ኮሮናን በቤት ተወስኖ በመቆየት

እጆችን በንፁህ ውሃና ሳሙና መታጠብ፣ በሳኒታይዘር ማፅዳት፣ ከሰዎች ጋር አለመጨባበጥ፣ ባልታጠበ እጅ አፍና አፍንጫን አለመንካትና ሳል ወይም ትኩሳት ካለበት ሰው ሁለት የአዋቂ እርምጃ መራቅ የኮሮና ቫይረስን ለመከላከል በአብዛኛው በህክምና ባለሙያዎች የሚሰጡ ምክሮች ናቸው፡፡
ከዚህ በተጨማሪ ራስን በቤት ወስኖ ማቆየት /stay at home/ የኮሮና ቫይረስን ለመከላከልና ስርጭቱንም ባለበት ለማቆም ዋነኛ መንገድ መሆኑን ባለሙያዎቹ ይስማሙበታል።
ኢትዮጵያም የቫይረሱን ስርጭት ባለበት ለመከላከልና ከዚህ የከፋ ጉዳት እንዳያስከትል በፌዴራልና በአዲስ አበባ ከተማ የሚገኙ የመንግሥት ሠራተኞች በቤታቸው ሆነው ሥራቸውን እንዲያከናውኑ ውስናለች። ከአንደኛ ደረጃ እስከ ከፍተኛ የትምህርት ተቋም ያሉ ተማሪዎችም በቤታቸው ሆነው እንዲቆዩ ትእዛዝ አስተላልፋለች።
በአዳማ ከተማም በኮሮና ቫይረስ የተያዙ ሶስት ሰዎች መገኘታቸውን ተከትሎ ቫይረሱ ወደሌሎች አካባቢዎች ይበልጥ እንዳይስፋፋ የከተማዋ ነዋሪዎች በቤታቸው ተወስነው እንዲቆዩ ታዟል።
ሆኖም እስካሁን ባለው ሂደት መንግሥት ከላይ የተጠቀሱት የህብረተሰብ ክፍሎች በቤታቸው ራሳቸውን ወስነው እንዲቆዩ ያሳተላለፈውን መመሪያ ወደጎን በመተው ከቤት ውጪ እየተንቀሳቀሱ ያሉ ዜጎች አሁንም ይታያሉ።
ቻይና የቫይረሱን ስርጭት ሙሉ በሙሉ ለመግታት ያስቻላት ህዝቧ በቤቱ ተወስኖ እንዲቆይ ያስተላለፈቸውን መመሪያ በመፈጸሙ ነው።መመሪያው የህዝቡ ቀና ትብብር ታክሎበት ቫይረሱን በመከላከል ረገድ ትልቅ አስተዋፅኦ አበርክቷል። ኢትዮጵያውያንም ከቻይናውያን ትምህርት በመውሰድ መንግሥት ያወጣውን በቤት ተወስኖ የመቆየት መመሪያ በጥብቅ ዲስፕሊን ተግባራዊ ሊያደርጉት ይገባል።
አዲስ ዘመን መጋቢት 22/2012