ምክትል ጠቅላይ ኢታማዦር ሹም አበባው ታደሰ ከሰሞኑ ከኢትዮጵያ ብሮድካስቲንግ ኮርፖሬሽን (ኢቢሲ) ጋር በወቅታዊ ጉዳዮች ላይ ቆይታ ማድረጋቸው ይታወሳል። የዛሬ ወቅታዊ አምዳችን ይህንን ቃለ መጠይቅ የያዘ ነው። መልካም ንባብ :: ኢቢሲ፡- የጦር ሃይሎች ምክትል ኢታማዦር ሹም ጄኔራል አበባው ታደሰ ከእኛ ጋር ቆይታ ለማድረግ ስለወደዱ እጅግ አድርጌ አመሰግናለሁ ። ከለውጡ በኋላ መከላከያን ጨምሮ የተለያዩ የጸጥታ ኃይሎች ሪፎርም የመስራት ተግባራት በመንግስት ተከናውነዋል። ከዚህ ሪፎርም አኳያ መከላከያ በምን ሁኔታ ላይ ይገኛል ?
ጄኔራል አበባው ታደሰ ፡- ስለጋበዛችሁኝ አመሰግናለሁ። የአገሪቷ ብሄራዊ የጸጥታ ኃይል የሪፎርም ስራውን ከጀመረ ሶስት፤ አራት ዓመት ተቆጥረዋል። ሪፎርሙ «ቤዚካሊ» የሚያጠነጥነው የአገሪቷን የግዛት አንድነት፤ የአገሪቷን ሉዓላዊነት፣ የአገሪቷን የህዝቦች ደህንነት መነሻ አድርጎ እንዲጠብቅ እና እንዲከላከል የአገሪቷ ብሄራዊ የፀጥታ ኃይል መደራጀት አለበት ።
በፊት ምንድን ነው የነበረው፤ መላው የኢትዮጵያ ህዝብ ስለሚያውቀው እሱ ላይ ደግሜ አልመለስም። ይህን ኃይል ለማደራጀት ግን መከላከያን፣ ፌደራል ፖሊስን እና ብሄራዊ ደህንነትን እና ሌሎች ከጸጥታ ጋር ሊሄዱ የሚችሉ ኃይሎች በሚገባ ሪፎርም መደረግ ነበረባቸው።
አንደኛው ሪፎርም የሚያጠነጥነው አስተሳሰብ ላይ ነው። ኢትዮጰያዊነት ላይ ነው። በኢትዮጵያዊነት የተገነባ ለሁሉም ህዝብ እኩል የሆነ የጸጥታ ግብረ ኃይል እና መዋቅር መገንባት ነው። ሁለተኛው አስተሳሰቡ ኢትዮጵያዊነት ላይ በቂ ስለማይሆን ለኢትዮጵያዊነት ጠቅላይ ግዛት ሊመች የሚችል ችሎታ መፍጠር አለብን። «ስኪል» የምንለው ነገር ችሎታ መፈጠር አለበት። ምክንያቱም ኢትዮጵያዊነት በባዶ አይመሰረትም። በችሎታ ነው መመስረት ያለበት። ሶስተኛ ችሎታው ብቻ በቂ ስላልሆነ በቴክኖሎጂ፤ በትጥቅ መዘመን አለበት። አራተኛው አሰራሮቹ አካሄዶቹ ዘመናዊ መሆን አለባቸው። መዘመን መቻል አለባቸው።
ይሄንን መነሻ አድርጎ በአንድ በኩል ውስጥ ላይ የተቃጣውን ጥቃት እየመከተ በሌላ በኩል ደግሞ ይሄንን ሪፎርም እየሰራ የነበረ ጸጥታ ኃይል ነው ያለው፤ ኢትዮጵያ ውስጥ። ይህ ኃይል ምንድን ነው የሚዘምነው? ለምድን ነው ይህ ኃይል ሪፎርም እየተደረገ ያለው ? ለሚለው ግን አገሪቷ ሁለት ስጋቶች ስላሉባት ነው። አንደኛው ስጋት ከባቢያችን ነው። «ሆርን አፍሪካ» የምንለው ስጋት ነው። ሁተኛው በየጊዜው እየተቀያየረ የመጣው የዓለም ሁኔታ አገራችን ላይ የሚያሳድረው ተጽዕኖ ነው።
እነኝህን ሊመክት የሚችል የጸጥታ መዋቅር መገንባት መቻል አለበት የሚለው ነው የመንግስት ሃሳብ። ይሄንን ይዘን እየሰራን ነው ያለነው። ይሄንን ይዘን ስንሰራ ስለአካባቢያችን ለመከታታል እና ሁለተኛም ደግሞ በተመሳሳይ ተለዋዋጭ የሆነውን ነገር ለመመከት የራሳችንን ቤት ደግሞ ማጽዳት አለብን። የአገራችንን ቤት ማጽዳት አለብን። የአገራችን የቤት ጽዳት ምንድን ነው ? ካልን ደግሞ ሁለት ናቸው። አንደኛ የህዝቦቹን ሰላም ማረጋጋጥ ነው። ሁለተኛ የአገሪቷን ልማት በሰላም እንዲሄድ ማድረግ ነው።
ሰላም ስንል ህዝቦች በስነ ስርዓት ከቤታቸው ወጥተው የሚገቡበት አገር ማድረግ አለብን። ልማት ስንል ደግሞ ልማቱ ያለምንም የጸጥታ እንቅፋት እንዲሄድ ማድረግ አለብን። ይሄንን ስራ እያከናወንን ነው ያለነው። በዚህ ስራ ላይ ከፍተኛ የሆነ እንቅፋቶች አሉ። እንቅፋቶቹን ነው እያስወገድን ያለነው።
እንቅፋቶቹ ምንድን ናቸው? ከተባሉ አንደኛው ዘርን ተደብቆ የሚመጣ የአገሪቷን ህግ መጣስ ነው። ሁለተኛው በዘር ተደብቆ የሚመጣ የታጠቀ ኃይል ነው። ሶስተኛው በዘር ተደብቆ የሚመጣ ኃይማኖት ነው። አራተኛ በዘር ተደብቆ የሚመጣ ስርቆት ነው። እነዚህ መጽዳት አለባቸው። እነዚህን ለማጽዳት አገሪቷ ከነበረችበት ችግር አንጻር የግድ ደረጃ መስጠት ነበረብን። ደረጃ መስጠት ሰለነበረብን ወደ ትልቁ እንቅፋት ወደሆነው የሰሜኑ ጦርነት ነው ኃይላችንን ያዞርነው።
የሰሜኑ ጦርነት ምንድን ነው ? ልክ ማስያዝ ነው። ልክ ማለት ምን ማለት ነው ? አገር ማንም ሊገነጥላት እንደማይችል፤ ጠቅላይ ግዛቷን ይዛ መቀጠል እንደምትችል፤ ህዝብ ስላለ፤ መንግስት ስላለ፤ ያ የተመረጠ መንግስት መቀጠል ስላለበት፤ በጉልበት መገልበጥ ስለሌሌበት፤ አገር አንደኛውን ህዝብ አኮስሰህ አንደኛውን ህዝብ ከፍ ማድረግ እንደማይቻል፤ ሁሉም በልኩ መኖር እንደሚችል፤ አገሩ ለሁሉም እንደሚበቃ ለማሳየት ዋጋ ከፍለናል።
ይህ ደግሞ በቦታው ልክ ይዟል ብለን እናስባለን። ይሄ በልክ ከያዘ ኃይላችንን ደግሞ ወደ ማህል አገር ማምጣት ነበረብን። ኃይላችንን ወደ መሀል አገር አምጥተናል። ኃይላችንን ወደ መሀል አገር ስናመጣ ልክ ያልሆነ ቦታ አለ። እሱን ደግሞ ልክ ማስያዝ አለብን። ያ ልክ ደግሞ ምንድን ነው ? ከመከላከያ ውጭ የታጠቀ ኃይል ኢትዮጵያ ውስጥ መኖር የለበትም። የታጠቀ ኃይል ህግ የሚፈቅደው መከላከያ እና የብሄራዊ ደህንነቱ ነው። «ሪፈረንሳችን» ህገ መንግስት ነው። አንድን መንግስት ማውጣትም ማውረድም የሚቻለው ህዝብ ብቻ ነው።
ይህን ለማድረግ ደግሞ ንግግር መኖር አለበት። ለምሳሌ አማራ አካባቢ ላይ የነበረው ከአገው ሸንጎ ጋር፤ ከቅማንት ጋር የነበረውን ችግር በንግግር እየፈታን ነው ያለነው። ክልላቸው ጋር በሰላም መስራት ስላለባቸው። ሁለተኛ ቤኒሻንጉል ላይ፤ ጋምቤላ ላይ የነበሩ ከታጠቁ ኃይሎች ጋር በተመሳሳይ ትጥቅ እንደማያዋጣ፤ ሞክረውትም ስላልቻሉ ከእነዚህንም ጋር ወደ ሰላም እያመጣን ነው ያለነው። ኦሮሚያ አካባቢ ከሸኔ ጋር ደግሞ ንግግር እየተጀመረ ነው። መምጣት አለበት። መጥቶ አገሩ ውስጥ መስራት አለበት።
በጉልበት ግን በፍጹም አያዋጣም። ይህን አድርገን መጨረሻ ላይ የአገራችንን ሰላም እናረጋግጣለን። የአገራችንን ሰላም ካረጋገጥን፤ ልማቱ በሚፈለገው ፍጥነት፤ በሚፈለገው ጊዜ ይሄዳል። ሪፎርሙ የመጨረሻ ውጤቱ ሂዶ ሂዶ የህዝቦችን ደህንነት እና የአገር ሉዓላዊነት ጠብቆ መሄድ አለበት። የአገሮች ሰላም ማለት የህዝቦቹ ሰላም ደህንነት ማለት ነው።
የአገራችንን ሰላም ካረጋገጥን ልማቱ በሚፈለገው ፍጥነት፤ በሚፈለገው ጊዜ ይሄዳል። ሪፎርሙ የመጨረሻ ውጤቱ ሄዶ ሄዶ የህዝቦችን ደህንነነትና የአገር ሉዓላዊነትን ጠብቆ መሄድ አለበት። የአገር ሰላም ማለት የህዝቦችን ሰላም ማለት ነው። የአገር ሉዓላዊነት ማለት ደግሞ ማንም እየተነሳ የሚጨፍርበት አገር ሊሆን አይችልም፤ ከውስጥም፤ ከውጭም። ስለዚህ መጠበቅ አለበት። ይህንን ማሳየት መቻል አለበት። ሪፎርማችን በተሳካ መንገድ እየሄደ ነው ያለው። በጣም ትልቅ ኃይል ነው እየሆንን ያለነው። ምንም ጥያቄ የለውም። ይሄ ትልቅ ኃይል የምንለው ደግሞ ማንንም ለማስፈራራት አይደለም፤ አገራችንን ለመጠበቅ ነው። ይህንን ደግሞ እያደረግን ያለነው ነው፤ እናደርገዋለንም።
ጥያቄ፡- ኢትዮጵያ ከፀጥታ ስጋት አኳያ አሁናዊ የሆነ ፈተናዎቿ ምንድን ናቸው? እንዴትስ ነው የሚገለፁት?
ጀነራል አበባው፡- አሁን ላይ ያሉት ፈተናዎች ሁለት ናቸው፤ አንዱ ከዘር የሚመጣ፤ ዘርን መነሻ አድርጎ በጉልበት ስልጣን እይዛለሁ፤ መንገድ በመዝጋት ስልጣን እይዛለሁ፤ ህዝብን በማሳመፅ ስልጣን እይዛለሁ፤ የሚል አለ። ነገር ግን በኢትዮጵያ ውስጥ በፍፁም አይፈቀድም። ኢትዮጵያ ውስጥ ስልጣን ለመያዝ የሚፈቀደው አንድና አንድ መንገድ ብቻ ነው፤ ይኸውም የኢትዮጵያ ውስጥ ይመራኛል ያለውን 11 ሰዓት ተሰልፎ እንደመረጠ ጊዜው ሲደርስ 11 ሰዓት ድረስ ተሰልፎ ማውረድ ብቻ ነው። ከዚህ ውጪ ግን በፍፁም ኢትዮጵያ ውስጥ በጉልበት አይሆንም። ስልጣን በጉልበት አይገኝም።
ትልቅ አገር ነው የያዝነው፤ ስርዓት አለው፤ ህግ አለው፤ በህጉ መሰረት መሄድ መቻል አለበት። እነዚህን ስርዓት ለማስያዝ በሁለት መንገድ እንሄዳለን፤ አንደኛው አስቀድሜ እንደገለፅኩት ሰላማዊ በሆነ መንገድ ወንድሞቻችን ስለሆኑ በሰላም ቁጭ ብለን በጋራ ፈትተን መሄድ ነው ያለብን። በታጠቀ ኃይል ኢትዮጵያን መገንባት አይቻልም። በመሰረታዊነት የአገሪቷን ችግር ፖለቲካ የሚፈታው ቢሆንም የእኛ የወታደሮቹና የፀጥታ ኃይሉ ሥራ ግን ፖለቲከኛው ጊዜ አግኝቶ በሰላም ቁጭ ብሎ በአገሩ ጉዳይ ላይ እንዲወያይ ሰላም መፍጠር አለበት።
ሰላም ለመፍጠር ግን በዚህ ድርጅት፤ በዚህ የታጠቀ ኃይል፤ በዚህ አስፈራርቼ፤ በዚህ እንደዚህ መጥቼ የሚባለው ነገር ግን አይሰራም። ይህንን እንደማይሰራ በሰላም ነው ማሳየት ያለብን። የሚደራደር አካል አለ፤ ተደራድሮ አገሩ ላይ ቁጭ ብሎ አገሩ የሚመስለውን ሃሳብ የሚመስለውን ነገር በጠረጴዛ ዙሪያ ላይ መነጋገር መቻል አለበት። አይ ይሄ ነገር አያዋጣኝም በጉልበት ነው የምመጣው ካለ ደግሞ ከሰሜኑ ጦርነት መማር ካልቻለ በደንብ አድርገን እናስተምረዋለን። በጉልበት፤ አይሆንም፤ አይፈቀድም። ስለማይፈቀድ ይሄ ለማንኛውም በአራቱም ማዕዘን ለሚነሳ ለታጠቀ ኃይል አይቻልም።
ጥያቄ፡- አሁን ላይ እንግዲህ በመንግስት ደረጃ ልዩ ኃይልን መልሶ የማደራጀት ሥራዎች የኢትዮጵያን የግዛት አንድነት ለማስጠበቅ እና አንድነቱ የተጠናቀረ እንዲሆን በሚል መልሶ ኃይሉን የማደረጃት ስራ በየክልሉ ተጀምረዋል። ይህ ሥራ ፕሮግራሙ ምንድን ነው? የነበረው ኃይል እጣፈንታ ምንሊሆን ነው ? አተገባበሩና የቁጥጥር ስርዓቱስ ምንድን ነው የሚመስለው?
ጀነራል አበባው፡- ይህ ፕሮግራም አሁን የጀመርነው አይደለም፤ የኢትዮጵያ ህዝብ እንዲያውቅልን የምንፈልገው በአገሪቷ የፀጥታ ኃይል እንዲገነባ የሚፈቅደው ህግመንግስት መከላከያና ፌደራል ፖሊስን ነው። ይሄ ይታወቃል። በየክልሉ ያለው ልዩ ኃይል በመጠኑ ልክ አለው፤ በሌላ አነጋገር አገር በሚመስል ደረጃ 14ና 15 ሬንጀር አለው። አይቻልም። ይህንን ለማሻሻል ስንነሳ እንደዚሁ በሞራል የተገባበት አይደለም። በረጅም ጊዜ በጥናት የተገነባ ነው።
ጥናቱ ምንድን ነው የሚያተኩረው የሚለው ነገር አንደኛ የክልሎች ልዩ ኃይሎች በሙሉ አንደኛ የክልላቸውን ፀጥታ ይጠብቁ ነበር፤ ሁለተኛ ከእኛ ጋር ሆነው አብረው ይሞቱ ነበር። ምንም ጥያቄ የለውም። ከእኛ ጋር አብረው ሞተዋል፤ ከእኛ ጋር ህይወታቸውን አሳልፈዋል። ከእኛ ጋር ቆስለዋል፤ ደምተዋል። ይህ ኃይል ይህንን የመሰለ ትልቅ ማንነት አለው። ግን ይህንን በሙሉ እኛ ነን እየመራናቸው ያለነው። መከላከያ ነው የሚያስተባብራቸው፤ የሚመራቸው።
የክልል የጸጥታ ኃይል ግን ደግሞ አወቃቀሩ ጉድለት አለው። አሁን ሁለት ነገር መለየት መቻል አለብን። የልዩ ኃይሉን ጥንካሬ መስዋዕትነትና ልፋት በአንድ ጎን፤ በሌላ በኩል እጥረቶች አሉ እንደአገር። እጥረቶችን የሚገልፁ ማሳያዎች ምንድን ናቸው? ካልን ህገ-መንግስት ነው፤ ከህገመንግስት አንፃር ስናይ እነዚህ ኃይሎች ህጋዊ አይደሉም። ህገመንግስቱ እውቅና አይሰጣቸውም። ለክልል ኃይል የሚሰጠው መደበኛ ፖሊሰን ብቻ ነው። ህገመንግስቱ የታጠቀን ኃይል የሚሰጠው አንደኛ መከላከያን፤ ሁለተኛ ፌደራል ፖሊስ፤ ሶስተኛ ደግሞ የክልል መደበኛ ፖሊስ ነው። ከዚህ ውጭ ህገመንግስቱ ላይ መብት የተሰጠው የለም።
ይሄ ኃይል ህጋዊ አይደለም ማለት ነው አወቃቀሩ። ስለዚህ ህጋዊ መስመር እናሲዘዋለን። ወደ ህጋዊ መስመር እንዲገባ እናደርገዋለን ማለት ነው። በሌላ አነጋገር በኢትዮጵያ ውስጥ 14 ሬንጀር መመስረት አይቻልም ማለት ነው። ሁለት ሬንጀር ነው የሚፈቀደው። አይደለም ለህዝቡ ለእኛ ለወታደሮቹ መለየት አቅቶናል። ይሄ አይቻልም።
አንዱ ጥናቱ የሚያጠነጥነው ነገር ህጋዊ መስመር ማስያዝ እንዳለብን ነው፤ ሁለተኛ የኃይል አገነባቡ ብሄር ተኮር ነው። ብሔር ተኮር ሲባል ኦሮሞው ‹‹ለኦሮሞ ህዝብ እሞታለሁ ›› ይላል፤ አማራው ጉዳዩ አይደለም ማለት ነው። በግልፅ አማርኛ ጉዳዩ አይደለም። አማራው ይመጣና ደግሞ ‹‹ ለአማራ ህዝብ እሞታለሁ›› ይላል። ስለኦሮሞው ጉዳዩ አይደለም ማለት ነው። ብሔር ተኮር ስለሆነ አገር አቀፍ የሆነውን አብሮነት፤ የህዝቦችን አንድነት ይሸረሽራል። አንደኛ ብሔር ተኮር መሆኑ
እጥረት አለበት ማለት ነው። ሶስተኛው ነገር ደግሞ በዚህ ኃይል ላይ የአገሪቷን የፖለቲካ መፍቻ መንገድ አበላሽቷል። የፖለቲካውን መፍቻ መንገድ ያበላሸው በምንድን ነው? ካልን በየትኛውም አገር፤ በእኛ አገር ህገመንግስትም ፖለቲካና ጉልበት አብሮ አይሄድም። በእኛ አገር ፖለቲካና ጉልበት የሰጠው ህገመንግስቱ በህዝብ ለተመረጠ መንግስት ብቻ ነው።
ስለዚህ ፖለቲከኛው በሀሳብ ማሸነፍ ሲያቅተው ሌላ በትር አለው ማለት ነው። የታጠቀውን ኃይል ያነሳል። ሶሰት ዓመት ሙሉ ጦርነት የቆየነው ለምንድ ነው? ፖለቲከኛና ኃይል ተገናኘ ትግራይ ላይ። ፖለቲካውን ያዘው ወታደር ፈጠሩ። ስለዚህ አርፈህ ተቀመጥ ኢትዮጵያን እንበትናለን፤ እንዲህ እናደርጋለን ተባለ። መፍቻ መንገዱን አበላሸው። አንዱ ጥናቱ የሚያጠነጥነው ሶስተኛው ነገር ይሄ ነው።
አራተኛ ለአገርና ለሁሉም ህዝቦች የሚሞተውን ኃይል መገዳደር ቻለ፤ ተገዳዳሪ ኃይል ተፈጠረ፤ አንተም ተው አንተም ተው ለማለት ጉልበት አለኝ ማለት ተጀመረ። ይህን በማን አየነው ሶስት ዓመት ጦርነት የቆየነው በዚህ ነው። ስለዚህ ነው ጥናቱ ያስፈለገው። ህዝቡም ሆነ ይሄ ኃይል ልክ አይደለም ማለት ከተጀመረ ሶስት አራት ዓመት አድርጓል። ግን የትኛውን እናስቀድም ነው። ለምንድነው ታዲያ በጊዜው በሰዓቱ እንዲህ ያላደረጋችሁት ከሆነ የነበረው ስርዓት ሌላ ችግር ስለነበረው ነው።
አሁን ያለውስ፤ አሁን ያለው ደግሞ ደረጃ ሰጠ። መጀመሪያ ይሄንን ኃይል የራሳችን ኃይል ነው እንጠቀምበት። ሁለተኛ ትልቁን ኃይል ወደ ትክክለኛ ቦታው ልኬታው እናምጣው። ይሄኛው ኃይል ግን የአማራ፤ የኦሮሞ፤ የጋምቤላ፤ የቤኒሻነጉል፤ የሲዳሞ ፤ደቡብ ፤ሱማሌ፤ አፋር ሁሉም ልዩ ኃይል አለው። ይሄ ኃይል ግን ቅድም እንዳልኩት የሞተ የተሰዋ ነው። ስለሆነም ይሄንን ኃይል እንደገና ሪፎርም እናድርገው፤ ሪፎርም አድርገን እናደራጀው የሚል ወሳኔ ነው የተወሰነው።
እንበትነው አልተባለም፤ ትጥቁን እናስፈታው አልተባለም። ሪፎርሙን እንዴት አድርገን ነው የምናደርገው መከላከያ መግባት ያለበትን መከላከያ እናስገባው፤ ፌደራል ፖሊስ የሚሆነውን ፌደራል ፖሊስ እናስገባው። መደበኛ ፖሊስ መሆን የሚፈልገውን ደግሞ መደበኛ ፖሊስ እናድርገው። ይሄ ምን ክፋት አለው፤ ይሄ እኮ የህገ መንግስት ጉዳይ ነው። ጊዜ የሰጠነውም አገር ውስጥ ሌላ ችግር ስለነበረ ነው።
ስለዚህ ፕሮግራሙ ወደ መከላከያ ማስገባት፤ ወደ ፌደራል መንግስት ማስገባት፤ ወደ መደበኛ ፖሊስ ማስገባት ነው። በማን? በራሱ ምርጫ፤ በምን? ክብሩን በማይነካ፤ በምን? ሞራሉን በማይነካ፤ በምን? ጥቅሙን በማይነካ መልኩ ወደዚህ ኃይል እናስገባው። ይሄ ነው የተያዘው ፕሮግራም። ይሄን ይዘን አፈፃፀሙ ላይ ደግሞ እኩል እናደራጀዋለን።
ወደ ተግባር ከመግባታችን በፊት አፈፃፀሙ ላይ ምንድነው የተደረገው ጥናቱ ለሚወስነው አካል ነው የቀረበው። የአገሪቱን የመከላከያ ኃይል እንደ አቅም ለመጠቀም፤ የክልሎቹን ልዩ ኃይል እንደ አቅም ለመጠቀም፤ ይሄ ጥንካሬ አለው፤ ይሄ ደግሞ እጥረት አለው፤ ጥንካሬና እጥረት ለምንለው ደግሞ ሪፈረንሳችን ህገ መንግስት ነው። ጥናታችን መነሻ የሚያደርገው ደግሞ ከሌሎች አገር ልምድ ነው። ጥናቱ መነሻ ያደረገው ደግሞ እኛ አገር ያደረሰው ጠባሳ ነወ። ሁሉም የክልል አመራሮች ባሉበት፤ ሁሉም የመንግስት አመራሮች ባሉበት ጥናቱ ላይ ለረጅም ጊዜ ተወያይተው ወስነዋል።
ከዚያም ይሄንን ጥናት ሊያስፈፅም የሚችል አንድ ብሄራዊ ኮሚቴ መቋቋም አለበት ተባለ። ያ ብሄራዊ ኮሚቴም ከመከላከያ፤ ከብሄራዊ ደህንነት፤ ከፌደራል ፖሊስ፤ ከህግ አካላትና ከፖለቲከኞች ሆኖ ተቋቋመ። የተቋቋመበት ዋንኛ ምክንያትም አፈፃፀሙ ላይ ጉድለት እንዳይኖረው ለማድረግ ነው። በጥንቃቄ እንዲሰራ አቅም እንዲሆን ነው። አሁን ይሄንን አድርገን በጥንቃቄ እየሰራን ነው። ይሄ በየትኛውም መንገድ ለኛ ለወታደሮቹ ደስተኞች የሚያደርግ ነው ነን። ለህዝቡ ደግሞ የበለጠ ደስታ ነው። ብሄርን የማያይ፤ ዘርን የማይመርጥ ኢትዮጵያዊ የሆነ የፀጥታ መዋቅር መገንባቱ፤ ደህንነቱን የሚጠብቅለት ኃይል መኖሩ ከማንም በላይ ህዝቡን ያስደስተዋል።
እኛም በየመንደሩ በየክልሉ ከሚደራጀው ኃይል ጋር ፖለቲከኛው ባመፀ ቁጥር መጋጨት ሰለቸን። እኛ መዋጋት ያለብን ከኢትዮጵያ ውጭ ካለ ወራሪ ጋር ነው። ስለዚህ ይሄ አፈፃፀም ላይ ጥናት ቀርቦበት መንግስት ወስኖ ኮሚቴ ተቋቁሞ እኩል በጋራ ነው እየተፈፀመ ያለው።
እዚህ ላይ መጠንቀቅ ያለብን ሶሰት ነገሮች አሉ፤ አንደኛ ትጥቅ ይፈታል ለማነው የሚፈታው? ሁለተኛ ለማነው የሚፈታው? ልዩ ኃይል ትጥቅ ሊፈታ ነው የሚለው ሀሰት ነው። እንዲያውም ሌላ መሳሪያ እንሰጠዋለን። እኛ ያልነው ሌላ ብረት እንሰጥሃለን እንጂ ትጥቅ ፍታ ያለ የለም። ከእኛ ጋራ ነው የሞተውን ወደ ህጋዊ መስመር እናስገባው እንጂ እንበትነው አላልንም አንዱ ይሄ ነው።
ሁለተኛ አንደኛው ክልል ኃይል እንዲኖረው ሌላው ክልል ግን ኃይል እንዳይኖረው አናደርግም። ይሄ ኢትየጵያ ውስጥ አይታሰብም። ከልሎች ልይዙት የሚችሉት ኃይል አንድ ነው፤ ይሄም መደበኛ ፖሊስ ነው። ከዚህ ውጭ አይዝም። መደበኛ ፖሊስ አድማ በታኝ ይኖራል ከዚህ ውጭ አይፈቀድም። ህጉም አይፈቅድም፤ ሌላው ኃይል ግን ወደ ትክክለኛው የፀጥታ ኃይል መግባት አለበት። አፈፃፀሙን እኩል እያደረግን ነው ያለነው። አንደኛውን አሳጥተን አንደኛውን የምናተጋው አይደለም። አፈፃፀሙም እኩል ነው። የከተማ ቀልደኛ የሚያወራው ወሬ ነው። ለእኛ እሄ አይሰራም። ትልቅ ኃላፊነት ያለብን ሰዎች ነን።
ሁለተኛ ኢትዮጵያን እኩል የምናይ ነን። ኢትዮጵያን ምንጠብቅ ነን። ስለዚህ አንደኛውን አሳብጠን አንደኛውን የምናረግብበት ነገር የለም። ሶስተኛው ፕሮግራም ደግሞ የታጠቁ ኃይሎች ትጥቅ መፍታት አለባቸው ለምሳሌ የትግራይ ክልል እንደማንኛውም ክልል መደበኛ ፖሊስ ብቻ ነው የሚኖረው። የታጠቀ ልዩ ኃይል የሚባል በፍፁም አይኖረውም። ሶስት ዓመት እኮ የታገልነውም በሰላም ስምምነቱ እና ማዕቀፉ መሰረትም ደግሞ እየሄደ ያለው ይሄው ነው።
በህገ መንግስቱ የፀጥታ ኃይል፤ መከላከያ፤ ፌደራል ፖሊስ ይኖራል። በክልሎች መደበኛ ፖሊስ ይኖራል። እንደገና ሲደመር ሶስት ሬንጀር ይኖራል፤ የኢትዮጵያ ህዝብ ሰለሳ ሬንጀር አያይም ይሄ ነው እውነቱ። ስለዚህ በፕሮግራማችን መሰረት ደግሞ አፈፃፀሙ ላይ በሁሉም ክልል በሚባል ደረጃ ይሄንን ውይይት በየደረጃው ያለው አመራር ተወያይቶበታል፤ ተቀብሎታል፤ ደስተኛም ነው።
በአንዳንድ የአማራ አካባቢ እና ዩኒቶች ከልሆነ በስተቀር አማራ ልዩ ኃይል የሚባለውም አብዛኛው ተቀብሎታል፤ ይሄ ደግሞ የኮምዩኒኬሽን ችግር ነው። ይሄንን የኮምዩኒኬሽን ችግር አሁን እየፈታን ነው ያለነው። አፈፃፀሙ ላይ የታየው ጉድለት ይሄ ነው። እንዲህ አይነት ነገር ሊኖር እንደሚችል ደግሞ እንጠብቃለን፤ አስበንም ነው የገባነው። ከዛ ውጭ ግን ባወጣነው ፕሮግራም መሰረት በአጭር ጊዜ ይሄንን ኃይል ወደምንለው ፕሮግራም እናስገባዋለን።
ቢቢሲ ፡- ወደ ፊት በአገሪቱ ያሉ የፀጥታ ስጋቶች ተፈትተው ዘላቂ የሆነ ሰላም እና መረጋጋት እንዲፈጠር ከማን ምንድነው የሚጠበቃው ይላሉ?
ጄነራል አበባው፡- እዚህ ላይ ልገልፀው የምፈልገው ነገር ምንድነው፤ አሁን በኢትዮጵያ ትናንሽ ክፋቶች ቀርተዋል፤ እነዚህን ትናንሽ ክፋቶች ደግሞ በትናንሽ ሞት እናልፈዋለን፤ ምንም ጥያቄ የለውም። ክፋቱ ሁለት ነው። አንደኛውም፡- በጉልበት ኢትዮጵያ ውስጥ ስልጣን ለመያዝ መሞከር ነው። ይሄ አይቻልም እባካችሁ ወንድሞቼ ከሰሜኑ ጦርነት ተማሩ ነው የምለው አይቻልም። ኢትዮጵያ ውስጥ የሚፈቀደው በህግ ብቻ ነው።
እርሱም ህገ መንግስቱ ነው። የስልጣን ባለቤት የሚያደርገው ደግሞ ህዝቡ ነው። ታጥቄ አድማ መትቼ መንገድ ዘግቼ ስልጣን እቀይራለሁ የሚባል ነገር በፍፁም አይታሰብም። ሁለተኛው ደግሞ ቅድም ያልኩሽ ነው፤ የዘር ካባ ይለብስ እና የእርሱን የአጥንት ፖለቲካ ወደዚህ ወርውሮ መንገድ ከልክሎ፣ ህዝብን አሳምፆ፣ ወጣቱን አሳምፆ እንደዛ አድርጎ ስልጣን መያዝ የሚባል ነገር የለም። ይሄንን አትጠራጣሩ መልክ እናሲዘዋለን።
ኦሮሚያ የሚንቀሳቀስ ሸኔ አለ። በምዕራብ አካባቢ ደግሞ የተወሰነ የሚንቀሳቀስ ኃይል አለ። ይሄን ኃይል ቅድም ባልኩት መንገድ ከቻለ በሰላም ይምጣ እና ይደራደር ካልቻለ ግን እናጠፋዋለን፤ እናፀደዋለን። ይሄንን አውቆ ከመንግስት ጋር፤ ከክልል መንግስት ጋር ቢደራደር ነው የሚሻለው። ትጥቁን ፈትቶ በሰላም ቢቀጥል ነው የሚሻለው።
እኛ ምንም ጥያቄ የለውም የአገራችንን ሰላም እናረጋጋዋለን፤ ህዝቦችም በሰላም ገብተው የሚወጡበት ሰላም እንፈጥራለን። አብሮነቱን ይዘን እናስቀጥላለን። የአብሮነቱን ነቀርሳ የሆኑትን እየለቀምን እንጠርጋለን፤ ከዛ በኋላ ወደ ትልቁ ጠላታችን ፊታችንን እናዞራለን። ትልቁ ጠላታችን ደግሞ ከኢትዮጵያ ውጭ የሚመጣው ነው። ለዚህ ደግሞ እራሳችን እናዘጋጃለን።
እዚህ ላይ ለሶስት አካላት መልዕክት ማስተላለፍ እፈልጋለሁ። አንደኛው እና ትልቁ የኢትዮጵያ ህዝብ ነው። የኔ እና የኔ ጎደኞች የማይገባን ነገር አለ። ኢትዮጵያ ትፈርሰለች ይሉናል፤ ሲያስፈራሩን ነው። በንግግር ካፈረሷትመ 60 ዓመት አድርገዋል። ኢትዮጵያ የተዋቀረችበት መንገድ እንድትፈርስ የሚያደርጋት አይደለም። በሐይማኖት መጥተው፣ በዘር መጥተው ልትበተንብህ ነው አይበሉት። እነርሱ ባመጡት እሳት ደግሞ ከማንም በላይ የሚጎደው ህዝቧ እና ወታደሮቹ ነን።
ስለአገር መፍረስ የሚያወሩ ሰዎች ምላጭ አይስቡም። አይጋፈጡም። ስለዚህ አንድ መከላከያ እንዲኖር ሀዝቡ ከጎናችን መቆም አለበት። ሁለተኛው መልዕክት ለፅንፈኞቹ ነው። አገር ውስጥም ሆናችሁ ከአገር ውጭም ሆናችሁ በሰላም ለሚኖረው ህዝብ ማዘን አለባችሁ። ሁሉም አማራጭ ኢትዮጵያ ውስጥ አለ። በጉልበት ነው፤ በአመፅ ነው የምንገለብጠው ለምትሉት ህይወት ከመክፈል ውጭ ሌለ ምንም የምታመጡት ነገር የለም። ኢትዮጵያን ለመጠበቅ የሚችል በጣም በጣም በጣም ዝግጁ የሆነ ኃይል አለ።
ኢትዮጵያ ውስጥ አንደኛ የሚባል ህዝብ የለም። ሁለተኛ የሚባል ህዝብ የለም። ማንም ከማንም አይበልጥም። እኩል የምንኖርባት አገር ነች ያለችን። እኩል የምንኖርባትን ኢትዮጵያ ደግሞ የመጠበቅ ግዴታ አለብን። እኟ የተገመድንበት ገመድ ልዩ ነው። እኛ የተገመድንበትን አገማመድ በቅጡ ማወቅ ይገባል። እኛ የተገመድንበት አገማመድ ኢትዮጵያን ለማጽናት እንደሚያስችል ግልጽ መሆን አለበት። ሶስተኛው ፖለቲከኛው ኃይል ነው። እኛ የአንተ ሙያ ጋር አልገባንም ስለማይመለከተን እኛ ላይ ግን አትግቡ። እኛ ላይ መግባት የሚፈቀድላችሁ ህዝብ ሲመርጧችሁ ብቻ ነው። ህዝብ ካልመረጣችሁ እኛ ሙያ ላይ አትግቡብን። የእናንተ ሙያ ላይ እንዳልገባነው ሁሉ እኛም ሙያ ውስጥ አትግቡብን።
ይሄ ትልቅ ባውንደሪ ነው። ከቻላችሁ ህዝቦች አብረው እንዲኖሩ ፖለቲካውን ቀይሩት። እኔነኝ አንደኛ የሚለው ፖለቲካ ኢትዮጵያ ውስጥ እንደማይሰራ ይግባችሁ። በጉልበት ኢትዮጵያ ውስጥ ስልጣን እንደማይያዝ ከትላንትናው ጦርነት ይግባችሁ። የኢትየጰያን አንድነት አትሸርሽሩ። ግን ይኄ የእናንተ ጉዳይ ነው። የእናንተን የአጥንት ፖለቲካ መከላከያ ውስጥ፤ ጸጥታ ኃይሉ ውስጥ አታምጠት።
ተከባብረን በየሙያችን ነው መስራት ያለብን። የኢትዮጵያ መከላከያ ሰራዊት፤ ደህንነት ኃይሉና ፌዴራል ፖሊስ የጀመርነውን ሪፎርም አጠናክረን እንቀጥላለን። አሁን ያለውን ነገር በየደረጃችን እናውቀዋለን። ሁሉንም ችግሮች ዋጋ እየከፈልን፡ እየደማን፡ እየሞትን ቢሆን ኢትዮጵያ ትቀጥላለች። ስለዚህ ይህንን አላማ ተረድቶ መላው የክልሎች የጸጥታ ኃይል በጀመርነው ፕሮግራም እና በተስማማንበት መንገድ እንድንሄድ ከጎናችን ሁኑ። ህዝቡም ከጎናችን ሆኖ እንዲያግዘን።
ኢቢሲ።- በአንዳንድ ማህበራዊ ሚዲያዎች፤ በአንዳንድ የፖለቲካና ወታደራዊ አመራሮች ላይ የሚነሱ አሉባልታዎች ወይም ደግሞ ስም የማጥፋት ዘመቻዎች እንመለከታለን። በተለይ ከእርሶ ጋር ተያይዞ ከአንድ ክልል ወይም ከአንድ ብሄር ጋር በማገናኘት ስሞትን ሲያነሱ እንመለከታለን። እዛ ላይ ምን ይላሉ
ጄኔራል አበባው፡- እኔ ማለት የምችለው፡ እኔ ሰው ነኝ፡ አበባው እባላለሁ። ሲቀጥል ኢትየጵያዊ ነኝ። ሲቀጥል ደግሞ የኢትየጵያ ጄኔራል ነኝ። ስትደምሪው ደግሞ ኢትየጵያዊ ነኝ። የማስተዳድረውም ከአራቱም ማዕዘን የመጣን ወታደር ነው። የአንዱ መሆን አልችልም። የተገነባሁበትም ይሄ ነው። የአደግኩበትም ይሄ ነው። ስለዚህ በግሌ የሚመጣ ነገር ምንም አያስጨንቀኝም። አንደኛ አልሰማውም።
ኢትየጵያ ውስጥ ያለውን የመከለካከያ አባል፤ ጄኔራል፤ ኦፊሰር በዘር አሳምነሽ ወደ አንቺ ልታደርጊው አትችይም። ከወሰድሽውም የመንደር ጄኔራል ነው የሚሆነው። የኢትየጵያ ሊሆን አይችልም። እኛ ደግሞ ክብራችንን እንፈልገዋለን። የኢትየጵያ ጄኔራል ስንባል እንጂ የአንድ መንደር ጄኔራል እንድንባል አንፈልግም። ለዛም አይደለም እየሞትን ያለነው። እንደውም ችሎታው ካለን ከዛም እንወጣለን። ድንበር ዘለል ጄኔራል መሆን ነው የምንፈልገው።
ኢቢሲ- በመጨረሻ ቀረ ያሉት ኃሳብ ካለ ዕድሉን ልስጥዎት
ጄኔራል አበባው– እኔ ማለት የምፈልገው ለህዝቡ ነው። ህዝቡ መጠየቅ የሚፈልገውን ማንኛውንም ነገር መጠየቅ ይችላል። እየሰራን ያለነውን ነገር ደግሞ በትክክል እየገለጽን እንሄዳለን። አሁን እኛ እየሰራነው ያለነው ነገር የህዝቦችን ሰላም፤ የህዝቦችን አንድነት፤ የሕዝቦችን መተማመን የሚያመጣ ነው። ከእኔ በላይ ህዝቡ ይገባዋል ብዩ አስባለሁ። አሁን ወጥቶ ከአንዱ ክልል ወደ ሌላ ክልል መሄድ ይችላል? ከአንድ ሰፈር ወደ ሌላ ሰፈር ደፍሮ መሄድ ይችላል? ከአንዱ ቦታ ወደሌላ ቦታ ሄዶ መዝናናት ይችላል?
ይህንን እንቅፋት ነው እያጸዳን ያለነው። ስለዚህ የጋራ ሰላማችን ስለሆነ ህዝቡ ከጎናችን እንዲሆን ሁለተኛ በጉልበት የሚሄዱትን ህዝቡ እራሱ ቢመክራቸው። እኛ ካጠፋንም እኛንም ቢመክረን፡ ቢገስጸን እኛ እንፈልጋለን። ከዛ ውጪ መወያየትና መመካከር እየቻልን ወደ አላስፈላጊ ነገር የምንሄድበትን መንገድ ማቆም አለብን። የሁሉም ክልል የጸጥታ ኃይሎች እንዴት አስበን እየሰራን እንደሆነ በትክክል ስለምታውቁት። አንዳንድ ቦታዎች ላይ ያልተረዳችሁ ካላችሁ ለመረዳት ሞክሩ። ቆም ብላችሁ አስባችሁ ወደ ፕሮግራሙ ኑ፡ ከማንም በላይ የምትጎዱት እናንተ ናችሁ። ግለሰቦች። ተጎጂዎች ግለሰቦች ናቸው። ስለዚህ አገራችን በጉልበታችንም፡ በላባችንም። በጸሎታችንም፡ ሰላም ሆና ትቀጥላለች።
አዲስ ዘመን ሰኞ ሚያዝያ 2 ቀን 2015 ዓ.ም
