ሁለቱ የባህል ፋሽን አርበኞች

ኢትዮጵያ በፋሽን ኢንዱስትሪው በዓለም አቀፍ ደረጃ ተወዳዳሪ መሆን የምትችልበት ሰፊ እድል ነበራት። ነገር ግን ነገሩ በነበር ቀረና በአፍሪካ ደረጃ እንኳን ተወዳዳሪ መሆን ሳትችል ቀርታለች። ለዚህም ሁለት አበይት ምክንያቶች ይጠቀሳሉ። የመጀመሪያው ያለንን አገራዊ እምቅ ሀብት አለማወቃችን ነው። ያወቅነውን አለመጠቀማችን ደግሞ ሌላው ሲሆን የመጀመሪያውን ግንብ ደርምሰው የሚገቡ ቆራጥ ፊተኞች ባለመኖራቸው ነው። አሁን አሁን ግን ሁሉም ነገር እየተቀየረ የመጣ ይመስላል። በዘመናዊው የፋሽን ኢንዱስትሪ ሰቅዞ ከያዘን አባዜና ድንዛዜ ነቅተው የሚያነቁ የፋሽኑ ዓለም ጀግኖች ከየአቅጣጫው እየወጡ ወደ ውድድሩ ሜዳ መትመም ጀምረዋል። ከእነዚህም መካከል ስለ ሁለቱ የኢትዮጵያ የዘመናዊ ፋሽን የፊት ደጀን አርበኞች ጥቂት ነገር እንበል።

በፋሽን ኢንዱስትሪው ምንም ከማይታይበት ድንግዝግዝ ጨለማ በድፍረት ዘልቃ በመግባት በዓለም አቀፍ ደረጃ ተወዳዳሪ ለመሆን የበቃችውና የመጀመሪያዋ የኢትዮጵያ የዘመናዊ ፋሽን ድልድይ መሆን የቻለችው ጀግና አርበኛ ዲዛይነር ገነት ከበደ ናት። ከ30 ዓመታት በፊት ገነት ፓራዳይዝ የተሰኘውን ድርጅት መስርታ የኢትዮጵያን የባህል አልባሳት በዘመናዊ መንገድ እያዘጋጀች ለዓለም አቀፍ ገበያ ታቀርባለች። በዓለማችን ከፍተኛ ነዋይ በሚፈስበት የፋሽን ኢንዱስትሪ ውስጥም ተቀባይነትን ማግኘት ችላለች። በተለይ የምትታወቅበት ደግሞ በባህላዊ የሽመና ውጤቶች ዘመናዊ የሙሽራ እና የሚዜ አልባሳትን በመስራት ነው።

ኢትዮጵያዊቷ እውቅ ዲዛይነር ገነት ከበደ የፋሽን ጥበብን በጣሊያን እና አርጀንቲና ተምራ ወደ አገሯ ትመለስ እንጂ፣ ለፋሽን እና ለዲዛይን ጥበብ ያላት ፍቅር የሚጀምረው ገና ከልጅነቷ ነው። በአሁኑ ሰዓትም ገነት ፋሽን በሚል ስያሜ የሚታወቁ የተለያዩ በባህላዊ ጨርቆች የተሰሩ አልባሳት በገበያ ላይ ይገኛሉ። የሽመና ጨርቆች በዘመናዊ መልክ በስፋት እንዲመረቱ እና ለገበያ እንዲቀርቡ የማድረግ ሂደቱ ተጀመረ እንጂ ገና ምኑም አልተነካም በማለትም ትናገራለች። በዚህ ዘርፍ ውስጥ እሷና እሷን መሰል ጥቂት ዲዛይነሮች ብቻ የኢትዮጵያን የፋሽን ኢንዱስትሪ ለማሳደግ በቂ እንዳልሆኑ የምታምነው ገነት፣ ያላትን እውቀትና ልምድ ለሌሎች ለማካፈል የማሰልጠኛ ትምህርት ቤት የመክፈት ትልቅ ህልም አላት። ስራዎቿን እና በዘርፉ ያበረከተችውን አስተዋፅኦ የሚዘክር ታላቅ የፋሽንና የሙዚቃ ትርዒት በየጊዜው ይዘጋጃል። ከዚህ የፋሽን ትርዒት የሚሰበሰበው ገቢም በካንሰር በሽታ ለተጠቁ ህፃናት ህክምና ይውላል።

ሌላኛዋና የኢትዮጵያ የዘመናዊ ፋሽን የፊት ደጀን አርበኛ ደግሞ የዊን ፒስ መስራቿ ሞዴልና ዲዛይነር ሰናይት ማሪዎ ናት። ደከመኝ ሰለቸኝ ሳትልም በትጋትና ጥረት የፋሽን ኢንዱስትሪው አንድ እርምጃ ወደፊት እንዲሄድ አድርጋዋለች። ዊን ፒስ የተሰኘውን ድርጅት በማቋቋም የኢትዮጵያን የባህል አልባሳት በዓለም አቀፍ ደረጃ ተወዳዳሪ የማድረግ ራዕይ ሰንቃ በአሁኑ ወቅት በገበያ ላይ በመንቀሳቀስ ትታወቃለች። ሞዴልና ዲዛይነር ሰናይት እንዴት ወደዚህ ሙያ እንደገባች ስትናገርም “በአንድ ወቅት ጣሊያን አገር ነበርኩኝ፣ በዚያ ሰዓት ሙያውና እውቀቱ እንዳለኝ ባስብም በትንሹ ከመሞካከር ውጭ እዚህ ደረጃ ላይ ግን እደርሳለሁ ብዬ አንድም ቀን አስቤ አላውቅም ነበር። ታዲያ ሁል ጊዜ በጣሊያን ጎዳናዎችና በሄድኩባቸው ቦታዎች ሁሉ አለባበሴን፣ ቁመቴን፣ እንዲሁም የሀበሻ መልኬን የተመለከቱ ሞዴል ነሻ?…ግን ለምን ሞዴል አትሆኚም?… የሚሉኝ ሰዎች በዙ። እኔም ያለኝን ነገር ትልቅ ደረጃ ላይ ማድረስ እንደምችል አመንኩ።” በማለት ትገልጻለች።

ገና ወደስራው ሳትገባ በሰዎች ዘንድ ተቀባይነትና የሞዴልነትን ማዕረግ ያገኘችው ሰናይት፣ ጊዜዋን ሳታባክን ወዲያው ወደ ሞዴሊንግ ሙያ ገባች። ለተወሰኑ ዓመታትም ስኬታማ ሊባል በሚችል መልኩ በዚያው ሙያ ቆይታ ከዚያም ወደ ዘመናዊ የፋሽን ኢንዱስትሪ በዲዛይነርነት ተቀላቀለች። ሁለቱም ሙያዎች ተያያዥ ቢሆኑም ወደ ሁለተኛው ሙያ እንድታደላ ያደረጋት አንድ ጉዳይ ገጥሟት ነበር። በወቅቱ ሰናይት የልጅ እናት ሆነችና ለተወሰኑ ጊዜያት ከሞዴሊንጉ በመራቋ የሰውነት ቅርጿም ከሞዴልነት ዓለም ቀስ በቀስ እያሸሻት እንደሆነ ተመለከተች። ወደ ፋሽን ዲዛይነርነት ብትገባ ስኬታማ መሆን እንደምትችል ስለተረዳችም ከሞዴልነት ወደ ፋሽን ዲዛይነርነት ቀየረች። ሌላው እንደ ምክንያትነት የምታነሳው ሞዴል በነበረችበት ወቅት ኬንያ፣ ናይጄሪያ፣ ጋናና ሌሎችም የአፍሪካ አገራት የባህል አልባሳቶቻቸውን ለዓለም ገበያ ሲያቀርቡ ትመለከት ስለነበረ ኢትዮጵያስ ከእነርሱ የተሻለ አገራዊ ሀብት እያላት በፋሽን ኢንዱስትሪው ለምን የበታች ሆነች? የሚል ቁጭት በውስጧ ማደሩን ትናገራለች።

አብዛኛዎቹ የአፍሪካ አገራት የባህል አልባሳቶ ቻቸውን ሰርተው ለዓለም ገበያ ለማቅረብ ጥሬ እቃውን የሚወስዱት ደግሞ ከኢትዮጵያ ነበር። ይባስ ብሎም መልሰው የሚሸጡት ለእኛው ነው። ይህም መንፈሳዊ ቅናት ስላሳደረባት አይኗን ሳታሽ በቀጥታ ወደሙያው ገባችበት። በአንድ ወቅት አንድ ልብስ ነጮቹ ለብሰውት ሲታዩ በማህበራዊ ሚዲያዎች ብዙዎች እየተቀባበሉም በአድናቆት ብዙ ነገር ብለውለታል። በነጮች ስላዩትም የጀርመን ባንዲራ የሚመስላቸውም ነበሩ። ነገር ግን ልብሱ ከወላይታ ‘ድንጉዛ’ የተሰራ፣ ፈጠራውም የዲዛይነሯ ሰናይት የመጀመሪያ ስራ ነበር።

ዊን ፒስ ፋሽንን ለመመስረት አቅሙን ያገኘችውም ከዚህ በኋላ ነበር። በፈጠራዎች የተካነችው ዲዛይነሯ ከእንሰት በአልኮል ታጥበው ከድንች ጋር በመቀላቀል በርካታ ስራዎችን መስራት ችላለች። በአሁኑ ሰዓትም የተለያዩ የአገር አልባሳትን በመስራት ለዓለም አቀፍ ገበያ ታቀርባለች። ፓሪስ፣ ሚላን፣ ኒውዮርክ፣ ከአፍሪካ ደግሞ ጋና፣ ደቡብ አፍሪካ፣ ናይጄሪያን ጨምሮ በተለያዩ አገራት በመዘዋወር ስራዎቿን ለማሳየት በቅታለች። በምታደርገው እንቅስቃሴም በናይጄሪያ፣ ጋና፣ አሜሪካና በኢትዮጵያ አቢሲኒያ አዋርድ ላይ የተለያዩ ሽልማቶችን አግኝታለች፡፡ የእነዚህ የዘመናዊው ፋሽን የፊት ደጀን፣ ጀግና አርበኞች አገራችን ኢትዮጵያ በባህላዊው የፋሽን ዓለም የነበራትን ሉአላዊነት ለማስጠበቅ ይታገላሉ። እኛም የእነርሱን አርአያነት እንከተል። ሰጪዎች እንጂ ተቀባዮች እንዳንሆንም፣ ለአገራችን የፋሽን ኩራት ዋልታ እንቁም።

ሙሉጌታ ብርሃኑ

አዲስ ዘመን ሰኞ የካቲት 20 ቀን 2015 ዓ.ም