ከዋድላ የወጡት የበጎነት እጆች

መርድ ክፍሉ

 የስብዕና ልህቀትና የአስተሳሰብ ለውጥን በመደበኛ ትምህርት ብቻ ማሳካት አይቻልም።ከመደበኛ ትምህርት በተጨማሪ በህብረተሰቡ አስተሳሰብ ለውጥ ላይ የሚሰሩ ማዕከላት እገዛ ያስፈልጋል። የጋራ ጥረት ለውጤት ያበቃል። በአስተሳሰብ ለውጥ ላይ የሚሰሩ ሥራዎች ተከታታይነት ከሌላቸው የሚፈለገውን ለውጥ ማምጣት አያስችልም። ምክንያቱም ሁሉንም የህብረተሰብ ክፍል ያማከለ መሆን ስላለበት ነው።

ሃሳብ የመጀመሪያው የሃብት ምንጭና የአንድ ሀገር ዕድገት መለኪያ ሲሆን ትኩረት ተሰጥቶ ሊሰራበት ይገባል። አሁን ባለው የዓለም ነባራዊ ሁኔታ በማህበረሰብ ደረጃ ቀናና የበለጸገ አስተሳሰብ ማምጣት ለፍትሃዊ ዕድገት ቁልፍ መሳሪያ በመሆኑ በአስተሳሰብ ላይ ብዙ መስራትና የመወያያ መድረኮችን ማበራከት ያስፈልጋል። ወደ ግለሰብ፣ ቤተሰብና ማህበረሰብ በማውረድ ሁሉም ኃላፊነቱን እንዲወጣ ማድረግም ይገባል።

ማህበረሰቡ ለኢትዮጵያዊነት ብያኔ አይሻም። ማህበረሰቡ ኢትዮጵያዊነትን በተግባር በየዕለቱ የሚኖረው እውነት ነው። ማህበረሰቡ የኢትዮጵያዊነት ወግና ባህሉን፣ የልብ አብሮነቱን በተግባር የሚመነዝርበት፣ ደስታና ኀዘኑን የሚካፈልበት የአንድ ሳንቲም ሁለት ገጽታ ያለው ነው።

ይሄን ሐቅ በተግባር ቋንቋ ከሚነግሩንና ከሚያስረዱን በርካታ ተግባራት መካከል በማህበራት ተሰባስበው ለወገኖቻቸው ጉልበት እና እስትንፋስ የዘሩ ብዙ ናቸው። በተመሳሳይም ፖለቲካው ዘርቶ፣ አጠጥቶ፣ አብቅሎ፣ ኮትኩቶ፣ ለፍሬ ያበቃቸውን አልፎ አልፎ በአገሪቱ የሚስተዋሉ መጥፎ ድርጊቶች በእምነቶች መካከል፣ በብሄረሰቦች መካከል፣ በማህበረሰቡ መካከል የሆኑ፣ የተደረጉና የተፈጠሩ አድርገው የሚነዙ አካላት አይጠፉም። ይሄ የኢትዮጵያዊነትን የትስስር፣ የመዋደድ፣ የአንድነት፣ የፍቅር ማሰሪያ ውል ጥልቀት በፖለቲካቸው ጮርቃ ሚዛን ከመለካት የሚመነጭ የለጋ እሳቤ ውጤት ነው።

በብዛት ወጣት ከሚገኝባቸው አገራት መካከል አንዷ ኢትዮጵያ ናት። በኢትዮጵያ ታድያ ወጣቱ ክፍል ከመስራትና አገርን ከማሳደግ ይልቅ ባልባሌ ትርክቶች ተጠምዶ እርስበርስ ሲጋጭ ማስተዋል ከተጀመረ ዋል አደር ብሏል። በአገሪቱ የሚሰራ ሥራ ጠፍቶ ሳሆን አለመስማማቶች በመበራከታቸው የሚሰሩ እጆች ለጥፋት እየዋሉ ይገኛሉ። በመንግሥትም ደረጃ ጠንከር ያሉ ሥራዎች ባለመከናወናቸው ዝርፍያና ቅምያ በከተሞች አካባቢ እየተስፋፋ ይገኛል።

ኢትዮጵያ ውስጥ የሚገኙ ብሄር፣ ብሄረሰቦችና ህዝቦች በአንድ ላይ ተሰናስለው፣ ባህላቸውን፣ እሴታቸውን እንዲሁም ሌሎች ነገሮቻቸውን እየተሰጣጡ እዚህ ደርሰዋል። በዚህም ውስጥ በጎ ተግባር የሚፈፅሙ በሁሉም ቦታ የሚገኙ ወጣቶች በማሳያነት ማንሳት ይቻላል።

ለተቸገረ መርዳትና መድረስ ከጥንት ጀምሮ የነበረ ባህል ሲሆን በአሁኑ ወቅት ይህ ባህል አድርጎ እየተተገበረ ይገኛል። በአገሪቱ አራቱም መዓዘናት ችግሮች ሲከሰቱ ለምሳሌ ድርቅ፣ ረሀብ፣ መፈናቀልና ሌሎች ችግሮች ሲስተዋሉ ሁሉም በአንድነት ያለውን አካፍሎ ያንን ክፉ ጊዜ እንዲታለፍ አድርጓል።

በሌላ በኩል ደግሞ የአገር አንድነትን ለማፍረስ በሚደረጉ ህገወጥ ድርጊቶች ምክንያት የሚደርሱ ውድመቶችንና መፈናቀሎችን ለማስቀረትና መልሶ ለማቋቋም ብዙ በጎ አድራጊ ሰዎች ተሳትፎ ሲያደርጉ መመልከት እየተለመደ መጥቷል። በጎ አድራጊ ወጣቶችም ሆነ ድርጅቶች ዋነኛ መስፈርታቸው ኢትዮጵያዊነት ብቻ ነው።

የኮቪድ 19 ወረርሽኝ ከተከሰተ በኋላ በሁሉም አካባቢዎች ለተቸገሩ የሚደርሱ ወገኖች እየበዙ ይገኛሉ። ወረርሽኙ ካስከተው ጉዳት አንፃር የሚደረጉ ድጋፎች በቂ ባይሆኑም ለእለት የሚሆን ቀለብ ግን ማቅረብ ተችሏል።

ዋድላ በአሁኑ ሰሜን ወሎ ዞን የሚገኝ ወረዳ ሲሆን የወረዳው ዋና ከተማ ቆኔ ይባላል። በባሽሎ ወንዝ ጠለል ውስጥ የሚገኘው ይህ ወረዳ ዥታ የተሰኘ ወንዝ አልፎት ይሄዳል። ዋድላ ወረዳ በሰሜን ወሎ ውስጥ ከሚገኙ የገጠር ወረዳዎች መካከል አንዷ ስትሆን ከዞኑ ዋና ከተማ ወልዲያ በ120 ኪሎ ሜትር ርቀት ላይ የምትገኝ ወረዳ ናት።

ወረዳዋ በአብዛኛው የአየር ንብረቷ ደጋማ ሲሆን በስፋት የምትታወቀው በገብስ ምርቷና በእንስሳት ሃብቷ ቢሆንም ዛሬ ዛሬ ደግሞ በአፕልና በኦፓል ምርቷ እውቅናን ማግኘት ጀምራለች።

ቅኔን ለመላው ኢትዮጵያ በገፀ በረከት ያበረከተችው ዋድላ ዛሬ ደግሞ የኢትዮጵያ ቅድመ ታሪክ በአዲሱ ትውልድ ይደገም ዘንድ ዳግማዊ ላሊበላን በጋሸና በመፈልፈል እንካችሁ ብላለች። ዋድላ በ13ኛው መቶ ክፍለ ዘመን የተቆረቆረውን የኔጃ ገበያን ሃብቷ አድርጋ የያዘች፣ በ2ኛው የኢትዮጵያ ሊቀ ጳጳስ በአቡነ ሙሴ የተፈለፈሉ 2 ቤተክርስቲያኖችን በክብር ያቆየች ወረዳ ናት። ዋድላ የግባ በለው ሃገር የእርጎ የጮማ መፍለቂያ ታላቅ ምድር መሆኗ ይታወቃል።

ወጣት በጎ ፈቃደኞቹ የልማት ሥራዎችን በመስራት፤ አረጋውያንን በመንከባከብና ድጋፍ በማድረግ፤ የተቸገሩትን በመርዳት አገልግሎት ይሰጣሉ። በጎ ፈቃደኞችን ሰው ሰራሽም ሆነ የተፈጥሮ አደጋ ለሚያደርጉት ተግባር ግንባር ቀደም ናቸው። በኢትዮጵያም ወጣት በጎ ፈቃደኞቹ የልማት ሥራዎችን በመስራት፤ አረጋውያንን በመንከባከብና ድጋፍ በማድረግ፤ የተቸገሩትን በመርዳት አገልግሎት ይሰጣሉ።

ከላይ ከተቀመጡት ነገሮች ባሻገር የዋድላ ወጣት ነዋሪዎች በአካባቢው ለሚገኙ ችግረኛ ሰዎች የተለያዩ ድጋፎችን ያደርጋሉ። ከዚህም በዘለለ በትምህርት ዙሪያና በሌሎች በጎ አድራጎት ሥራዎች እየተሳፉ ይገኛሉ።

በአካባቢው የሚገኙ ወጣቶች የዋድላ አንድነት በጎ አድራጎት ማህበር በሚል ተደራጅተው ጥሩ እንቅስቃሴ እያደረጉ ናቸው። ማህበሩ በአማራ ክልል በሰሜን ወሎ ዞን በዋድላ ወረዳ በኮን ከተማ የሚገኝ ህጋዊ እውቅና የተሠጠው ነው። ስለማህበሩ አጠቃላይ የሥራ እንቅስቃሴ ዋና ፀሐፊ ከሆነው አቶ መካሻው ሀይሉ ጋር ቀይታ አድርገናል። እንደሚከተለው አቅርበነዋል።

ማህበሩ ያከናወናቸው ተግባራት

ማህበሩ የተመሰረተው በ2010 ዓ.ም ላይ ሲሆን በአካባቢው የሚገኙ በጎ ፈቃደኞች በመሰባሰብ የመሰረቱት ነው። የተለያዩ የበጎ አድጎት ሥራዎችን አከናውኗል። ማህበሩ በዋነኝነት በትምህርት ላይ አተኩሮ የሚሰራ ሲሆን አቅም ለሌላቸው ተማሪዎች ደብተርና የመማሪያ ቁሳቁስ ድጋፍ ይደረጋል። እስካሁን አንድ ሺህ አምስት መቶ ደርዘን ደብተር ድጋፍ አደርጓል።

በ2011 ዓ.ም በኮን ገጠር ሰብላቸው በእሳት አደጋ ለተቃጠለባቸው አርሶ አደሮች አንድ ነጥብ አምስት ሚሊዮን ብር በላይ ከሰሜን አሜሪካ ካሉት ወንድሞች የተላከ ገንዘብ እንዲሰጥ ተደርጓል:: እስካሁን ባሉት ሶስት ተከታታይ ዓመታት ደብተርና እስክርቢቶ በማሰባሰብ ከአንድ ሺህ ስምንት መቶ ለሚሆኑ ተማሪዎች ደብተርና እስክርቢቶ መግዛት ለማይችሉ ተማሪዎች ለአንድ ተማሪ አንድ ደርዘን እና ሁለት እስክርቢቶ ተደራሽ ተደርጓል:: እንዲሁም እስከ 20 ለሚደርሱ የዩኒቨርሲቲ ተማሪዎች ሃያ ሺህ ብር ያላነሰ ገንዘብ ወጪ በማድረግ እንደ የዩኒቨርሲታቸው ርቀት የትራንስፖርት ድጋፍ ተደርጓል::

ሌላው ማህበሩ የተቸገሩ እናቶችን ህፃናትን እየለየ እንደ ችግራቸው የገንዘብ፣ የቤት ኪራይ፣ የህክምና ወጪ እና አልባሳት ድጋፎችን እያደረገ ይገኛል:: በሥራ እድል ፈጠራው ዘርፍም ለ14 ወጣቶች ሁለት የሊስትሮ መስሪያ ሼድ በማሰራት ለወጣቶቹ እና ደንበኞቻቸው ምቹ ሁኔታ ፈጥሯል::

አሁን ላይ ለ17 ዓመት ያህል በአእምሮ ህመም ሲሰቃይ የቆየውን ሰው ለማሳከም የተለያዩ ድጋፎችን በማስተባበር ላይ ይገኛል:: አሁን ላይም ወደ ዋድላ መጀመሪያ ደረጃ ሆስፒታል አጠገብ በቅርብ ቤት በመከራየት ከአንድ አስታማሚ እህቱ ጋር ሙሉ ወጪ በመሸፈን በሳይካትሪ ባለሙያ ክትትል እየተደረገለት ይገኛል:: ለዚህም ሆስፒታሉ የባለሙያ ትብብር ያለምንም ክፍያ እያደረገ ነው::

የህብረተሰቡ አቀባበል

በጎ ፈቃደኛ ሆኖ ማገልገል በራሱ ትልቅ ትእግስት ይጠይቃል:: ይህ ሲባል ህብረተሰቡ ተቀበለም አልተቀበለም ሥራዎችን ያለምንም ማመንታት ማከናወን ይገባል:: በማህበሩ እንቅስቃሴ የህብረተሰቡ አቀባበል ጥሩ የሚባል ነው:: ምክንያቱም ማህበሩ የራሱ የሆነ ገቢ የሌለው ሲሆን ዋነኛው ገቢ የአባላት መዋጮ ሲሆን ማህበሩ በህብረተሰቡ ዘንድ ተቀባይነት አለው ማለት ይቻላል:: ነገር ግን አልፎ አልፎ ሥራዎች ሲሰሩ የሚያጋጥሙ ችግሮች አሉ::

ማህበሩን ያጋጠሙት ችግሮች

ማህበሩን የሚመሩት ሥራ አስፈፃሚዎች በሥራ ጉዳይ ወደተለያየ ቦታ ሲሄዱ የማህበሩ ሥራ ሊቆራረጥ ይችላል:: ማህበሩ ውስጥ ያሉ አባላት በበጎ ፈቃድ ባላቸው ትርፍ ሰዓት የሚሰሩ ሲሆን በዚህም የሥራ መደራረቦች ይኖራሉ::

የገቢ ምንጩም በአባላቱ መዋጮ ላይ የተመሰረተ ሲሆን በማህበራዊ ሚድያ ላይ ሰፊ ሥራዎችን እያከናወነ ነው:: ሌላው ችግር መንግሥታዊ ተቋማት ድጋፍ ለማድረግ ቃል ገብተው በወቅቱ አለመፈጸም ይስተዋላል:: በቀበሌ ደረጃ የመማሪያ ቁሳቁስ ለማስተላለፍ የትራንስፖርት ችግር የማጋጠም ችግርም ነበር::

አባላት ተሟልተው የወር መዋጪ ያለመክፈል ሁኔታዎች አሉ:: የወር መዋጮ ካልተጠየቁ ያለመስጠት ሁኔታዎች ይስተዋላሉ:: ማህበሩ በአባላት መዋጮ፣ በአገር ውስጥና በውጭ ከሚገኙ ሰዎች በሚያገኘው ገቢ ሥራዎችን የሚሰራ ነው:: በኮቪድ 19 ወረርሽኝ ምክንያት አብዛኛው ውይይት የተካሄደው በቴሌግራም በኩል ነው:: ማህበሩ የራሱ የሆነ ቢሮ ያለው ሲሆን ሥራ አስፈፃሚዎች እየሰሩበት ይገኛሉ::

ማህበሩ ለበርካታ ችግረኞች ድጋፍ ቢያደርግም ድጋፍ የሚፈልጉ ሰዎች ቁጥር በጣም እየበዛ ይገኛል:: በዚህም ድጋፎችን ማዳረስ ትልቅ ፈተና ፈጥሯል:: ለምሳሌ የመማሪያ ቁሳቁስ ድጋፍ በተደረገለት ወቅት አንድ ሺህ 586 ደርዘን ደብተርና 46 ካርቶን እስክርቢቶ የተገዛ ቢሆንም ለሁሉም እኩል ማዳረስ አልተቻለም:: ድጋፍ የሚፈልጉ ተማሪዎች ከሁለት ሺህ በላይ ነበሩ::

ይህ ከባድ ፈተና ነበር:: በትብብር መስራት የሚፈልጉ የበጎ አድራት ማህበራትና ታዋቂ ግለሰቦች ካሉ ማህበሩ በሩ ክፍት ነው:: ከጤናም ጋር በተያያዘ የሚመጡ ነገሮች ያሉ ሲሆን ድጋፍ የሚጠይቀው ሰው ቢሮ በየጊዜው ይመጣል:: የሚመጡትን ሰዎች ግን በተፈለገው ጊዜ መደገፍ አልቻለም::

የማህበሩ ቀጣይ ሥራ

ማህበሩ በቀጣይ ያሰበው ነገር ድጋፍ ያልተዳረሰባቸውን ወደፊት አንድ የአረጋውያን ማዕከል በመክፈት ጧሪ ቀባሪ የሌላቸውን ሰዎች አንድ ላይ ለመሰብሰብ እቅድ አለ:: ማዕከሉ የራሱ ሰራተኛ ኖሮት የልማት ሥራዎችን እያከናወነ ከአባላት መዋጮ በዘለለ የራሱን ገቢ ለማመንጨት ሀሳብ አለው:: በተጨማሪም የተለያዩ ህንፃዎችን በመገንባት በሚገኘው የህንፃ ኪራይ አቅመ ደካሞችን ለመደገፍ አስቧል:: ከልማት ጋር በተያያዘ ማህበሩ ሥራዎችን ለማከናወን ያቀደ ሲሆን የገቢ ምንጮችን ለማሳደግ አማራጮችን ለመጠቀም አስቧል::

በአጠቃላይ የማህበሩን ገቢ ለመጨመር የሚያስችሉ ሥራዎችን ለማከናወን ጥረቶች ይደረጋሉ። ከማህበሩ የተመረጡ ሰዎች ፕሮጀክቶችን በመቅረፅ እንቅስቃሴ እያደረጉ ነው። የዋድላ የልማት ማህበር ጋር በመቀናጀት የታሰቡ ሥራዎችን ለማከናወንና ወደ ተግባር ለመግባት ዝግጅት እየተደረገ ነው። በትምህርት ዙሪያ ደግሞ በአካባቢው ላይ የሚገኙ ህፃናት የሚማሩበት ትምህርት ቤት ባለመኖሩ ማህበሩ ለህፃናቱ የሚሆን ትምህርት ቤት ለመገንባት እቅድ አለው። ትምህርት ቤቱ ሲከፈት ከፍለው ማስተማር የማይችሉ ሰዎች ልጆቻቸውን እንዲያስተምሩበት ይደረጋል።

አዲስ ዘመን መጋቢት 17/2013