ከተረጂነት እና የተረጂነት አስተሳሰብ ራሳችንን ነጻ ማውጣት ይጠበቅብናል

ተረጂነት በአንድ ሀገር /ሕዝብ ማኅበራዊ ስነ ልቦናም ሆነ ብሔራዊ ክብር ላይ ሊያሳድር የሚችለው አሉታዊ ተጽእኖ ከፍተኛ ነው። በተለይም የተለያዩ ፖለቲካዊ፣ ኢኮኖሚያዊ እና ማኅበራዊ ፍላጎቶችን በሌሎች ላይ ለመጫን የሚያስችሉ ሴራዎች በስፋት በሚስተናገድበት አሁናዊ ዓለም አቀፍ እውነታ ውስጥ ተረጂነት ሊያስከትል የሚችለው ጥፋት አጠቃላይ የሀገራትን ቀጣይ ዕጣ ፈንታን አደጋ ላይ የሚጥል እንደሚሆን ይታመናል።

የአንድን ሀገር ሉዓላዊነት ምሉዕ ከሚያደርጉ ጉዳዮች አንዱ፤ ሀገራቱ የራሳችውን ዕድል በራሳቸው የመወሰን ሁለንተናዊ አቅም የመገንባታቸው እውነታ ነው። የኔ የሚሉትን ፖለቲካዊ፣ ኢኮኖሚያዊ እና ማኅበራዊ እሴቶች የማጽናት እና የማስቀጠል ጉልበት ሲፈጥሩ፤ በተጨባጭ ተግባራዊ በማድረግ ማኅበረሰባዊ ማንነታቸውን አጠንክረው መቀጠል ሲችሉ ነው።

ይህንን ማድረግ ያልቻለ ሀገር /ማኅበረሰብ የጊዜ ጉዳይ ካልሆነ በስተቀር በተለያዩ የአስተሳሰብ መዛነፎች እና እነሱን በሚደግፉ ዓለም አቀፍ ሴራዎች ማንነታቸው እየተሸረሸረ ራሳቸውን መሆን የማይችሉበት እውነታ መፈጠሩ የማይቀር ነው። ይህ ደግሞ ራስን ካለመሆን ለሚፈጠር የማንነት ዝቅጠት መዳረጉ፤ ብሔራዊ ክብርንም ማጠልሸቱ ብዙም ለጥያቄ የሚቀርብ አይደለም።

ለዚህ ዓይነቱ ፈተና ከሚዳርጉ ችግሮች አንዱ እና ዋነኛው፤ በአንድም ይሁን በሌላ ሊፈጠር የሚችል የተረጂነት መንፈስ ነው ።ተረጂነት በራሱ ችግር አይደለም፤ በተለያዩ አጋጣሚዎች ሊፈጠር የሚችል ክስተት ነው። ከዚህ ባለፈ ተረጂነት የህይወት ጉዞ አንድ አካል አድርጎ መውሰድ ፤ ማህበረሰባዊ ማንነትን የሚያኮስስ፤ ብሄራዊ ክብርን የሚያጎድፍ ጥልቅ መርገም ነው ።

በተለይም ባለንበት ዘመን እርዳታን ከሰብአዊነት ባለፈ የፖለቲካ መሳሪያ አድርጎ የመጠቀም ዓለም አቀፍ ልምምድ በስፋት በሚስተዋልበት ፣ እርዳታዎች በብዙ አድርግ አታድርግ አስገዳጅ ትእዛዛት ተቃኝተው እየመጡ ባለበት ዓለም አቀፋዊ እውነታ፤ የተረጂነት መንፈስ ሊፈጥር የሚችለው ብሄራዊ አደጋ ከግምት በላይ ነው።

ችግሩ በሰብአዊና ዴሞክራሲያዊ መብቶች ስም እርዳታ ተቀባይ ሀገራት ለዘመናት ያካበቷቸውን መንፈሳዊ እና ባህላዊ እሴቶች እየተፈታተኑ ያለበት ሁኔታ የአደባባይ ምስጢር ከሆነ ውሎ አድሯል። ሀገራቱ ጤናማ አምራች ትውልድ ለመፍጠር ለሚያደርጉት ጥረትም ፈተና እንደሆነ ነው ።

ሀገራት አስከፊ በሆኑ ተፈጥሯዊ እና ሰው ሰራሽ ችግሮች ፈተና ውስጥ በወደቁባቸው ጊዜያት ፣ የዜጎቻቸውን ህይወት ለመታደግ ዓለም አቀፍ እርዳታዎችን በሚጠይቁባቸው ወቅቶች ሳይቀር፤ ለሚጠይቋቸው የሰብአዊ ድጋፎች ፣ በሕዝባቸው መከራና ስቃይ እንዲደራደሩ የሚገደዱባቸው ሁኔታዎች እየተበራከቱ ነው።

አሁን አሁን እነዚህን ክፉ ቀናትን እንደ መልካም አጋጣሚ በመጠቀም በመልካም ቀናት ማስፈጸም ያልቻሉትን ፍላጎታቸውን በእርዳታ እና ድጋፍ ስም በሀገራት ላይ ለመጫን የሚንቀሳቀሱ፤ ይህንንም ስትራቴጂክ የማስፈጸም አቅም አድርገው የሚወስዱ ሀገራት ፣ ተቋማት እና ቡድኖች ጥቂት አይደሉም።

ከዚህም ባለፈ ሀገራት ራሳቸውን ችለው በራሳችው ዕጣ ፈንታ ላይ ወሳኝ ኃይል እንዳይሆኑ፤ ተረጂነትን ተቀብለው በጠባቂነት እንዲጓዙ የሚደረጉ ዓለም አቀፍ ሴራዎች በቀላሉ የሚታዩ አይደሉም፤ ነገሮች እንደማይቻሉ አድርጎ ማሰብ የሚያስችል ማኅበረሰባዊ የስነ ልቦና ጫና ከመፍጠር ጀምሮ በግጭቶች ሀገራትን ዕረፍት መሳጣት የዚሁ ሴራ መገለጫዎች ናቸው።

በርግጥ በዓለማችን የሚጠቀሱ አብዛኞቹ ተረጂ ሀገራት ፣ ካላቸው ሀገራዊ አቅም አኳያ ከራሳቸው አልፈው ለሌሎች መትረፍ የሚያስችል ሁለንተናዊ ቁመና ያላቸው ናቸው። በተለያዩ የታሪክ አጋጣሚዎችም ይህን አቅማቸውን ተጠቅመው ለብዙዎች መትረፍ የቻሉም ናቸው። በሀገራቱ ሕዝቦች ስነ ልቦና ላይ ከተጫነ የአይቻልም መንፈስና በሴራ በተፈጠረ የሰላም እና የመረጋጋት እጦት ለተረጂነት ተዳርገዋል።

በታሪክ ሂደት ውስጥ ይህ የተረጂነት መንፈስ የተረጂነት ስነልቦና በመፍጠር ሀገራቱ ተረጂነትን ተቀብለው እንዲኖሩ ፣ ተረጂነት ለሚፈጥረው የማንነትም ሆነ የብሔራዊ ክብር ዝቅታ ራሳቸውን እንዲያለምዱ አድርጓቸዋል። ማንነታቸውን እና ብሔራዊ ክብራቸውን ብቻ ሳይሆን ሰብአዊ እሴቶቻቸውንም ጭምር ከእጃቸው በሚያሳጣ ታሪካዊ አጋጣሚ ውስጥ እንዲገኙ አድርጓቸዋል።

ይህ ዓለም አቀፍ እውነታ እኛንም እንደ ሀገር እየተፈታተነ ስለመሆኑ፣ ከእያንዳንዷ ሰብአዊ ድጋፍ በስተጀርባ በሰብአዊ መብት እና በዴሞክራሲ ስም የሚመጡ ይህን አድርግ አታድርግ ትእዛዛት መመልከቱ በራሱ በቂ ነው። ትእዛዛቱን ባለመፈጸማችን እያጋጠሙን ያሉ ፈተናዎች የቱን ያህል ዋጋ እያስከፈሉን መሆናቸውም የአደባባይ ምስጢር ነው።

እንደ ሀገር ከዚህ ችግር ለዘለቄታው ለመውጣት፤ የራሳችንን ዕድል በራሳችን በመወሰን ራሳችንን ሆነን ቀጣይ የታሪክ ምዕራፋችንን ብሩህ አድርገን፣ ብሔራዊ ማንነታችንን አጽንተን፣ ብዙ ዋጋ የተከፈለበትን ሀገራዊ ክብራችንንና ነጻነታችንን አስጠብቀን ለመጓዝ ከተረጂነት እና ከተረጂነት አስተሳሰብ ራሳችንን ነጻ ማውጣት ይጠበቅብናል።

ለዚህ ደግሞ በለውጡ ማግስት ከድህነት እና ድህነት ከሚፈጥረው ጠባቂነት ለአንዴና ለመጨረሻ ጊዜ ለመውጣት የጀመርነውን ሀገራዊ መነቃቃት ማስቀጠል ፣ መነቃቃቱ የፈጠረውን ተጨባጭ ተስፋ በማጤንም ለበለጠ ሥራ ራሳችንን ማዘጋጀት ብሎም ለዚህ የሚሆን ቁርጠኝነት መፍጠር ይኖርብናል!

አዲስ ዘመን ሰኞ ሰኔ 24 ቀን 2016 ዓ.ም