በላተኛ ወይስ? 

የቻይናዋ ሄናን ክፍለ ሀገር ዢያንዥያን ከተማ ነዋሪው የ11 ዓመት ታዳጊ ባልተለመደ መልኩ በቀን አምስት ጊዜ ገበታ ላይ ይቀርባል፡፡ የሚመገበው ደግሞ ቀላል ምግቦችን አይደለም። ይልቅስ ስብ የበዛባቸው የስጋና የሩዝ ምግቦችን ነው፡፡ የቤተሰቡ ገቢ ይህን ያልተለመደ አመጋገብ የሚመጥን ባይሆንም፣ ልጁን መመገብ ግን የግድ ሆኖበታል።

መቼም መሰል ያልተለመደ አመጋገብን የሚመለከት ታዛቢ ልጁን «ሆዳም» ቢለውም ሀዘኔታ የተሰማው ደግሞ ምንአልባትም ህመም ተጠናውቶት ይሆናል ማለቱ አይቀሬ ነው። ይሁንና የታዳጊው በላተኛ መሆን ከሁለቱም እሳቤዎች የተቃረነ ነው።

በሚያስገርም መልኩ የ11 ዓመት ታዳጊ ባልተለመደ መልኩ በቀን አምስት ጊዜ ገበታ የሚቀርበው የአባቱን ሕይወት ለመታደግ ብሎ ነው።

ምክንያቱ እንዲህ ነው። ሉ ዚኩዋን የተባለው ታዳጊ አባት የደም ካንስር (በሉኪሚያ) በሽታ ተይዞ ላለፉት ሰባት ዓመታት በህክምና ሲከታታል ቆይቷል። ይሁንና የህክምናው ድጋፍ ጤንነቱን ሊመልስለት አልተቻለውም። በተለይ ባለፈው የፈረንጆቹ ዓመት ነሀሴ ወር ጤንነቱ በአስደንጋጭ ሁኔታ ይበልጥ ያሽቆለቁላል።

ይህን ያስተዋሉት ሀኪሞችም መፍትሄ ያሉትን ምክር ይለግሱታል፡፡ ህይወቱን ሊታደገው የሚችለውንና የህክምና ባለሙያዎቹ መፍትሄ ያሉት ደግሞ የቦን ማሮው ንቅለ ተከላ ማካሄድ ይሆናል፡፡

አባት ይህን ማግኘት የሚኖርበትም ከቤተሰቡ አባላት እንደሆነ የተነገረው ሲሆን ሁሉም የቤተሰቡ አባላትም ከእሱ ጋር በደም አይነት ተመሳሳይ ስለመሆናቸው ምርመራ ይደረግላቸዋል፡፡ ይህ ምርምራ ሲካሄድ ታዲያ ከቤተሰቡ አባላት መካከል ከእሱ ደም ጋር ተመሳሳይ ሆኖ የተገኘው የ11 ዓመቱ ታዳጊ ሉ ዚኩዋን ይሆናል፡፡

ታዳጊው ለዚህ ህይወት ማዳን ተልእኮ ሲታጭ እድሜው ገና 10 ዓመት ነበር፡፡ በወቅቱ ይህ የአንደኛ ደረጃ ተማሪ ገና በጨቅላ እድሜው የአባቱን ህይወት ለመታደግ ለቀዶ ህክምና ስለት ራሱን ለማዘጋጀት አልፈራም፡፡

ታዳጊው አባቱን ለመታደግ ዝግጁ ቢሆንም የታዳጊው ክብደት 30 ኪሎ ግራም ነበርና ሀኪሞች ክብደቱ በትንሹ በ15 ኪሎ ግራም ካላደገ ወደ ቀዶ ህክምናው እንደማይገቡ ለቤተሰቦቹ ያስገነዝባሉ። ታዳጊው ከዚህ በኋላ ነው ታዲያ ልክ እንደ አሳማ መመገብ የጀመረው፡፡ ስብ የበዛባቸውን ምግቦች መመገብን ስራ አድርጎም የተያያዘው፡፡

‹‹ሀኪሞቼ አባቴን ለመታደግ ክብደቴ 45 ኪሎ ግራም መድረስ እንደሚኖርበት ስለነገሩኝ ያልተለመደ አመጋገብ እንድጀምር ምክንያት ሆኖኛል›› ሲል ለቻይና ጋዜጠኞች ገልጿል።

የየቀን ምግብ ወጪው የአባቱን የህክምና ወጪ ለመሸፈን እስኪቃረብ የሚመገበው ታዳጊም የምግብ ወጪው ቤተሰቦቹን ክፉኛ መጉዳቱንም መስከሯል። እንዲያም ሆኖ ግን ‹‹መመገቤን ቀጥያለሁ፤ ቤተሰቦቻችን የአባታችንን ሞት በጭራሽ አይፈቅዱም›› ሲል ገልጿል፡፡

የታዳጊው እናት ሊ ጂያንግ በአንድ ግሮሰሪ መጋዘን ውስጥ በጣም አስቸጋሪ የሚባል ስራ እየሰራች በወር በምታገኘው ሁለት ሺ ዩዋን ይህን ወጪ ለመሸፈን መገደዷን ዘገባው አመላክቷል። የታዳጊው ትምህርት ቤት በአስቸጋሪ ሁኔታ ውስጥ የሚገኘውን ቤተሰብ ለመደገፍ የገንዘብ ማሰባሰቢያ መርሀ ግብር እስከ ማዘጋጀት የደረሰ ስራ መስራቱንም ዘገባው ጨምሮ አስነብቧል።

የልጆቹ ሁሉ ታላቅ የሆነው ዚኩዋን ከብዙ ጥረት በኋላም ለቀዶ ህክምና ዝግጁ ካደረገው 45 ኪሎ ግራም ክብደት ቢደርስም አሁንም መመገቡን አጥብቆ ይቀጥላል፤ የዚህ ምክንያቱ ደግሞ የበለጠ በወፈረ ቁጥር ለቀዶ ህክምና ዝግጁ እንደሚሆን ከሀኪሞቹ መስማቱ ነው፡፡

ይህን ክብደቱን ያስተዋሉ የትምህርት ቤት ጓደኞቹ ግብዳው ልጅ (ቢግ ቦይ) አያሉ ይጠሩት ጀመር። ተማሪዎቹ ጓደኛቸው የወፈረበትን ምክንያት ሲረዱ ግን ከቀልዳቸው ይታቀባሉ፡፡ የታዳጊው ዓላማ አባቱን መታደግ ነውና ሁሉንም አልሰማቸውም፡፡ ‹‹በቅድሚያ አባትን ማዳን፤ ከዚያም ክብደትን መቀነስ›› የሚል መፈክርም ነበረው፡፡

የሉ ዚክዋን ስራ በኦን ላይን ከተለቀቀ በኋላ ለቤተሰቦቹ ያሳየው ቁርጠኛነት በመላ እሲያ የሚሊዮኖችን ልብ ነክቷል፡፡ ሰዎች እንደ ጀግና የቆጠሩት ሲሆን፣ አላማውን ያሳካ ዘንድም የገንዘብ ድጋፍ ጭምር ተዥጎድጉዶለታል፡፡ ‹‹በታዳጊነት እድሜህ ጫንቃህ ይህን ያህል ታላቅ ሃላፊነት ተሸክሟል፤ በጣም የምትገርም ፍጡር ነህ›› ሲል አንድ ሰው በቻይና ትዊተር ገጽ ላይ አድናቆቱን ገልጾለታል፡፡ ‹‹አንተ እንደተባለው ግብዳው ታዳጊ አይደለህም፤ ጀግና ነህ ›› ሲል ሌላ ግለሰብም አድናቆቱን አስፍሮለታል፡፡

አዲስ ዘመን ሰኔ 11/2011

 ዘካርያስ