ኢንዱስትሪዎችን ከቫይረሱ ነፃ ከማድረግ ባለፈ ማህበራዊ ኃላፊነትን መወጣት

ዓለም ገብረ መድህን በመቀሌ ከተማ በሚገኘው ማ- ጋርመንትና ቴክስታይል ፋብሪካ በመስራት ላይ ትገኛለች። የኮረና ቫይረስ በኢትዮጵያ መከሰቱ በተገለጸ ቀን ከስራዋ ባህሪ ጋር በተያያዘ ከፍተኛ ፍርሃትና ጭንቀት ተፈጥሮባት እንደነበር ታስታውሳለች።

ዛሬ ግን የፋብሪካው አስተዳደር ለሰራተኞቹ በሰጠው ግንዛቤ ዓለምና ጓደኞቿ ጥንቃቄዎችን በማድረግ የዘወትር ስራቸውን እያከናወኑ ይገኛሉ። የኮረናን ስርጭት ለመከላከል በፍርሃትና በጭንቀት ይልቅ ማድረግ በሚገባ ጥንቃቄዎች ላይ እንዲያተኩሩ ትመክራለች።

የፋብሪካው አስተዳደር ለጉዳዩ የሰጠው ትኩረት ከቀን ወደ ቀን እያደገ መምጣቱና የሰራተኛውም ጥንቃቄ እየጨመረ መምጣት ስጋቷን እንደቀነሰላት ዓለም ትናገራለች።

የኢንዱስትሪ ዞኖች ጥንቃቄ መደረጉ ስርጭቱን ለመግታት አበርክቶው ከፍ ያለ እንደሆነና ፋብሪካዎች ኢኮኖሚን የማመንጨት እንቅስቃሴያቸው እንዳይስተጓጎል ያደርጋል ትላለች። ፋብሪካው ኮረና ቫይረስን በመከላከል ረገድ ከሰራተኞቹ አልፎ ለአካባቢው ማሕበረሰብ የፊት ማስኮችን እየሰፋ ማሰራጨቱን የገለጸችው ዓለም ቫይረሱን ለመከላከል ትብብርን በመፍጠር መሆኑን ታስረዳለች።

ገብረትንሳይ ገብሩ ሌላው አስተያየት የሰጠን የዚሁ ፋብሪካ ሰራተኛ ነው። እርሱ እንደሚያስረዳው በፋብሪካዎች አካባቢ በርካታ ቁጥር ያላቸው ሰራተኞች ስራቸውን የሚያከናውኑት በቅብብሎሽ ስለሆነ በሀገሪቱ የተከሰተው የኮረና ቫይረስ እንዳይሰራጭ ብርቱ ጥንቃቄ ማድረግ ያስፈልጋል።

እርሱና ጓደኞቹ በፋብሪካው የጤና ባለሙያዎች የተሰጣቸውን የግንዛቤ ማስጨበጫ ትምህርት ወስደው ተግባራዊ በማድረግ ላይ ናቸው።

ጠዋት ወደ ስራ ሲገቡ በግቢው በር ላይ እጃቸውን ይታጠባሉ፤ ማስክ ያደርጋሉ፤ ስራቸውንም ርቀታቸውን ጠብቀው ያከናውናሉ፤ በአልኮል ይደባብሳሉ፤ የተነገራቸውን ሁሉ ተግባራዊ አድርገው ስራቸውን መስራታቸው የነበረባቸውን መረበሽ እንዳስወገደላቸው አቶ ገብርተንሳይ ያስረዳል።

የማ-ጋርመንትና ቴክስታይል ፋብሪካ ዋና ስራ አስኪያጅ አቶ ፍቅረስላሴ አምባው እንደሚያስረዱት ፋብሪካው 1ሺ 500 ሰራተኞች እንዳሉትና 80 በመቶ ኤክስፖርት በማድረግ ስራ ላይ የተሰማራ እንደመሆኑ የኮሮና ቫይረስን ስርጭት ከመቆጣጠር አንጻር በትኩረት እየተሰራ ነው።

በመሆኑም የኮረና ቫይረስ መከላከል ግብረ ሃይል በማቋቋም ሰራተኞች አስፈላጊውን ቅድመ ጥንቃቄ እንዲያደርጉ የግንዛቤ ማስጨበጫ ትምህርቶችን እንዲያገኙ ተደርጓል።

አሁን በሀገሪቱ ያለውን የማስክ እጥረት ለመቅረፍም በህክምና ባለሙያዎች ምክር የመደበኛውን ማክስ መመዘኛ ሊያሟላ የሚያስችል ጨርቅ ተመርጦ መሰራቱን ተናግረዋል።

ለ1 ሺ አምስት መቶ የፋብሪካው ሰራተኞች የፊት ጭንብሎችን ሰፍቶ ማሰራጨቱን ገልጸዋል። ያም ብቻ ሳይሆን 25 ሺህ ጭንብሎችን አዘጋጅቶ ለህክምና ተቋማትና ለሌሎች ድርጅቶች በነጻ ማሰራጨቱን አስረድተው አሁንም 150 ሺ ጭንብሎችን አዘጋጀቶ በክልሉ ለሚገኙ ህክምና ተቋማት ለማሰራጨት በዝግጅት ላይ መሆኑን ጠቅሰዋል።

በጋርመንት ስራ ላይ የተሰማሩ ሰራተኞች ስራቸውን ሲያከናውኑ አቀማመጣቸው ዓለም አቀፍ ስታንዳርድ እንዳለው የተናገሩት ስራ አስኪያጁ ከቫይረሱ መከሰት ጋር በተያያዘ ግን ተራርቀው እንዲቀመጡ የማሻሻያ ስራዎች መሰራታቸውን ገልጸዋል።
የሀዋሳ ኢንዱስትሪዎች ፓርክ ስራ አስኪያጅ አቶ ፍጹም ሽፈራሁ እንደገለጹት ኮሮና ቫይረስን ለመከላከል በሀዋሳ ኢንዱስትሪ ፓርክ ደረጃ ግብረሃይል ተቋቁሞ እየተሰራ መሆኑን ተናግረዋል።

ቫይረሱ በቻይና ሀገር ከተከሰተ ጀምሮ የተለያዩ የውጭ ሀገር ዜጎች ወደ ሃዋሳ ኢንዱስትሪ ፓርክ ሲመጡ ለ 14 ቀናት በለይቶ ማቆያ ስፍራ ተቀምጠው ከቫይረሱ ነጻ መሆናቸው ሲረጋጋጥ ወደ ፓርኩ ማሕበረሰብ እንዲቀላቀሉ ተደርጓል።

ከዚህ ጎን ለጎንም በፋብሪካው ለሚገኙ 34 ሺህ ሰራተኞች በተለያዩ መንገዶች የግንዛቤ ማስጨበጥ ስራ እየተሰራ መሆኑን ተናግረዋል። ሰራተኞች እርስ በእርሳቸው የሚያደርጉትን ቅርርብ እንዲቀንሱ እጃቸውን ቶሎ ቶሎ እንዲታጠቡና ሳኒታይዘሮችን እንዲጠቀሙ እየተደረገ መሆኑን አስረድተዋል።

የትራንስፖርት አገልግሎት የሚሰጡ መኪኖችን በየጊዜው የማጽዳትና የአገልግሎቱ ተጠቃሚዎችም ተጨናንቀው እንዳይጓዙ መደረጉን ጠቅሰዋል።

የኢንዱስትሪ ፓርኮች ልማት ኮርፕሬሽን ኦፕሪሽን ዘርፍ ምክትል ስራ አስፈጻሚ አቶ ሽፈራሁ ሰለሞን እንደሚያስረዱት የኮረና ቫይረስ ኢትዮጵያ ውስጥ ከመከሰቱ አንድ ወር በፊት ጀምሮ በኢንዱስትሪ አካባቢ ያሉት ማህበረሰቦች በቫይረሱ እንዳይጠቁ ግንዛቤ የማስጨበጫ ስራዎችን የመስራት ስራ ተሰርቷል።

ይህንን የሚያስተባብር ግብረ ሃይልም ተቋቁሟል ብለዋል። ከኢንዱስትሪ ፓርኮች ጋር ግንኙነት ያላቸው ከውጭ የሚገቡ ኢትዮጵያውያንም ሆኑ የውጭ ዜጎች ወደ ፓርኩ ከመግባታቸው በፊት 14 ቀን ተለይተው እንዲቀመጡ ተደርጓል።

የኢንዱስትሪዎች ዘርፍ በሀገር ኢኮኖሚ ላይ ከፍተኛ አስተዋጽኦ እያበረከተ የመጣ መሆኑን የገለጹት አቶ ሽፈራው የግል ኢንዱስትሪዎችን ጨምሮ እስከ 102 ሺ ሰራተኞች በዘርፉ መታቀፋቸውን አመላክተዋል።

በዚህም የኢንዱስትሪ መንደሮችን ከቫይረሱ የጸዱ ማድረግ ሌላውን የማህበረሰብ ክፍል መታደግ እንደሆነም ጠቅሰዋል። በርካታ የውጭ ዜጎች በኢንዱስትሪው ዘርፍ መሰማራተቸውን በመግለጽም እነዚህን የውጭ ሀገር ዜጎች በተሳሳተ ግንዛቤ ከጉዳዩ ጋር በማያያዝ ማግለልና ማጥቃት ኢትዮጵያዊ ስነምግባር አለመሆኑን ጠቅሰዋል።

ይህ አይነቱ ተግባር በአገር ገጽታ ላይ መጥፎ ተጽዕኖ ስለሚኖረው ህብረተሰቡ እንግዶችን የማክበር ልምዱን እንዲጠብቅ መክረዋል።
አዲስ ዘመን መጋቢት 17/2012

ኢያሱ መሰለ