የአውሮፓ ኅብረት በአሜሪካ ላይ የሚጥለውን የአፀፋ የንግድ ታሪፍ አዘገየ

የአውሮፓ ኅብረት ከአሜሪካ በሚገቡ ምርቶች ላይ የአፀፋ ታሪፍ ለመጣል የነበረውን ዕቅድ እንደገና ማዘግየቱን የአውሮፓ ኅብረት ኮሚሽን ፕሬዚዳንት ኡርሱላ ፎን ደር ሊየን አስታወቁ። ቢቢሲ እንደዘገበው፤ ዛሬ ሊጀመር ታቅዶ የነበረው የአፀፋ የንግድ ታሪፍ ርምጃ የአሜሪካው ፕሬዚዳንት ዶናልድ ትራምፕ በብረት እና በአሉሚኒየም ምርቶች ላይ ለጣሉት ታሪፍ ምላሽ ለመስጠት ያለመ ነበር።

የአውሮፓ ኅብረት፤ 21 ቢሊዮን ዩሮ በሚያወጡ የአሜሪካ ሸቀጦች ላይ ለመጣል ያቀደው የአፀፋ ታሪፍ ለመጀመሪያ ጊዜ የታገደው መጋቢት ላይ ነበር። ይህ መዘግየት እስከ ነሐሴ መጀመሪያ ድረስ ተራዝሟል ሲሉ ቮን ደር ሊየን በሰጡት ጋዜጣዊ መግለጫቸው ላይ ተናግረዋል።

ይህ የሆነው ትራምፕ ከነሐሴ አንድ ቀን ጀምሮ በአውሮፓ ኅብረት ምርቶች ላይ የ30 በመቶ ታሪፍ ለመጣል ማቀዳቸውን ለቮን ደር ሊየን በደብዳቤ ካሳወቁ በኋላ ነው። የንግድ አጋሮቹ በአሜሪካ ምርቶች ላይ የአፀፋ ታሪፍ የሚጥሉ ከሆነ የሚቀመጥባቸውን የታሪፍ መጠን ከ30 በመቶ በላይ ከፍ እንደሚያደርጉት አስጠንቅቀዋል። ትራምፕ ከ‹‹ፎክስ ኒውስ›› ጋር ባደረጉት ቃለ ምልልስ፤ ‹‹አንዳንድ ሀገራት አሁን በጣም ተበሳጭተዋል፤ ነገር ግን ታሪፉ በመቶ ቢሊዮን የሚቆጠር ዶላር እያስገኘ ነው›› ብለዋል።

ቮን ደር ሊየን ‹‹ዩናይትድ ስቴትስ በድርድር መፍትሔ እስካልተገኘ ድረስ ተግባራዊ ሊሆኑ የሚችሉ ርምጃዎችን የያዘ ደብዳቤ ልካለች። ስለሆነም የአፀፋ ርምጃዎቻችንን እስከ ነሐሴ መጀመሪያ ድረስ እናራዝማለን። በተመሳሳይ ጊዜ፣ እኛ ሙሉ በሙሉ ዝግጁ እንድንሆን ለመከላከያ ርምጃዎች መዘጋጀታችንን እንቀጥላለን›› በማለት ለጋዜጠኞች ተናግረዋል፡፡ ከእዚህ በተጨማሪም ‹‹የአውሮፓ ኅብረት የድርድር መፍትሔን እንደሚመርጥ ሁልጊዜ ግልፅ ነው፡፡ ይህ አሁንም እንደቀጠለ ነው፤ ስለዚህ እስከ ነሐሴ አንድ ቀን ድረስ ያለንን ጊዜ እንጠቀማለን›› ብለዋል፡፡

በሌላ በኩል የአውሮፓ ኅብረት አባል ሀገራት የንግድ ሚኒስትሮች በብራሰልስ ተገናኝተው ከዋሽንግተን ጋር በሚኖራቸው ድርድር ምን ዓይነት ጠንካራ አቋም እንደሚይዙና ምላሽ በሚሰጡበት ሁኔታ ላይ መክረዋል።

የጀርመኑ የገንዘብ ሚኒስትር ላርስ ክሊንግቤል ‹‹ከአሜሪካ ጋር ኮስተር ያለ እና መፍትሔን ያማከለ ድርድር አሁንም አስፈላጊ ነው። ይህ ካልተሳካ ግን የአውሮፓ ኅብረት በአውሮፓ ውስጥ የሚገኙ ሥራዎችን እና ንግዶችን ለማስጠበቅ ወሳኝ የመከላከያ ርምጃዎችን መውሰድ ያስፈልገዋል፡፡ እጃችን የተዘረጋ ቢሆንም የሰጡንን ሁሉ አንቀበልም›› በማለት ለአንድ ዕለታዊ ጋዜጣ ተናግረዋል።

የእርሳቸው አስተያየት የተሰማው ቅዳሜ ዕለት የፈረንሳዩ ፕሬዚዳንት ኢማኑኤል ማክሮን የአውሮፓ ኅብረት አባል ሀገራትን ወክሎ የሚደራደረው የአውሮፓ ኮሚሽን የአውሮፓን ጥቅም በቆራጥነት እንዲያስጠብቅ ማሳሰባቸውን ተከትሎ ነው። ካለፈው ቅዳሜ ጀምሮ የፕሬዚዳንት ዶናልድ ትራምፕ አስተዳደር 27 ሀገራትን ባቀፈው በአውሮፓ ኅብረት ላይ የታሪፍ ቅድመ ሁኔታዎችን አስቀምጧል።

የዋይት ሐውስ የንግድ አማካሪ ፒተር ናቫሮ ባለፈው ሚያዚያ ‹‹90 ስምምነቶችን በ90 ቀናት›› የሚል ግብ አስቀምጠው ነበር። እስካሁን ድረስ ፕሬዚዳንቱ ከዩናይትድ ኪንግደም እና ከቬትናም ጋር ስምምነት ላይ የደረሱ ሲሆን ከሌሎች ሀገራትም ጋር ድርድራቸውን ቀጥለዋል።

በጋዜጣው ሪፖርተር

አዲስ ዘመን ማክሰኞ ሐምሌ 8 ቀን 2017 ዓ.ም