መራር ቀልዳቸውና ሳቃችን

ሆድ ይዞ የሚያንቆራጥጥ፣ ቁጭ እድርጎ የሚያንቀጠቅጥ፣ አንዳንዱን ደግሞ መሬት ላይ እያንከባለለ የሚያንፈራፍር ሳቅ ግን የት ሄደ? እኔምለው ሰዎቹ እሱንም ሰርቀውን ነው እንዴ የሄዱት? ልክ ነው፤ እነሱ ስንቱን ጥሩ ጥሩ ነገር ወሰዱብን? የተዉልን አስለቃሹን ነው:: ግን ቆይ ጎበዝ እነሱ መሳቅ አይችሉ፤ ሴራ ላይ ናቸው፤ ሳቁ ምን ይሰራላቸዋልና ነው ይዘውብን የሄዱት?

እያስመለስናቸው እንዳሉት ብዙ ነገሮቻችን ሳቃችንንም ማስመለስ አለብን:: እዚህም ላይ መስራት አለብን:: በእርግጥ ውዶቼ ሙሉ ሳቃችን በቅርቡ ይመለሳል፤አትጠራጠሩ:: እናስመልሳቸዋለን:: እያመማቸውም ቢሆን ይመልሷታል::

እውነቴን ነው የምላችሁ፤ እኔ ካካካካካ….ቂቂቂቂቂቂ ሃሃሃሀሃሃ የሚሉት አንከትካች ሳቆች አይደለም በዚህ መልክ የሚስቅ ሰው ካየሁ ስንት ጊዜ ሆነኝ መሰላችሁ:: በዚህ መልክ የሚስቅ ሰው አገኘሁ ስል ወዲያው አቀሞ ይቆዝማል:: ወይ ጉድ!

ደግነቱ ግን እንዲሁ መለስ ያለ ሳቅ እዚህ እዚያም በምንመለከተው ጉዳይ አልራቀንም:: ባይሆንማ ህይወት በራስዋ ትፀልምብን ነበር:: አሁን ላይ ደግሞ ሳቆቻችን ከምሬት ውስጥ የሚፈልቁ ሳንወድ በግድ የሚያስፈግጉን ሆነዋል:: እነዚያ ሳቃችን የሰረቁት የሚቀልዱት መራር ቀልድ በእነሱ ላይ እንድንስቅ እያደረገን ነው:: ከዚያ መንደር ያሉት ባለማፈር የሚናገሩትን ባለማስተዋል የሚቀባጥሩት ሁሉ ሳንወድ በግድ እንድንስቅ ፣ሳንፈልግ እንድናስካካ እያደረጉን ነው::

ሰውዬው ለካስ “ወደው አይስቁ” ያለው ይህን አይቶ ነው:: የመረረ ጫዋታው የሚያስቃችሁ ሰው የለም:: እየሳቃችሁ የምትገምቱት እየሳቃችሁበት ጉዳዩ ቁብ የሌለው መሆኑን የምትገልፁለት አይነት ሰው:: የሳቃችን ምንጩ ሰዎቹ አልያም የሚያነሱት ርዕሰ ጉዳይ ነው:: ታዲያ በዚህ መልኩ ሳቅ የሚፈጥሩብን ሰዎች ፈፅሞ ውስጣችን ላይ አንዳች ደስ የሚል ስሜት አይፈጥሩብንም:: እንዲሁ በሳቃችን ውስጥ ለእነሱ ያለንን ምልከታ በብዙ ብናሳይ እንጂ::

አለ አይደል፤ ህፃናት በምናጫውትበት አልያም በምናባብልበት ጊዜ ህፃናቱ እኛ በምንፈጥረው ማታለል ሲታለሉና ሲስቁ እያየን እኛም የምንስቀው ሳቅ::ይሄንንም እንደዛ በሉት:: ልዩነቱ እነዚህ ሳቅ የሚፈጥሩብን ሰዎች የሚያነሱት ጉዳይ የመረረ መሆኑንና እኛ በእነሱ ንግግርና ተግባር መሳቃችን ብቻ ነው::

እኔ ምለው እነዚያ ሳቃችን የሰረቁት እነሱ ይስቁበት ይሆን እንዴ? አይመስለኝም፤ የእኛን ሳቅ ቀምተው ቢያለቅሱ እንጂ አይስቁም፤ መሳቅ አይችሉምና:: በእርግጥም እያለቀሱ ነው::

ምን እነዚህ ነጣቂዎች ስንቱን ቀምተውናል መሰላችሁ:: ግድ የለም አሁን ላይ የቀሙንን ሳቅ ሁሉ ወደራሳችን በራሳችን እንመልሰዋለን:: በዚህ እርግጠኛ ሁኑ:: በነገራችን ላይ በሴራቸው የቀሙን ሳቅ እንዳይጎልብን አስበው መሰለኝ አልፎ አልፎ በመራር ቀልዳቸው እንድንስቅባቸው እያደረጉን ነው:: አንዳንድ ብርቱ የሆኑ መራር ቀልደኛ ጥራዝ ነጠቅ ኮሜዲያን አላቸው::

አንዳንዴ ሰዎች ባላቸው ጠባብ ምልከታ ሰፊ እና ጥልቅ የሆኑ ውስብስብ ጉዳዮችን ያቀላሉ:: እነዚህ ሳቅ የሚፈጥሩብንና በሳቃችን የምንታዘባቸው ብሎም የምንስቅባቸው ሰዎች የምር ሳቅ አይፈጥሩብንም:: ይልቅ ስራና ተግባራቸው መራር ሳቅ ይፈጥርብናል:: ጥርሳችንን ከፍተን ምን አልባትም ካካካ ወይም ቂቂቂ ብለን ሳቃችንን በድምፅ ልናጅበው እንችል ይሆናል::

ከሳቆቻችን ነጣቂዎች አንዱ በነፃነት ሰውን ይዘልፋል፤ ያለ ልክ ማህበረሰብን ያንቋሽሻል:: አንድ ወቅት ስለ ባህላዊ ጨዋታ ሲያወራ ብዙዎች ፈግግ ብለውበት ነበር:: በቀልዱ ሳይሆን በቀላጁ ነው ፈገግ ያሉት::

ስሙ አሉላ ነው:: አሉላ የሚለው ስም ለእሱ ፈጽሞ አይመጥነውም:: ግን ምን ይደረግ፤ ራስ አሉላን በእጅጉ ይቃረናቸዋል:: እሳቸው ለአገራቸው የተዋደቁ ጀግና ፤ለኢትዮጵያ የታገሉ ታላቅ ሰው ሲሆኑ እሱ አገሩን ለማዋረድ የተፈጠረበትን ለማፍረስ የሚጥር የመንደር ቧልተኛ ነው:: ትልቅነትና ትንሽነት በሁለቱ መካከል ያለ ልዩነት ነው:: እናም የዚህን ጉደኛ ቧልተኛ ጉዳይ እያነሳሁ መራር በሆኑ ቀልዶቹ እጅግ ያጠረና ያላገናዘበ ምልከታውን ላሳያችሁማ፤ ቆዩኝ:: የምር በሳቅ ፍርስ ያሰኛል፤ ተግባርና ንግግሩ:: በአገር ላይ ለመቀለድ መሞከሩ ይመራል እንጂ::

ያኔ ትዝ ይላችኋል፤ ይህቺን አገር ለማፍረስ ዱብ ዱብ በይፋ የጀመሩ ሰሞን:: አዎ ያኔ ነው ፤ይህ ወገኛ መራር ቀልዱን ጀምሮ የነበረው:: “ጦርነት ለኛ ባህላዊ ጨዋታችን ነው…ከፈለጉ መጥተው ይግጠሙን” እያለ በይፋ የሰው ልጅን ያህል ክቡር ፍጡር ለመስዋዕትነት የሚያቀርብ ጦርነትን ሲቀሰቅስ ነበር:: ልብ አድርግ ወገን ፤“ ጦርነት ባህላዊ ጨዋታችን ነው” ነበር ያለው:: ምን ዋጋ አለው ይህ ቧልተኛ የሚጋጠመው ከኢትዮጵያ ልጆች ጋር መሆኑን ረስቶት ባህላዊ ጨዋታው ከ15 ቀን ባልበለጠ ጊዜ ሲከተከት ጨዋታውን ቀየረ::

መልሶም በሌላ ጨዋታው ትንሽ ፈገግ አስብሎን ብዙ ሳቅንበት:: ይሄ ልጅ ባህላዊ ነገር ይመቸዋል መሰለኝ:: ያኔ እሱ ባህላዊ ጨዋታችን ነው ባለው ወገቡ ከተሰበረ በኋላ ሌላ ባህላዊ ጉዳይን አነሳ:: “ወገኖቼ በፍፁም ከኢትዮጵያዊ በርበሬ፣ሽሮ፣እንጀራ ባህላዊ ምግብ እንዳትገዙ፤ እንዳትጠቀሙ” ብሎ አንድ ብቻውን እየቀባጠረ በሚውልበት ገፁ ላይ አሳዛኝ የሆነ ገፅታውን ይዞ ሲናዘዝ ሰምተንም ስቀንበታል:: ምን እንዲበሉ አስቦ ይሆን? እኔ ምለው ይሄንን ቀልድ ግን ከየት ለምዶት ይሆን እባካችሁ:: አሁን ላይ በጠፋ ቀልድና ሳቅ እሱ ባይኖር በምን እንስቅ ነበር ፤ማለቴ ማን ላይ እንስቅ ነበር:: ምን ዋጋ አለው ?ሊያስቀን የሚነግረን ሁሉ ስለሱ እያሰብን መሳቀቃችን በዛ እንጂ::

ይሄ ጉደኛ ሰሞኑን በሌላ መራር ቀልድ ብቅ ብሏል:: እኛ ያልመራናት ኢትዮጵያ ብትንትንዋ ይውጣ:: እኛ ከሌለን ኢትዮጵያ ህልውናዋ ምን ሊረባ ብሎ በድፍረት ሲናገር ተሰምቷል:: አይገርምም ውዶቼ አንድ ተራ ቧልተኛ ኢትዮጵያን የምታክል ግዙፍ አገር በጠባብ መነፅሩ ተመልክቶ እኔና የኔ ቢጤ ብቻ ካልተጠቀመ እንደፈለገ ካላዘዘና ካልሰረቃት አታስፈልግም ብሎ ሲደነፋ:: በእርግጥ ልኬታውን የማያውቅ የኢትዮጵያን ትልቅነት በምን እሳቤ ሊረዳ ይችላል::

ለምስረታዋ አንዲት ጠጠር ያልወረወረ፣ ስትፈጠር ለመፈጠር አይደለም ያልታሰበ አንድ ተራ ቧልተኛ ነው እንግዲህ ቀዳሚ የሆነ ታሪክ የተጎናፀፈች፣ህዝቦችዋ በፍቅር ተሳስረው የሚኖሩባትና በአንድነት ጠብቀዋት የቆይዋትን እምዬ ኢትዮጵያን ብትንትንዋ ይውጣ የሚል::

ደፋርና ደንባራ መነሻውን እንጂ መድረሻውን አያስብም ይባላል:: የሚገርመው ግን ይሄ ጉደኛ መነሻውም መድረሻውም በፍፁም ያለየ ነው:: ማስረጃ አለኝ መነሻው ዛሬ እኔ ካልመራኋት ትፍረስ እኔ እንዳሻኝ ካልዘርፈኳት ትውደም የሚላት ኢትዮጵያ ጡት ነካሽ ሆኖባት እንጂ ከአመዳማነት ወደ ወዛማነት ቀይራው ነበር::

ኢትዮጵያ እናት ናትና እሱንም ልጄ ብላ አቅፋ አሳድጋ ከሌላት ላይ ቀንሳ ከፍ አድርጋው ነበር:: ከሀዲነቱ በርትቶ ዝቅታ ላይ ተገኘባት እንጂ:: እናም መነሻውን ነው ትውደም የሚለው:: ምክንያቱም መነሻውን አያውቅማ::

መድረሻውንም አያውቅም ያልኩትም በምክንያት ነው:: የኢትጵያን ግዙፍነት፣ የኢትዮጵያዊያን ፅኑነትና አገር ወዳድነት፣የህዝቦችዋን አንድነት ጠንቅቆ አያውቅምና ዛሬን እንደምትሻገር ነገ መፍረስ ሳይሆን መጠንከር የእስዋ መገለጫና ከፍታ መገኛዋ መሆኑን አያውቅም:: እሱና ሴረኛ ሀሳቡ ከመሰል ጋሻጃግሬዎቹ ጋር መድረሻ እንደማያገኙ መገኛቸውም ተራ ቦታ እንደሆነ አይረዳም:: ስለዚህ ይህ ጉደኛ መነሻውንም መድረሻውንም አያውቅም::

እሱ ብቻ አይደሉም በእድሜ ዘመናቸው ምላስና ሰንበር ብቻ መተዳደሪያቸው፣ውሸትና ቅጥፈት የስራ ዘርፋቸው የሆኑ መሰሎቹ እንደሱው መራር ቀልድ እየቀለዱ እንድንስቅባቸው ደጋግመው ግብዣ ያቀርቡልናል:: እኔ የምለው ሰው ስብዕናን የሚያህል አካል ተሸክሞ፤ ሰው መምሰልን መስሎ እንዴት ርካሽ ነገርን ከራሱ ጋር ያዋህዳል:: ኢትዮጵያን ከመሰለ ውድና ክቡር ማንነት ረከስ ብዬ ልገኝ እንደምን ይላል? አበቃሁ፤ ቸር ይግጠመን::

ተገኝ ብሩ

አዲስ ዘመን ነሃሴ 14/2013