እውነት ሲቀርብ

ወለል በቀይ አበባ ንስንስ ፈክቷል። ጠባቡ ክፍል በሻማ መብራት ተውቧል። የእራት ቀሚስ የለበሰች እጅግ የተዋበች እንስት አጠገብ ጓደኛዬ ሰለሞን ተንበርክኮ ከኪሱ ቀለበት አውልቆ “ታገቢኛለሽ” ጥያቄ ለፅጌረዳ ሲያቀርብ ከፊታቸው ደስ የማይል ስሜት እየተሰማኝ ነው። ቆሜ በቅሬታ ውስጥ ሆኜ አጨበጭባለሁ። የማየው ነገር እጅግ አብሽቆኛል።

ከጥቂት ደቂቃዎች በፊት እኔ ጓደኛዬ ሰለሞንና ፍቅረኛው ፅጌረዳ አብረን መናፈሻው ውስጥ ነበር። በመሀል ጓደኛዬ እየተጫወትን ሳለ ድንገት ብድግ ብሎ መጣሁ ብሎን ወደ መታጠቢያ ቤት ሄዶ ቆየብን። ጓደኛዬ ሳይኖር ከፅጌረዳ ጋር መቆየቱን አልወድም። እጅግ ጠልቻታለሁ። ከርስዋ ጋር መሆኔ ምቶች አይሰጠኝም።

ከቆይታ በኋላ አንድ አስተናጋጅ መጥቶ ጓደኛቹ እዚያኛው ክፍል ይጠብቃችኋል ሲለን በአይን ተያይተን ወደተባልንበት ክፍል ስንሄድ እኔ ብዙ አሰብኩ። ስለ ፅጌረዳ ከኔ በፊት አውቆ ይሆን? ወይስ ፅጌረዳ ስለኔ የሆነ ተንኮል ሸርባ ነግራው ይሆን? እያልኩ እያሰብኩ ወደተባለው ክፍል ደረስን።

ለካስ ቀድሞ የተዘጋጀበት ነበርና ጓደኛዬ ለፍቅረኛው ፅጌረዳ የታገቢኛለሽ ጥያቄ ለማቅረብ አስቦ እና አስተናጋጆቹን በድብቅ አስተባብሮ ክፍል አዘጋጅቶና አስውቦ ነበር። ሁሉን ነገር በሚስጥር አድርጎት ጠርቶን ፍቅረኛውን ሰርፕራይዝ አደረጋት። ለእኔ ግን ለምን አልነገረኝም? ጥያቄ ውስጤ ተፈጠረ።

ፅጌረዳ እፊቱ ቆማ ስታለቅስ አይቼ እንባዋ የአዞ መሰለኝ። አብሬያቸው ብዙም አልቆየሁም። “እንኳን ደስ ያላችሁ” ብዬ ከክፍሉ ሾልኬ ወጣሁ። እዚያው ግቢ ውስጥ ባለ ምቹና ተለጣጭ ወንበር ላይ በጀርባዬ ተንጋልዬ በጭለማው መሀል ወገግ ብሎ የተገለጠውን ጨረቃ ማየት ጀመርኩ። ውስጤ እረፍት ሲሻ መረጋጋት ከእኔ ጋር ሲሆን ጨረቃን እያየሁ ውስጤን ማደስ ያስደስተኛል።

የጨረቃዋ ውበት ግን አልገለጥልህ አለኝ። በዚያውበትዋ ውስጥ የተደበቀ ጥላትዋ በዚያ ወገግታዋ ውስጥ የጨፈገገ ማንነትዋ በመፈለግ ላይ ነኝ። ጨረቃ ውብ ናት ችግሬ ከጨረቃ ጋር ውበት ማነፃፀሬ ነው። የጨረቃ ውበትዋ ወይቦብኝ አይደለም:: ውበትዋ ከፅጌረዳ ጋር ስለተመሳሰለብኝ ነው። ፅጌረዳም ውብ ናት። ሁለቱም ውብ ስለሆኑ ውብ ነገር ሁሉ አንድ አይነት መሰለኝ።

ጨረቃዋም ውብ ስለሆነች ልክ እንደ ፅጌሬዳ ንጹህ አልመስልህ ብላኛለች። ጓደኛዬ ምነው ውበትዋን ብቻ ሳይሆን ውስጥዋንም በተረዳ አልኩ። ፅጌረዳ ፍቅረኛው ናት፤ ነው ያልኩት? ወይ ፍቅር። በፍፁም አይደለችም። እሱ እስዋን ከራሱ በላይ የሚወዳት ፍቅረኛዬ ናት የሚላት ፅጌረዳ ግን ፍቅሩም ምኑም አይደለችም። እሱ ህይወቴ ናት የሚላት ፅጌረዳ የህይወቱ እንቅፋት መሆኑን አያውቅም።

እንደው ለአንድ ጊዜ ብቻ ከጀርባው የምታደርገው በተገለጠለት ኖሮ፤ ፍቅሩ ወደ ጥላቻ ተቀይሮ አጠገብዋ ባልደረሰ ነበር። አስመሳይ ናት። እወድሀለው እያለች የምታርድ አፈቅርሀለው እያለች በስውር የምትገዘግዝ። ላይዋ ተዋበ ውስጥዋ እንደ ፅጌረዳ እሾህ የምትዋጋ ሴት ናት።

የሚገርመው ጓደኛዬ ሰለሞን ውጫዊ የፈካ ውበትዋን እንጂ መሰሪነትዋ ተገልጦለት አያውቅም። የሚታየው የፅጌረዳ ንፁህ ፍቅር እና የለበጣ እንክብካቤ እንጂ ደባዋ አይታየውም። የሚታየው እውነተኛነትዋና አፍቃሪነትዋ እንጂ እምነት አጉዳይነት አይደለም።

ከራሴ ጋር ሙግት ውስጥ ገብቻለሁ። አልነግረውም፤ በፍፁም ከፊቱ ቆሜ እጅግ የምትወዳት ፍቅርህ ልታገባት ያሰብካት ሚስትህ፤አግቢኝ ያልካት ውድህ ላንተ ቀርቶ ለማንም የማትሆን ናት። አልለውም። ሚስትህ ልትሆን ከጫፍ የደረሰችው ሴት ለአንተ የምተገባ አይደለችም ብዬ ውስጡን አልሰብረውም። ግን ደግሞ ለእኔ ከሱ የሚቀርበኝ የለም። ከሱ በላይ በወንድምነትም በጓደኝነትም የኔ የምለው የለም። እንዴት ጉዳቱን እያየሁ ዝም እላለሁ? ይህ በየዋህነት ቀርቧት ህይወትን ትጋራልኛለች፤ ከስዋ ጋር ቤተሰብ መስርቼ ደስታን ትፈጥርልኛለች ያለት የህይወቱ መሰነናክል ስትሆን እንዴት ዝም ልበል።

ጓደኛዬን ማዳንማ አለብኝ። ግን እንዴት አደርጌ ነው ከዚህ ጉድ የማወጣው። ምላሽ የሌለው ጥያቄ አዕምሮዬ ውስጥ ይመላለሳል። ኡፉፉ!! ይጨንቃል። ምነው የዚያን ቀን ባላየኋት። ምነው ያን ገጠመኝ ከኔ በራቀና እኔም እንደ ጓደኛዬ ንፁህ ናት ጥሩ አፍቃሪ እና ታማኝ ናት ብዬ እስከዛሬ በቆየሁ፤ አልኩ። ፅጌረዳን ያልሆነ ቦታ ያየሁበትን ቀን ረገምኩት።

ቀኑ የዛሬን ያህል ቁልጭ ብሎ ይታየኛል። ድንገት አንድ መዝናኛ ውስጥ ከሌላ ጓደኛዬ ጋር አንድ ሁለት እያልን ስንዝናና ነበር፤ የፅጌረዳን ጉድ ያየሁት። አንዱ ጎረምሳ ወገብ ላይ ልክ እንደ ቀበቶ ጥምጥም ብላ እኛ ወዳለንበት መናፈሻ ገባች። ሳቅዋ ከልጁ ጋር ሲራመዱና ሲያወሩ የሚያደርጉት ሁሉ በ8 ዓመታቸው በናፍቆት የተገናኙና እጅግ የሚፋቀሩ ጥንዶች ይመስላሉ።

ማመን አቅቶኝ አይኔን አሸሁ። እያየሁት ያለሁት ነገር በህልሜ እንዲሆን ተመኘሁ። ነገር ግን ፅጌረዳ መሆንዋን አይኔም በእውን እያየ መሆኑን ነገረኝ። ከቤቱ አንዱ ጥግ ሸሸግ ብለን ስለተቀመጥን ፅጌረዳ ፈፅሞ እኔን አላየችኝም። ከጓደኛዬ ሰለሞን ጋር እንደዚያ ርግት ብላ የምትታየው ፅጌረዳ አሁን ከልጁ ጋር ስትከንፍ ሳይ አይ ይህችማ ፅጌረዳ አይደለችም አልኩ። ነገር ግን እራሴን መዋሸት አልቻልኩም።

ሁኔታውን ይበልጥ መከታተል ጀመርኩ ቦታ መርጠው ተቀምጠው ምግብ እስኪመጣ አይን ላይን ገጥመው ማውራት ቀጠሉ። በመሀል መሀል አንገቱን እያቀፈች ከንፈሩን ስትስመው ሳይ አደባባይ ላይ ሰው አለማፈርዋ ሳያንስ አስመሳይ መሆንዋን ሳስብ ሰውነቴን አንዳች ስሜት ወረረው። እጅግ አምርሬ ጠላኋት። ተበሳጨሁባት። እየሆነ ያለው ለጓደኛዬ ነገርኩት። ሰለሞንን ባያውቀውም እሱም ተናደደ። እንደምንም እራሴን ተቆጣጥሬ የሚሆነውን ማየቱን ቀጠልኩ።

በልተው ከጨረሱ በኋላ የሆነው ደግሞ እራሴን ከቁጥጥር ውጪ አድርጎኝ ብድግ ብዬ ሄጄ ላንቃት ብፈልግም ጓደኛዬ አረጋጋኝ። ይባስ ብሎ ልጁ ወደእንግዳ መቀበያ ዴስኩ ሄዶ እዚያው ሆቴል ውስጥ አልጋ ክፍል ሲጠይቅ ብር ከፍሎ ቁልፍ ተሰቶት ፅጌረዳን ይዟት ሲገባ አየሁ። ከዚያ በፍጥነት ወጥቼ እራሴን አረጋግቼ በንጋታው ከሰለሞን ጋር ላወራበት አሰብኩ። ሰለሞን ድንገት ስራ ክፍለ ሀገር ተመድቦ መሄዱን በንጋታው ጠዋት ደውሎ ነገረኝ።

 በስልክ ላወራው ስላልፈለኩ እስኪመጣ ታገስኩ። በመሀል ግን ፅጌረዳን አግኝቼ ስለጉዳዩ አወራኋት። መጀመሪያ እንደ መካድ አደረገችኝና በኋላ ሁሉንም ማየቴና እዚያ እንደነበርኩ ስነግራት ተረጋግታ በዝምታ ብዙ ቆየችና ኮስተር ብላ “ምን አገባህ፤እንኳን አደረኩ አለችኝ” ይሄንን ደግሞ ብትናገር አንተ ልትዳራኝ እንደፈለክና እኔ እምቢ እንዳልኩህ ነግሬው ከጓደኛህ ጋር አለያይሀለው። ምን ያህል እንደሚወደኝ ታውቃለህ እኔን ነው የሚያምነኝ ካንተ” ስትለኝ በንዴት በጥፊ ላጮላት ሁሉ አሰብኩ። ግን እራሴን መቆጣጠር እንዳለብኝ ተረዳሁ። ትቻት ሄድኩኝ።

እውነትዋን ነው ሰለሞን ሁሉነገርዋን አሳልፎ ሰቷታል ይወዳታል እምነቱን ሁሉ ሰቷታል። እነዴት አድርጌ ነው ላሳምነው ምችለው። በሀሳብ ተውጬ ቀናት አለፉ። መላ እየፈለኩ ሰለሞን መምጣቱንና ዛሬ ምሽት እንደሚፈልገኝ ነግሮኝ ዛሬ ተገናኝተን ነው ይሄ ሁሉ ነገር እየሆነ ያለው። ስንገኛኝ ከፅጌረዳ ጋር ሆነው ነው ያገኘኋቸው። ምንም ሳልል አብሬያቸው ቆየሁ። በመሀል ሰለሞን ለእስዋ ያዘጋጀውን ሰርፕራይዝ ይፋ አደረገ። እኔ ደግሞ በሚሆነው ውስጤ መቃጠሉን ቀጥሏል።

ጭንቅ ሲለኝ ከተንጋለልኩበት እምር ብዬ ተነስቼ ከመናፈሻው ግቢ ስወጣ ያልጠበኩት ሰው አየሁ። ወደኔ ሲቀርብ ተመልክቼ አንዳች ነገር አሰብኩና ሸርተት ብዬ እራሴን በመሳት ስሜት ቁጭ አልኩ። ሰውየው መጥቶ ያናግረኝ ጀመር። መጀመሪያ ደህና ሆኜ ስራመድ አይቶኝ ስለነበር ምን እንደሆንኩ ጠየቀኝ።

ስኳር እንዳለብኝ ነግሬው ተሯሩጦ ሚሪንዳ ገዝቶ እንዲያጠጣኝ በደከመ ድምፅ አወራሁት። ፈጥኖ አመጣልኝና ከጠጣሁ በኋላ ደግፎ እንዲያስገባኝ አደረኩና ሰለሞንና ፅጌረዳ ያሉበት ክፍል እየጠቆምኩት ወሰደኝ። ጓደኛዬ ከፍቅረኛው ጋር መሆኑንና እንዳናስደነግጣቸው ቀስ እንድንል ነገርኩት ለሰውየው። በቀስታ ከፍተን ስንገባ ፅጌረዳና ሰለሞን ተቃቅፈው ቁጭ ብለው በፍቅር ሲያወሩ ነበር። ደንግጠው ሲነሱ እኔም ወደጤነኛነት ተመለስኩ። ፅጌረዳና ሰውየው ተፋጠጡ። ሰውየው ከፅጌረዳ ጋር ባለፈው ያየሁት በሰለሞን የደረበችው ሰው ነበር። ሰውየውም ፅጌረዳም ደርቀው ቀሩ። ሰውየው ፅጌረዳ ላይ ያጓራ ጀመር። ተፈፀመ

ተገኝ ብሩ

አዲስ ዘመን መስከረም 7/2014