በወጣቶች ተሳትፎ ለስኬት የበቃው የግንባታ ካምፓኒ

ስያሜውን ያገኘው ባሌ አካባቢ ከሚገኝ አንደኛው ቦታ ነው። ከተመሰረተ ገና ሁለት ዓመታትን ብቻ ያሰቆጠረ ቢሆንም ግዙፉን የቡልቡላ አግሮ ኢንዱስትሪ ፓርክና የሻሸመኔ የገጠር ትራንስፎርሜሽን ማእከልን በአጭር ጊዜ ውስጥ ገንብቶ ከጫፍ በማድረስ በግንባታ ኢንቨስትመንት ዘርፍ ስኬታማ ለመሆን ከበቁ የኮንስትራክሽን ኩባንያዎች ውስጥ አንዱ ለመሆን በቅቷል – የወላቡ ኮንስትራክሽን አክሲዮን ማህበር።
እኛም አክሲዮን ማህበሩ እንዲህ በአጭር ጊዜ ውስጥ ለስኬት የበቃበትን ምስጢርና ተሞክሮውን በግንባታው ዘርፍ ውስጥ ላሉ ሌሎች ተቋራጮች ብናጋራ ጠቃሚ ይሆናል ብለን ስላመንን የአክሲዮን ማህበሩን ማኔጂንግ ዳይሬክተር ኢንጂነር ደረጀ ኤርሚያስን በማነጋገር እንደሚከተለው አቅርበነዋል።
ወላቡ ኮንስትራክሽን አክሲዮን ማህበር የኦሮሚያ ብሄራዊ ክልላዊ መንግስት የክልሉን ኢኮኖሚ በከፍተኛ ደረጃ ለማሳደግ በታሰበው የኢኮኖሚ ሪቮሊሽን መሰረት በ12 የከተማ አስተዳደሮችና በተወሰኑ የልማት ድርጅቶች አክሲዮን ባለድርሻዎች በ320 ሚሊዮን ብር መነሻ ካፒታል በታህሳስ ወር 2010 ዓ.ም የተመሰረተ ነው። በዋናነትም ትኩረቱን በወጣቶች ላይ በማድረግ የክልሉንና የአገሪቱን ኢኮኖሚ በማሳደግ ከምስራቅ አፍሪካ ቀዳሚ የኮንስትራክሽን ኩባንያ ለመሆን የግንባታውን ዘርፍ ተቀላቅሏል።
ማህበሩ ከምስረታው በኋላ በደረጃ አንድ ግንባታ ተቋራጭነት በኦሮሚያ ክልል ምስራቅ ሸዋ አዳሚ ቱሉ ወረዳ የሚገኘውን የቡልቡላ አግሮ ኢንዱስትሪ ፓርክና የሻሸመኔ ገጠር ትራንስፎርሜሽን ማእከል በመገንባት ስራውን ጀምሯል። እስካሁን ባለው ሂደትም የፓርኩንና የማእከሉን የመጀመሪያ ምእራፍ ስራዎች ሙሉ በሙሉ አጠናቆ ለባለቤቱ ለማስረከብ ተዘጋጅቷል።
የሁለተኛ ምእራፍ የመንገድ፣ ውሃ፣ ኤሌክትሪክና መሰል የመሰረተ ልማት ስራዎችም ከ82 በመቶ በላይ ደርሰዋል። በሦስተኛው ምእራፍ የመኖሪያ ቤቶች ግንባታ ስራ ደግሞ ከ72 በመቶ በላይ የሚሆኑ ስራዎች ተጠናቀዋል። በአጠቃላይ ስራዎቹ በሰኔ ወር መጨረሻ 2012 ዓ.ም ሙሉ በሙሉ ተጠናቀው ባለቤቱ ይረከባቸዋል። አብዛኛዎቹን ስራዎቹንም በጥቃቅንና አነስተኛ ለተደራጁ ማህበራት በማከፋፈልና የስራ እድል በመፍጠር የአካባቢውን በርካታ ወጣቶች ተጠቃሚ ማድረግ ችሏል።
በሁለት ዓመታት ጊዜ ውስጥ ማህበሩ ከ300 በላይ ለሚሆኑ አነስተኛና መካከለኛ ማህበራት የስራ እድል ፈጥሯል። በአንድ ዓመት ጊዜ ውስጥ ደግሞ ለዚሁ የስራ እድል ፈጠራ ብቻ ከ148 ሚሊዮን ብር በላይ ወጪ አድርጓል። በዚህም የጥቃቅንና አነስተኛ ማህበራትንና የቀን ሰራተኞችን ጨምሮ እስካሁን ለአምስት ሺህ የአካባቢው ወጣቶች የስራ እድል ተፈጥሯል።
የኮንስትራክሽን ማህበሩ ዋነኛ አጋሮች ወጣቶች ሲሆኑ፣ በተለይም ከተለያዩ የአገሪቱ ዩኒቨርሲቲዎች ተመርቀው የወጡ ኢንጂነሮች፣ ከቴክኒክና ሙያ ትምህርትና ስልጠና ተመርቀው የወጡ መካከለኛ ባለሙያዎችና በአነስተኛና ጥቃቅን ተደራጅተው የሚሰሩ ናቸው። መንግስት ያስቀመጠውን የልማት አቅጣጫ መከተሉ ደግሞ ማህበሩን ለስኬት አብቅተዋል። የስራ ቁርጠኝነትና ከዜሮ በመነሳት ማደግ እንደሚቻል ያለው አመኔታም ማህበሩን በአጭር ጊዜ ውስጥ በርካታ ዓመታት በግንባታው ዘርፍ ከቆዩ ኩባንያዎች ተርታ እንዲሰለፍ አድርገውታል። የተሰጠውን ስራ በአጭር ጊዜና በአግባቡ ማከናወኑም ማህበሩን ለተጨማሪ ስኬት አብቅቶታል። በአንድ ዓመት ውስጥ የሚያንቀሳቅሰው የገንዘብ መጠንም ከአንድ ቢሊየን ብር በላይ ደርሷል።
በዚሁ የማህበሩ ተግባር አብዛኛዎቹ ወጣቶች ከአነስተኛና ጥቃቅን ተነስተው ደረጃቸውን በማሻሻል ደረጃ ስደስትና ሰባት የግንባታ ስራ ተቋራጭ ውስጥ መግባት ችለዋል። የስራ ባህላቸውን በማሻሻልም ተደራጅተው በመስራት ተጠቃሚ ለመሆን በቅተዋል። ከደረጃ አንድ እስከ ስደስት ያሉ የግንባታ ተቋራጮችንም ማህበሩ በሚያከናውናቸው የግንባታ ስራዎች ውስጥ በንኡስ ተቋራጭነት በመሳተፍ አቅማቸውን አዳብረዋል።
ከሰባት በላይ ደረጃ አንድ ተቋራጮችም የመሰረተ ልማትና የህንፃ ግንባታ ስራዎችን ከማህበሩ ጋር እየሰሩ ይገኛሉ። ይህም ማህበሩ እየሰራቸው ያሉ ስራዎችን በዋናነትም ቡልቡላ አግሮ ኢንዱስትሪ ፓርክንና የሻሸመኔ የገጠር ትራንስፎርሜሽን ማእከልን በአጭር ጊዜ ውስጥ ወደማጠናቀቂያው ምእራፍ ለማድረስ አስችሎታል።
በአሁኑ ወቅትም ማህበሩ አሁን ካለው የካፒታል መጠን በላይ ያስመዘገበ ሲሆን፣ በጊንጪ የሚገነባ አንድ የቢራ ፋብሪካ ፕሮጀክት ወስዶ በመጀመሪያው ምእራፍ የመኖሪያ ቤት ስራዎችን እያከናወነ ይገኛል። ከቡልቡላ አግሮ ኢንዱስትሪ ፓርክ ግንባታ ጥሩ ልምድ በማግኘቱም በቀጣይ በመንገድ ፣በንፁህ መጠጥ ውሃና በህንፃ ግንባታ ስራዎች ላይ በስፋት ይሳተፋል። ከሁለት ዓመት በኋላም ከ10 እስከ 15 ሺህ ለሚሆኑ ዜጎች በተለያየ መልኩ የስራ እድል ለመፍጠር እቅድ ይዟል።አራተኛ ዓመት ላይ ሲደርስም ከ20 ሺህ በላይ ለሚሆኑ ወጣቶች ተጨማሪ የስራ እድል ለመፍጠር አቅዷል።
ከቡልቡላ አግሮ ኢንዱስትሪ ፓርክና ከሻሸመኔ የገጠር ትራንስፎርሜሽን ማእከል ግንባታ በተጨማሪም ማህበሩ በቀጣይ ከኢትዮጵያ መንገዶች ባለስልጣን ጋር በመሆን የተለያዩ የመንገድ ፕሮጀክቶችን ለመገንባት የሚያስችለውን የጨረታ ውድድር ለማድረግ ቅድመ ዝግጅቱን አጠናቋል። ከዚህ ባሻገር በረጅም ጊዜ እቅድ ማህበሩ በህንፃ የመሰረተ ልማት፣ የአውሮፕላን ማረፊያዎች፣ የባቡር፣ የሃይል ማመንጫና የሪል ስቴት ግንባታ ስራዎችም ይሳተፋል። በሚቀጥሉት አምስት ዓመታት ጊዜ ውስጥም በነዚሁ የግንባታ ስራዎች ውስጥ በስፋት ይገባል ተብሎ ይጠበቃል። ከዚህ በዘለለም በ2015 ዓ.ም በሃር ውስጥ ግዙፍና ተወዳዳሪ እንዲሁም በ2020 ዓ.ም በምስራቅ አፍሪካ ተፅእኖ ፈጣሪ የግንባታ ካምፓኒ ለመሆን ውጥን ይዟል።
ማህበሩ ወደ ግንባታው ዘርፍ ሲቀላቀል መጠነኛ ችግሮች አጋጥመውታል። በተለይ በአሁኑ ወቅት ወጣቱ ብዙም የስራ እድል ያገኘ ባለመሆኑ ከወጣቱ በርካታ ጥያቄዎች ይነሳሉ። ማህበሩም የገጠመው ችግር ይኸው ከወጣቱ የሚነሳው የስራ እድል ጥያቄ ነበር። ይህንኑ የወጣቶች ጥያቄ ለመመለስ ታዲያ እያንዳንዱ የኮንስትራክሽን ድርጅት ራሱን አዘጋጅቶ ወደ ስራ መግባት ነበረበት። በዚህ ረገድ የወላቡ ኮንስትራክሽን ካምፓኒ ወጣቶቹ የድንጋይ ካባ፣ ሴሌክት ማቴሪያልና የአሸዋ ቦታዎች ላይ እንዲደራጁ በማድረግ ከነዚሁ ወጣቶች የተለያዩ የግንባታ ግብአቶችን በመግዛትና በግንባታ ሳይቶች ላይ የስራ አድል በመፍጠር የገጠመውን ችግር መፍታት ትችሏል። ይህም ተግባር በጥሩ ምሳሌ የሚጠቀስና ሌሎች የግንባታ ድርጅቶችም በየአካባቢያቸው ተግበራዊ እንዲያደርጉት የሚመከር ነው።
በሌላ በኩል ደግሞ ማህበሩ የግብአት አቅርቦትና ማምረቻ ቦታዎችን በጊዜ ያለማግኘት ችግር፣ የኮንትራት ግዜና የስራ ብዛት አለመመጣጠንና የውጭ ምንዛሬ እጥረት አጋጥሞት የነበረ ሲሆን እነዚህን መሰናክሎች በማለፍ የቡልቡላ አግሮ ኢንዱስትሪ ፓርክና የሻሸመኔ ገጠር ትራንስፎርሜሽን ማእከል ግንባታን በአጭር ግዜ ውስጥ አጠናቆ ለባለቤቱ ለማስረከብ ከጫፍ ደርሷል።
‹‹በኢትዮጵያ የኮንስትራክሽን ዘርፉ በጣም የተወሳሰበ ነው›› የሚለው አክሲዮን ማህበሩ፤ ስራውን ለመስራት ከጨረታ ጀምሮ ባሉ በርካታ ቁልፍ ችግሮች ምክንያት አብዛኛዎቹ የግንባታ ተቋራጮች ስራ እንዳላገኙ ይጠቅሳል። ይህም መስተካከል ያለበትና መንግስትም በስፋት ሊሰራበት የሚገባ ጉዳይ መሆኑን ያሳስባል።
ዘርፉ ሙስና በከፍተኛ ደረጃ የሚታይበት ከመሆኑ አኳያ የሃገሪቱን ኢኮኖሚ በከፍተኛ ደረጃ የሚጎዳ በመሆኑ መንግስትን ጨምሮ ሁሉም በየዘርፋቸው የተማሩትን ወደ ስራ በመቀየር የኮንስትራክሽን ዘርፉ ለሃገሪቷ የኢኮኖሚ እድገት የበኩሉን አስተዋፅኦ እንዲያበረክት የድርሻቸውን መወጣት እንደሚገባቸውም አክሲዮን ማህበሩ ያስገነዝባል።
በአሁኑ ወቅት የግንባታውን ዘርፍ ተቀላቅለው እየሰሩ ያሉ የውጪ ሀገር ተቋራጮች በስራ ጥራትና በግዜ አጠቃቀም ላይ ድርድር የላቸውም። ይሁንና የጥራት፣ የግዜ አጠቃቀምና ጠንካራ የስራ ባህል ችግር በሃገር ውስጥ ተቋራጮች ላይ የሚታይ ክፍተት በመሆኑ ከውጪ ሀገራት ተቋራጮች ትልቅ ትምህርት በመውሰድ አንደሚገባም ይመክራል። በተለይ በግንባታው ዘርፍ ከሚታዩ ችግሮች ውስጥ አንዱና ዋነኛው ጥራት በመሆኑ ከእነርሱ ብዙ መማር እንደሚገባም ያሳውቃል። ጠንካራ የስራ ባህል አሁንም በሚገባ ባለመዳበሩ በዚህ ረገድ ያለውን ክፍተት በስልጠናና አቅም ግንባታ መድፈን እንደሚገባም ያሳስባል።
ከከፍተኛ ትምህርት ተቋም በምህንድስና እና በቴክኒክና ሞያ ትምህርት ስልጠና ትምሀርታቸውን ተከታትለው ከመወጣታቸው በፊት ከሚወስዱት የንድፈ ሃሳብ ትምህርት በተጨማሪ በተለይ ጠንካራ የስራ ባህልን ተለማምደውና አዳብረው የሚወጡበት ስራዓት በሰፊው ቢመቻች ተመርቀው የስራውን አለም ሲቀላቀሉ አዲስ አይሆንባቸውም። በዚህ ረገድ በኢንተርነንሺፕ ላይ በደምብ ሊሰራበት እንደሚገባ አፅንኦት ይሰጣል።
በኢትዮጵያ አብዛኛው አምራች ሃይል ወጣት የመሆኑን ያህል ያለወጣቱ ተሳትፎ የሃገሪቷ ልማት አይረጋገጥምና ወጣቶችን በተለያዩ የስራ መስኮች ላይ በየደረጃው ማሳተፍ ይገባል። ለዚህ ደግሞ በተለይ የግንባታው ዘርፍ በስራ እድል ፈጠራ የሚይዘው የሰው ሃይል ከፍተኛ በመሆኑ በዚህ ዘርፍ ያሉ ሁሉም የግንባታ ድርጅቶች ልክ እንደ ወላቡ ሁሉ ወጣቶችን በማሳተፍ መስራት ይኖርባቸዋል እንላለን።

አዲስ ዘመን ሚያዝያ 6/2012

አስናቀ ፀጋዬ