ትውልዱን ከማንነቱ የሚያስተዋውቅ የባሕል ስፖርት ሻምፒዮና እና ፌስቲቫል

ከታኅሣሥ ወር አንስቶ በጥር፣ በሚያዚያ እስከ ክረምቱ መግቢያ ድረስ መኸር በተሰበሰበበት ሜዳ የተለያዩ ጨዋታዎችንና የእርስ በእርስ ፉክክር ማድረግ በአብዛኛው የኢትዮጵያ ገጠራማ አካባቢዎች የተለመደ ነው:: እነዚህ ጨዋታዎች ዛሬ ላይ ለሚዘወተሩት ዘመናዊ ስፖርቶች መሠረት ቢሆኑም፤ ከዘመኑ ጋር እየተበረዘ፣ በወጣቱ ዘንድ ያለው ተዘውታሪነትም እየቀነሰ መምጣቱ እርግጥ ነው:: በመሆኑም ትውልዱን ወደ ማንነቱ ለመመለስ ወቅቱን ጠብቆ ባሕላዊ የስፖርት ውድድሮችን በክልሎች፤ እንዲሁም በሃገር አቀፍ ደረጃ ማካሄድ የተለመደ ነው::

ከባሕላዊ ውድድሮች ጎን ለጎንም የባሕል ፌስቲቫል በማዘጋጀትም እሴቱን ከማሳደግ ባለፈ ከትውልዱ ጋር የማስተዋወቅ ሥራም ይሠራል:: 20ኛው የመላው የኦሮሚያ ባሕል ስፖርት ሻምፒዮና እንዲሁም 16ኛው የባሕል ስፖርት ፌስቲቫልም ይህንኑ መሠረት በማድረግ በአምቦ ከተማ በመካሄድ ላይ ይገኛል:: ለቀናት በሚዘልቀው በዚህ ሻምፒዮና ላይም 20 ዞኖችና 13 ከተማ አስተዳደሮች ተወካዮቻቸውን እያፎካከሩ ይገኛሉ:: 1ሺህ 80 የሚሆኑ ተወዳዳሪዎች በባሕል ጨዋታዎቹ ላይ እየተሳተፉ ሲሆን፤ 3ሺህ 800 የሚሆኑት ደግሞ በባሕል ፌስቲቫሉ ላይ ተካፋይ ናቸው::

ውድድሩም በሃገር አቀፍ ደረጃ ዕውቅና ካገኙ የባሕል ጨዋታዎች መካከል በ10ሩ ይካሄዳል:: በፌስቲቫሉ ደግሞ በባሕላዊ አልባሳትና ጌጣጌጣቸው አምረው የተገኙት ተሳታፊዎች የጭፈራ እና የአመጋገብ ሥርዓታቸውን በማሳየት እርስ በእርሳቸው ይፎካከራሉ:: ዘንድሮ ለ21ኛ ጊዜ የኢትዮጵያ ባሕል ስፖርቶች ሻምፒዮና በአዲስ አበባ ከተማ አስተዳደር አዘጋጅነት የሚካሄድ ሲሆን በዚህ ሻምፒዮና ላይ ክልሉን ወክለው የሚሳተፉ የባሕል ስፖርት ተወዳዳሪዎችን መምረጥ የሻምፒዮናው ቀዳሚ ዓላማ ነው:: ሕዝቡ የራሱን ባሕል መግለጽ እንዲችል፤ እንዲሁም በክልሉ የሚገኙ ዞኖች ትውፊታቸውን ለሌላኛው ዞን በማስተዋወቅ እርስ በእርሳቸው ያላቸውን ግንኙነት ለማሳደግም ጠቃሚ ነው:: በሌላ በኩል ከሥልጣኔና ዘመናዊነት ጋር በተያያዘ ስለ ባሕሉ ያለው ግንዛቤ ከጊዜ ወደ ጊዜ እየተመናመነ የመጣውን ትውልድ ማንነቱን እንዲያውቅና ባሕሉን እንዲያሳድግ የሚጫወተው ሚና እጅግ ከፍተኛ ነው::

እንደሌሎቹ የኢትዮጵያ ክፍሎች ሁሉ የኦሮሚያ ክልልም በተለያዩ ባሕላዊ እሴቶች የበለጸገ መሆኑ ይታወቃል:: ነገር ግን ከዚህ ቀደም በዘርፉ የነበረው ሁኔታ ወደ ኋላ የመቅረት አዝማሚያ የታየበት እንደነበረ የሚያስታውሱት፤ በኦሮሚያ ክልል የባሕል ስፖርት ፌዴሬሽን ጽሕፈት ቤት ኃላፊ አቶ በቀለ ኢራሱ ናቸው:: በመሰል ውድድሮች ላይም በባሕል ልብስ ተውቦ መገኘት ያልተለመደ ነበር:: ፌዴሬሽኑም ይህንን በመገንዘብ በመተዳደሪያ ደንቡ ላይ የውድድር ተወዳዳሪዎች ወደ ሜዳ ሲገቡ ባሕላቸውን በሚያንጸባርቅ አልባሳት መቅረብ እንዳለባቸው በመደንገጉ፤ እንዲሁም ፌስቲቫሉም እንዲካሄድ በመደረጉ አስደናቂ ለውጦች ታይተዋል:: ከቅርብ ጊዜ ወዲህ ግን ስፖርቱን የሚመራው የክልሉ ወጣቶችና ስፖርት ቢሮ ትኩረት በመስጠትና ድጋፍ በማድረግ የባሕል ስፖርት ጽሕፈት ቤት እንቅስቃሴ እንዲያንሰራራ አድርጓል:: በዚህም የተሳታፊ ዞኖችን፣ እንዲሁም ተወዳዳሪዎችን ቁጥር በማሳደግ የመላ ኦሮሚያ ሻምፒዮና ሊሆን ችሏል::

በሃገር አቀፍ ደረጃ በሚካሄደው ሻምፒዮና ላይም ክልሉ ጠንካራ ተፎካካሪ በመሆኑ ከደረጃ ወርዶ እንደማያውቅ ኃላፊው ይጠቁማሉ:: በቅርቡ የሚካሄደውን ሻምፒዮናም በበላይነት ለማጠናቀቅ ታቅዶ እየተሠራ ይገኛል:: ክልሉ በተለይ ከሚታወቅባቸው የባሕል ስፖርቶች መካከል አንዱ የፈረስ ስፖርት ነው:: ይህን የፈረስ ሃብት በትልቅ ደረጃ ለማስተዋወቅና ስፖርቱን ለማሳደግ የተጀመረ ፕሮጀክት ነበር:: ይኸውም የተለያዩ ማኅበራትን በማቋቋም በሰባቱ የፈረስ ስፖርቶች በየዓመቱ ውድድር እንዲካሄድ እየተደረገ መሆኑንም አቶ በቀለ ያብራራሉ:: አሁን ካለበት በይበልጥ እንዲያድግና ስፖርቱ እንዲስፋፋም እንደ ክልል አቅጣጫ የተያዘ ሲሆን፤ በቀጣይም ማኅበራትን በማደራጀት ይሠራል::

ነገር ግን የማንነት መገለጫ የሆነው ይህ ስፖርት አሁንም በይበልጥ እየተዝወተረ የሚገኘው በገጠራማ አካባቢዎች ነው:: በከተማ አካባቢዎች ያለው እንቅስቃሴ ደካማ የሚባል ነው:: በእርግጥ ቀድሞ ተሳታፊ ያልነበሩ ክልሎች በቅርቡ ተወዳዳሪዎችን መላክ ስለጀመሩ ጥቂት ለውጥ መጥቷል ማለት ቢቻልም፤ በታዳጊዎች ዘንድ ግን ምንም አልተሠራም በሚያስብል ደረጃ ላይ እንደሚገኝ ኃላፊው አልሸሸጉም:: በመሆኑም የባሕል ስፖርትና ፌስቲቫልን በክልል ደረጃ ከማካሄድ ባለፈ በየዞኑና በወረዳ እንዲካሄድ በማድረግ ኅብረተሰቡን ተደራሽ ለማድረግ እየተሠራ ነው:: በዚህም ስፖርቱን ማሳደግና ወጣቱም ባሕሉን እንዲያውቅ ለማድረግ እንደሚቻልም ተስፋ ተደርጓል::

ብርሃን ፈይሳ

አዲስ ዘመን ረቡዕ ጥር 22 ቀን 2016 ዓ.ም