አቶ ተመስገን ጥሩነህ የኢፌዴሪ ምክትል ጠቅላይ ሚኒስትር ሆነው ተሾሙ

አምባሳደር ታዬ አጽቀስላሴ የውጭ ጉዳይ፤ ዶክተር መቅደስ ዳባ የጤና ሚኒስትር በመሆን ቃለመሃላ ፈጽመዋል

አዲስ አበባ:- የኢፌዴሪ የሕዝብ ተወካዮች ምክር ቤት ትናንት ባካሄደው ስብሰባ አቶ ተመስገን ጥሩነህን ምክትል ጠቅላይ ሚኒስትር አድርጎ ሲሾም የሁለት ሚኒስትሮችንም ሹመት አጽድቋል፡፡

የሕዝብ ተወካዮች ምክር ቤት ትናንት ባካሄደው 3ኛ ዓመት የሥራ ዘመን 15ኛ መደበኛ ስብሰባ በጠቅላይ ሚኒስትር ዐቢይ አሕመድ (ዶ/ር) በእጩነት የቀረቡትን አቶ ተመስገን ጥሩነህን ምክትል ጠቅላይ ሚኒስትር፣

 አምባሳደር ታዬ አጽቀስላሴን የውጭ ጉዳይ ሚኒስትር እንዲሁም ዶክተር መሰረት ዳባን የጤና ሚኒስትር በማድረግ በሙሉ ድምጽ አጽድቋል፡፡

ጠቅላይ ሚኒስትር ዐቢይ(ዶ/ር) እጩዎቹን ባቀረቡበት ወቅት፤ ለምክትል ጠቅላይ ሚኒስትርነት የተሾሙት አቶ ተመስገን ጥሩነህ በቂ የትምህርት ዝግጅት ያላቸው፣ በወጣትነት ዘመናቸው ሀገራቸውን በውትድርና የሕይወት ዋጋ ለመክፈል ዝግጁ ሆነው ያገለገሉ መሆናቸውን ተናግረዋል፡፡

በፖለቲካው ጎራ ከተቀላቀሉ በኋላም ከታችኛው እርከን አንስቶ በብዙ ተቋማት በአመራርነት በታማኝነት፣ በትጋት፣ በቅንነት ያገለገሉ፣ በአማራ ክልል ከዞን አመራርነት እስከ ርእሰ መስተዳድርነት እንዲሁም በተለያዩ የፌዴራል ተቋማት የኃላፊነት ቦታዎች ላይ ማገልገላቸውን አንስተዋል፡፡

የውጭ ጉዳይ ሚኒስትር ሆነው የተሾሙት አምባሳደር ታዬ አጽቀስላሴም በዓለም አቀፍ መድረክ የኢትዮጵያን ጥቅም ለማስጠበቅ የተከራከሩ፣ በዘርፉ ታሪክና ጀግንነት የፈጸሙ ለሥራውም የቀረቡ መሆናቸውን ገልጸዋል፡፡

በተለያዩ የውጭ ሀገራት የኢትዮጵያ አምባሳደር ሆነው በዲፕሎማሲው መስክ ኢትዮጵያን ያገለገሉ እንዲሁም በውጭ ጉዳይ ሚኒስቴር በሚኒስትር ዴኤታነት ያገለገሉ፣ በዓለም አቀፍ ተቋማትም ልዩ ልዩ ኃላፊነት ላይ የሠሩ መሆናቸውን ነው ያብራሩት፡፡

ልምድና ተሞክሯቸውን ግምት ውስጥ በማስገባት ምንም እንኳን የብልጽግና ፓርቲ አባል ባይሆኑም ሀገር ሊጠቅሙ እንደሚችሉ በማመን እንዲሾሙ ውሳኔ ላይ መደረሱንም ጠቅላይ ሚኒስትር ዐቢይ (ዶ/ር) ባቀረቡት ዝርዝር ጠቁመዋል፡፡

ዘርፉን ጠንቅቀው የሚያውቁ፣ ሀገራቸውንና የዓለም አቀፍ ፖለቲካን ጠንቅቀው የሚያውቁ ታማኝና ታታሪ ባለሙያ መሆናቸውንም መስክረዋል፡፡

የጤና ሚኒስትር ሆነው የተሾሙት ዶክተር መቅደስ ዳባ በሐዋሳ ዩኒቨርሲቲ ረዳት ፕሮፌሰር በመሆን በመምህርነትና በህክምና ትምህርት በኃላፊነት ያገለገሉ፣ የኢትዮጵያ ጽንስና ማህጸን ማህበርን በፕሬዚዳንትነት የመሩ፤ እንዲሁም የዓለምአቀፍ ሥነ ተዋልዶ ጤና ማዕከል ዋና ዳይሬክተር በመሆን ማገልገላቸው ተጠቁሟል፡፡

በዓለም ጤና ድርጅት በዋናው መስሪያ ቤት በጀኔቫ የምክትል ዳይሬክተሩ ልዩ ረዳትና ከፍተኛ ባለሙያ ሆነው በማገልገል ላይ እንደሚገኙና ባካበቱት ልምድ ዘርፉ የሚፈልገውን አመራርነት ለመስጠት የተሻለ ብቃት እንዳላቸው በማመን እንዲሾሙ መወሰኑን ነው የገለጹት፡፡

ጠቅላይ ሚኒስትር ዐቢይ በዚሁ ወቅት እንደገለጹት፤ መተካካቱ የኢትዮጵያን ጥቅም ባስቀደመ፣ አቅም እና ብቃትን ማዕከል ባደረገ መልኩ የሚቀጥል ይሆናል፡፡

ብቃት ያላቸው በዩኒቨርሲቲ፣ በተፎካካሪ ፓርቲዎች ውስጥ ካሉ የብልጽግና ፓርቲ አባል ባይሆኑም በሚደረገው መተካካት ታሳቢ እንዲደረግ በተደረገው ውይይት ፓርቲው መወሰኑን ጠቅላይ ሚኒስትር ዐቢይ (ዶ/ር) አመልክተዋል፡፡

በዩኒቨርሲቲ፣ በተፎካካሪ ፓርቲዎች ውስጥ ብቃትና ልምድ ያላቸው ካሉ ወደ ፊት በሚደረጉ ሽግሽጎችም  እንዲካተቱ ይደረጋል ያሉት ጠቅላይ ሚኒስትር ዐቢይ(ዶ/ር) በካቢኔው ውስጥ የሌሎች ፓርቲ አመራር የሆኑ አባላት በፊት ከነበረው ልምድ በተለየ ሁኔታ በስፋት መካተታቸውንና ትግበራው ተጠናክሮ እንደሚቀጥልም አመልክተዋል፡፡

ስልጣን በኢትዮጵያ በሰላማዊ መንገድ፣ በንግግር፣ በምክክር ብቻ የሚገኝ እንዲሆን ሁሉም በኃላፊነት መሥራት ይገባዋል ብለዋል፡፡

ምክር ቤቱ ለ32 ዓመታት በተለያዩ የኃላፊነት ደረጃ ያገለገሉትን አቶ ደመቀ መኮንንም አመስግኖ ከመንግሥት ኃላፊነታቸው በክብር ሸኝቷል ሲሉ ጠቅሰዋል፡፡

ላለፉት 12 ዓመታት ምክትል ጠቅላይ ሚኒስትር የነበሩትን አቶ ደመቀ መኮንን በሚመለከት አሁን የተወሰነው በምክክርና በውይይት መሆኑን የገለጹት ጠቅላይ ሚኒስትር ዐቢይ(ዶ/ር)፤ በሰላማዊ መንገድ ስልጣን መረካከብና ኢትዮጵያን ላገለገሉበት ተመስግነው መሄድ ተጨማሪ ክብር ነው ብለዋል፡፡

በውጭ ብዙ አሉባልታና ወሬ ቢሰማም ሁሉም በምክክር፣ በውይይትና በመግባባት የተደረገ ስለመሆኑም ጠቅላይ ሚኒስትር ዐቢይ አሕመድ (ዶ/ር) ተናግረዋል፡፡

በተያያዘ ዜና የኢፌዴሪ ጠቅላይ ሚኒስትር ዐቢይ አሕመድ (ዶ/ር) አምባሳደር ሬድዋን ሁሴንን የብሔራዊ መረጃና ደህንነት አገልግሎት ዋና ዳይሬክተር እንዲሁም ትዕግስት ሃሚድን የኢንፎርሜሽን መረብ ደህንነት አስተዳደር ዋና ዳይሬክተር አድርገው መሾማቸውን የጠቅላይ ሚኒስትር ጽህፈት ቤት አስታውቋል፡፡

ዘላለም ግዛው

አዲስ ዘመን  የካቲት 1 ቀን 2016 ዓ.ም

Recommended For You