ኢትዮጵያውያንን በእንባ ያራጨ ምሽት

— December 13, 2018 639 comments

ከሰሞኑ በተለያዩ የቴሌቪዥን ማሰራጫ ጣቢያዎች የቀረበው የሰብዓዊ መብት ጥሰት ዶክመንተሪ በሕዝብና በዜጎች ላይ የተፈጸመው ግፍና በደል መጠን የለሽ እንደነበር ያሳያል፡፡ ገራሚው ነገር እኩልነት በተግባር ተረጋግጧል በሚባልበት ሀገር ዜጎች በብሔራቸውና በጎሳቸው መነሻነት ተለይተው እጅግ ዘግናኝና በጭካኔ የተሞላ አረመኔያዊ ድርጊት የተፈጸመባቸው መሆኑ በእጅጉ አሳዝኗል፡፡ የት ሀገር ላይ ነበርንም ያሰኛል፡፡
ይህ አይነቱ ጸያፍ ድርጊት በዓለም ደረጃ ይፈጸም የነበረው በተለይ በናዚ ጀርመን የማሰቃያና የመግረፊያ በጋዝ መርዝ ሰዎች ይገደሉባቸው በነበሩ ካምፖች ነበር፡፡ በተለያዩ የቴሌቪዥን ማሰራጫ ጣቢያዎች የተላለ ፈው የሰብዓዊ መብት ጥሰት ዶክመንተሪ ፊልም ድፍን ሀገርን በእንባ አራጭቷል፡፡

የግፉና የአረመኔያዊ ድርጊቱ ጫፍና ጣሪያ ከሚገመተው በላይ የሆነ በተለይም ዘርና ብሔርን ኢላማ ያደረገ መሆኑ ደግሞ እጅጉን ያማል፡፡ ሰው የሆነ ሰው፤ ቤተሰብ ልጅ እህት ወንድም ወገን ያለው ሰብዓዊ የሆነ ፍጡር እንዲህ አይነቱን ድርጊት ያደር ጋል ይፈጽማል ብሎ ለማመን ይከብዳል፡፡ ግን ደግሞ ሆነ፡፡ ተደረገም፡፡

ይህን በዘረኝነት ጥላቻ የተሞላ ከአፍ እስከ ገደፉ ሞልቶ የፈሰሰን እጅግ አረመኔያዊ ድርጊት ለመግለጽ ቃላቶች አቅም ያጥራቸ ዋል፡፡ ሰው በሀገሩ እንዲህ አይነት በደልና ግፍ በአረመኔነት ተሞልቶ ሲፈጸምበት ሀገሬ አይደለችም አላውቃትም ቢል አይፈረድ በትም፡፡
ከሥልጣኔና ከእውቀት ከመልካም ሥነምግባር የተፋቱ ሰብዓዊነት የሚባል ነገር ያልፈጠረባቸው አረመኔ አውሬዎች ቀጣዩን ትውልድ እንዳይበክሉት መጠንቀቅ ለሕግና ለፍትህ ማቅረብ ግድ ይላል፡፡

ሕዝብና የሕዝብ ልጆችን ማሰቃየት፤ ብልታቸውን ማኮላሸት፤ ገልብጦ በእንጨት ላይ አንጠልጥሎ መግረፍ፤ ሰቅሎ ማቆየት፤ ዘርን ለይቶ መሳደብ ማንቋሸሽ፤ አፍ ላይ መጸዳዳት፤ ወንድ ላይ የግብረ ሰዶማዊነትን መፈጸም፤ ሴትን ልጅ እርቃኗን እያዩ መሳለቅ፤ ከዚያም አልፎ ወሲብ መፈጸም ሌላ ሀገር ሳይሆን እዚሁ ኢትዮጵያ ውስጥ የተፈጸመ ድርጊት ነው፡፡ ያውም የአፍሪካ መዲና በሆነችው አዲስ አበባና ፈጣሪውን የሚፈራ ሩህሩህ ሕዝብ አለበት በሚባል ሀገር፡፡

ይህ ሁሉ ድርጊት በኃይል፤ በጉልበት፤ በጠመንጃ አፈሙዝ አስገብሬና አስፈራርቼ እገዛለሁ በሚል የደንቆሮዎች እምነት መከወኑ ያሳፍራል፡፡ ጉዳዮቹ በጥብቅ ምስጢር ተይዘው ሲሠራባቸው የነበሩና የምስጢር ዘበኞቹም ራሳቸው ስለሆኑ ይህን ጉዳይ በአልፎ አገደም ከምንሰማው ውጪ እንዲህ የሰብዓዊ መብት ጥሰት የተፈጸመባቸው ሰዎች አደባባይ ወጥተው ድምጻቸውን ለማሰማት የማይችሉባቸው በርካታ ሁኔታዎች ነበሩ፡፡ ቀን ሲፈቅድ ሁሉም ይሆናል እንዲሉ ሆነና ቀን በደሉን ግፉን አረመኔነቱንና ጭካኔውን ግፈኝነቱን እንዲህ በአደባባይ አሰጣው፡፡
ምስጋናው ለሰው ሳይሆን ለቀን ነው የሚሆነው፡፡ ለውጡን ላመጣው የሕዝብ ትግልና ለውጡን ከዳር ለማድረስ ሪፎርሙን እየመሩ ላሉት ሰዎች፡፡ ይህን ያህል ግፍ በጭካኔና አረመኔያዊነት በዘር ጥላቻ ላይ የተፈጸመ ሰቅጣጭ ድራማ በሀገራችን ምድር ላይ ተፈጽሞ እናያለን ብሎ የገመተም የጠበቀም አልነበረም፡፡ ደርግ እንዲህ አይነት እጅግ ነውረኛና ዘረኛ አረመኔያዊና ፋሽስታዊ ድርጊት በዜጎቹ ላይ ስለመፈጸሙ አልሰ ማንም፡፡

በፖለቲካ ልዩነት እንጂ በደርግ ዘመን እንኳን በዜጎቹ መካከል ልዩነትን ፈጥሮ ማጥቃት አልተስተዋለም፤ ብሔር እየመረጠ አልረሸነም፤ ብሔር እየመረጠም አልጠቀ መም፡፡ የደርግ አምባገነናዊ ባሕሪይው እንደተጠበቀ ሆኖ በእንዲህ መልኩ አሰቃቂ የግፍ ተግባራት ስለመፈጸማቸውም ያጠራጥራል፡፡ ይሁንና በመቶ ሺዎች የሚቆጠሩ ወጣቶች ክቡር ህይወታቸውን ገብረው ለሰብዓዊ መብት መከበር የከፈሉትን መስዋዕትነት ገደል የሚከት ተግባር በእነዚህ ጥቂት አረመኔዎች ተፈጽሟል። የሀገሬ ሰው እንደሚለው ‹‹ወንበሬን ማን ነክቶት አይሉም አይሉም፤ ሚስቴንስ ማን አይቷት አይሉም አይሉም ቀን የፈቀደ እለት ይደረጋል ሁሉም›› እንዲሉ ሁሉንም ይፋ ያወጣው ቀን ሆነ፡፡ በቀላሉ ይፋ የማይወጡ ሊታወቁ የማይችሉ ምስጢሮች ለአደባባይ በቁ፡፡

መቼም አንዱ ሄዶ ሌላው ሲመጣ አዲስ ለውጥና ሂደት ቢጠበቅም በዚህ አይነት ደረጃ መዝቀጥና መውረድ ይኖራል ተብሎ አይታሰብም ነበር፡፡ እነዚህ ሰዎች የፈጸሙትን አረመኔያዊ ድርጊት የጀርመኑ አዶልፍ ሂትለር ስድስት ሚሊዮን አይሁዶች በመፍጀት አሳይቷል፡፡ በማቃጠያና መግደያ ካምፖቹ ውስጥ በማስገባት በጋዝ መርዝ ጭስ ተሰቃይተው ከሞቱ በኋላ አስከሬናቸው ተፈጭቶ ወደ ሳሙናነት እስኪለወጥ ድረስ ሠርቷል፡፡ ይህን አይነቱን አረመኔያዊ ድርጊት በራሱ ዜጎች ላይ ግን አልፈጸመም፡፡

ዱክ ሙሶሎኒ ፋሽስት ስለሆነ ኢትዮጵ ያን በቅኝ ግዛት ለመግዛት ቋምጦ በመጣውና መሪ በነበረው ግራዚያኒ አማካኝነት ኢትዮጵያ ውያንን በአካፋና በዶማ አስጨፍ ጭፏል፡፡ ቤት ውስጥ እንዲገቡ ካደረገ በኋላ እሳት ለኩሶ አንድዷቸዋል፡፡ የዘር ማጥፋት ፍጅት ፈጽሟል፡፡
የተላለፈው እጅግ የከፋ የሰብዓዊ መብት ጥሰትን የተመለከተው ዶክመንተሪ ፊልም እነዚህ ሰዎች ከባሕላችን፤ ከእሴቶቻችን፤ ከኃይማኖታዊ እምነታችን በእጅጉ የራቁ፤ በዘረኝነት ጭፍን ጥላቻ የታወሩ፤ የክፍለ ዘመናችን ጥቁር ፋሽስቶች መሆናቸውን ደግሞ ደጋግሞ ያረጋግጣል፡፡
የራሳችን ሰዎች የሆኑ ኢትዮጵያውያን ምን ያህል ጸያፍ ሥራ ሲፈጽሙ እንደኖሩ፤ ሀገርንና ሕዝብን እንዳዋረዱ፤ ወደፊትም በዚሁ አሳፋሪ ሥራቸው ቀና ብለው ለመራመድ እንደሚቸገሩ በእርግጠኝነት ለመናገር ይቻላል፡፡ ታስረው ከነበሩ ሰዎች የተፈጸመውን ግፍ የሰማውና ጠንቅቆ የሚያውቀው ሕዝብ በሌሎችም በርካታ አጋጣሚዎች በዜጎች ላይ የተፈጸመውን የሰብዓዊ መብት ጥሰት ሲሰማ የኖረው ሕዝብ የከረረ ተቃውሞ ቢያሰማ አሻፈረኝ ቢል ምንም አይፈረድበትም፡፡

እንዲህ አይነቱ ፋሽስታዊ ድርጊት ከምድራችን ተነቅሎ እንዲጠፋ፤ ሕግና ተጠያቂነት እንዲሰፍን፤ ሁሉም ዜጋ የየበኩሉን አስተዋጽኦ ማድረግ ይጠበቅበ ታል፡፡ በመዲናዋ አዲስ አበባና በሌሎችም ከተሞች ሕቡእ ከመሬት ስር ያሉ እስር ቤቶችን ከፍቶ ዜጎችን ማሰቃየት፤ መግረፍ፤ መግደል፤ የወንጀሎች ሁሉ የከፋው ወንጀል ከመሆኑም በላይ አስቸኳይ የሕግ ውሳኔን ይጠይቃል፡፡

ዋናውና ትልቁ ጥያቄ ይህ ሁሉ ግፍና በደል ሲፈጸም ዜጎች ሲደፈሩ፤ ግብረሰዶም ሲፈጸምባቸው፤ አፋቸው ላይ ሲጸዳዱ፤ ሴቶች እርቃናቸውን ሆነው መጫወቻ ሲሆኑ፤ መንግሥት ተብሎ የሚጠራው መንግሥት ምን ሲሠራ ነበር ብሎ መጠየቅ ይገባል፡፡ ሀገሬ የተፈጸመብሽ ግፍ አረመኔነት ጭካኔ ከጣሪያ በላይ ወጣ፡፡ የናቁሽ የረገጡሽ ያዋረዱሽ ሁሉ ውርደትን ሽንፈትን ውድቀትን ይከናነቡ ዘንድ ፍርዱ የአምላክም የሕዝብም ይሆናል፡፡ ይሁንና ከዚህ ልማረው የሚገባው ጉዳይ ልክ እንደ ዘራፊዎች ጨካኞችም የትኛውንም ብሔር እንደማይወክሉና የሕዝብ ጠላቶች እንደሆኑ ነው። ሕዝባችንም ለእነዚህ ዓይነት ጨካኞች ምን ዓይነት የመደበቂያ ከለላ ሳይሰጥ የወገኖቼ ጠላቶች ናችሁ ብሎ ሊያወግዛቸው ብሎም ለፍርድ ሊያቀርባቸው ይገባል። ስህተት በሌላ ስህተት አይታረምምና መንግሥትም እነዚህ አካላት ከፈጸሙት ተግባር በተቃራኒው ሄዶ ሰብዓዊነትን የሚማሩበትን የፍርድ ሂደት ማከናወን ጊዜ ሊሰጠው የማይገባው ተግባሩ ሊሆን ይገባል።

መሐመድ አማን