እስራኤል በሊባኖስ የምታደርገውን ዘመቻ ስታስፋፋ፣ በቤይሩት ከባድ ፍንዳታ ተከሰተ

እሥራኤል በሊባኖስ የምታደርገውን ዘመቻ ስታስፋፋ፣ በቤይሩት ከባድ ፍንዳታ ተከሰተ። የእሥራኤል ጦር ቃል አቀባይ ሪር አድሚራል ዳኒኤል ሀጋሪ እስራኤል ባደረገችው የእግረኛ ጦር ዘመቻ 400 የሄዝቦላ ተዋጊዎችን መግደሏን ተናግረዋል፡፡

የደቡባዊ ቤሩት ዳርቻ ከቅዳሜ ምሽት እስከ እሁድ ድረስ በከባድ ፍንዳታ መመታቱን እና ፍንዳታው የፈጠረው እሳት ከብዙ ኪሎ ሜትሮች ርቀት ይታይ እንደነበር ሮይተርስ የዓይን እማኞችን ጠቅሶ ዘግቧል።

ይህ ጥቃት እሥራኤል በቤይሩት ከተማ ዳርቻ በሚገኘው የሄዝቦላሃ ምሽግ እንደሆነ በሚታመነው ቦታ ላይ በአየር ጥቃት የቡድኑን መሪ ሀሰን ነስረላህን ከገደለች ከቀናት በኋላ የተፈጸመ ነው።

እሥራኤል የሄዝቦላ ተተኪ መሪ ይሆናል የተባለውን ሀሽም ሰይፈዲንን ዒላማ ያደረገ ጥቃት በከተማዋ ዓለምአቀፍ አየር ማረፊያ አቅራቢያ ካደረሰችበት ከባለፈው ዓርብ ጀምሮ ሰይፈዲን የት እንዳለ እንደማይታወቅ ሮይተርስ የሊባኖስን የደኅንነት ምንጮች ጠቅሶ ዘግቧል።

የእሥራኤል ጦር ባለፈው መስከረም 27 ነበር የሄዝቦላ መሪ የሆነውን ነስረላህን በቡድኑ ማዕከላዊ ማዘዣ ጣቢያ ላይ በፈጸመው ጥቃት መግደሉን ያስታወቀው። ሄዝቦላም ግድያው መፈጸሙን አረጋግጧል።

ባለፈው አንድ ዓመት ውስጥ እሥራኤል በቀጣናው እያደረገች ያለው ጥቃት ባለፉት ሳምንት ጨምራለች፤ በሄዝቦላ አመራሮች ላይ ከፍተኛ ጉዳት አድርሳለች።

እሥራኤል በሊባኖስ የምታደርገውን ጥቃት እያስፋፋች ነው። ባለፈው ቅዳሜ ትሪፖሊ በተባለችው ከተማ ላይ ለመጀመሪያ ጊዜ የአየር ጥቃት መፈጸሟን የሊባኖስ ባለሥልጣን መናገራቸውን ሮይተርስ ዘግቧል።

የእሥራኤል ጦር ነዋሪዎች ከተወሰኑ ቦታዎች እንዲለቁ ትዕዛዝ ከሰጠ በኋላ ቅዳሜ ምሽት በቤይሩት ከተማ ዳርቻ በአየር ማረፊያ አቅራቢያ ጨምሮ ስምንት ፍንዳታዎች መፈጸማቸውን ዘገባው ጠቅሷል።

እሥራኤል እና ሄዝቦላ መካከል ያለው ግጭት በቅርቡ ወደ ከፍተኛ ደረጃ ከመድረሱ በፊት ከጋዛው ጦርነት ጎን ለጎን በድንበር አካባቢ የተወሰነ የተኩስ ልውውጥ ያደርጉ ነበር።

የእሥራኤል ጦር ቃል አቀባይ ሪር አድሚራል ዳኒኤል ሀጋሪ እሥራኤል ባደረገችው የእግረኛ ጦር ዘመቻ 400 የሄዝቦላ ተዋጊዎችን መግደሏን እና 2000 የሄዝቦላ ዒላማዎችን ማውደሟን ተናግረዋል። ሄዝቦላ የሟቾቹን ቁጥር ይፋ አላደረገም።

እሥራኤል ከድንበር አካባቢ የተፈናቀሉ በ10 ሺዎች የሚቆጠሩ ዜጐቿን ለመመለስ በሄዝቦላ ላይ የምታደርሰውን ጥቃት አጠናክራ እንደምትቀጥል ገልጻለች።

የእስራኤል ባለሥልጣናት በደቡባዊ ሊባኖስ በተደረገ ውጊያ ዘጠኝ ወታደሮች ተገድለዋል ብለዋል።

የእሥራኤል-ሄዝቦላ ግጭት የእሥራኤል አጋር የሆነችውን አሜሪካን እና ኢራን ወደ ግጭቱ ጎትቶ እንዳያስገባ ተሰግቷል።

በጋዜጣው ሪፖርተር

አዲስ ዘመን ሰኞ መስከረም 27 ቀን 2017 ዓ.ም