የገቢና ወጪ አለመመጣጠንና ስራ አጥነት አሁንም የለውጡ ፈተናዎች ናቸው ተባለ

የሀገሪቱ ገቢና ወጪ የተመጣጠነ አለመሆንና ሰፊ የስራ አጥነት ችግር አሁንም እየመጣ ላለው ለውጥ ፈተናዎች መሆናቸውን ምሁራን ተናገሩ።

ሁለተኛ ቀኑን በያዘው በጠቅላይ ሚኒስትር ፅ/ቤት አዘጋጅነት በሸራተን ሆቴል እየተካሄደ ባለው ‘አዲስ ወግ’ የተሰኘና ባለፈው አንድ አመት የመጣውን ለውጥ ብሎም ያጋጠሙ ፈተናዎችን በሚዳስሰው የውይይት መድረክ ላይ”የኢትዮጵያ ምጣኔ ሀብት፣ የምጣኔ ሀብቱ እድገት፣ ስራ ፈጠራና ማህበራዊ አካታችነት” በሚል ምሁራንና የምጣኔ ሀብት ባለሙያዎች ጥናቶችን አቅርበዋል።

የማክሮ ኢኮኖሚ ተመራማሪና መምህር ዶ/ር ሰዒድ ኑሩ እንዳሉት የሀገሪቱ ገቢና ወጪ አለመመጣጠን ትልቁ ፈታኝ ችግር እንደሆነ ቀጥሏል፤ ለዚህም የቁጠባ ባህል አለመዳበርና በሀገር ውስጥ በቂ ሀብት አለመኖር በምክንያትነት ጠቅሰዋል።

እንደ ዶ/ር ሰዒድ ገለፃ የሀገሪቱ እድገት በመንግስት ጫንቃ ላይ የነበረ መሆኑ በኢኮኖሚው ዘርፍ በተፈለገው ደረጃ ለውጥ እንዳይታይ አድርጎታል።

የኑሮ ውድነት፣ የንግድ ሚዛን አለመመጣጠን፣ የፋይናንስ ተቋማትን የሚመሩ አካላት ከፖለቲካው ተፅዕኖ አለመውጣት እና ሌሎችም ችግሮች የፋይናንስ አንቀሳቃሽ ተቋማትን ውጥረትና ችግር ውስጥ እንደከተታቸው የተናገሩት ደግሞ……. አቶ ዛፉ እየሱስወርቅ ዛፉ።

በጥናቶቹ እንደተመላከተው ባለፉት አመታት ኢኮኖሚውን ለማጠናከር በተሰሩ ስራዎች አርሶአደሩ ተጠቃሚ አልሆነም፤ ለአብነትም ለትላልቅ እርሻዎች የብድር አገልግሎት ሲሰጥ ለአርሶ አደሩ ግን ብድር የሚሰጥበት ማዕቀፍ አልነበረም በዚህም እስካሁን ከዝናብ ጥገኝነት የተላቀቀ ግብርናን መተግበር አዳጋች ሆኗል፤ ባስ ሲልም ምግብ አምራቹ የምግብ ዋስትናውን ማረጋገጥ አቅቶታል።

በኢትዮጵያ ህዝብ ቁጥር መጨመር እና ኢኮኖሚው ከሚፈልገው እድገት አኳያ ሀገሪቱ ያላት የፋይናንስ ተቋማት ቁጥር አነስተኛ ነው የተባለ ሲሆን የውጪ ኩባንያዎችንና ኢትዮጵያውያን ዳያስፖራዎችን በፋይናንሱ ዘርፍ ድርሻ እንዲኖራቸው ማድረግ ተገቢ ነው ተብሏል።

ከዚህም በተጨማሪ የሀገሪቱን የወደፊት የኢኮኖሚ ሁኔታ ፍንትው አድርጎ የሚያሳይ ፖሊሲና ፍኖተ ካርታ ማዘጋጀት ለችግሮች መፍቻ ቁልፎች እንደሚሆኑ በጥናት አቅራቢዎቹ ተመላክቷል።

በውይይት መድረኩ ከፍተኛ የመንግስት ባለስልጣናት፣ አምባሳደሮች፣ምሁራን፣ አርቲስቶች፣ ተማሪዎችና ጥሪ የተደረገላቸው እንግዶች እየተሳተፉ ሲሆን ዛሬ የሚጠናቀቅ ይሆናል።

በድልነሳ ምንውየለት
ፎቶ:- ዳኜ አበራ