የጨዋታው ፍፃሜ

ገና በንጋት ፀሀይ በምስራቅ በኩል ብቅ ስትል የሰው ትርምስ አይታ አርፍጄ ይሆን እንዴ ማለትዋ አይቀርም:: “ዛሬ ነው ዓለም ደስታቸው ዛሬ ነው ዓለም ደስታቸው… ሆሆ የሁለታቸው” የሰርግ ሙዚቃው አካባቢ ላይ የተለየ ድባብ አላብሶታል::

የአካባቢው ሰው የድግሱን ስራ አጡፎታል:: ሁሉም ቤተሰብ ጥድፊያ ላይ ነው:: እዚያ ቦታ ላይ ተገኝቶ የተለያየ ስራ ላይ የሚራወጠው ሰው ሲታይ አካባቢው ላይ የቀረ ሰው ያለ አይመስልም:: “እንደዚያ … ወደዚያ… አዎ.. ትንሽ..ከፍ ከፍ አዎ” የሚል የድንኳን ጣዮች ጩኸት፣…. ወይዘሮ ዝናሽ የታለ አረ ቆዩ…ፍጠኑ፣ ሽንኩርቱን አደራችሁበት እኮ.. ” የሚሉት የወይዘሮ አፀደ ድምፅ ከሁሉ ጎልቶ የሚሰማው ተደጋጋሚ ድምፅ ነው::

ወይዘሮ አፀደ ልጃቸውን ሊድሩ መሆኑን የሰሙ ጎረቤቶችና ዘመድ አዝማድ ሁሉ ተሰብስቦ በድግሱ ስራ ላይ ተሰማርተውበታል::፡ እጅግ ተግባቢና ሰው አክባሪ ትልቅ ወይዘሮ ናቸው:: እንደ ቸርነታቸውና ለጋስነታቸው እጃቸው ላይ ያለው ሀብት እንዴት ተጠብቆ ቆየ? ብለው ብዙዎች ይደመማሉ፤ይገረማሉም:: እንደ ልባቸው ሰጥተው ለሚያስፈልገው ሁሉ ለግሰው ሀብታቸው እያደገ እየተመነደገ የሚሄድ አካባቢው ላይ የታወቁ ዲታ ናቸው::ያላቸው ሀብት የድግሱና የግርግሩ መድመቅ የራሱ የሆነ አስተዋፅዖ ቢኖረውም ፀባየ ሰናይ እና ከሁሉ ጋር ተግባቢ መሆናቸው እንዳደመቀው ግን በሙሉ ልብ መመስከር ይቻላል::

ብዙ እናቶች በቡድን በቡድን ሆነው ግማሾቹ ሽንኩርት እየላጡ ግማሾቹ እየከተፉና አንዳንዶቹ ድስት ላይ የተጣደውን ወጥ እያማሰሉ በጨዋታ እና ሳቅ ድግሱን አድምቀውታል:: ወይዘሮ አፀደ በዚያ ሲያልፉ እየጎተቱ ያስቆሙዋቸውና “እሰይ እስይ እማማ አፀደ እንኳን ለወግ ማዕረግ አበቃዎ” እያሉ ይስሙዋቸዋል:: “ በክብር በወግ ማግባትሽ ፣ ኩራት ነው ለእናት ለአባትሽ፣ ሆሆ ለእናት ለአባትሽ” እያሉ ይዘው እያስቆሟቸው ተሰብስበው ጭፈራውን ያስነኩታል::

“እንግዶቹ መምጫቸው ደርሷል…ወጡም ገና ነው፤ ጥብሱም አልደረሰ…ኸረ እንዳንዋረድ ወገኖቼ..” ይሉና የሚጨፍሩት ሴቶች ስራቸው ላይ እንዲበረቱ ይነግራሉ:: ደግሞ ወደ ሌላ ስራና ሁኔታ ለማየት ያቀናሉ:: ሴቶቹም ጭፈራቸውን አቁመው ወደ ስራቸው እያቀኑ “እማማ አፀደ አያስቡ ሁሉ ነገር በጊዜው ይደርሳል፤እኛ እያለንልዎ ሀሳብ አይግባዎ” ከመሀል የሚሰጣቸው ምላሽ ነው::እሳቸው በበኩላቸው “እሰይ እሰይ ኑሩልኝ ፤ኑሩልኝ አለሞቼ” ብለው ይመልሳሉ::

ወይዘሮ አፀዳ ባላቸው ከሞቱ 5 ዓመት ሆኗቸዋል:: ባላቸው በአካባቢው ሁሉ በተለየ ፍቅራቸው ይታወቁ ነበር:: የወይዘሮ አፀደና ባላቸው ፍቅር ለብዙው የአካባቢው ሰዎች አርዓያ እየሆነ እየተነሳ ስለመሆኑ ሁሌም ይወራ ነበር::

ባላቸው ልክ እንደሳቸው አመለ ሸጋ ነበሩ:: ከሰዎች ጋር በቀላሉ የሚግባቡና ታታሪ ነጋዴ :: ልክ እንደ ሚስታቸው እጃቸው እርጥብ:: በመኪና አደጋ ምክንያት በድንገት በወጡበት ቀሩ:: አገር ምድሩ አልቅሶ ቀበራቸው:: የአካባቢው አድባር ነበሩና ቀዬው በሀዘን ተዋጠ:: ወይዘሮ አፀደ ሀዘን በረታባቸው:: ብዙ ተጎዱ:: ሀዘን በረታባቸው:: ለዘመናት በፍቅር አብሮዋቸው የቆዩት ባላቸውን በማጣታቸው ልባቸው በሀዘን ተሰበረ::

ለሶስት አመታት ያህል ከቤት ሳይወጡ በሀዘን አሳለፉ:: ከቤት ወጥተው ከሰዎች መቀላቀል ከለመዱ አንድ አመት ከምናምን ቢሆናቸው ነው:: ለዚያውም በወዳጆቻቸው ብዙ ጥረት:: “ወይዘሮ አፀደ እባክዎ ሀዘን አያብዙ ከፈጣሪ ጋር መጋጨት ነው…እሱ የሰራውን መኮነን ደግም አይደል…ሁላችንስ ወደዚያው አይደለን…ለዓመታት በዚህ መልክ መቆየት ያስኮንናል በቃዎት” እያሉ የነብስ አባታቸው ደጋግመው ከገሰፁዋቸው በኋላ ነው መለስ ያሉት::

በተለይ የልጃቸው የሳራ ለማግባት መወሰን ከሀዘናቸው መለሳቸው:: የልጃቸው ሰርግ መቃረብ ከሀዘንና ድባቴ አላቀቃቸው:: ዛሬ የምታገባዋ ሳራ የወይዘሮ አፀደ የስጋ ልጅ አይደለችም:: ወልዶ ለማቀፍ ለመሳም ተፈጥሮ አልፈቀደላቸውም:: እስከ መጨረሻው መውለድ አለመቻላቸው በሀኪም እስኪረጋገጥና እስኪነገራቸው ያላደረጉት የህክምና ሙከራ አልነበረም:: ለውጥ ሲያጡ ተስፋ ቆርጠው ተውት:: በመጨረሻው ከሩቅ አገር ከባላቸው ጋር ሄደው አሁን ልክ እንደ አይናቸው ብሌን የሚሳሱላት ልጃቸውን ለማሳደግ ገና በጨቅላነትዋ ተቀበሉ:: አሳድገውም ለወግ ማዕረግ ለማብቃት ዛሬ በመሰናዳት ላይ ናቸው::

ሳራ ከአራት ጊዜ በላይ ታጭታለች:: አራት ጊዜ ያህል ሊደገስና ልታገባ ዝግጅት ተደርጓል:: ሊያገብዋት የቀረብዋት ሁሉ ከልጅነትዋ ጀምሮ የሚጥል በሽታ ያለባት መሆኗን ሲሰሙ ሰርጉን ሰርዘውታል:: ሳትፈልግ በመጣባት በሽታ ልብዋ እስኪሰበር ድረስ የቀረቧት ወንዶች ርቀዋታል:: የተጀመረው ድግስ ተቋርጦ የተላኩት ሽማግሌዎች መልሰው መልስ ለመስማት ሳይመጡ ቀርተው ተሸማቃለች:: ወይዘሮ አፀደ ጠንካራ ናቸው:: በመንፈስ አጠንክረዋታል::

በእድልዋ አዝና ልቧ ቢሰበርም መክረውና አበርትተዋት ለዛሬ ደርሳለች:: እጅግ የተለየ ፍርሀት ውስጧ ሰርጿል:: የአሁንም ሰርግ እንዳይቋረጥ የሚያገባትም ሰው ጥሏት እንዳይጠፋ ብላ ገና ሲተዋወቁ ነው ችግርዋን የነገረችው:: እሱም ያለውን አምኖ እስከነችግርዋ እንደሚቀበላት ነግሯት ለጋብቻ ተጫጭተው ዛሬ ወደቤቱ ሊወስዳት ቀጠሮ ይዘዋል:: ሳራ ግን ፍርሀቱ እስከዛሬ ሳይለቃት ቆይቷል:: የበፊቱ ገጠመኝዋ የፈጠረባት የስነ ልቦና ቀውስ ዛሬ ድረስ በፍርሀት እያንዳንዱን ምሽት እንድታሳልፍ አድርጓታል::

ወይዘሮ አፀፈ ከልጃቸው ጎን ሳይለዩ እያበረትዋትና ከፍርሀትዋ እንድትላቀቅ ብዙ ጥረዋል:: ዛሬ ንጋት ላይ ልጃቸው የሰርግዋ ቀን መሆኑን አምና ተቀብላ ተቆነጃጅታና ከሚዜዎችዋ ጋር ስትዘገጃጅ አይተው ተደስተዋል:: ልጃቸው ፍክት ብላ ሲያይዋት ልባቸው በሀሴት ተሞልቷል:: የልጃቸው ሳራ ተመሳሳይ ገጠመኝና ሀዘን እሳቸውም ተጋብቶባቸው ነበር:: አሁን አሁን በስተመጨረሻ ሊሰምር ሲሆን ተደስተዋል::

ሁሉ ነገር ተሰናድቶ የሰርገኛ መምጫ ሰዓት እየተጠበቀ ነው:: ለሰርጉ የተጠራው ታዳሚ በወይዘሮ አፀደ ግቢና ዋናው መንገድ ላይ በተሰሩት ዳሶች ውስጥ ከትሞ እየተጨዋወተ ሙሽሮችን ይጠባበቃል:: ሙሽሪትና ሚዜዎችዋ ከዋናው ቤት ሳሉን ተቀምጠው ይጨዋወታሉ:: የሙሽሪት ልብ ተሰቅሏል:: የሚዜዎቹ ፌሽታና ሳቅ ደስታና ጨዋታ ሳሎኑን አድምቆታል:: እዚያ ሳሎን ውስጥ ከሙሽሪትና ከሚዜዎችዋ በቀር ማንም መግባት እንዳይችል ተደርጓል:: ሚዜዎቹ ከሙሽሪት ጋር የሚያደርጉት የመጨረሻ የአብሮነት ቆይታ ነውና ጓደኛቸው ባለትዳር ከመሆንዋ በፊት በነፃነት ሊያወርዋትና ሊያጫውቷት በመፈለጋቸው ያደረጉት ነው::

ሙሽሪት የሰአቱን መድረስ በጉጉት መጠበቅዋን በጨዋታ መሀል ግድግዳ ላይ የተሰቀለውን ሰዓት እያየች መመለስዋ ላይ ያስታውቅባታል:: አንዴ ሚዜዋ ብድግ ብላ ሌሎችን ሚዜዎች ወደስዋ እንዲቀርቡ ጋበዘች:: ሙሽሪት እንዳትቀርብ ተደረገና አወሩ ሚስጥርና የጨዋታቸው አንዱ ክፍል መሆኑ ነው:: ተጠቃቅሰው አንደኛዋ ወጣች:: ሌሎቹ ጨዋታቸውን ቀጠሉ:: ከቆይታ በኋላ ቅድም የወጣችዋ ሚዜ ተመለሰች:: ፊትዋ ተለዋውጦኛ ተቀያይራ:: ሁሉም ሚዜዎች ደነገጡ ሙሽሪት ላይ ደግሞ መረበሽና መደናገጥ ታየ:: ልጅትዋ “አዝናለሁ” አለች:: “ምን ተፈጠረ?” አሉዋት በአንድ ድምፅ “የመኪና አደጋ” ሁሉም ራሳቸውን ይዘው ወደ ሙሽሪት ዞሩ:: ሙሽሪት የሰማቸውን ማመን አቃታት:: ተዘረረች፤ የሰማችው ነገር ራስዋን አሳታት:: ቀርበው ይሄኔ ሚዜዎቹ ለቀልድ የፈጠሩት ጨዋታ መሆኑን አልገባትም፤ አልተረዳቸውም::

ሚዜዎቹ ቀልድ መሆኑን እየነገርዋት ቀርበው ሊያነስዋት ሞከሩ፤ ነገር ግን ትንፋሽዋ ተቋረጠ:: ባዩት ነገር ተደናገጡ:: የሚሆነውን ማመን አቃታቸው:: ሙሽራዋ በድን መሆንዋን ሲያረጋግጡ ይበልጥ ሁሉ ነገር ዞረባቸው:: በር ተከፍቶ ሙሽራው ሲገባ ታየ:: ግቢው ላይ የነበረው ጭፈራ ከደቂቃዎች በኋላ ሁሉ ወደ ለቅሶ ተቀየረ:: ከፍ ያለው ደስታ በመሪር ሀዘን ተለወጠ::

 ተገኝ ብሩ

አዲስ ዘመን ሰኔ  4/2013