አረንጓዴ አሻራ ለትውልዶች

ወደ ተነሳሁበት ርዕሰ ጉዳይ ከመግባቴ በፊት ሰሞኑን በኦሮሚያና በቤኒሻንጉል ጉሙዝ ክልሎች በንጹሐን ወገኖቻችን ላይ በተፈጸመ ዘግናኝ ጭፍጨፋ የተሰማኝን መሪርና ጥልቅ ኀዘን እየገለጽሁ ለተጎጂ ወገኖቼም መጽናናትን እመኛለሁ። ወንጀለኞችም ታድነው ለሕግ እንዲቀርቡ እንደ አንድ ዜጋ እጠይቃለሁ። በምንም ሁኔታ ውስጥ ተሁኖ ሕይወት እንደትናንቱ ይቀጥላልና ወደ መጣጥፌ ተመለስሁ።

አረንጓዴ አሻራ ለትውልዶች የሚተላለፍ አረንጓዴ ችቦ ነው። ትውልዶች ተቀባብለው ካላስቀጠሉት ውጤታማ ሊሆን አይችልም። ትውልዶች አሻራውን እንዲያስቀጥሉ በሥርዓተ ትምህርቱ የተካተተ ዕውቀትን እንዲገበዩ ሊመቻችላቸው ይገባል። ከ1ኛ ደረጃ እስከ ከፍተኛ የትምህርት ተቋማት የአረንጓዴ አሻራ ክበባት ሊበረታቱና ሊቋቋሙ ግድ ይላል። ብዙኃን መገናኛዎችም ከአካባቢ ጥበቃና ከአረንጓዴ አሻራ ጋር ተያይዞ አርዓያነት ያላቸውን ግለሰቦችና ተቋማትም ማስተዋወቅ ይጠበቅባቸዋል። በዚህ መጣጥፌ የአካባቢ ጥበቃ ተቆርቋሪና ቃፊር የሆነችን ብላቴና ዳግም አስተዋውቃለሁ።

ዓለምአቀፉ የሰላም ፣ የእርቅ ፣ የሽምግልናና የግልግል ረቡኒ/ መምህር / ፕሮፌሰር ሕዝቅያስ አሰፋ ዘላቂ ሰላም እውን እንዲሆን ሰው በመጀመሪያ ከፈጣሪ ጋር ከዚያ ከራሱ ጋር በማስከተል ከተፈጥሮ ጋር ሰላም ፣ እርቅ ማውረድ አለበት ይላሉ ። ከተፈጥሮ ጋር ሰላም ለመፍጠር የሰው ልጅ ተፈጥሮን እንዳይኑ ብሌን መንከባከብ ይጠበቅበታል። ከዚህ ጎን ለጎን የሰውን ልጅ ከተፈጥሮ ጋር የሚያሸማግሉ፣ የሚያስታርቁ የኖቤል የሰላም ተሸላሚ የሆኑትን የአካባቢ ጥበቃ ተሟጋች ኬንያዊቷን ዋንጋሪ ማታይ ፣ ክቡር ጠቅላይ ሚኒስትርን ማንሳት ይቻላል። የዛሬ መጣጥፌ ትኩረት የልጅ አዋቂዋ ስዊድናዊ ብላቴና ናት ።

በዚህም ሆነ በዚያኛው ዓለም ገና በልጅነታቸው በሰው ልጅ ሕይወት ላይ አርዓያነት ያለው ተግባር በመፈፀም አሻራቸውን ያኖሩ እንደማላላ ዩሱፍ ፣ ግሬታ ተንበርግና እዮስያስ ያሉ እልፍ አእላፍ ብላቴናዎች አሉ። እንዲሁም ታዳጊዋን አቀንቃኝ ሎርዴን ፣ ተአምረኛዋን አትሌት ሲሞን ባይልስን ፣ የሆንግኮንጉ የጃንጥላ አብዮት ምልክትና ፊት አውራሪ ጆሹዋ ማንሳት ይቻላል ።

የዛሬው ትኩረቴ የእናት ምድር ጠበቃ ስለሆነችውና ከልጅ እስከ አዋቂ ፣ ከሊቅ እስከ ደቂቅ ፣ ከአገር መሪ እስከ ተራው ዜጋ ፣ ከትምህርት ቤት የአካባቢ ጥበቃ ክበብ እስከ የተባበሩት መንግሥታት ድርጅት በአጠቃላይ ከአፅናፍ እስከ አፅናፍ ስለ የአየር ንብረት ለውጥ ዓለምአቀፍ ንቅናቄን ስለ አቀጣጠለችው፤ የኖቤል የሰላም አሸናፊ ዕጩ ፤ የተወዳጁ TIME መፅሔት የ2019 ዓ.ም የአመቱ ሰው ተብላ ስለተመረጠችው ስዊድናዊት ብላቴና ግሬታ ተንበርግ ነው ።

ተንበርግ የአየር ንብረት ለውጥ ተሟጋችነት እንቅስቃሴዋን አሀዱ ብላ የጀመረች በወርሀ ነሐሴ እንደ አውሮፓውያን አቆጣጠር በ2018 ከስዊድን ፓርላማ ፊት ለፊት ድንኳኗን ደንኩና በስዊድንኛ በነጭ ሰሌዳ ላይ በጥቁር የተጻፈ «ለአካባቢ ጥበቃ ትምህርት እናቁም » የሚል መፈክር በማንገብ ነው ። አመት ከመንፈቅ ባልሞላ ጊዜ ዝናዋ በዓለም ተናኘ ። በመንግሥታቱ ድርጅት ተገኝታ ስለ አየር ንብረት ጥበቃ አስፈላጊነት እና ስለ ዓለም ሙቀት መጨመር ለአገራት መሪዎች በአግራሞት እጅን በአፍ የሚያስጭን ንግግር አደረገች። ወዲያው ከካቶሊካዊት ቤተ ክርስቲያን ሊቀ ጳጳስ ጋር ተገናኘች።

የዓለም ሙቀት መጨመርን ከሴራ ኀልዮት ጋር የሚያዛንቁትን የቀድሞው የአሜሪካ ፕሬዚዳንት ትራምፕን ስማቸውን ሳትጠራ በአሽሙር ጎሸም አደረገቻቸው። በሰው ልጅ ታሪክ ወደር ያልተገኘለትንና 4 ሚሊዮን ተማሪዎችን ትምህርት አዘግቶ ለዓለም የአየር ንብረት መዛባት ተገቢው ትኩረት እንዲሰጥ ጥሪ የሚያስተላልፍ ሰልፍ በመስከረም 20 ቀን ፣ 2019 ዓ.ም በተመሳሳይ ጊዜ በምዕራባውያን ከተሞች ተካሄደ። ከዚያማ ምስሏ በአውሮፓና አሜሪካ ከተሞች በየሕንፃው ግድግዳና ጣራ በትላልቅ እስክሪኖች ተለቀቀ ሕፃናት በጥቅምት መጨረሻ አስፈሪ ጭምብል አድርገው በሚያከብሩት በዓል Halloween ሳይቀር ምስሏ ማድመቂያ ሆነ ። ኮሊንስ የተሰኘው የእንግሊዝኛ መዝገበ ቃላት የተንበርግን “ climate strike “ / አድማ ለየአየር ንብረት/ የሚለውን ሀረግ የአመቱ ምርጥ ሀረግ ብሎ እስከ መሰየም ደረሰ።

ታይም መጽሔት የ2019 ዓ.ም « የአመቱ ሰው » በሚል በፊቱ ገፁ ላይ ይዟት ወጣ። የመፅሔቱ ጋዜጠኞች እነ ቻርሎቴ አልተር ፣ ሱይን ሀይኔስ እና ጀስቲን ወርላንድ በጋራ ባጠናቀሩት የተንበርግ ዘካሪ ጽሑፍ ፤ የአየር ንብረት ጉዳይ ምንም እንኳ ውስብስብና አሳሳቢ ቢሆንም ታዳጊዋ ግን የአመለካከት ለውጥ በማምጣት ውጤታማ እየሆነች ነው። ዓለምአቀፋዊ ንቅናቄ በመፍጠር አዲስ አተያይ መፍጠር ችላለች። የልጅ አዋቂዋ ከከንቲባ እስከ አገር መሪዎች ስለ አየር ንብረት ግድ እንዲላቸው ተፅዕኖ መፍጠር ችላለች።

የእንግሊዝ የፓርላማ አባላትን ካነጋገረችና ከእንግሊዝ የአየር ንብረት ተሟጋቾች ጋር አደባባይ ሰልፍ በወጣች ማግስት እንግሊዝ የካርቦን ልቀትን ለመቀነስ የሚያስገድድ ሕግ አፅደቀች። የተንበርግ ሌላው የትኩረት አቅጣጫ የየአገሪቱ ተሟጋቾች ለአመታት የወተወቱት የአየር ንብረት ጉዳይ ከሌሎች አንገብጋቢ ማህበራዊ፣ ኢኮኖሚያዊና ፖለቲካዊ ጉዳዮች እኩል ትኩረት እንዲሰጠው ግፊት ማድረግ ነው ። ይህ የብላቴናዋ ጥረት ከዓለም ሙቀትና ከባሕር መጠን መጨመር፣ ከጎርፍ ፣ ከሀሪካን ፣ ከሰደድ እሳት።

በዚያ ሰሞን በዓለምአቀፍ የቴሌቪዥን ኔትወርኮች እንደተመለከተው በአውስትራሊያ የተከሰተው ሰደድ እሳት ዓለማችን በታሪኳ አይታው የማያውቅ ሲሆን ወደ 18 ሚሊዮን ሄክታር መሬት ( ኮስታሪካን የሚያህል) የሚጠጋ ደን ወድሟል። የእሳት አደጋ ሠራተኞችን ጨምሮ 12 ሰዎች ሞተዋል። በሚሊዮኖች የሚቆጠሩ የዱር እንስሳት ሞተዋል። እርሻዎች ፣ መኖሪያ ቤቶች በሰደድ እሳቱ ወድመዋል። ቁጥራቸው ቀላል ያልሆኑ ቤተሰቦች ከቀዬ፣ ከቤት ንብረታቸው ተፈናቅለዋል። ከዚህ በላይ ቃጠሎው የከባቢ አየር ሙቀት እንዲጨምር ከማድረጉ ባሻገር ከፍተኛ የአየር ብክለት አስከትሏል።

የሰደድ እሳቱ ስለቀጠለ የጉዳቱ መጠን በየቀኑ ይጨምራል። ጠቢቡ ሰለሞን ለሁሉም ጊዜ አለው እንዳለው የታዳጊዋ ጩኸት እንደ አውስትራሊያ ካለ የአየር ንብረት ቀውስ ጋር አብሮ ዓለም ጆሮውን አዝንብሎ እንዲሰማት መልካም አጋጣሚ ፈጥሯል ። ለዚህ ይመስላል የቀድሞው የአሜሪካ ምክትል ፕሬዚዳንት ፣ የኖቤል የሰላም አሸናፊና የአየር ንብረት ተሟጋች አል ጎር «ያለንበት ጊዜ ለአየር ንብረት ተሟጋችነት የተመቸ ይመስላል ፤ » ያሉት ።

የዝክረ ተንበርግ የTIME ፀሐፍት ሰፊ ዘገባ በመቀጠል፤ ብላቴናዋ ዕድሜዋ 16 ሲሆን ሲያይዋት ግን ገፅታዋ በአራት አመት ቀንሶ የ12 አመት ሕፃን እንደምትመስል፤ ከኦቲዝም ቤተሰብ የሚመደብ አዝፔርገር ሲንደረም ታማሚ (ሰው በተሰበሰበበት ስፍራ መገኘት ምቾት የሚነሳት ፤ ) መሆኗን ፤ ስለ ባህር ከፍታ መጨመርና ይህን ተከትሎ በሚከተል የባህር ዳርቻ ከተሞች በውሃ መጥለቅለቅና በሚሊዮኖች የሚቆጠሩ ሰዎች ከቤት ንብረታቸው ሊፈናቀሉ ይችላሉ ብላ ሌት ተቀን የምትጨነቅ መሆኑን ያወሳሉ ።

« ነገ እንደሌለ ለዛሬ ብቻ የምንኖረውን የሕይወት ዘይቤ መቀየር አለበን። ምክንያቱም ነገ አለ ።» አዎ ! ብላቴናዋ እንዳሳሰበችው ለመጪው ትውልድ የወደመ ደን፣ የተራቆተ መሬት፣ በርሀማ አገር ፣ ውሃቸው የነጠፈ ምንጮችና ወንዞች ልናወርሰው አይገባም ። በአገራችን ከረፈደ ቢሆንም እየተሠሩ ያሉ የአፈርና ውሃ ጥበቃ ሥራዎች ይበል የሚያሰኙ ናቸው። በአገራችን የተፈጥሮ ጥበቃ ታሪክ የመጀመሪያ የሆነውና በክቡር ጠቅላይ ሚኒስትር ፊት አውራሪነት የተመራው የ« አረንጓዴ አሻራ » አገራዊ ንቅናቄ ይሄን አመት ጨምሮ ከ20 ቢሊዮን በላይ አገር በቀል ችግኞችን ይተክላል።

ይህ ለነገው ትውልድ ጭምር ለምለም፣ ነፋሻ ፣ ምንጮች የሚንፎለፎሉባት፣ ወንዞች የሚገማሸሩባት ፣ ወዘተ. አገር ለማቆየት ያስችላል ። አይደለም የዛሬ ብላቴናዎችና ወጣቶች እኔ እንኳን ዝግባ ፣ ቀረሮን ፣ ኮሶን በቅጡ ለይቼ አላውቃቸውም ። ደደብ ስለሆንሁ አይደለም ። ያ ራስ ወዳድ ስስታም የእኔ ቀደምት ትውልድ ዛሬን ፣ እኔን ቀድሞ አስቦ ስላላቆየኝ እንጂ። ይሄ ትውልድ ከመሰል ተወቃሽነት ተከሳሽነት ለመዳን ኃላፊነቱን መወጣት አለበት። ተንበርግ የዛሬውን ትውልድ በ74ኛው የተመድ ጠቅላላ የአየር ንብረት ለውጥ ጉባኤ እንዲህ እንደወቀሰችው « …የሰው ልጅ ገንዘቡን ከማሳደድና ስለዘላለማዊ ምጣኔ ሀብት እድገት እንጂ ስለአየር ንብረት ለውጥ ግድ አይለውም ። የአካባቢ የአየር ንብረት ለውጥን ለመግታት ጠንካራ እርምጃ መውሰድ አልቻለም ። ‘ እኔ እዚህ መምጣት አልነበረብኝም ። ከውቅያኖስ አጠገብ ወደ ሚገኘው ት/ቤት መሄድ ነበረብኝ። ይህ ስህተት ነው። በባዶ ቃላት ህልሜን ፣ ልጅነቴን ቀምቶኛል ።… ‘ »

አገራት የካርቦን ልቀትን ለመቀነስ ካልተስማሙ ከየኢንዱስትሪ አብዮት ወዲህ የከባቢ አየር ሙቀት በ1 ነጥብ 5 ዲግሪ ሴንትግሬድ ይጨምር ይሆናል ሲል ስጋቱን ያጋራው የTIME ዘገባ እስከ አውሮፓውያኑ 2030 ዓ.ም 350 ሚሊዮን ሕዝብ ለድርቅ ፣ 120 ሚሊዮን ሕዝብ ለከፋ ድህነት ሊጋለጥ ይችላል ሲል አበክሮ ያስጠነቅቃል። የዓለም ሙቀት በሽርፍራፊ ሴንትግሬዶች በጨመረ ቁጥር የአየር ንብረት ለውጡ እየተባባሰ ይሄዳል። ይህ ፍርሀትን ለማንገስ ሳይሆን በሳይንቲስቶች የተረጋገጠ ጥሬ ሀቅ ነው። የአካባቢ ጥበቃ ተሟጋቾች፣ የዘርፉ ተመራማሪዎች ላለፉት አስርት አመታት ፖለቲከኞች ለአሳሳቢው የአየር ንብረት መዛባት ፖለቲከኞች ትኩረት እንዲሰጡት ነጋ ጠባ ቢወተውቱም ሰሚ ሳያገኙ ቆይተዋል።

ያልተጠበቀችው ብላቴና የአየር ንብረት መዛባት፣ የአካባቢ ጥበቃ ጉዳይና የዓለም ሙቀት መጨመር በመሪዎች ዘንድ ትኩረት እንዲያገኝ የአንበሳውን ድርሻ ተወጥታለች ። አሁን አሁን የአየር ንብረት መዛባት ጉዳይ በተነሳ ቁጥር ቀድሞ የሚነሳው የብላቴናዋ ስም ነው ። ይህ በአጋጣሚ አልያም በሚዲያውም ሆነ በፖለቲከኞች መልካም ፈቃድ አይደለም። በተንበርግ ደፋር ውሳኔና አርቆ አሳቢ እርምጃዎች እንጂ። ባለፈው ጥር በዳቮስ በተካሄደ ኢኮኖሚክ ፎረም ለታላላቅ ኩባንያዎች ዋና ሥራ አስፈጻሚዎችና ለአገራት መሪዎች ያለምንም ማቅማማትና ፍርሀት የተናገረችው ለዚህ ጥሩ አብነት ነው። «እንድትደናገጡ፣ እንድትረበሹ እፈልጋለሁ። በየቀኑ የሚሰማኝ ፍርሀት እናንተንም እንዲሰማችሁ እሻለሁ። ይህን ተከትሎ ኃላፊነትን እንድትወስዱ እጠይቃለሁ ።» ለዚህ ነው ተንበርግ ለአየር ንብረት ለውጥ ብቻ ሳይሆን ለአሜሪካ የጦር መሣሪያ ቁጥጥር ተሟጋች ወጣቶች ለሆንግኮንክ የዴሞክራሲ ወትዋቾች ብላቴናዎች ሁሉ ያልዩነት ምልክት ልትሆን የቻለችው ሲል TIME ያትታል።

ዛሬ የብላቴናዋን ጥሪ ወሰን ፣ ዘር ፣ ቀለም ፣ ሃይማኖት፣ የኑሮ ደረጃ ፣ አድማስ አይበግረውም ከአፅናፍ አፅናፍ ናኝቷል። ዓለምአቀፉ የሰብዓዊ መብት ተሟጋቹ አምነስቲ ኢንተርናሽናል በዚያ ሰሞን ባካሄደው የዳሰሳ ጥናት ፤ «… በ22 አገራት የሚገኙ ወጣቶች የአየር ንብረት ለውጥ ከሁሉም ነገር በላይ እንደሚያስጨንቃቸው አረጋግጠዋል። »

ምስጋና ለብላቴናዋ ይሁንና የአውሮፓ ሕብረት ከአዲሱ አመት ጀምሮ የአየር ንብረትን ለመከላከል በሚያመነቱ ዳተኛ በሆኑ አገራት ላይ ታክስ መጣል እንደሚጀምር ይፋ አድርጓል። ተንበርግን አርዓያ በማድረግ በየአገራቱ የሚካሄዱ የብላቴናዎች ተቃውሞ ተቋማትን ብቻ ሳይሆን ለአገራቱ መሪዎችም እንደ ማንቂያ ደወል እየሆነ ነው ። የፈረንሳዩ ፕሬዚዳንት ኢማኑየል ማክሮን ለዚህ ጥሩ ማሳያ ናቸው ይላል TIME መፅሔት « ወጣቶች በየሳምንቱ የሚያካሂዱትን የተቃውሞ ሰልፎችን እየተመለከትህ ገለልተኛ መሆን አትችልም ። እንድለወጥ ረድተውኛል ። » ብለዋል። « ዓለምን የማየው እንደወረደ በነጭና በጥቁሩ ነው ። መመቻመች አልፈልግም። እንደሌሎች ሕፃናት ብሆን ይህን ቀውስ ልረዳው አልችልም ነበር ። » የምትለው ተንበርግ ራሷን እንደ ሕፃን አታይም። ስለትምህርት ቤቷ በተጠየቀች ጊዜ የሰጠችው መልስ ለዚህ ዋቢ ነው ። « ሕፃናት በጣም ጩኸታም ናቸው ።» በእሷ ቤት እሷ ሕፃን አይደለችም ።

እንደ መውጫ

ብላቴናዋን ለዓለም ያበረከቱት ወላጆቿ ፣ ትምህርት ቤቷ፣ ማህበረሰቡ በመጨረሻም አገረ ስዊድን ናት ። መምህሯ ከክፈለ ጊዜው በአንዱ ተማሪዎቹን የአየር ንብረት መዛባት የበረዶ ግግሩን እያቀለጠ፣ የባህር ከፍታን እየጨመረ በባህር ዳርቻ ያሉ ሰዎችንና ከተማዎችን በውሃ እያጥለቀለቀ፣ የዓለም ሙቀትን እየጨመረ ፣ ሰደድ እሳትን አየቀሰቀሰ እንደ ሆኑ ለተማሪዎቹ ሲገልፅ ለእውቀት ለፈተና እያዘጋጃቸው እንጂ ከመካከላቸው ነገ ተነስታ / ቶ የአየር ንብረት ጥበቃ ተሟጋች ትሆናለች / ይሆናል ብሎ በህልሙም ሆነ በእውኑ አላሰበውም። ተንበርግ ግን ከዚያች ቀን ጀምሮ ስለ አየር ንብረት ተጨናቂ ፣ ተብሰክሳኪ ፣ አንሰላሳሊ ከመሆኗ ባሻገር አጠቃላይ ሕይወቷ ተወሰደ። ተቀየረ። ለድብርትና ለጭንቀት ተዳረገች ። ክፍሏን ዘግታ ብቸዋን መሆን መረጠች ። ምግብ ቀነሰች ፣ ከሰውነት ጎዳና ወጣች ።

በዚህም ወላጆቿ ተጨነቁ ። ተጠበቡ ። በመጨረሻም ከዚህ በፊት ግድ የማይሰጣቸውን የአየር ንብረት ለውጥ ጉዳይ መመራመር ፣ መጠየቅ ፣ ማንሰላሰል ጀመሩ ። በመጨረሻም የልጃቸውን መንገድ ተቀላቀሉ ። ስጋ መመገብ አቆሙ ። የኃይል ምንጮቻቸውን ሁሉ በታዳሽ ኃይል ተኩ ። የፀሐይ ኃይል solar energy ተጠቃሚ ሆኑ ። በየሄደችበት መሄድ ፣ በምትሰለፍበት መሰለፍ ጀመሩ ። የተንበርግ ተፈጥሮ ከእኩዯቿ የተለየ ቢሆንም መልካም ዘር በመዝራት ፣ የተማሪዎቻቸውን መጻኢ ዕድል በበጎ በመወሰን ረገድ መምህራን ትልቅ ድርሻ አላቸው ። ወላጆች ለልጆቻቸው አላማ መሳካት ምን ያህል እርቀት እንደሚሄዱና የትኛውንም መስዋዕትነት ለመክፈል ዝግጁ እንደሆኑ በተንበርግ እናትና አባት ተመልክተናል። በዛሬዋ የዓለማችን አብሪ ኮከብ ተንበረግ ስሪት ውስጥ የእነዚህ ሁሉ አሻራ ይታያል። በዓለማችን ተፅዕኖ ፈጣሪ የሆኑ ሕፃናት ስሪትም ከዚህ የተለየ አይደለም።

ከቅርብ ጊዜ ወዲህ ወላጆች ፣ መምህራን ፣ ማህበረሰቡ፣ መንግሥት ፣ አገር በተወሰነ ደረጃ ስለሕፃናት ያላቸው አመለካከት እየተሻሻለ እየተለወጠ ቢሆንም ገና ብዙ ይቀረናል። አስተዳደጋቸው ፣ የትምህርት ሥርዓቱ ፣ የዕምነት ተቋማት በራሳቸው የሚተማመኑ ፣ ራሳቸውን ችለው የሚቆሙ ፣ ርዕይ ሰንቀው የሚያድጉ ሕፃናትን አንጾ ማሳደግ ላይ ወጥ የሆነ ጥረት እያደረጉ ነው ብሎ አፍን ሞልቶ መናገር ይቸግራል። በተለይ በገጠሩ የአገራችን ክፍል የልጆች አስተዳደግና ትምህርት ዛሬም ሕፃናትን ማነፅ መቅረፅ ላይ ብዙ ይቀረዋል ። አጠቃላይ ስለ ሕፃናትና ስለ ልጆች ብዙ ብዙ ግድ የሚሉን ጉዳዮች ይቀሩናል። ስለሕፃናት ይዘነው የመጣነውን ስሁት መንገድ ሥነ ቃሎቻችን በተለይ ምሳሌአዊ ንግግሮቻችን አፍ አውጥተው ጩኸው ይናገራሉ ። ልጅ ከሳቁለት ውሻ ከሮጡለት፤ ልጅ ለእናቷ ምጥ አስተማረች፤ ልጅ ቢያስብ ምሳውን አዝማሪ ቢያስብ ጠላውን ፤ ልጅ ከዋለበት ሽማግሌ አይውልም ፤ ልጅ ያቦካው ለእራት አይበቃም ።

መጪው ዘመን ለኢትዮጵያ ሕፃናት በጎ ይሆናል !!!

አሜን ።

 በቁምላቸው አበበ ይማም (ሞሼ ዳያን)

fenote1971@gmail.com

አዲስ ዘመን ሰኔ 16 /2014