“ ሳይቃጠል በቅጠል ”

ክረምቱ አይሏል፤ ቅቃዜው ብሷል። መልካም ዜናዎች ርቀውናል። ጆሯችን ክፉ ወሬን ለምዷል። ስለአገራችን የምንሰማው አንጀት ያቆስላል፤ ልብ ያርዳል። የምናየው የሚፈጸመው ሁሉ በእኛ እድሜ ሊሆን ቀርቶ ልናስበው የማንችለው ሆኖብናል። እውነት መንምኗል፤ ውሸት ገኗል።

በዚህ ቀዝቃዛ ወራትና ዘመን ላይ ሆኜ አገሬን ሳስብ እጄም ደጄም ላይ ያለው ሁለት ነገር ብቻ ነው። አንዱ የጠቅላይ ሚኒስትሩ ኢትዮጵያ የሚለው ቃላቸውና ተስፋቸው ነው። ጠቅላይ ሚኒስትሩ ስለ ነገዋ ኢትዮጵያ በሰጡን ቃል እስከ መጨረሻው ተስፋ አልቆርጥም። በአገር ተስፋ አይቆረጥማ፡፡፡

ከዚህ ቃል መለስ ግን በእውኑ ስለ አገሬ መጽናኛዬ ቢያንስ ከያኔው ያንጎራጎረው ለስላሳ ሙዚቃ ብቻ ነው፤

“አንደኛው ሲክብሽ አንዱ ያፈርስሻል፤

አንዱ ሲያሳድግሽ አንዱ ይዘርፍሻል…..

….አገሬ ሰው አጣሽ ወይ….”

አዎን አገሬ ሰው አጣሽ ወይ!!

ስለ አገሬ ብዙ ማለት ብፈልግም ዛሬ ግን በአንድ ወቅታዊ ነገር አተኩራለሁ፤ በጋራ መኖሪያ ቤቶች እጣና እሱን ተከትሎ በመጣው ጣጣ ላይ ብቻ።

ለአዲስ አበባ ነዋሪ ቤት ማለት ምን ማለት እንደሆነ ለማስረዳት መሞከር ለቀባሪ ማርዳት ስለሚሆን ይሄንን ሃሳብ አልፈዋለሁ።

ያኔ ኢህአዴግ 1997 ምርጫ ላይ ቅንጅት የተባለ ጊዜ ወለድ ፓርቲ መጥቶበት ምርጫውን ከእጁ እንደሚነጥቀው ሲረዳ እንደ ቀልድ ያስተዋወቀው የኮንዶሚኒየም ቤት ግንባታ እንደምንም እየተንፏቀቀ ዛሬ ላይ ደርሷል።

ያኔ ለፖለቲካ ፍጆታ እንደ ቀልድ በተጀመረው የቤት ግንባታ ፕሮጀክት ባለፉት 17 አመታት 300 ሺ ቤቶች ተገንብተው በእጣም፣ በምደባም በውሳኔም ለሰዎች ተላልፈዋል (ይቺ ምደባና ውሳኔ የምትለዋን አሰራር አልስማማባትም፤ ዝቅ ብዬ ተችቼዋለሁ)። ያም ሆነ ይህ ግን ለዚህ መልካም ተግባር በየዘመኑ የነበሩ አመራሮች ሁሉ ምስጋና ይገባቸዋል። በቅንፍ ውስጥ ያጭበረበሩንን አይመለከትም።

ከለውጡ በፊት የነበረው መንግስት ኮንዶሚኒየሙን በእጣም በፈጣጣም ለአዲስ አበባ ነዋሪዎች እና “ኢምፖርትድ” ሆነው በመታወቂያ ብቻ የአዲስ አበባ ነዋሪ ለሆኑ “ታማኝ ዜጎች” አድሏል። ይህንን ማንም ሊያስተባብለው የማይችለው ሀቅ ስለሆነ “ልዩነት አለኝ” ካልክ አልሰማህም! እየሄድክ!

ወደ ቀጣዩ ሃሳብ እንለፍማ

ሌላ ብሶት የወለደው ህዝብ በአንድም በሌላም መንገድ ታግሎ ያመጣው የለውጥ መንግስት ቀጣዩ የቤቶች ግንባታ ፕሮጀክት አልሚ ሆኖ መጣ። አስተዳደሩን የተቆጣጠሩ አመራሮችም በኮንዶሚኒየም ላይ ሲሰራ የነበረውን ሸፍጥ ነግረውን አስቆጩን፤ ጸጉራችንንም አስነጩን። ይሄ ዝርፊያ አይደገምም ተባለ፤ ደስ አለን። ይሁን ይደረግልን አልን።

መራሩ እውነት ግን ቀጥሎ ያለው ነው። ዝግ ብለህ አንብበው።

አስተዳደሩ ማንም ሳይሰማ አንድ መመሪያ ማሻሻሉን ዘግይተን ተረዳን። መመሪያው መጽደቁንም የሰማነው መሽቶ ሲያበቃ መመሪያው በሥራ ሲገለጥ ነው። ይህ መመሪያ የከተማዋ ከንቲባ ከፈቀዱ ከእጣ ውጭ የተፈቀደላቸው ሰዎች ቤት ማግኘት እንደሚችሉ ያዛል። ይቺ መውረሪያ ማለቴ መመሪያ የእግር ኳስ አስጨፋሪዎችን ሳይቀር የቤት ባለቤት አደረገች። ህዝብ ጠየቀ “ለምን” አለ። መልሱ መመሪያ ነው ተባለ። ህዝብ አንገቱን ደፋ፤ ሆድ ይፍጀው ብሎም ዝም አለ። ህይወት ቀጠለ። ቤቱም መታደል ቀጠለ። ለቁጥር የሚታክቱ ቤቶች ለተፈቀደላቸው “ዜጎች” ተላልፈው ተሰጡ።

ከዚህ መመሪያና ከአርሶ አደር ልጆችና ቤተሰቦች የተረፈው ቤት በ13ኛ ዙር ተከፋፈለ። ብዙዎች ተደሰቱ። መንግስትንም አመሰገኑ። ምስጋናው ወደ እርግማን ሲቀየር ግን አመትም አልቆየ።

በ13ኛ ዙር የ20/80 እና በሁለተኛ ዙር የ40/60 ቤት እድለኞች ናችሁ ተብለው ቤት የወጣላቸው አብዛኛዎቹ ሰዎች ዛሬም ድረስ የባንከ እዳ እንጂ ቤቱ በእጃቸው አልገባም። እነዚህ ዜጎች ገና መልስ ሳያገኙ ሌላ ዙር እጣ ወጣ ተብሎ ሌላ ብሶት ለህዘቡ ተጨምሮለታል።

14ኛ ዙር ቤት እጣ እንደሚወጣ ሲነገር ተስፋ ያደረጉት ዜጎች የ1997 ተመዝጋቢዎች ብቻ ሳይሆኑ የ2005 ተመዝጋቢዎችም ነበሩ። ምክንያቱም 12ኛ ዙር ላይ እጣ ሲወጣ የ1997 ባለ ሶስት መኝታ ተመዝጋቢዎች በሙሉ ቤት ስላገኙ ከዚህ በሁዋላ ባለ ሶስት መኝታ ቤቶች ለ2005 ተመዝጋቢዎች ይውላሉ ተብሎ ቃል ተገብቶ፤ አስተዳደሩም ቃሉን ጠብቆ 13ኛ ዙር እጣ ሲወጣ ባለሶስት መኝታ ቤቶችን ለ2005 ተመዝጋቢዎች በእጣ አድሎ ነበርና ነው።

በዚህም ያልተደሰተ የለውጡ ፍሬ ነው ያላለ ያላመሰገነ የለም። ቀጣይ እድለኛ እኛ ነን በሚልም ሺዎች ቁጠባ ላይ ከርመዋል።

የዘንድሮ ቁጠባ ምን ያህል ከባድ እንደሆነ ሁሉም የሚያውቀው ነው። በኑሮ ውድነት፣ በቤት ኪራይ መናር፣ በልጆች ትምህርት ቤት ክፍያ ማሻቀብ ውስጥ ሆኖ ከትንሿ ገቢ ከልጆች ጉሮሮ ነጥቆ መቆጠብ ምን ያህል ከባድ መሆኑን ለመረዳት የግድ ከቆጣቢዎቹ መካከል አንዱ መሆንን ይጠይቃል።

የሚያሳዝነው ግን ለእነዚህ ቆጣቢዎች የተሰጠው ውሳኔ አገሬ ሰው አጣሽ ወይ አስብሎኛል። ለ2005 ተመዝጋቢዎች ይውላሉ የተባሉት ቤቶች 14ኛ ዙር ላይ ሳይካተቱ ቀርተዋል። አስተዳደሩ የሰጠው ማብራሪያም፤ “በ12ኛ ዙር እጣ የ1997 ባለሶስት መኝታ ተመዝጋቢዎችን ሙሉ ለሙሉ አስተናግደናል በሚል መነሻ መረጃቸው የተሟላ የሆኑት ተስተናግደው የባለሶስት መኝታ ፕሮግራም ተዘግቶ ነበር” የሚል ነው። ዘግየት ብሎ ደግሞ በ1997 የቀሩ ስላገኘን ለእነሱ በልዩ ሁኔታ እንሰጣለን ነው የተባለው። ይሁን እነዚህም ዜጎች ስለሆኑ ይሰጣቸው። ጥያቄው ግን ለምን የ2005 ተመዝጋቢዎች ከተጀመረው ስርአት እንዲወጡ ተደረገ፤ ለምንስ የተጀመረው ፍትሃዊ አሰራር ተስተጓጎለ የሚለው ነው።

አስተዳደሩ ውሳኔው የቦርዱ ነው ብሏል። ቦርዱ ለውሳኔው ግብአት ያደረገው የ1997 ባለ ሶስት መኝታ ተመዝጋቢዎች በሙሉ አግኝተዋል የሚለውን ከሆነ፤ ለምን 13ኛ ዙር ላይ የ2005 ተመዝጋቢዎች እጣ ውስጥ ገብተው ቤት እንዲያገኙ ተደረገ?

በተጨማሪም ከ1997 ተመዝጋቢዎች መካከል በሙሉ ቤት ያገኙት ባለ ሶስት መኝታዎች ብቻ ሳይሆኑ የስቱዲዮም ተመዝጋቢዎችም በተመሳሳይ ሙሉ በሙሉ ቤት አግኝተዋል። ቤቶቹ ስለተረፉ 13ኛ ዙር ላይ ለ2005 ተመዝጋቢዎች ተሰጥተዋል፤ ምን ይሄ ብቻ የ1090 ተመዝጋቢዎች በሙሉ ቤት አግኝተዋል፤ ቤቱም እንደተረፈ በወቅቱ ተገልጿል (በነገራችን ላይ ስለነዚህ ቤቶች አስተዳደሩም ነዋሪውም ሲያነሳ አይሰማም። የተረፉት ቤቶች ምን ላይ ናቸው ግን) ።

የጠቃቀስኳቸውን ጥቂት አብነቶችና ጥያቄዎች ዘርዝሮ ማስረዳት ካልተቻለ ጣጣው እንዲህ በቀላሉ የሚለቅ አይሆንም። ጊዜ ጠብቆ እየፈነዳ የአስተዳደሩን መልካም ስራዎች ማጠልሸቱ አይቀርም። ምክንያቱም ሁሉም ህዝብ እንደተባለው ሾርት ሚሞሪያም አይደለማ። ስለሆነም ሃሜቱን ማጥራት እውነቱን ሳይታክቱ ማስረዳት የግድ ይላል።

ደስ የሚለው ነገር…

አዎን ደስ የሚለው ነገር ሰኞ ማምሻውን አስተዳደሩ ለህዝብ ይፋ ባደረገው መረጃ “ከዕጣ አወጣጥ ስነ-ስርዓት በኋላ የተለያዩ ጥቆማዎች በመቅረባቸው የኦዲት ሥራ ስንጀምር በባንክ የተላከውና ለእጣ እንዲውል ወደ ኮምፒዩተር የተጫነው ዳታ ልዩነቶች ተግኝተዋል:: በመሆኑም በእስካሁኑ የማጣራት ስራ ላልቆጠቡ ሰዎች እጣ መውጣትን ጨምሮ የተለያዩ የተዓማኒነት ጉድለቶች ታይተዋል፡፡

ከዚህ በመነሳትም የቤት ማስተላለፉን ሂደት ግልፅነት ለማስፈን ሲባል እና ውጤቱን የሚያዛባ ተግባር ሲያጋጥም መልሰን ኦዲት እንዲደረግ በገባነው ቃል መሰረት የተፈጠረውን ችግር ከጉዳዩ ገለልተኛ በሆኑ በሚመለከታቸው ተቋማት የማጣራት ስራ በመከናወን ላይ የሚገኝ ሲሆን በጉዳዩ የተጠረጠሩ ባለሙያዎች እና አመራር በቁጥጥር ሥር ሆነው ምርመራ እየተደረገ ይገኛል” ሲል አስታውቆናል።

ይህንን የአስተዳደሩን ጥረት አለማድነቅ አይቻልም። ይህንን ማጣራት ተከትሎ እየተወሰደ ያለው እርምጃ ተስፋችን በኖ እንዳይጠፋ ሆኗል። አሁን ከአስተዳደሩ የምንጠብቀው ይህንን ጉዳይ ቃል በገባው መሰረት አጥርቶ ለህዝብ አስረድቶ ጉዳዩን መዝጋት ነው።

በተጨማሪም የባለሶስት መኝታ ቤቶች ጉዳይ ቸል የሚባል አይደለም። በእነዚህ ቤቶች ጉዳይ አስተዳደሩ ከዕጣ አወጣጡ በኋላ ሶስት ጊዜ ማብራሪያ ሰጥቷል። ሶስቱም ግን ህዝቡን አላረኩም፤ የሚነሱ መከራከሪያዎችንም አልረቱም።

ስለሆነም “አገሬ ሰው አጣሽ ወይ” የሚለውን ዜማችንን አገሬ ሰው አለሽ ወይ ልንል የምንችለው የእውነት ስራ ሲሰራ ብቻ ነውና አስተዳደሩ ለህዝብም ለራሱም ሲል ጆሮውን ወደ ህዝብ ያዘንብል። ለመንግስት ይሄንን ጉድለት ማስተካከል ሲበዛ ቀላል ስራ ነው ብዬ አምናለሁ።

አስተዳደሩ በቤት ልማት የጀመራቸው ሰፋፊ ፕሮጀክቶችን ህዝብ በጉጉት እየጠበቃቸው ነው። ቤቶቹን መስራት አንድ ነገር ሆኖ ማከፋፈል ላይ የዚህ አይነት ብልሽት ከተፈጠረ መስራቱ ዋጋ የለውም። ስለሆነም “ሳይቃጠል በቅጠል” ነውና ዛሬውኑ መፍትሄ መፍትሄ መፍትሄ !!!

መንግስት ለምርጫ አብዝቶ የሚፈልገውን ህዝብ፤ ህዝቡ ሲፈልገው ደግሞ አለሁ ይበል፤ ሲጠራው ይስማ፤ ሲጠይቀው ይመልስ። ሲወቅሰው ይቀበል። የምንወዳትን አገራችንን በማንወዳቸው ብልሹ አሰራሮችና ስግብግብ ሹመኞች ምክንያት እንድንጠላት አይሁንብን።

አበቃሁ!!!

በጋዜጣው ሪፖርተር

አዲስ ዘመን ሐምሌ 7 ቀን 2014 ዓ.ም