![](https://www.press.et/Ama/wp-content/uploads/2019/07/11-15.png)
መኪና ተከራይቶ ጉዳይን ማስፈጸም፣ ጉብኝት ማድረግ፣ ወዘተ. የተለመደ ነው፡፡ በሀገራችን የሙሽራ መኪና ኪራይ ለእዚህ ይጠቀሳል። ሙሽራ ለማጀብም መኪና መከራየት አለ። አንዳንድ ተቋራጮች ብዙ ስራቸውን በመኪና ኪራይ ወይም ኮንትራት ሲከውኑም ይስተዋላል። በእነዚህ ሁሉ ታዲያ መኪናዎቹን የሚያሽከረክሩት ባለመኪናዎቹ ወይም ሾፌሮቻቸው ናቸው፡፡
ከዚህ ውጪ ደግሞ መኪናውን ተከራይቶ በራስ አሽከርካሪ ወይም እያሽከረከሩ መገልገል ይቻላል፡፡ ይህም በሀገራችን በስፋት ይሰራበታል። በዚህም ይሁን በዚህ በዚያ ሰዎች መኪናዎቹን የሚከራዩት ግን ለመጓጓዣ አገልግሎት ነው፡፡
ኦዲቲ ሴንትራል ከወደ ጃፓን ይዞት የወጣ ዘገባ እንዳመለከተው ግን በጃፓን አሁን አሁን ሰዎች መኪና የሚከራዩት ለትራንስፖርት አገልግሎት ብቻ አይደለም፡፡ በሀገሪቱ መኪና የማከራየት ስራ የሚያካሂዱ ሁሉ በጣም እንግዳ የሆነ ነገር እየተመለከቱ ናቸው፡፡ በርካታ መኪና ተከራዮች በጣም ውስን ርቀቶችን የሚጓዙ ሲሆን፣ጨርሶ የማያሽከረክሩበት ሁኔታም አለ፡፡
ይህ ደግሞ ለአከራዮች ሰርግና ምላሽ ሆኖላቸዋል። አከራዮች ተከራዮች ብዙ ርቀት ቢጓዙ ይበልጥ እንደሚጠቀሙ ያውቃሉ። ከቅርብ ጊዜ ወዲህ ተከራዮች መኪና የሚፈልጉት ለትራንስፖርት አገልግሎት ወይም ለማሽከርከር ሲሉ አለመሆኑ ግን እንቆቅልሽ ሆኖባቸዋል። ጉዳዩ በእጅጉ እያሳሰባቸው ቢያወጡት ቢያወርዱት ችግሩን ሊደርሱበት ይቸገራሉ፡፡
እነዚህ መኪና አከራይ ኩባንያዎችና ግለሰ ቦች ታዲያ አንድ መላ ይመጣላቸዋል። ይህም መላ በሚያከራዩዋቸው መኪናዎችና ተከራዮች ላይ ጥናት ማካሄድ ነበር። ይህንንም በማድረግ ከሚገርም ውጤት ላይ ይደርሳሉ። ሰዎቹ መኪናዎቹን የሚከራዩት ለማሽከርከር ብለው ሳይሆን ሌሎች የተለያዩ ተግባሮች መሆኑን ይደርሱበታል፡፡ የእነዚህ
ሰዎች ቁጥር ከጊዜ ወደጊዜ እየጨመረ እንደመጣም ነው የተጠቆመው፡፡
በሀገሪቱ የታዋቂው የኤንአይቲ ዶኮሞ የመኪና አከራይ ኩባንያ በ2018 ያደረገውን ጥናት መሰረት አርጎ እንደገለጸው፤ ከመኪናዎቹ ተከራዮች ከስምንቱ አንዱ መኪና የሚከራየው ከትራንስፖርት አገልገሎት ውጪ ለሆኑ ተግባሮች ነው፡፡
በጥናቱ አስተያየት ከሰጡ አብዛኞቹ መኪና የሚከራዩት የሆነ ቦታ ላይ በማቆም ለመኝታ አገልግሎት ለመጠቀም ወይም አረፍ ለማለት ብለው መሆኑን ተናግረዋል፡፡ ሌሎች ደግሞ እንደ ልብ ለማረፍም ሆነ ከጓደኞቻቸው፣ ከቤተ ሰቦቻቸው እና ከንግድ አጋሮቻቸው ጋር በስልክ እንደልብ ለማውራት መኪና መከራየት በጣም ምቹ ስፍራ እንደሆናቸው ጠቁመዋል፡፡
እንድ የቶኪዮ ሰው ‹‹ደንበኞቼን ለማግኘት ለማነጋገር ብቅ ባልኩ ቁጥር ትንሽ ማሸለብ ስፈልግ ምርጫዬ ሆኖ የቆየው ብቸኛ ስፍራ ኢንተርኔት ካፌ ነበር፤ ከቅርብ ጊዜ ወዲህ ግን በጥቂት መቶዎች የን (የጃፓን ገንዘብ) መኪና ተከራይቶ መተኛትን ምርጫዬ እያረጉ መጥቻለሁ፤ በእውነቱ በጣም ይመቻል›› ሲል ተናግሯል፡፡
አንዳንድ ሰዎች ደግሞ ምሳቸውን ለመብላት መኪና መከራየትን ምርጫቸው አድርገዋል። ቲቪ ለመከታተል መኪና የሚከራዩም አሉ። ሌሎች ደግሞ ልብሳቸውን ለመቀየር፣ለመቆነጃጀት ሲፈ ልጉ መኪና መከራይትን መርጠዋል፡፡
በጃፓን የሚከራይ መኪና እንደልብ መገኘቱና ዋጋውም ኪስ የማይጎዳ መሆኑም ሰዎች መኪና ተከራይተው የፈለጉትን እንዲያደርጉ ምቹ ሁኔታ ፈጥሮላቸዋል። መኪና ለ30 ደቂቃ ለመከራየት 400 የን ብቻ ነው የሚያስፈልገው፡ ፡ በአስር ሺዎች የሚቆጠሩ የመኪና ማቆሚያ ስፍራዎች መኖራቸውም ሌላው ጠቀሚታው ነው፡፡ ምክንያቱም መኪና ለመከራየት ብዙ ርቀት መሄድ አይጠበቅም፤ የራስን መኪና አስነስቶ የመሄድ ያህል ቀላል ነው፡፡
በዚህ ምክንያትም ሰዎች የመመገቢያ እና እረፍት የማድረጊያ ስፍራን ሲያስቡ ቅድ ሚያ ምርጫቸው እያረጉ የመጡት ስማርት ስልኮቻቸውን በመነካካት መኪና መከራየትን ሆኗል፡፡
የኤንአይቲ ዶኮሞ የመኪና አከራይ ድርጅት ኃላፊ መኪና ለግል አገልግሎት ሊውል ይችላል፤ ሰዎች መኪናዎቻችንን እኛ ከምናስበው ውጪ ለሌሎች በርካታ ተግባሮቸ ሲጠቀሙባቸው ይስተዋላሉ ሲል ለመገናኛ ብዙሃን ተናግሯል፡፡
ሌላው በጃፓን በመኪና ኪራይ መሪ ከሚባሉት ኩባንያዎች መካከል አንዱ የሆነው የታይምስ 24 መኪና አከራይ ኩባንያ እንዲሁ በመኪና ተከራዮች ዘንድ ተመሳሳይ ተግባር ማየቱን ይገልጻል፡፡ በተከራዮቹ ላይ ያደረገውን ቅኝት አስመልክቶ ሲናገርም ተከራዮች በተከ ራዩት መኪና ውስጥ እረፍት እንደሚያደርጉ አንዳንዶቹም ስራዎቻቸውን እንደሚሰሩም ገልጿል። አንዳንዶች እቃዎችን ለተወሰነ ጊዜ ለማቆያነት እንደሚጠቀሙባቸውም አመልክቷል።
አሪክስ የተሰኘው መኪና አከራይ ድርጅት በበኩሉ ያከራያቸው መኪናዎች ብዙ ርቀት አለመጓዛቸውን አንዳንዶቹም ተንቀሳቅሰዋል የሚያስኝ እንቅስቃሴ አለማድረጋቸውን ማረጋገ ጡን ጠቅሶ ከዚያ በመለስ ግን ለምን አገልግሎት እያዋሏቸው ስለመሆኑ የደረሰበት ግምገማ እንደሌለው ተናግሯል፡፡
በጃፓን መኪና ተከራይቶ ከትራንስፖርት እና መኪና ከማሽከርከር አገልግሎት ውጪ ለሌሎች አገልግሎቶች ማዋል የተጀመረው እኤአ በ2011 በሀገሪቱ ተከስቶ ከነበረው ሱናሚ ማግስት አንስቶ መሆኑን ዘገባው ጠቁሞ፣ በወቅቱም መኪና መከራየት የሚያስፈልገው ሞባይል ቻርጅ ለማድ ረግ ብቻ እንደነበርም አመልክቷል፡፡ በጃፓን መኪና ተከራይቶ ማሽከርከር የተለመደ ቢሆንም ከተወሰነ ጊዜ ወዲህ ግን መኪና እየተከራዩ ለሌሎች የተለያዩ ተግባሮች ማዋል እየተለመደ መምጣቱን ዘገባው ጠቁሟል፡፡
አዲስ ዘመን ሐምሌ 9/2011
ዘካርያስ