ሀይለማርያም ወንድሙ
በዛሬው አዲስ ዘመን ድሮ አምዳችን አዲስ ዘመን ጋዜጣ በ1950ዎቹ እና 60ዎቹ ህብረተሰቡ በተለያዩ የልማት ስራዎች ገንዘብ በማዋጣት ያደርግ የነበረውን ተሳትፎ ከሚያመለክቱ ዘገባዎች ጥቂቱን ይዘን ቀርበናል።
የዕድር ወኪሎች ስለልማትና ፀጥታ ተወያዩ
አ.አ. ኢ.ወ.ም/በመስፍነ ሐረርና አርበኞች መንገድ መካከል ለሚገኙ ፭ ሺህ ዕድርተኞች የተወከሉ የሰፈር ሽማግሌዎች ጳጉሜ ፭ ቀን እሁድ ከጧቱ ፫ ሰዓት በወይዘሮ ቀለመወርቅ ትምህርት ቤት ጠቅላላ ስብሰባ አድርገው፤ ስለሠፈራቸው ልማትና ፀጥታ ጥበቃ ተወያይተዋል።
በስብሰባውም የዕድሮቹ ምክትል ፕሬዚዳንት አቶ ፍስሐ ሀብተ ሥላሴ የአካባቢው ሕዝብ በኅብረት በመሥራት የቀበሌውን ንጽሕናና ፀጥታ መጠበቅ ያለበት መሆኑን አስገንዝበዋል።
በቀበሌው ሕዝብ በኩል ተወክለው የመጡት ሽማግሌዎቹም በየተራ ንግግር አድርገዋል። እንዲሁም የአካባቢው ንጽሕና የቀበሌው ፀጥታ የሚጠበቅበትንና በተለይም ለበዓሉ ሰሞን ያለፈቃድ ያልተመረመሩ ከብቶች እንዳይታረዱ ምክርና ማስጠንቀቂያ የሚሰጡ መሆናቸውን ተወያይተው የሚቀጥለው ቀጠሮ ለመስከረም 20 እንዲሆን ተወስኗል።
መስከረም 1 ቀን 1960
የሲዳሞ ጠ/ግዛትለልማትሥራ ፷፩ሺ ፰፻፯ ብር ተዋጣ
ይርጋ ዓለም፤(ኢ/ወ/ም) በክቡር ሌተና ጄኔራል ኢሳይያስ ገብረሥላሴ የሲዳሞ ጠ/ግዛት እንደራሴ አሳሳቢነት የተቋቋመው የልማት ሥራ መዋጮ ፤61 807 ብር ከ50 ሣንቲም ፤ደረሰ።
ይህም ገንዘብ የተሰበሰበው በጀምጀም አውራጃ ገዥ በፊታውራሪ ለማ ወልደ ጻዲቅ ሊቀመንበርነት ፤መስከረም ወር ፶፱ ዓ/ም/ እስከ ሰኔ ፴ ቀን ፶፱ ዓ/ም/ ድረስ ነው።
ከዚሁ ውስጥ የአረጋ ወረዳ ግዛት ሕዝብ 36 999 ፤ ከ50ሣንቲም ፤የአዶ ወረዳ ግዛት ሕዝብ 7 800 ፤የአሮሬሳ ወረዳ ግዛት ሕዝብ 5361 ፤የአዶላ ወረዳ ግዛት ሕዝብ 3628 ፤የዋደራ ወረዳ ግዛት 1706 ፤የክብረ መንግሥት ከተማ ሕዝብ 756 ያዋጣ መሆኑን የአውራጀው ግዛት ዋና ጸሐፊ አቶ መኰንን አበበ ገለጡ።
መስከረም 1 ቀን 1960
በመረዳዳት የተፈጸሙ ተግባሮች
ሻሸመኔ ፤ ሕዝብ ዛሬ መንግሥት ለመርዳትና ተባብሮ ማናቸውንም ሥራ ከግብ ለማድረስ ተነሣስቶ ይታያል።
የሻሸመኔ ከተማ ሕዝቦች ልጆቻቸው በትምህርት ቤት መጥበብ እንዳይቸገሩ በግምት ቁመቱ እስከ ፴ ሜትር ጐኑ ፷ ሜትር የሆነ ትምህርት ቤት ሠርተው ቆርቆሮ አልብሰዋል።
በሌሎች የሕዝብ ጉዳይ ማከናወኛዎችም በኩል የአገር አገዛዝ መ/ቤት ግምጃ ቤት የፖሊስ ጽ/ቤት እንዲሁም ለመሳሰሉት የሚረዱ የተያያዙ ክፍሎች ያለበት ትልቅ ቤት ሠርተዋል። ወደፊትም እንደዚህ ያሉትን ለሕዝብ ጠቃሚ ለሆኑት መ/ቤቶች መንግሥትን አናስቸግርም የማለት ድምፅ ስለሚሰማባቸው ተከታዩ የሐኪም ቤት ሳይሆን አይቀርም የማለት ተስፋ ሳይጣልባቸው አልቀረም ።
በሥራ ምክንያት በምንዘዋወርበት ሁሉ በየባላገሩ ሳይቀሩ መንገዶችን በመጠገን ፤ት/ቤቶችን በማስፋፋት ፤መ/ቤቶችን ከቀድሞው ሁኔታ በበለጠ በመሥራት በየክፍለ ሀገሩ ሕዝብ መንግሥትን ረዳ ማለት እንደዚህ ያለው ነው።
የአሩሲ ጠ/ግዛት አዣንስ።
(ጥር 18 ቀን 19 52 ዓ.ም ከወጣው አዲስ ዘመን)
የጅማ ዕድገት ኮሚቴ 45000 ብር ሰበሰበ
ጅማ፡- (ኢዜአ) በጅማ ከተማ የተቋቋመው የእድገትና ልማት ኮሚቴ ከጥቅምት ፩/፷፫ ዓ/ም ጥር ፲/፷፫ ዓ/ም ድረሽ ፵፭ ሺህ ብር ሰበሰበ ።
ኮሚቴው ገንዘቡን የሰበሰበው ከጅማ ማዘጋጃ ቤት ጋር በመተባበር ለከተማው እድገትና ውበት የሚያስፈልጉትን የአስፋልት መንገዶችና የመናፈሻ ሥፍራዎች ለማሠራት መሆኑ ታውቋል።
ኮሚቴው የተቋቋመው ባለፈው መስከረም ወር ፷፫ ዓ/ም ሲሆን ከሕዝቡ ለመሰብሰብ ያቀደውም እስከ ፩ ፻ ሺህ ብር ድረስ ነው። ማዘጋጃ ቤቱ ለጊዜው ፩፻፴፮ ሺህ ብር ፪፻ ሜትር ርዝመትና ፲፮ ቁመት ስፋት ያለው የአስፋልት መንገድና የአንድ የመናፈሻ ሥፍራ በማሠራት ላይ ይገኛል።
በኮሚቴው አማካይነት ከሕዝብ የሚሰበሰበው ገንዘብ በዕቅዱ መሠረት ከማዘጋጃ ቤቱ ጋር ለሚከናወነው የኅብረት ሥራ እንዲረዳ ጅማ ከተማ በሚገኘው አዲስ አበባ ባንክ ተቀማጭ እንደሆነ ተረጋግጧል።
እስካሁን ከተዋጣውም ገንዘብ ውስጥ የከፋ ጠ/ግዛት ትራንስፖርት ማኅበር ፫ ሺህ ብር፣ የምዕራብ ክፍለ ሀገር ንግድ ባንክ ፪ ሺህ ብር ፤የጅማ ኢ-ዲ-ስ -ኮ ኩባንያ ፩ ሺህ ፭፻ ብር ፤የአዲስ አበባ ባንክ ፩ ሺህ ብር ፤አቶ አህመድ ሸባን ፩ ሺህ ፭፻ ብር ፤ ቀኛዝማች አባ ጀማል አባቦራ ፩ ሺህ ብር ፤አቶ አብዱል ራዛቅ አብዱል ራደል ፩ ሺህ ብር ፤አቶ ዋከበደ ሻይ ፩ ሺህ ብር፤ አቶ መሐመድ አብዶ አሩሲ ፩ ሺህ ብር፤ አቶ ሰኢድ ቡኬር ሳሊም ፩ ሺህ ብር አቶ አዳሙ ገብረ ዋህድ ፩ ሺህ ብር ፤የኢትዮጵያ ኢንተር ፕራይዝ ኩባንያ ፩ ሺህ ብር፤አቶ ሁሴን አሸናፊ ፩ ሺህ ብር፤ አቶ ኢብራሂም ኑር ሁሴን ፩ ሺህ ብር ፤አቶ ዓሊ መሐመድ ፰፻ ብር ሰጥተዋል።
እንዲሁም አቶ ተገኘ መንግሥቱ ፤ግራዝማች አባገሮ መሐመድ ሀሰን፤ አቶ ዓለሙ ወልዴ አባ ቡላ ሀብቱ አቶ አህመድ አብዲ ፤አቶ የሱፍ መሐመድ ፤ አቶ ሰዒድ ዓሊ፤ አቶ ኑሪ ዓሊ ፤አቶ ዑስማን ዘኪር ፤ሲኞር ሚካኤሊ ፤አቶ መሐመድ አብዲ አቶ ዓለማየሁ ሜጫ አቶ ጣሂር ጀማል ፤አቶ ጀምበሬ ኃይሌ ፤አቶ ሲፋ መሐመድ ዓሊ አቶ በለጠ ሺበሺ አቶ ቀመሪ ዲን ኡላ ሙሉ፤አቶ አገር ኡላመሌ ፤አቶ ጋሊል ዓሊ ፤አቶ ፈቃዱ ሙስላ እያንዳንዳቸው ፭፻ ብር ሲረዱ በርከት ያሉ ሰዎችም ከ ፬፻ እስከ ፪፻ ብር ማዋጣታቸው ታውቋል።
(ጥር 8 ቀን 19 63 የወጣው አዲስ ዘመን)
አዲስ ዘመን ሚያዝያ 11/2013