አንጋፋውን የአዲስ ዘመን ጋዜጣ አንባቢያን የእውነት ጠይቀውበታል፤ እየተማሩም አስተምረውበታልና ሁሌም ከአንባቢያን ሃሳብና ጥያቄዎች ላይ ለትውስታ ማቅረባች ከግርምትና ከመዝናኛነት ባሻገር ባለፈው ትውልድና በዛሬው መካከል ያሉትን ልዩነቶችም ጭምር የሚያሳይ ነው:: ቆየት ካሉ የመረጃ ማህደሮች መካከልም ለዛሬ በሦስት ብር ጉቦ 60 ብር የተቀጣው ቪቼንሶ፤ የመጠጥ ሱሰኛ የሆነው ሰካራሙ ውሻ ለራስ ምታቱ አስፕሮ ይውጣል..እና ሌሎችም አካተን አቅርበናል::
ሦስት ብር ጉቦ ሰጥቶ ስድሳ ብር ተቀጣ
ቪቼንሶ ሎምባርዲያ የተባለ የ19 ዓመት ወጣት ለወታደር ኃይሉ ሀብቴ የትራፊክ ፖሊስ ባልደረባ ሦስት ብር ጉቦ በመስጠቱ ተከሶ 60 ብር ተቀጥቷል::
የ29 ዓመቱ ወጣት የትራፊክ ፖሊስ ስለሁኔታው ሲያጫውተን “…የካቲት 23 ቀን እኔ ሲኒማ ኢትዮጵያ አጠገብ ቆሜያለሁ፤ ሰውየው ከምሽቱ 3 ሰዓት ገደማ ይሆናል:: በሴይቼንቶ መኪና ረጅም መብራት እያበራ መጣ:: እንደተለመደው ፊሽካዬን ነፋሁ፤አቆመ:: በረጅም መብራት ይነዳሉና ጥፋተኛ ኖት አልኩት:: ታዲያስ? አለኝ:: የመንጃ ፈቃድዎን ያሳዩኝ አልኩት:: አልሰጥም አለ፤ ስምዎሳ? አልኩት፤ አልነግርም አለኝ:: እንግዲያውስ በመኪናዋ ቁጥር የፍርድ ቤት መጥሪያ ይቀበሉኝ አልኩት::
ስማኝ አለኝ፤ ቪንቼሶ ሎምባርዲያ እኔ አሥመራ በነበርኩበት ጊዜ፤ የአዲስ አበባ ፖሊሶች በገንዘብ እየተደለሉ ይለቃሉ ብለውኛልና የምትፈልገው ስለገባኝ እንካ ሦስት ብር አለኝ:: ወዲያው በአጠገቤ የነበሩትን አንድ የፖሊስና አንድ የወህኒ ቤት ዘበኛ ምስክር ቆጠርኩ::
…
ልጁ እኮ ገንዘብም የለውም፤ 60 ብር ቢፈረድበት፤ ከአባቴ ዘንድ ለምኜ ላምጣ ብሎ በፍርድ ቤት ትእዛዝ አብሬው ካባቱ ቤት ሔደን ነው ገንዘቡን ያመጣነው:: መንጃ ፈቃድማ ባይኖረው ስንት በተቀጣ ነበር” እያለ አጫወተን::
ቪቼንሶ ሎምባረዲያ አዲስ አበባ አንደኛ ወረዳ ፍ/ቤት ቀርቦ ጥፋቱን ስላመነ፤ የካቲት 29 ቀን 60 ብር መቀጫ ተፈርዶበት ከፍሏል::
(አዲስ ዘመን መጋቢት 4 ቀን 1957ዓ.ም)
5 ሴቶች ገደል ተንዶባቸው ሞቱ
በየረር ከረዩ አውራጃ ግዛት በሉሜ ወረዳ በቆቃ ም/ ወረዳ ግዛት ልዩ ስሙ መልመሌ ከተባለው ቀበሌ 5 ሴቶች በገደል ውስጥ ከሚገኝ ኩሬ ውሃ ሲቀዱ ገደሉ ስለተናደባቸው አምስቱም ሴቶች ሞተዋል::
አደጋው እንደተሰማ የየረር ከረዩ አውራጃ ገዥ፤ አቶ ደምስ ባንጃውና የአውራጃው ፖሊስ አዛዥ ኮሎኔል ኪዳኔ ወልድ ጊዮርጊስ፤ አደጋው ስፍራ ደርሰው ሁኔታውን ተመልክተዋል:: የሟቾቹ አስክሬን እስካሁን በመፈለግ ላይ ነው::
(አዲስ ዘመን የካቲት 13 ቀን 1957ዓ.ም)
አውቶማቲክ የጫማ መወልወያ አዲስ አበባ መጣ
ጫማ በኤሌክትሪክ የሚወለውሉ መሣሪያዎች በቅርቡ አዲስ አበባ ገብተው ሥራቸውን ጀምረዋል:: ለጊዜው የመጡት መሳሪያዎች ሁለት ሲሆኑ ያስመጧቸው አቶ አበበ የሚባሉ የሞዝቮልድ ኩባንያ ባልደረባ ናቸው:: ጫማ መወልወያዎቹ መሣሪያዎች ራሳቸው ቀለም፤ ብሩሽና መወልወያ ያላቸው አውቶማቲክ ናቸው::
(አዲስ ዘመን ጥር 10 ቀን 1957ዓ.ም)
ውሻው እየሰከረ አስፕሮ ይውጣል
ከለንደን፤ የቢራ ሱስ የጠነከረበት ውሻ በቅርቡ ወደ አልኮል መዛወሩን አንድ የእንስሳት ጤና አዋቂ በሰጠው ዜና ለመረዳት ተችሏል::
“ፓትሲ” በመጠጥ ኃይል ይሁን አይታወቅም ዓይኖቹ በደንበኛው አይገለጡም:: ዓይኑን ሲገልጥ በእንቅልፍ ላይ ያለ ይመስላል:: በቀን የሚወስደው መጠጥ ከአራት ፓይንት በላይ ነው:: ጠጪነቱንም ለማስወገድ በቀን የሚወስደው የመጠጥ ብዛት እንዲቀነስ ተድርጎ ነበር:: ግን ሱሰኛነቱ እየባሰበት ሔዷል::
ይህ ውሻ መጠጥ የለመደበትን ጊዜ በትክክል የሚያውቅ ሰው የለም:: ፓትሲ በሌሊት እየተነሣ ድርጎውን በሚያገኝበት መጠጥ ቤት ደጃፍ የመከፈቻው ሰዓት አልደርስ እያለው በየቀኑ ከዚያች ሥፍራ ቆሞ ሲጠባበቅ ይታያል::
የፓትሲ ባለቤት እንደገለጠው ከሆነ፤ ፓትሲ የመጠጥ ሱስ በጣም ስለሚጠነክርበት ጠዋት ጠዋት ራሱን ያመዋል:: ስለዚህ ለራስ ሕመም በየቀኑ ሁለት ሁለት አስፕሪን ይወስዳል ብሏል::
ፓትሲ በመጠጥ ቤቱ እየዞረ የቢራ ድርጎውን እንዲያገኝ ይጮሃል:: ግን አብዝተው እንዳይሰጡት የመጠጥ ቤት ባለቤቶች ተጠይቀዋል::
(አዲስ ዘመን መስከረም 4 ቀን 1957ዓ.ም)
ጥያቄ አለኝ
ይድረስ ለጳውሎስ ኞኞ
*ከአምስቱ የፋንታ ቆርኪዎች አራቱን አግኝቼ ቲ ጎደለችኝ:: ይቺን ቆርኪ ከሌላ ወስጄ ወይም ገዝቼ ባቀርብ ራዲዮኑን ማግኘት አልችልም?
ኃይሌ ፍታዊ(ከአሥመራ)
-መቻል ትችላለህ:: ግን እስካሁን እሷን ያገኘ ሰው የለምና ከየት ታገኛለህ?
*ሀብታሞች የዕድር ገንዘብ ሳይከፍሉ ሲቀሩ የሚጠይቃቸው የለም:: እኔ ግን ደሀ በመሆኔ የእድር አልከፈልክም ብለው ከዕድር አስወጡኝ:: ለምን እንዲህ ያደርጋሉ?
ኃይሉ ተፈራ(ከሂርና)
-ተው ሌላ ጉዳይ ይኖር ይሆናል:: ከሌለ እናንተ የሂርና ሰዎች እባካችሁ እንዲህ አታድርጉ:: ባይሆን የዛሬውን ማሩትና ዳግመኛ አይለምደውም:: አንተም ዓመልህን አሳምረህ የእድርህን ገንዘብ እየከፈልክ ኑር::
*እነዚህ ወፍ ሳይንጫጫ እየመጡ የሚጮሁት ላሊበላ የሚባሉት ሌሊት እየተነሡ ካልጮሁ ይቆመጣሉ ይባላል:: ይህ ነገር እስከምንድረስ እውነት ነው?
ሻለቃ አበራ ታቦር
-እስከመጨረሻው ድረስ ውሸት ነው::
(አዲስ ዘመን ጥቅምት 4 1961ዓ.ም)
*ስለ ፍቅር ይጠይቁሃል:: የእውነትም የፍቅር ምርኮኞች ከሆኑ ይኸ ሁሉ የወንድና የሴት ጋለሞታ ለምን በዛ?
ስንታየሁ መሰንበት(ከማዘጋጃ ቤት)
-መቼም የፍቅር ዓይነቱ ብዙ ስለሆነ የኔዎቹ ጠያቂዎች የሚይዛቸው እያስወደደ የሚያለያየው ነው:: በዚሁ ላይ እባካችሁ ሰዎች የተዋደድነው ተጠፋፋን የሚለውን ጥያቄያችሁን ተውኝ:: እናንተ የምትተዋወቁት ያልተገናኛችሁ እኔ የት ብዬ እንዳገኝላችሁ ነው?
(አዲስ ዘመን የካቲት 4 ቀን 1962ዓ.ም)
ሙሉጌታ ብርሃኑ
አዲስ ዘመን የካቲት 5/2016
