከመገፋፋት ወጥቶ አገርን ለመቀየር አንድነትን ማጠናከር እንደሚጠበቅበት ፣ማድረግም እንደሚችል ትልቅ እምነት እንዳላቸውም አስታውቀዋል፡፡ ‹‹ያቀረባችሁትን ጥያቄ ምላሽ እንሰጥበታለን፡፡ የምናደርግላችሁ ደግሞ ለእናንተ ብቻ አስበን ሳይሆን ከእናንተ ለመጠቀምም ጭምር ነው፡፡ ብዙ ምርት አይተናል፡፡ ያን ለማጣጣምም ነው የምናግዛችሁ›› በማለት የአርሶ አደሮቹ ጥያቄ ምላሽ እንደሚያገኝ አረጋግጠዋል፡፡

ምክትል ጠቅላይ ሚኒስትር ደመቀ መኮንን በበኩላቸው፤ ‹‹የኦሮሞ መሰረትና የታላቁ አገር ፈርጥና ጌጥ የሆነው ባሌ ከምንም በላይ የእነ ዋቆ ጉቱ፣ የእነ ድሬ ሺህ ሁሴን፣የብዙ ታጋዮች አገርና ትግል የተጠነሰሰበትና ዳር የደረሰበት መሆኑን ጠቅሰው፣ ‹‹በዚህ እንኮራባችኋለን›› ብለዋል፡፡

ግብርናን እንዴት ማዘመን እንደሚቻል ከባሌ መረዳታቸውን ጠቅሰው፤ ኢትዮጵያን ማዘመን ግብርናን ማዘመን ብሎም ወደ ኢንዱስትሪ መሻገር እንደሆነም አመልክተዋል፡፡ ስለዚህም የክልሉም ሆነ የፌዴራል መንግሥት የበኩሉን ድርሻ እንደሚወጣና ድጋፍም እንደሚያደርግ አረጋግጠዋል፡፡

የእንግሊዝ የቀድሞ ጠቅላይ ሚኒስትር ሚር ቶኒ ብሌር፣ በባሌ ዞን ተገኝተው የአርሶ አደሩን እንቅስቃሴ እንዲጎበኙ በጠቅላይ ሚኒስትር ዶክተር ዐብይ መጋበዛቸውን ጠቅሰው፤ህዝቡ አስደናቂ ችሎ ያለውና መለወጥ የሚፈልግ መሆኑን ማስተዋላቸውን ተናግረዋል፡፡ መልካምድሩን ያደነቁት ብሌር፣ የግብርና ልማቱ ለኢኮኖሚ እድገቱ የሚያግዝ እንደሆነና በግብርናው ዘርፍ የታየው የቴክኖሎጂው አጠቃቀምም መልካም መሆኑን አስታውቀዋል፡፡ አገሪቱም በዘርፉ ትልቅ አቅም ያላት እንደሆነም ተናግረዋል፡፡

‹‹እኔ በጠቅላይ ሚኒስትሩም፣ በአገሪቱም ሆነ በኢትዮጵያና በባሌ ህዝብ አምናለሁ፤ መልካም የሆነ መልካምድርና ትልቅ አቅም ያለው ነው›› ሲሉ የእንግሊዙ የቀድሞው ጠቅላይ ሚኒስትር ተናግረዋል፡፡

የኦሮሚያ ርዕሰ መስተዳድር አቶ ለማ መገርሳ፣ቴክኖሎጂን በመጠቀም በማምረት ላይ ያለው የባሌ አርሶ አደር ለኦሮሚያ ብቻ ሳይሆን ለኢትዮጵያውን ሁሉ ትልቅ ተስፋ መሆኑን ገልጸዋል፡፡ በስፍራው የተገኙ ከፍተኛ ባለስልጣናትም እንደኩሩባቸው ተናግረዋል፡፡ በመሆኑም እንኳን ደስ ያላችሁ ማለት እንደሚፈልጉም ተናግረዋል፡፡

አስቴር ኤልያስ