ኅብረ-ብሔራዊ አንድነት- የኢትዮጵያ የጥንካሬ ምንጭ

ኢትዮጵያ ከ76 በላይ ብሔሮች፣ ብሔረሰቦችና ሕዝቦች ቤት ናት:: ይህም የብዙ ባሕል፣ ቋንቋ፣ ሃይማኖት፣ ባሕል እና እሴት ባለቤት አድርጓታል:: ኅዳር 29 ቀን 1987 ዓ.ም የፀደቀው የኢፌዴሪ ሕገመንግሥት ለብሔሮች፣ ብሔረሰቦችና ሕዝቦች እውቅና ሰጥቷል:: ራሳቸውን በራሳቸው እንዲያስተዳድሩ፣ ባሕላቸውን፣ ቋንቋቸውንና እሴታቸውን እንዲጠቀሙና እንዲያበለፅጉም ዕድል ፈጥሯል::

ይህን መነሻ በማድረግም በየዓመቱ ኅዳር 29 የብሔር፣ ብሔረሰቦች እና ሕዝቦች ቀን ሆኖ ይከበራል:: 19ኛው የብሔር፣ ብሔረሰቦች እና ሕዝቦች ቀንም “ሀገራዊ መግባባት ለኅብረ ብሔራዊ አንድነት” በሚል መሪ ሃሳብ በዛሬው ዕለት በአርባ ምንጭ ከተማ ይከበራል።

ለመሆኑ የበዓሉ መከበር ፋይዳ ምንድነው? በየዓመቱ በዓል ከማክበር ባለፈ ያሉንን ነባር እሴቶች ተጠቅመን ችግሮቻችንን ለመፍታትና ኅብረ-ብሔራዊ አንድነትን ለመገንባትስ ምን መሠራት አለበት በሚሉት ጉዳዮች ዙሪያ ምሑራንን ጠይቀናል::

የሕገ መንግሥትና ፌዴራሊዝም አስተምህሮ ማዕከል ዋና ዳይሬክተር ኃይለእየሱስ ታዬ (ዶ/ር) እንደሚሉት፤ የሀገራችን ዋንኛ መገለጫዋ ብዝኃነት ነው:: ብዝኃነት መገለጫው የሆነ ሀገር ደግሞ ብዝኃነትን ማክበር ይኖርበታል:: በየዓመቱ ተሰባስቦ ብዝኃነትን ማክበር በራሱ ትልቅ ውጤት ነው::

ብዝኃነት ልዩ ልዩ እውቀቶች፣ ልምዶችና የአሠራር ዘዴዎችን የምናገኝበት ትልቅ ሀብት መሆኑን የሚጠቅሱት ኃይለእየሱስ (ዶ/ር)፤ ይህን መልካም አጋጣሚ ተጠቅመን የበለፀገች፣ ሠላም የሰፈነባትና ተሰሚነት ያላት ሀገር መገንባት ያስፈልጋል:: ለዚህ ደግሞ ተገናኝቶ መመካከርና መወያየት ይጠይቃል:: በየዓመቱ በሚከበረው የብሔር ብሔረሰቦች ቀን በዓልን ተንተርሶ የሚደረጉ የውይይትና ምክክር መድረኮችም ትልቅ ዕድል ይፈጥራሉ ነው ያሉት::

ብዝኃነት ሲኖር ብዝኃ ጥያቄዎች መኖራቸው የሚጠበቅ ነው የሚሉት ዋና ዳይሬክተሩ፤ እነዚህ ጥያቄዎች ሁላችንንም በሚጠቅም መልኩ መልስ እንዲያገኙ እያንዳንዱ ብሔር፣ ብሔረሰብ እና ሕዝብ ያለውን የችግር መፍቻ ነባር እሴት መጠቀምና ተቀራርቦ መሥራት ይጠበቃል ሱሉ ያመለክታሉ::

በዓል ለማክበር የምናደርገው መስተጋብር እርስ በርስ ለመተዋወቅ፣ ለመመካከርና መልካም ተሞክሮዎችን ለማስፋት እንደሚያግዝ የሚጠቁሙት ዋና ዳይሬክተሩ፤ ይህ ደግሞ ራዕያችንን የጋራ ለማድረግና ተቀራርቦ ችግሮችን በመፍታት ሠላም የሰፈነባት፣ ጠንካራና ብዝኃነትን ማዕከል ያደረገ አንድነት እንዲገነባ ያደርጋል ይላሉ::

የኢትዮጵያውያን በዘመናት ያስመዘገብናቸው ድሎች አብሮ በመቆምና ለሀገር ቅድሚያ በመስጠት የተመዘገቡ ናቸው የሚሉት ኃይለእየሱስ (ዶ/ር)፤ ለዚህ ደግሞ ሁላችንም ብዝኃነትን ባከበረ መልኩ ትብብርና አንድነት እንዲጠናከር አስፈላጊ የሆኑ የቤት ሥራዎቻችንን መሥራት ይኖርብናል:: በተለይም ልጆቻችንን ስናሳድግ እንደሀገር ያለውን ልዩ ልዩ ማንነት አውቀውና የሌሎች ማንነት የእኔ ነው የሚል እሳቤ ኖሯቸው እንዲያድጉ መሥራት ይጠበቅብናል ነው ያሉት::

ብዝኃነት ልዩ ልዩ እውቀት እና ልምድ የምናገኝበት ሀብት መሆኑን መገንዘብ ያስፈልጋል የሚሉት ዋና ዳይሬክተሩ፤ ለሌሎች ማንነት እውቅና መስጠትና ጥያቄያቸውን ለማዳመጥም ዝግጁ ስንሆን አንዳችን የሌላችን ደስታ እንዲያስደስተን ሕመማቸውም እንዲሰማን ያደርጋል:: ለዚህ ደግሞ እንደ ሀገር የውይይትና ምክክር ባሕላችንን እያሳደግን መሄድ እንደሚገባ ይጠቁማሉ::

የኢትዮጵያ ሶሻል ዴሞክራቲክ ፓርቲ ምክትል ሰብሳቢ ራሔል ባፌ (ዶ/ር) በበኩላቸው፤ በየዓመቱ እየተሰባሰቡ የብሔር ብሔረሰቦችንና ሕዝቦችን ባሕል ማንፀባረቅ፣ ማንነታቸውንም የሚገልጹበት ጥሩ መድረክ ነው:: ይህ ብቻውን ግን የአንድነት እና የመተባበር ምልክት ሊሆን አይችልም:: ከዚህ መነሻነት በዓሉን ስናከብር ከልዩነት ይልቅ አንድነትን በሚያጠናክር መልኩ መሆን ይኖርበታል ይላሉ::

የብሔር ብሔረሰቦች የብዝኃነታቸውን ውበት አብሮ መኖር፣ ሁሉም ጋር በነፃነት መንቀሳቀስን፣ አንዱ የሌላውን ባሕል ማክበር እንዲሁም በሀገራዊ ጉዳዮች ላይ አብሮ መቆም መቻል ነው የሚሉት ምክትል ሰብሳቢዋ፤ ድንበሮቻችን፣ ቋንቋዎቻችን እና ባሕሎቻችን ሳያጋጩን በወንድማማችነትና በአንድነት መኖር የምንችልበትን ጠንካራ መስተጋብር መፍጠር ይኖርብናል ነው ያሉት::

ከዚህ ውጭ ግን ተገናኝተን፣ የየባሕላችንን ጨፍረን እና ተጫውተን ወደ የአካባቢያችን ስንመለስ የምንገዳደል እና ችግሮቻችንን በውይይት መፍታት የማንችል ከሆነ የምንፈልገውን ውጤት ማምጣት አይቻልም:: በብዝኃነት ውስጥ ያለ አንድነት እንዲመጣ ከሠላም ያፈነገጠ እሳቤያችንን መቅረፍ እንደሚያስፈልግ የሚጠቅሱት ራሔል (ዶ/ር)፤ በትብብር የምንኖርባትና የሁላችንም የሆነች ሀገር እንድትኖረን እያንዳንዳችን ለሠላም መስፈን መሥራት ይኖርብናል:: ለዚህ ደግሞ ደስታችንንም ችግሮቻችንንም ወደ ጠረጴዛ ማምጣትና መነጋገር መቻል ይጠበቅብናል ሲሉ ያስረዳሉ::

በዓመት አንዴ በዓሉን ከማክበር ባለፈ በየዕለቱ እንደ ሕዝብ ወንድማማች መሆናችንን፣ የማንነጣጠልና አብረን የምንኖር በልዩነታችን የምንከባበር፣ የምንደማመጥ እና ለሀገራችን እድገት አብረን የምንሠራ መሆናችንን መገንዘብ መቻል ይኖርብናል ይላሉ::

እንደ ምሑራኑ ገለጻ፤ ኢትዮጵያ ያላት ብዝኃ ማንነት ውበቷና የጥንካሬዋ መሠረት ነው:: የብሔር ብሔረሰቦች በዓል መከበሩም በሕዝቦች መካከል ጠንካራ መስተጋብር እንዲፈጠር በማድረግ የጋራ ራዕይ እንዲኖራቸው ያደርጋል::

ብዝኃነት ልዩ ልዩ እውቀት እና ልምድ የምናገኝበት ሀብት መሆኑን መገንዘብ ያስፈልጋል:: መቀራረብና መተዋወቃችን አንዳችን የሌላችን ደስታ እንዲያስደስተን ሕመማቸውም እንዲሰማን ያደርጋል:: ለዚህ ደግሞ እንደ ሀገር የውይይትና ምክክር ባሕላችንን እያሳደግን መሄድ እንደሚገባ ይጠቁማሉ::

በዓመት አንዴ ከምናደርገው በዓል አከባበር ባለፈ በየዕለቱ እንደ ሕዝብ ወንድማማች መሆናችንን፣ የማንነጣጠልና አብረን የምንኖር፣ በልዩነታችን የምንከባበር፣ የምንደማመጥ እና ለሀገራችን እድገት አብረን የምንሠራ መሆን ይጠበቅብናል ይላሉ::

ፋንታነሽ ክንዴ

አዲስ ዘመን ኅዳር 29 ቀን 2017 ዓ.ም