በሀገራችን ድህንትን በአስተማማኝ መልኩ በመቅረፍ የሕዝቡን ህይወት በዘላቂነት መለወጥ የሚያስችሉ ሥራዎች ታቅደው በመተግበር ላይ ይገኛሉ። በዚህም እየተመዘገቡ ያሉ ውጤቶች ተስፋ ሰጭ ስለመሆናቸው በሜጋ ፕሮጀክቶች አፈጻጸም ሆነ በግብርናው ዘርፍ የሚታዩ ስኬቶች ተጨባጭ ማሳያ ናቸው።
ቀደም ሲል ሀገሪቱ ከመጣችበት ፖለቲካዊ፤ ኢኮኖሚያዊ እና ማኅበራዊ ምስቅልቅሎች እና ምስቅልቅሎቹ ከፈጠሯቸው መንገጫገጮች አንጻር፤ ላለፉት አራት ዓመታት ዜጎች በብዙ ፈተናዎች ውስጥ እንዲያልፉ፤ ፈተናዎቹን አሸንፈው ለመውጣትም ከፍያለ አላስፈላጊ ዋጋ እንዲከፍሉ ተገድደዋል።
በተለይም ከለውጡ ማግስት ጀምሮ የለውጡን ጉዞ ለማደናቀፍ በመላው ሀገሪቱ በሚባል ደረጃ በተፈጠሩ የሰላም እጦቶች ብዛት ያላቸው ዜጎች ለሞት፤ ለአካል ጉዳት፣ ለስደት እና ለስነ ልቦናዊ ስብራት ተዳርገዋል። ከቤት ንብረታቸው ተፈናቅለዋል። በዚህም ለሌሎች ይተርፉ የነበሩ ሳይቀሩ በሚሊዮን የሚቆጠሩ ዜጎች የርዳታ እጆችን ጠባቂ ሆነዋል።
”በእንቅርት ላይ ጆሮ ደግፍ ” እንደሚባለው ሰው ሰራሽ ከሆነው የሰላም እጦት ከፈጠረው ችግር በተጨማሪ፤ በተለያዩ የተፈጥሮ አደጋዎች /ድርቅ፣ ጎርፍ የመሬት መንሸራተት…ወዘተ/ ብዛት ያላቸው ዜጎች ለአስቸኳይ የምግብ እርዳታ ጠባቂነት ተዳርገዋል።
ወቅታዊ ችግሮቹ ቀደም ባላት ጊዜያት በተለያዩ ምክንያቶች በርዳታ ይኖሩ ከነበሩ በሚሊዮን የሚቆጠሩ ዜጎች ጋር ተዳምሮ፤ ለሀገርና ለሕዝብ ትልቁ የለውጥ ወቅት ፈተና ሆኗል። የእነዚህን ዜጎች ህይወት የመታደጉ ጉዳይ ከሁሉም ቅድሚያ የጠየቀ ሀገራዊ አጀንዳ ከሆነም ዓመታት እየተቆጠሩ ነው።
መንግስት የነዚህን ዜጎች ሕይወት ለመታደግ ካለበት የሞራልና የህግ ኃላፊነት አንጻር የተለያዩ አማራጮችን ወስዶ ሲንቀሳቀስ ቆይቷል። በችግሩ የዜጎች ህይወት እንዳይጠፋ ዓለም አቀፍና ሀገራዊ አቅሞችን አሟጦ ለመጠቀም ረጅም ርቀት ተጉዟል። በዚህም የብዙ ዜጎችን ህይወት መታደግ ችሏል።
በአንድ በኩል የችግሩን ስፋትና ጥልቀት ለዓለም አቀፉ ህብረተሰብ በማሳወቅ ለዜጎች የሚያስፈልጋቸውን የእርዳታ አቅርቦት ለማሟላት ሰፊ ዲፕላማሲያዊ ጥረቶችን ሲያደርግ፣ በሌላ በኩል ደግሞ በሀገር ውስጥ ያሉ አቅሞችን በማቀናጀት የህይወት አድን ስራዎችን አጠናክሮ እየሰራ ነው።
በርግጥ ሀገሪቱ በምግብ እህል እራሱዋን ያለመቻሏ /ትርፍ አምራች ያለመሆኗ፤ የተፈጥሮ እና የሰው ሰራሽ አደጋዎች ባጋጠሙ ቁጥር ችግሮቹን ማግዘፉ፣ ለመቆጣጠር የሚደረጉ ሀገራዊ ጥረቶችን ፈታኝ ማድረጉ የማይካድ ነው።
አሁናዊ በሆነው ዓለም አቀፋዊ እውነታ፣ እንዲህ አይነት ችግሮች ሲያጋጥሙ፤ እውነታውን እንደ መልካም አጋጣሚ በማየት በተጎጂዎች ለመቆመር የሚደረጉ ሙከራዎች የሰብአዊ እርዳታ ሥራዎችን መፈታተናቸውም አዲስ ክስተት አይደለም።
ጉዳዩን ከሰብአዊነት አውጥተው ፖለቲካ በማድረግ ከሕዝቦች ስቃይ አትራፊ መሆን የሚፈልጉ ኃይሎች መኖራቸው፤ በዚህም እርዳታ ጠባቂ ሰዎች ላልተገባ እንግልት እና ለከፋ አደጋ መጋለጣቸውም የተለመደ ከሆነም ቆይቷል።
ለዚህ ደግሞ የአሜሪካ ተራድኦ ድርጅትና ሌሎች ዓለም አቀፍ የእርዳታ ተቋማት በሀገሪቱ ለሚገኙ እርዳታ ፈላጊ ዜጎች የሚያደርጉትን ድጋፍ በማቋረጥ የፈጠሩትን ክፍተትና ክፍተቱ በተረጂዎች ላይ የፈጠረውን ጫና ማየት ይቻላል። በዚህም አላስፈላጊ ዋጋ ለመክፈል እየተገደዱ ያሉ ዜጎችን ማንሳት በቂ ነው።
በእርግጥ እርዳታ ፈላጊ ዜጎቻችን ከዓለም አቀፉ ማህበረሰብ ያለአንዳች ቅድመ ሁኔታ እርዳታ የማግኘት መብት አላቸው፤ ይህ መብታቸው ከሰብአዊነት፣ ከዓለም አቀፍ ህግና ከተቋማቱ ከራሳቸው የአሰራር ህግና መርህ የሚመነጭ ነው።
በችግር ውስጥ ያሉ ዜጎችን ሕይወት ለመታደግ መንግስት ካለበት ኃላፊነት አንጻር ከራሱ የመጠባበቂያ የምግብ ክምችት ወጪ በማድረግ በመጀመሪያው ዙር ለአራት ሚሊዮን ዜጎች ድጋፍ አድርጓል። 115 ሺህ ኩንታል ምግብ ነክ ድጋፍን ጨምሮ ከሁለት ሚሊየን ሊትር በላይ ዘይት በድጋፍ መልኩ ሰጥቷል።
መንግስት የውጭና የሀገር ውስጥ የእርዳታ ተቋማት ለተረጂዎች የሚያደርጉትን ድጋፍ ከማስተባበር ባለፈ በራሱ አቅም እያደረገ ያለው ድጋፍ፤ ዜጎችን ህይወት በመታደግ ተልእኮ ውስጥ እራሱን ግንባር ቀደም አድርጎ እየሰራ መሆኑን አመላካች ነው። በችግሩ ምክንያት የአንድም ዜጋ ህይወት እንዳይጠፋ ያለውን ቁርጠኝነት የሚያመላክት ነው።
ሕገ መንግስት ቁርጠኝነት በዓለም አቀፉ ኅብረተሰብ በአግባቡ ሊደገፍ ይገባል። በተለይም ባልተገባ መንገድ የእርዳታ አቅርቦቶችን ያቋረጡ ተቋማት ውሳኔያቸውን መልሰው በማጤን የመንግስትን ጥረት በመደገፍ የዜጎችን ሕይወት መታደግ ይጠበቅባቸዋል። ይህንን የማድረግ የሞራልና የህግ ተጠያቂነትም አለባቸው !
አዲስ ዘመን ነሐሴ 16/2015
